“Agosto 29–Septyembre 4: Mga Panultihon 1–4; 15–16; 22; 31; Ecclesiastes 1–3; 11–12: ‘Ang Pagbaton og Kahadlok sa Ginoo Maoy Sinugdanan sa Kaalam’” Dali, Sunod Kanako—Alang sa Primary: Daang Tugon 2022 (2021)
“Agosto 29–Septyembre 4: Mga Panultihon 1–4; 15–16; 22; 31; Ecclesiastes 1–3; 11–12,” Dali, Sunod Kanako—Alang sa Primary: 2022
Agosto 29–Septyembre 4
Mga Panultihon 1–4; 15–16; 22; 31; Ecclesiastes 1–3; 11–12
“Ang Pagbaton og Kahadlok sa Ginoo Maoy Sinugdanan sa Kaalam”
Samtang magtuon ka sa Mga Panultihon ug Ecclesiastes, paghunahuna mahitungod sa mga bata nga imong gitudloan. Unsa nga mga mensahe gikan niini nga mga kasulatan ang makatabang kanila nga mobati nga mas duol ngadto sa Langitnong Amahan ug ni Jesukristo?
Irekord ang Imong mga Impresyon
Dapita ang Pagpaambit
Drowinga sa pisara ang mga hulagway sa mga butang nga nahisgotan sa basahon sa Mga Panultihon, sama sa kasingkasing, kahayag, o dalan. Tabangi ang mga bata nga mobasa sa Mga Panultihon 3:5; 4:18, 26, ug dapita sila sa pagpaambit og usa ka butang nga ilang nakat-onan kabahin niini nga mga butang gikan sa mga kasulatan.
Itudlo ang Doktrina: Mas Gagmay nga mga Bata
Ako makasalig sa Ginoo sa tibuok nakong kasingkasing.
Kon kita mosalig sa Ginoo sa tibuok natong kasingkasing, kita adunay hugot nga pagtuo Kaniya ug nasayod nga Siya motabang kanato.
Posible nga mga Kalihokan
-
Pagunita ang usa sa mga bata og litrato sa Manluluwas samtang basahon ninyo ang Mga Panultihon 3:5. Sultihi ang mga bata kon unsay buot ipasabot sa pagsalig sa Ginoo para kanimo. Dapita ang mga bata nga moporma og kasingkasing gamit ang ilang mga kamot o mobutang sa ilang mga kamot ibabaw sa ilang mga kasingkasing samtang mosubli sa pulongan “salig sa Ginoo sa tibuok mong kasingkasing” sa makadaghang higayon.
-
Drowinga ang usa ka dako nga kasingkasing diha sa pisara, ug tabangi ang mga bata nga maghunahuna og mga butang nga ilang mahimo aron magpakita nga sila misalig sa Ginoo. Dapita sila sa pagdrowing sa ilang mga ideya sulod sa kasingkasing o diha sa usa ka piraso nga papel. Awhaga sila sa pagpaambit sa ilang mga ideya ngadto sa ilang mga pamilya.
Ang mga bata makahatag og “ malumong tubag” pinaagi sa paggamit og mabination nga mga pulong (Mga Panultihon 15:1).
Makagamit ako og mabination nga mga pulong.
Sa tensiyonado o makapasagmuyo nga mga sitwasyon, mahimong matintal kita nga motubag nga adunay kasuko. Ang Mga Panultihon 15:1,18 nagtudlo kanato kon unsaon nato nga makatubag nga walay kasuko.
Posible nga mga Kalihokan
-
Basaha ang Mga Panultihon 15:1 ngadto sa mga bata, ug ipasabot ang bisan unsa nga mga pulong o mga pulongan nga tingali dili pamilyar ngadto kanila. Pagpaambit og pipila ka ehemplo sa mga sitwasyon diin ang usa ka bata mahimong masuko (sama sa usa ka panaglalis sa usa ka igsoon). Tabangi sila sa paghunahuna og “mga tubag nga malumo,” o mabination nga mga pulong, nga ilang magamit imbes sa masuk-anon nga mga pulong. Tabangi sila sa pagbansay og sulti niini nga mga butang sa malumo nga paagi o sa kalma nga tingog.
-
Kantaha ang usa ka awit mahitungod sa pagkamabination, sama sa “Pagkamabination Magagikan Kanako” (Songbook sa mga Bata, 83). Unsa ang gitudlo niini nga awit kanato mahitungod sa pagkahimong mabination?
