“Agosto 22–28. Salmo 102–103; 110; 116–119; 127–128; 135–139: 146–150: ‘Ipapagdayeg sa Tagsa-tagsa ang Adunay Gininhawa sa Ginoo,’” Dali, Sunod Kanako—Alang sa Primary: Daang Tugon 2022 (2021)
“Agosto 22–28. Salmo 102–103; 110; 116–119; 127–128; 135-139; 146–150,” Dali, Sunod Kanako—Alang sa Primary: 2022
Tanang Tuhod Magaluhod, ni J. Kirk Richards
Agosto 22–28
Salmo 102–103; 110; 116–119; 127–128; 135–139; 146–150
“Ipapagdayeg sa Tagsa-tagsa ang Adunay Gininhawa sa Ginoo”
Kon nagkinahanglan ka og dugang nga mga ideya samtang mangandam ka sa pagtudlo, tan-awa ang “Dugang nga mga Kapanguhaan alang sa Pagtudlo sa mga Bata” ug ang “Pagtubag sa mga Panginahanglan sa Mas Gagmay nga mga Bata” sa sinugdanan niini nga kapanguhaan.
I-rekord ang Imong mga Panghunahuna
Dapita ang Pagpaambit
Ipakita ang hulagway diha sa outline niini nga semana sa Dali, Sunod Kanako—Alang sa mga Indibidwal ug mga Pamilya, ug dapita ang mga kabataan sa pagsulti mahitungod sa unsay ilang nakita diha sa mga hulagway. Tabangi sila sa pagkakita og mga koneksyon tali niini nga mga hulagway ug sa unsay ilang nakat-unan diha sa basahon sa Salmo.
Itudlo ang Doktrina: Mas Gagmay nga mga Bata
Ang pulong sa Dios sama sa usa ka kahayag.
Ang mga kabataan nga imong gitudloan anaa sa dalan balik ngadto sa Langitnong Amahan. Ang pulong sa Dios makatabang sa pagpabilin kanila diha niana nga dalan karon ug sa tibuok nilang mga kinabuhi.
Posible nga mga Kalihokan
-
Pagpakita og mga hulagway sa mga butang nga gihisgutan diha sa Salmo 119:105, ug dapita ang mga kabataan sa paghan-ay sa mga hulagway sa hustong pagkasunod-sunod samtang imong basahon ang bersikulo. Hangyoa ang mga kabataan sa pagsulti og balik sa mga hugpong sa mga pulong gikan sa bersikulo uban kanimo samtang ikaw nagtudlo ngadto sa mga hulagway.
-
Dapita ang mga kabataan sa pagsulti mahitungod sa unsay bation nga maanaa sa ngitngit. Unsa ang mga butang nga malisud buhaton diha sa ngitngit? Mahimo kang modapit og usa ka bata sa pagsulay sa pagbuhat og usa ka butang nga ang iyang mga mata gipiyong, sama sa pagdrowing og usa ka hulagway. Ngano nga kining mga butanga mas sayon nga buhaton kon adunay kahayag? Tabangi ang mga kabataan sa pagsabut kon sa unsa nga paagi nga ang pulong sa Dios, ingon nga makaplagan diha sa mga kasulatan ug sa mga pulong sa buhing mga propeta, pagbanwag sa atong agianan balik ngadto sa Langitnong Amahan.
Ang Langitnong Amahan ug si Jesukristo nakaila kanako ug nahigugma kanako.
Sa tibuok natong mga kinabuhi, kita nagkinahanglan nga pahinumduman nga ang Langitnong Amahan ug si Jesus personal nga nakaila kanato. Ang Salmo 139 makatabang kanimo sa pagtudlo sa mga kabataan nga Sila nakaila kanila ug nahigugma kanila.
Posible nga mga Kalihokan
-
Paghimo og mubo nga mga lista sa mga butang nga imong nahibaloan mahitungod sa matag bata. Samtang ikaw magbasa sa mga lista sa tinagsa, hangyoa ang mga kabataan sa pagtagna kinsa ang imong gihulagway. Basaha ang Salmo 139:1–3, ug tabangi ang mga kabataan sa pagsabut sa mga pulong nga tingali sila wala makahibalo. Ipamatuod nga ang Langitnong Amahan nakaila kaayo kanila––Sila nakahibalo sa ilang mga ngalan, unsay makapalipay ug makapasubo kanila, ug sa mga butang nga sila maayong mobuhat.
