jun profeet na’aatinak rik’ineb’ li winq

Laj Jeremias, xb’aan laj Walter Rane

10–16 octubre

Jeremias 1–3; 7; 16–18; 20

“Naq toj maji’ nakatsiyaak chaq rik’in laa na’, laa’in ak xinsik’ chaq aawu”

“Li rajom li junjunq chi aj k’utunel re li evangelio … a’an xk’utb’al li tz’aqal tzol’leb’ re li evangelio, rik’in li Musiq’ej, re xtenq’ankileb’ li ralal xk’ajol li Dios chixnimob’resinkileb’ xpaab’aal chirix li Kolonel ut chi wulak jo’ chanru a’an” (Li k’utuk jo’ li Kolonel, li rix).

Tz’iib’a li nakak’oxla

reetalil li wotzok

Xkanab’ankileb’ chi wotzok

Chiru kok’ hu, tz’iib’aheb’ junjunq aatin aajel ru xatzol chiru li xamaan a’in sa’ Jeremias, maare profeet, yo’yookil ha’, ch’utub’ank, ut melb’. K’eheb’ li kok’ hu sa’ jun li sek’ ut patz’ reheb’ li kok’al naq te’xchap jun ut te’xwotz k’a’ru neke’xk’oxla chirix. Tenq’aheb’ chirilb’al naq li aatin naxk’am rib’ rik’in junaq na’leb’ kixk’ut laj Jeremias.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Jeremias 1:5

Lin Choxahil Yuwa’ naxnaw chaq wu naq maji’ ninyo’la.

Xb’aan naq koowan chaq rik’in li Dios naq maji’ nokochal sa’ ruchich’och’, a’an naxnaw qu, us ta ink’a’ jultik qe a’an. Chan ru taatenq’aheb’ li kok’al chixtawb’al ru li xnimal ru na’leb’ a’an?

Kok’ k’anjel naru chi b’aanumank

• Yaab’asi Jeremias 1:5 reheb’ li kok’al ut ch’olob’ naq li Dios kixnaw chaq ru li profeet aj Jeremias rub’elaj naq kiyo’la. Ye reheb’ li kok’al, sa’ junjunqal, naq li qaChoxahil Yuwa’ naxnaweb’ ajwi’ ru rub’elaj naq xe’yo’la ut naq kooxtaqla chaq arin rik’in jun qajom.

• K’ut chiruheb’ li kok’al xjalam-uuch jun k’uula’al, ut patz’ reheb’ ma neke’xnaw b’ar xwan chaq li k’uula’al a’an naq maji’ nayo’la. B’ichahomaq jun li b’ich li na’aatinak chirix li qayu’am rik’in li Dios naq maji’ nokoyo’la, maare “Laa’in jun ralal li Dios” malaj “Sa’ li choxa chaq kinwan” (B’ichleb’aal choq’ reheb’ li Kok’al, 2, 139). Aatinan chirix li musiq’ejil eek’ahom naxk’am chaq li b’ich. Ch’olob’ xyaalal naq sa’ jun kutan chiqajunilo koowan chaq rik’in li qaChoxahil Yuwa’ ut naq a’an kooxtaqla chaq sa’ li ruchich’och’.

Jeremias 1:7

Neke’boqe’ li profeet re naq te’xyaab’asi li raatin li Qaawa’.

Lix b’oqb’al laj Jeremias naxk’ut k’a’ru naxpatz’ li Qaawa’ naq te’xb’aanu li profeet. Chan ru taatenq’aheb’ li kok’al chixkawob’resinkil li rajomeb’ chixtaaqenkil li yo’yookil profeet?

Kok’ k’anjel naru chi b’aanumank

• K’ut chiruheb’ li kok’al xjalam-uuch li yo’yookil profeet, ut patz’ reheb’ naq te’xwotz k’a’ru neke’xnaw chirix. K’a’ru neke’xb’aanu li profeet? Yaab’asi reheb’ k’a’ru kixye li Qaawa’ re laj Jeremias sa’ Jeremias 1:7. Naq taawil “a’ yaal b’ar tatintaqla, laa’at tatxik” patz’ reheb’ li kok’al naq te’xpak’ b’eek sa’ xna’ajeb’ ut naq taawil “taaye chixjunil li k’a’ru tatintaqla wi’ ” patz’ reheb’ naq te’xpak’ aatinak. Wotz xnawom aach’ool naq eb’ li profeet neke’xb’aanu ut neke’xye li k’a’ru naxtaqla li Qaawa’.