-
Aron matabangan ang mga bata nga makasabot kon unsay buot ipasabot nga mahimong “hinay sa pagkasuko” (Mga Panultihon 15:18), pagsugilon og usa ka personal nga istorya mahitungod sa panahon nga ikaw (o sa usa ka tawo nga imong nailhan) mibati nga nasuko apan mipili nga magmabination. Tugoti usab ang mga bata nga mopaambit sa ilang kaugalingon nga mga kasinatian. Tabangi ang mga bata sa paghunahuna og mga butang nga ilang mabuhat imbes nga masuko. Sama pananglit, mahimo silang maghunahuna ni Jesus, mohangyo sa Langitnong Amahan nga tabangan sila, kantahan ang ilang kaugalingon og awit sa Primary, o, kon posible, mobiya na lang.
Mapaambit nako unsay ania nako ngadto sa uban.
Ang gagmay nga mga bata makakat-on sa pagtabang sa mga tawo sa ilang palibot kinsa nanginahanglan. Sa unsang paagi nga ikaw makadasig kanila sa pagpaambit sa unsay anaa kanila ngadto sa uban?
Posible nga mga Kalihokan
-
Ipakita sa mga bata ang pipila ka hulagway sa uban nga nagserbisyo o nagtabang sa mga tawo nga nanginahanglan, lakip sa mga hulagway sa Manluluwas (sama sa Libro sa mga Hulagway sa Ebanghelyo, nu. 42, 44, 46). Hangyoa ang mga bata sa pagsulti kanimo unsa ang nahitabo sa matag hulagway. Basaha ngadto sa mga bata ang Mga Panultihon 22:9. Ipasabot nga usa ka paagi nga kita makaserbisyo mao ang paghatag og “pan ngadto sa kabos,” apan adunay daghang lain nga mga paagi sa pagtabang niadtong nanginahanglan. Dapita ang mga bata sa pagdrowing og hulagway sa ilang kaugalingon nga nagtabang og usa ka tawo.
-
Pagdala og pipila ka butang ngadto sa klase nga mapaambit nimo sa mga bata, sama sa mga hulagway o mga krayola. Samtang hatagan nimo ang matag bata og usa, isulti, “Akong ipaambit ni [ngalan sa bata].” Papuli-puliha ang mga bata sa pagpaambit sa mga butang sa matag usa. Unsa ang pipila ka butang nga atong mapaambit ngadto sa uban?
-
Kantaha og dungan ang usa ka awit mahitungod sa serbisyo, sama sa “Sulti sa Gamay nga Sapa ‘Hatag’” (Songbook sa mga Bata, 116). Pangutan-a ang mga bata kon unsay ilang bation kon motabang sila sa uban.
Itudlo ang Doktrina: Mas Dagko nga mga Bata
Mga Panultihon 1:7; 2:5; 15:33; 16:6; Ecclesiastes 12:13
Ang “[pag]kahadlok [sa] Dios” nagpasabot sa paghigugma ug pagsunod Kaniya.
Usa sa importante nga mga mensahe sa Mga Panultihon ug Ecclesiastes mao ang “kahadloki ang Dios ug tumana ang iyang mga sugo” (Ecclesiastes 12:13). Pamalandongi kon unsaon nimo sa pagtabang ang mga bata nga makasabot kon unsa ang buot ipasabot sa pagkahadlok sa Dios.
Posible nga mga Kalihokan
-
Dapita ang mga bata sa paglista og pipila ka butang nga mahimong gikahadlokan sa mga tawo. Dayon hangyoa sila sa pagbasa sa Mga Panultihon 1:7 ug Ecclesiastes 12:13. Unsay buot ipasabot sa pagkahadlok sa Dios? Aron sa pagtabang og tubag niini nga pangutana, hangyoa ang usa ka bata sa pagbasa sa mga bersikulo og usab, nga ilisdan ang pulong nga “kahadlok” sa pulong nga “balaang pagtahod.” Sublia kini nga kalihokan gamit ang mga pulong sama sa “gugma,” “pagkamasulundon,” o “tuman.” Sa unsang paagi kini makausab sa atong pagsabot kon unsay buot ipasabot sa pagkahadlok sa Dios?
