“3–9 octubre. Isaias 58–66: “Sa’ li tzuul Sion taachalq jun aj Kolonel,” ” Kim, Taaqehin—Choq’ re li Tzoleb’aal reheb’ li Kok’al: Li Najter Chaq’rab’ 2022 (2021)
“3–9 octubre. Isaias 58–66,” Kim, Taaqehin—Choq’ re li Tzoleb’aal reheb’ li Kok’al: 2022
Li Jesus sa’ li ch’utleb’aal kab’l aran Nazaret, xb’aan laj Greg K. Olsen
3–9 octubre
Isaias 58–66
“Sa’ li tzuul Sion taachalq jun aj Kolonel”
Li na’leb’ re kok’ k’anjel sa’ li tusleb’ aatin a’in, a’an re naq taataw aana’leb’ laa’at. Moko tento ta naq taawoksi jo’ chanru tz’iib’anb’il; taaqe xb’eresihom li Musiq’ej rub’elaj li k’utuk ut sa’ li k’utuk.
Tz’iib’a li nakak’oxla
Xkanab’ankileb’ chi wotzok
Naab’al reheb’ li raatin laj Isaias neke’xch’olob’ xyaalal ut neke’k’utuk chirix li Kolonel. K’ut xjalam-uuch li Jesukristo, ut patz’ reheb’ li kok’al naq te’xwotz k’a’ru xe’xtzol chirix a’an chiru li xamaan a’in.
Xk’utb’al li tzol’leb’: Kok’al toj ka’ch’ineb’ xyu’am
Li hilob’aal kutan naru nawan choq’ sahil kutan choq’ we.
Li hilob’aal kutan a’an jun hoonal re taqajultika li Qaawa’ ut re naq toohilanq chiruheb’ li qak’anjel sa’ li xamaan. Chan ru taatenq’aheb’ li kok’al chirilb’al li hilob’aal kutan jo’ jun sahil kutan?
Kok’ k’anjel naru chi b’aanumank
-
Patz’ reheb’ li kok’al naq te’xk’iilasuti li ch’ol aatin “Chaye re li kutan a’an sahil kutan, loq’laj kutan, cha’qat re lix santil kutankil li Qaawa’ ” (Isaias 58:13). Ch’olob’ naq “sahil kutan” naraj naxye naq naxk’am chaq xsahil qach’ool. Patz’ reheb’ li kok’al naq te’xye k’a’ru nak’ehok xsahileb’ xch’ool. Ch’olob’ xyaalal naq li Qaawa’ xke’ chaq qe li hilob’aal kutan xb’aan naq naraj naq sahaq qach’ool. Ye reheb’ li kok’al k’a’ut naq li hilob’aal kutan a’an jun sahil kutan choq’ aawe.
-
Yaab’asiheb’ li aatin a’in re Isaias 58:14 reheb’ li kok’al: “Taasaho’q laa ch’ool rik’in li Qaawa’.” Ch’olob’ chiruheb’ naq li hilob’aal kutan a’an jun xchaq’al ru kutan, jun kutan b’ar wi’ naru naqak’oxla k’a’ru xb’aanuhom li qaChoxahil Yuwa’ ut li Jesus re qatenq’ankil chi wank chi sa qach’ool. Tenq’aheb’ li kok’al chixk’oxlankil k’a’ru naru neke’xb’aanu sa’ li hilob’aal kutan re xjultikankil li qaChoxahil Yuwa’ ut li Jesus. Patz’ reheb’ naq te’xyiib’ xjalam-uuch lix k’a’uxleb’ ut te’xwotz chirib’ileb’ rib’ ut rik’ineb’ lix junkab’al.
Li Qaawa, a’an chik “laa saqenk chi junelik” (Isaias 60:19). Jun maatan re saqen, xb’aan li xEva Timothy
Naru nink’e chi k’utunk lix saqen li Kolonel choq’ reheb’ li was wiitz’in.
Laj Isaias kixye sa’ profeetil aatin naq sa’ roso’jikeb’ li kutan lix tenamit li Qaawa’ taawanq jo’ jun saqen choq’ reheb’ li wankeb’ sa’ aak’ab’. K’oxla chan ru taatenq’aheb’ li kok’al chi “wakliik” ut “chi lemtz’unk.”
Kok’ k’anjel naru chi b’aanumank
-
Patz’ reheb’ li kok’al naq te’xmutz’ li ru naq taayaab’asi Isaias 60:1–3. Patz’ reheb’ naq te’xte li ru naq te’rab’i li aatin “saqenk” ut te’xmutz’ naq te’rab’i li aatin “q’ojyin” malaj “aak’ab’.” Ch’olob’ naq li Jesukristo ut lix evangelio a’aneb’ li saqen li nokohe’xtenq’a chirilb’al li b’e re sutq’iik rik’in li qaChoxahil Yuwa’.