• K’uteb’ xjalam-uuch li profeet reheb’ li loq’laj hu (chi’ilmanq li Hu reheb’ li Jalam-uuch re li Evangelio, eb’ li hu re li Iglees, ut Kim, Taaqehin—Choq’ reheb’ li komon ut li junkab’al). Patz’ reheb’ li kok’al naq te’xye k’a’ru neke’xnaw chirixeb’ li profeet a’an. Wotz rik’ineb’ junaq na’leb’ xb’aanu junaq reheb’ li profeet a’an re xtenq’ankil li Dios sa’ lix k’anjel. Wotz xnawom aach’ool naq eb’ li profeet b’oqb’ileb’ xb’aan li Dios re te’xyaab’asi li raatin ut te’k’anjelaq chiru lix tenamit.

Jeremias 16:16

Naru nintenq’aheb’ li ralal xk’ajol li qaChoxahil Yuwa’ chi sutq’iik rik’in a’an.

Rik’in roksinkil Jeremias 16:16, li Awa’b’ej Russell M. Nelson kixye, “Eb’ li qamisioneer neke’xsik’eb’ laj Israel jek’inb’ileb’; neke’xyo chaq toj sa’ “lix julel li pek” ut neke’karab’k jo’ sa’ li najter kutan” (“El recogimiento de Israel disperso,” Liahona, noviembre 2006, 81).

Kok’ k’anjel naru chi b’aanumank

• Naq taawil Jeremias 16:16, patz’ reheb’ li kok’al naq te’xkoxla naq yookeb’ chi karab’k malaj chi yohob’k. Ch’olob’ naq eb’ laj kar ut laj yo naxye li raqal a’an nareetaliheb’ li misioneer. Patz’ reheb’ li kok’al naq te’xk’oxla naq a’aneb’ li misioneer. K’a’ru neke’xb’aanu li misioneer? Chan ru te’qatenq’a?

• Kawresi jun b’atz’unk re juntaq’eetank rik’in li perel re kok’ k’anjel re li xamaan a’in. Naq jun ch’ina al tixtaw li jalam-uuch juntaq’eet, ye k’a’ru naxye li jalam-uuch naq naru naqab’aanu re xtenq’ankileb’ li ralal xk’ajol li qaChoxahil Yuwa’ chi q’ajk rik’in a’an.

reetalil li k’utuk

Xk’utb’al li tzol’leb’: Kok’al ak ninqeb’

Jeremias 1:4–19

Neke’b’oqe’ li profeet chixyaab’ankil li raatin li Qaawa’.

Chan ru taatenq’aheb’ li kok’al chixkawob’resinkil lix paab’aaleb’ chirix lix k’anjeleb’ li profeet sa’ li rawa’b’ejihom li Dios ut chixnimob’resinkil lix tawomeb’ ru chirix a’an?

Kok’ k’anjel naru chi b’aanumank

• Sik’eb’ ru junjunq li raqal sa’ Jeremias 1 li neke’xk’ut li yaal chirixeb’ li profeet, maare li raqal 5, 7, 10 ut 19. Patz’ reheb’ li kok’al naq te’xsik’ ru jun reheb’ li raqal, te’ril ut te’xwotz k’a’ru neke’xtzol chirix li profeet chi sa’. Patz’ reheb’ junjunq li kok’al naq te’xwotz xnawom xch’ooleb’ chirix xtaaqenkil li profeet.

• K’ut jun xjalam-uuch li yo’yookil profeet ut b’ichahomaq jun li b’ich na’aatinak chirix li profeet, maare “Saqaq aawu” (B’ichleb’aal choq’ reheb’ li Kok’al, 81). Tenq’aheb’ li kok’al chixtz’iib’ankil k’a’ru naxpatz’ qe li yo’yookil profeet naq taqab’aanu. Sik’ ru junaq reheb’ li raatin li profeet sa’ li jolomil ch’utub’aj-ib’ toje’ xnume’ ut tenq’aheb’ li kok’al chixtawb’aleb’ xna’leb’ sa’ li raatin. Chan ru naq naqataaqe li profeet? Wotzomaq chan ru naq lix na’leb’ li profeet nokoxtenq’a chixtaaqenkil chi us li qaChoxahil Yuwa’ ut li Jesukristo.