-
Dapita ang matag bata sa pagpili og usa sa mosunod nga mga bersikulo nga basahon, nga mangita sa pulong “kahadlok”: Mga Panultihon 1:7; 2:5; 15:33; 16:6. Hangyoa ang mga bata sa pagpaambit kon unsay gitudlo sa ilang bersikulo mahitungod sa mga panalangin nga moabot kon kita mahadlok sa Ginoo, nga nagpasabot nga kita magpakita og balaang pagtahod Kaniya (tan-awa usab sa Mga Panultihon 14:26–27). Unsaon nato sa pagpakita sa Ginoo nga kita naghigugma ug nagtahod Kaniya?
“Salig sa Ginoo sa bug-os mong kasingkasing.”
-
Basaha og dungan ang Mga Panultihon 3:5–7, ug dapita ang mga bata sa paglista sa mga butang nga giingon niini nga mga bersikulo nga kinahanglan natong buhaton ug kinahanglan natong dili buhaton. Pangutan-a sila kon unsa sa tan-aw nila ang gipasabot niini nga mga butang. Unsa nga mga kinaiya ang atong makita sa mga tawo nga atong gisaligan? Unsa nga mga kinaiya ang anaa sa Ginoo nga makatabang kanato nga mosalig Kaniya?
-
Aron ipakita kon unsay buot ipasabot sa “ayaw gayod pagsalig sa imong kaalam,” pasulaya ang mga bata sa pagpasandig og tukog o lapis ngadto sa nagkalain-lain nga mga butang, sama sa usa ka libro o sa usa ka piraso nga papel. Hain sa mga butang ang labing maayong masandigan? Nganong importante ang “[mo]salig sa Ginoo” ug dili magsalig sa atong “[kaugalingong] kaalam”?
“Ang malumong tubag mohupay sa kasuko.”
Ang pagpamulong sa kasuko kasagaran nga mohimo sa usa ka tensiyonado nga sitwasyon nga mas mograbe pa. Kini nga mga bersikulo nagtudlo nga ang atong mga pulong ug ang atong mga kinaiya makapahupay sa kasuko o kalagot.
Posible nga mga Kalihokan
-
Isulat ang mga pulong nga kasuko ug panagbingkil diha sa pisara, ug pagpaambit og ehemplo sa usa ka panaglalis nga mahimong anaa sa mga bata. Dayon hangyoa ang mga bata sa pagbasa sa Mga Panultihon 15:1,18; 16:32 ug sa pagpangita og tambag nga ilang mahatag ngadto sa mga bata nga naglalis. Sa matag higayon nga ang mga bata magpaambit og ideya, dapita sila sa pagpapas og usa ka bahin sa mga pulong diha sa pisara. Dapita sila sa paghulip niadto nga mga pulong og uban nga naghulagway og Kristohanong mga hiyas nga magdala og kalinaw.
-
Tabangi ang mga bata nga maghunahuna og mga istorya sa mga kasulatan sa dihang gipakita sa Manluluwas ang unsay gitudlo sa Mga Panultihon 15:1,18; 16:32. Alang sa mga ideya, mahimo silang mobasa sa Juan 8:1–11; 18:1–11. Kantaha og dungan ang usa ka awit mahitungod sa ehemplo sa Manluluwas, sama sa “Maninguha Kong Mahimong Mahisama Kang Jesus” (Songbook sa mga Bata, 40–41). Sa unsang paagi kita makasunod sa ehemplo ni Jesus samtang makighalubilo kita sa mga sakop sa pamilya, mga higala, ug uban pa?
Awhaga ang Pagkat-on diha sa Panimalay
Tabangi ang mga bata nga mopili og bersikulo nga ilang nabasa sa klase nga ilang naganahan. Awhaga sila sa pagpaambit niana nga bersikulo sa ilang pamilya ug sultihan sila kon unsay ilang nakat-onan gikan niini.
Pagpalambo sa Atong Pagtudlo
Paglambo isip usa ka magtutudlo nga sama kang Kristo. Pamalandong og mga paagi nga mahimo nimong mapalambo ang imong abilidad sa pagtabang sa mga bata nga mapalig-on ang ilang hugot nga pagtuo sa Langitnong Amahan ug ni Jesukristo. Ang mga pangutana alang sa personal nga pagtimbang-timbang diha sa pahina 37 sa Pagtudlo sumala sa Pamaagi sa Manluluwas mahimong makatabang.