-
Basaha ang Salmo 139:23, ug dapita ang mga kabataan sa pagbutang sa ilang mga kamot diha sa ilang mga kasingkasing kon ikaw mosulti og “kasingkasing” ug sa paghikap sa ilang mga ulo kon ikaw mosulti og “mga hunahuna.” Pakigbahin og panahon sa dihang imong gibati nga ang Dios nahibalo sa imong kasingkasing ug sa imong mga hunahuna.
Ako makadayeg sa Ginoo.
Ang pagdayeg sa Ginoo nagpasabut sa pagpahayag sa atong pasalamat ug paghigugma alang Kaniya. Tabangi ang mga kabataan sa pagkat-on nga kita nagdayeg Kaniya kon kita mobuhat og mga butang sama sa pagkanta, pag-ampo, ug pagsunod sa Iyang mga pagtulun-an.
Posible nga mga Kalihokan
-
Dapita ang mga kabataan sa pagpakigbahin og mga kasinatian sa dihang usa ka tawo midayeg kanila o misulti kanila nga sila naghimo og maayong trabaho. Pakigbahin og pipila sa maayong mga butang gikan sa Salmo 146:6–9 nga nabuhat sa Ginoo, ug dapita ang mga kabataan sa pagsulti mahitungod sa ubang mga butang nga Iyang gihimo alang kanato. Tabangi sila sa paghunahuna og mga paagi nga sila makadayeg Kaniya alang niadtong mga butanga.
-
Panganta og dungan sa usa ka awit sa pagdayeg, sama sa “Maanindot Kaayo ang Kalibutan” (Songbook sa mga Bata, 123). Ipasabut nga alang sa mga Israelite sa dugay nang panahon, ang Salmo sama og ang mga awit nga atong gikanta karon sa pagsimba ug pagdayeg sa Dios.
Itudlo ang Doktrina: Mas Dagko nga mga Bata
Ang Ginoo mitanyag kanako og kahupay ug paglaum.
Ang Dios nagpakabana sa atong mga pagsulay ug mga kasubo, ug gusto Siya nga mohupay ug moawhag kanato. Tabangi ang mga kabataan sa pagtukod sa ilang hugot nga pagtuo diha Kaniya aron sila modangup ngadto Kaniya sa mga panahon sa panginahanglan.
Healing [Nag-ayo], ni J. Kirk Richards
Posible nga mga Kalihokan
-
Dapita ang usa sa mga bata sa pagbasa sa Salmo 102:1–2. Sa unsa nga paagi nga ang Ginoo makatabang kanato sa mga panahon sa atong kasamok? Unsaon nato sa pagpangayo alang sa Iyang panabang? Pakigbahin og kasinatian diin imong gibati nga ang Dios nakadungog sa imong mga pag-ampo sa dihang ikaw nanginahanglan, ug dapita ang mga kabataan sa pagpakigbahin sa ilang mga kasinatian ug mga pagpamatuod.
-
Dapita ang mga kabataan sa pagpangita og mga pulong sa paghupay ug paglaum diha sa Salmo 103. Sa unsa nga paagi nga nakatabang kini nga mga pulong sa mga tawo nga nag-atubang og mga hagit? Awhaga ang mga kabataan sa pagsulat og mga hugpong sa mga pulong nga ilang nakita nga makahuluganon aron sa pagpahinumdom kanila nga ang Ginoo makatabang kanila kon sila adunay mga pagsulay.
Ang mga pulong sa Dios nagtabang kanako sa pagsunod sa Iyang dalan.
Bisan tuod og ang kalibutan usahay ingon og mangitngit ang mga pulong sa Dios makabanwag sa atong dalan ug makatabang kanato sa pagbalik ngadto Kaniya.