-
K’e reheb’ li kok’al junjunq xjalam-uuch li saqen (maare li saq’e, jun kandeel, malaj bombiiy). Tenq’aheb’ chixk’oxlankil chan ru te’xwotz lix saqen li Kolonel rik’ineb’ li ras riitz’in. Rajlal sut naq te’xwotz junaq na’leb’, patz’ reheb’ naq “te’wakliiq” ut te’xk’e “chi lemtz’unk” lix saqen rik’in xtaqsinkil chi kutankil li jalam-uuch. Ye reheb’ li kok’al chan ru aawilom naq neke’xwotz lix saqen li Kolonel.
-
B’ichahomaq jun li b’ich li na’aatinak chirix xwotzb’al li saqen, maare “Lemtz’un” (B’ichleb’aal choq’ reheb’ li Kok’al, 96). Tenq’aheb’ li kok’al chixk’eeb’aleb’ reetal aatin sa’ li b’ich li ak xe’xtzol chaq sa’ Isaias 60:1–3.
Li Jesukristo a’an laj Kolol we ut laj Tojol wix.
Sa’ Isaias 61:1–3 wan jun xchaq’al ru xch’olob’ankil lix k’anjel li Kolonel re k’utuk ut re k’irtesink. Sik’ chan ru taatenq’aheb’ li kok’al chirilb’al chan ru naq naru neke’tzole’ ut neke’k’irtesiik xb’aan li Jesukristo.
Kok’ k’anjel naru chi b’aanumank
-
Naq yooqat chirilb’al Isaias 61:1, patz’ reheb’ li kok’al naq te’xchap xjalam-uuch li Jesus naq kixtzoleb’, kixk’irtesiheb’, ut kixtenq’aheb’ li ras riitz’in (chi’ilmanq Hu reheb’ li Jalam-uuch re li Evangelio). Ch’olob’ naq li Dios kixtaqla chaq li Jesukristo re xb’aanunkil chixjunil a’an choq’ qe. Patz’ reheb’ li kok’al naq te’xwotz li reek’ahomeb’ chirix li Jesukristo. Ch’olob’ xyaalal lix rahom li Kolonel choq’ reheb’ a’an.
-
Isaias 61:3 na’aatinak chirixeb’ li neke’ab’ink ut neke’paab’ank re li Qaawa’ jo’ “xche’el li tiikilal.” Yiib’ xjalam-uuch jun li che’ chiru li pizarron ut patz’ reheb’ li kok’al naq te’xk’oxla li k’a’ru tiik naru neke’xb’aanu. Rik’in li junjunq chi na’leb’ te’xye, patz’ reheb’ naq te’xyiib’ jun xxaq li che’ chiru li pizarron.
Xk’utb’al li tzol’leb’: Kok’al ak ninqeb’
Li kuyuk sa’ nikinrosob’tesi laa’in ut eb’ li kristiaan wankeb’ rajom ru.
Maare junjunqeb’ li kok’al ak tz’aqaleb’ xchihab’ re naq te’xk’uy xsa’. A’b’an us ta maji’ tz’aqaleb’ xchihab’ naru neke’tzolok chirix lix chaq’rab’ li Qaawa’ re kuyuk sa’ ut te’xkawresi rib’ re naq te’xk’uy xsa’ naq ak kawresinb’ilaqeb’.
Kok’ k’anjel naru chi b’aanumank
-
Tz’iib’a chiru li pizarron K’a’ut naq naqakut qasa’? ut Chan ru naq naqakuy qasa’? Patz’ reheb’ li kok’al naq te’xtz’iib’a li neke’xk’oxla naq a’an xsumenkileb’ li patz’om. Waklesi xch’ooleb’ chirilb’al “Kuyuk sa’ ” sa’ li K’utul Raqal reheb’ li Loq’laj Hu ut Isaias 58:6–11 re te’xtaw xkomon xsumenkileb’ li patz’om. Chan ru naq Isaias 58:6–11 naru nokoxtenq’a naq nach’a’ajko’ li kuyuk sa’ choq’ qe?
-
Wotz rik’ineb’ li kok’al jun aanumsihom chirix li kuyuk sa’, malaj ut, wotz junaq seraq’ reheb’ li hu re li Iglees chirix li kuyuk sa’. Jultika li osob’tesiik nak’ulman naq na’uxman li kuyuk sa’ rik’in jun musiq’ejil ajom. Wi junaq reheb’ li kok’al ak xkuyum xsa’, patz’ re naq tixwotz lix numsihom. Waklesi xch’ooleb’ li kok’al chi aatinak rik’ineb’ lix na’ xyuwa’ sa’ li domingo re kuyuk sa’ chal re chirix k’a’ru naraj naxye li kuyuk sa’. Tenq’aheb’ chixtawb’al ru k’a’ru naraj naxye li kuyuk sa’ rik’in junaq ajom ut rik’in jun aamej k’eek’o sa’ li tij.