• Patz’ reheb’ li kok’al chan raj ru te’xch’olob’ chiru junaq ramiiweb’ k’a’ut naq a’an jun osob’tesiik naq wan jun yo’yookil profeet (chi’ilmanq Eb’ lix Raqalil li Paab’aal 1:6, 9). Patz’ reheb’ naq te’xwotz li reek’ahomeb’ chirix li yo’yookil profeet.

Jeremias 16:14–15

Naru nintz’aqon sa’ xch’utub’ankil Israel.

Li na’leb’ chirix xch’utub’ankil Israel wan sa’ Jeremias 16:14–15 naru naxk’e jun chaab’il hoonal re raatinankileb’ li kok’al chirix li k’anjel re xjultikankil li evangelio ut li k’anjel re resilal li junkab’al. Chi jo’kan nokowan choq’ “aj yehol nawom chirix li Dios” (Mosiah 18:9).

Kok’ k’anjel naru chi b’aanumank

• Ilomaq Jeremias 16:14 sa’ komonil ut patz’ reheb’ li kok’al naq te’xwotz k’a’ru najultiko’ reheb’ chan ru naq “li Qaawa’ … ki’isink chaq reheb’ laj Israel sa’ li tenamit Egipto” (chi’ilmanq Exodo 14). Patz’ reheb’ naq te’ril Jeremias 16:15 re te’xsik’ k’a’ru kixye laj Jeremias naq jwal nimaq wi’chik xwankil chiru li ke’xk’ul laj Israel. Ch’olob’ naq Israel kijek’iik sa’ chixjunil li ruhich’och’, a’b’an li Dios kixyeechi’i xch’utub’ankileb’ wi’chik rik’in a’an ut sa’ lix Iglees. A’an a’in lix ch’utub’ankil wi’chik Israel. Chan ru naq juntaq’eet a’an rik’in rach’ab’ankileb’ li kristiaan chiru li preexil?

• Wotz li raatin li Awa’b’ej Russell M. Nelson: “Yalaq jo’q’e nakab’aanu yalaq k’a’ru li naxtenq’a yalaq ani—ma yo’yo malaj kamenaq—chi ok sa’ sumwank rik’in li Dios ut chixk’ulb’al li kub’iha’ ut eb’ li k’ojob’anb’il k’anjel re li santil ochoch, yookat chi tenq’ank chixch’utub’ankil Israel” (Russell M. Nelson ut Wendy W. Nelson, “Juventud de Israel” [ch’utam choq’ reheb’ li saaj sa’ chixjunil li ruchich’och’, 3 junio, 2018], aatin sa’ li New Era ut li Ensign,agosto 2018, 15, ChurchofJesusChrist.org). Chan ru tintenq’anq chixch’utub’ankil Israel?

• B’ichahomaq jun li b’ich li na’aatinak chirix xjultikankil li evangelio, maare “Nawaj li xik sa’ jun mision” malaj “B’oqb’ilo choq’ xmoos” (B’ichleb’aal choq’ reheb’ li Kok’al, 91, 94–95), malaj k’ut li video “Tu dia por la mision” (ChurchofJesusChrist.org). Patz’ reheb’ li kok’al k’a’ru neke’xtzol sa’ li b’ich malaj sa’ li video chirix k’a’ut naq jun komon naxsik’ ru xik’ sa’ jun mision.

reetalil li tzolok

Xb’oqb’aleb’ chi tzolok sa’ kab’l

B’oqeb’ li kok’al chixk’amb’al sa’ rochocheb’ jun reetalil li perel re kok’ k’anjel re li xamaan a’in ut te’b’atz’unq rik’ineb’ lix junkab’al. Waklesi xch’ooleb’ chixch’olob’ankil chiruheb’ lix junkab’al chan ru naq neke’osob’tesiik xb’aan xjultikankil li evangelio.

Xkawresinkil qib’ jo’ aj k’utunel

Tenq’aheb’ li kok’al chixk’eeb’al reetal li Musiq’ej. Li loq’laj b’ich naxk’e xb’oqb’al lix wankil li Santil Musiq’ej. Naq tatb’ichanq rik’ineb’ li kok’al, k’e aahoonal chixtenq’ankileb’ chixk’eeb’al reetal li musiq’ejil eek’ahom neke’xch’olob’ xyaalal li na’leb’ yookeb’ chixtzolb’al.

perel re kok’ k’anjel: Naru nintenq’aheb’ li ralal xk’ajol li qaChoxahil Yuwa’ chi sutq’iik rik’in a’an