Posible nga mga Kalihokan
-
Pagdrowing diha sa pisara og hulagway sa kahayag (sama sa lampara) ug usa ka hulagway sa mga kasulatan. Dapita ang mga kabataan sa pagbasa diha sa Salmo 119:105. Sa unsang paagi ang kahayag nagtabang kanato? Sa unsang paagi ang pulong sa Dios nagtabang kanato? Hangyoa ang mga kabataan sa pagsulat sa ilang mga tubag diha sa pisara tupad sa mga hulagway. Sa unsang paagi nga ang pulong sa Dios sama sa usa ka kahayag? Sa unsang paagi kini nagtabang kanato sa pagpabilin diha sa dalan nga naggiya balik ngadto sa Langitnong Amahan?
-
Pares-paresa ang mga kabataan ug hatagi ang matag pares og usa sa mosunod nga mga tudling sa kasulatan: Salmo 119:47–48; Salmo 119:105; 1 Nephi 11:25; 2 Nephi 31:20. Dapita sila sa pagbasa sa mga tudling ug sa pagpangita alang sa unsay gihatag sa Langitnong Amahan kanato sa pagtabang kanato nga magpabilin diha sa dalan balik ngadto Kaniya. Dapita ang mga kabataan sa pagpamalandong ug sa pagpakigbahin sa unsay gibati nilang nadasig nga buhaton tungod sa unsay ilang nakat-unan.
-
Panganta og dungan sa usa ka awit mahitungod sa pagsunod sa dalan sa Dios sama sa “Maninguha Kong Mahimong Mahisama ni Jesus” (Songbook sa mga Bata, 40–41). Unsa ang atong nakat-unan gikan niini nga awit mahitungod sa pagpabilin diha sa matarung nga dalan?
Ang Langitnong Amahan ug si Jesukristo makatabang kanako nga makahibalo unsaon sa pagpalambo.
Ang Salmo 139 nagtudlo nga ang Dios nahibalo sa tanan mahitungod kanato, lakip ang atong mga kalig-on ug mga kahuyang. Kon kita modangop ngadto Kaniya, Siya makatudlo kanato unsa ang kinahanglan natong buhaton nga mahimong mas mahisama Kaniya.
Posible nga mga Kalihokan
-
Isulat ang mga pulong sa Salmo 139:23–24 diha sa pisara, ug dapita ang mga kabataan sa pagbadlis sa mga pulong nga naghulagway sa mga butang nga makahimo ang Dios alang kanato. Nganong kita gusto nga ang Dios ang mobuhat niining mga butanga? Unsaon nato Siya sa pagdapit sa “paggiya [kanato] sa dalan nga walay katapusan”?
-
Awhaga ang mga kabataan sa “pagsiksik” sa ilang kaugalingong mga kinabuhi alang sa mga paagi nga sila makapalambo sa upat ka importanting bahin nga hatagan og pagtagad diha sa Mga Kabataan og Kabatan-onan nga programa––espiritwal, sosyal, pisikal, ug intelektwal. Pahinumdumi sila nga ang Ginoo nahibalo kon unsaon nila sa pagpalambo ang matag usa niini nga mga bahin, ug awhaga sila sa pagpaningkamot sa Iyang paggiya.
-
Pagkanta og usa ka awit mahitungod sa unsaon sa Langitnong Amahan nga makatabang kanato sa paglambo, sama sa ikaduhang bersikulo sa “Tabangi Ko, Mahal nga Amahan” (Songbook sa mga Bata, 52). Pakigbahin kon sa unsang paagi ang Langitnong Amahan ug si Jesukristo nagtabang kanimo nga molambo.
Awhaga ang Pagkat-on diha sa Panimalay
Usahay, mahimo kang modapit sa usa sa mga kabataan ug usa sa mga sakop sa iyang pamilya sa pagpakigbahin sa klase unsa ang ilang gibuhat nga makakat-on sa ebanghelyo diha sa ilang panimalay. Awhaga ang nahibilin sa mga kabataan sa pagpakigbahin niini nga mga ideya ngadto sa ilang mga pamilya.
Pagpalambo sa Atong Pagtudlo
Paggamit og musika. Ang mga kanta sa Primary ug ang mga himno makatabang sa mga kabataan sa tanang edad nga makasabut ug makagamit sa mga kamatuoran sa ebanghelyo sa halandumong paagi. Ang pagkanta makahimo usab sa mga kabataan nga aktibong moapil sa pagkat-on. (Tan-awa sa Pagtudlo sumala sa Pamaagi sa Manluluwas, 22.)