-
Ilomaq Isaias 58:6–7 sa’ komonil ut ch’olob’ naq naru “naqawotz li qawa rik’in li natz’okaak” naq naqakuy qasa’ ut naqamayeja li tumin li ink’a’ xqasach sa’ li tzakemq ink’a’ xqatzeka. K’ut chiruheb’ li kok’al jun li hu b’ar wi’ natz’iib’aman resil li mayej re li kuyuk sa’ ut ch’olob’ chan ru naq natz’iib’aman. Patz’ reheb’ naq te’ril Isaias 58:8–10 ut te’xsik’ li osob’tesiik neke’yeechi’iman qe naq naqakuy qasa’. Chan ru naq li kuyuk sa’ naru nokorosob’tesi laa’o ut eb’ li wankeb’ rajom ru?
Li Jesukristo a’an laj Kolol we ut laj Tojol wix.
K’oxla chan raj ru taawoksi li raatin laj Isaias re xkawob’resinkil xnawom xch’ooleb’ li kok’al chirix li Jesukristo jo’ laj Kolol reheb’ ut laj Tojol rixeb’.
Kok’ k’anjel naru chi b’aanumank
-
K’e xhoonaleb’ li kok’al re naq te’ril Isaias 61:1–3 xjuneseb’. Chirix a’an patz’ reheb’ naq te’xtz’iib’a chiru hu malaj sa’ jun li diario k’a’ru neke’xk’ut li raqal a’an chirix li Jesukristo. Patz’ reheb’ li kok’al naq te’xwotz k’a’ru xe’xk’oxla.
-
Patz’ reheb’ li kok’al chixwotzb’al junaq ch’ol aatin reheb’ li raqal a’an li wan xyaalal choq’ reheb’ ut te’xch’olob’ k’a’ut. Chan ru nokohe’xtenq’a li raqal a’an chixtawb’al ru k’a’ru kitaqlaak chaq li Jesukristo chixb’aanunkil sa’ ruchich’och’?
Li jun mil chihab’ a’anaq jun hoonal re tuqtuukilal ut sahil ch’oolejil.
Laj Isaias kiril li kutankil naq lix tenamit li Dios taawanq sa’ tuqtuukilal ut sahil ch’oolejil. Li profeetil aatin a’an taatz’aqloq ru naq li Jesukristo taasutq’iiq chaq sa’ ruchich’och’ ut taa’awa’b’ejinq chiru jun mil chihab’, sa’ li kutankil nawb’il ru jo’ li jun mil chihab’.
Kok’ k’anjel naru chi b’aanumank
-
Sa’ Isaias 65:17–25 nach’olob’aman chankaq ru li ruchich’och’ naq taak’ulunq wi’chik li Kolonel. K’eheb’ li kok’al sa’ kok’ ch’uut ut k’e reheb’ li junjunq chi ch’uut junjunq reheb’ li raqal a’an re naq te’ril. Chirix wiib’ oxib’ k’asal, tz’iib’ahomaq sa’ komonil chiru li pizarron chan ru naq jalanaq li yu’am sa’ li “ak’ ruchich’och’ ” jo’ chanru neke’xye li raqal a’an (raqal 17). K’a’ut naq a’anaq jun kutankil re “toosaho’q ut taawanq qanimla sahilal chi junelik”? (raqal 18).
-
Rub’elaj li tzolok, kawresiheb’ kok’ hu rik’ineb’ aatin ut ch’ol aatin re li xlajehil xraqalil li paab’aal. Patz’ re jun li ch’ina al naq tixyaab’asi lix raqalil li paab’aal ut patz’ reheb’ lix komon naq te’xtuseb’ ru li kok’ hu. Tenq’aheb’ chixtawb’al ru li naxk’ut lix raqalil li paab’aal chirix li jun mil chihab’.
Xb’oqb’aleb’ chi tzolok sa’ kab’l
Patz’ reheb’ li kok’al naq te’xwotz rik’ineb’ lix junkab’al junaq na’leb’ xe’xtzol anajwan chirix li Kolonel. Waklesi xch’ooleb’ chirilb’aleb’ li loq’laj hu rik’ineb’ lix junkab’al chiru li xamaan a’in.
Xkawresinkil qib’ jo’ aj k’utunel
Oksiheb’ li musiq’anb’il patz’om. Oksiheb’ li patz’om li tixkanab’eb’ li kok’al chi xik mas wi’chik chi uub’ej chiru ka’ajwi’ xyeeb’al resil li kik’ulman. Naru taak’oxlaheb’ patz’om li te’xwaklesi xch’ooleb’ chixwotzb’al xnawom xch’ooleb’ ut xnumsihomeb’.