“Septyembre 19–25. Isaias 40–49: ‘Dasiga Ang Akong Katawhan,’” Dali, Sunod Kanako—Alang sa Primary: Daang Tugon 2022 (2021)
“Septyembre 19–25. Isaias 40–49,” Dali, Sunod Kanako—Alang sa Primary: 2022
Healing the Blind Man [Pag-ayo sa Buta nga Tawo], ni Carl Heinrich Bloch
Septyembre 19–25
Isaias 40–49
“Dasiga Ang Akong Katawhan”
Daghan nga mga tudling sa Isaias 40–49 ang makatabang sa mga bata sa pagpalambo sa ilang gugma alang sa Ginoo ug sa ilang hugot nga pagtuo Kaniya. Tinguhaa ang giya sa Espiritu aron makit-an kadto nga mga tudling samtang ikaw magtuon.
Irekord ang Imong mga Impresyon
Dapita ang Pagpaambit
Basaha ang Isaias 40:9 uban ang mga bata, ug dapita sila nga magpakaaron-ingnon nga motungas ngadto “sa habog nga bukid” ug dayon magpuli-puli nga ipatigbabaw ang ilang mga tingog sa pagpaambit og usa ka butang nga bag-ohay lang nilang nakat-onan gikan sa mga kasulatan—sa balay man o sa simbahan.
Itudlo ang Doktrina: Mas Gagmay nga mga Bata
Mahimo akong usa ka saksi sa Ginoo.
Ang Ginoo mipahinumdom sa mga Israelihanon nga nakasaksi sila og daghan nga talagsaon nga mga butang nga Iyang gibuhat alang kanila. Gusto Siya nga sila (ug kitang tanan) mahimo nga mga saksi Kaniya, nga magtabang sa uban nga mahibalo sa Iyang gahom ug kaayo.
Posible nga mga Kalihokan
-
Sultihi ang mga bata mahitungod sa usa ka butang nga imong nasaksihan. Tabangi sila nga maghunahuna og mga butang nga ilang nasinati nga ilang maestorya sa usag usa o mahimong usa ka “saksi” niana—sama pananglit, usa ka lamian nga pagkaon nga ilang natilawan, usa ka lugar nga ilang nabisita, o usa ka tawo nga ilang nailhan. Basaha ngadto sa mga bata ang gikan sa Isaias 43:10: “Kamo mao ang akong mga saksi, nag-ingon ang Ginoo, ug ang akong sulugoon nga akong napili.” Sultihi ang mga bata nga sa dihang kita mabunyagan kita mosaad nga mahimong saksi ni Jesukristo (tan-awa sa Mosiah 18:9). Unsay buot ipasabot nga mahimong saksi sa Ginoo?
-
Hangyoa ang mga bata sa pagpaambit sa unsay ilang nahibaloan mahitungod ni Jesukristo ug sa Iyang ebanghelyo. Pakit-a sila og mga hulagway aron sa paghatag kanila og mga ideya (sama pananglit, mga hulagway sa Pagkabanhaw sa Manluluwas, sa Basahon ni Mormon, sa templo, ug sa buhi nga propeta). Dapita sila nga maghisgot mahitungod sa unsay ilang ikapaambit sa uban isip mga saksi sa Ginoo.
“Walay laing manluluwas gawas kanako.”
Si Jesukristo mao lamang ang makaluwas kanato gikan sa sala ug kamatayon. Pamalandongi kon unsaon nimo sa pagdasig ang mga bata nga mobutang sa ilang pagsalig diha Kaniya.
Posible nga mga Kalihokan
-
Dapita ang mga bata nga maghunahuna og sitwasyon diin mahimong magkinahanglan sila og tabang (sama sa pagkasakit o naabtan og unos). Ipakita ang pipila ka butang (o mga hulagway sa mga butang), pipila nga makatabang kanila sa sitwasyon ug uban nga dili. Sama pananglit, ang usa ka payong makatabang atol sa usa ka unos, apan ang usa ka basong tubig ug lapis dili. Hangyoa ang mga bata sa pagpili sa butang nga makatabang niana nga sitwasyon. Pagpakita og mga hulagway sa Manluluwas aron matabangan ang mga bata nga maghisgot mahitungod kon giunsa Niya pagtabang kanato.
-
Basaha ngadto sa mga bata ang Isaias 43:11, ug hangyoa sila nga motudlo sa usa ka hulagway ni Jesus kon madungog nila ang pulong “manluluwas.” Pagpamatuod nga tungod kay si Jesukristo nag-antos ug namatay alang kanato ug nabanhaw, Siya mao lamang ang makaluwas kanato gikan sa sala ug kamatayon.
Kita mahimong makabaton og “pagkamatarong sama sa mga balod sa dagat” (Isaias 48:18).
Ang pagtuman sa mga kasugoan sa Dios magdala og kalinaw.
Ang Ginoo nagsaad og kalinaw sama sa “suba” ug pagkamatarong sama “sa mga balod sa dagat” ngadto niadtong kinsa motuman sa Iyang mga kasugoan.
Posible nga mga Kalihokan
-
Basaha ngadto sa mga bata ang Isaias 48:18. Dapita sila nga lihokon ang ilang mga kamot ug mga bukton sama sa usa ka suba ug mga balod. Paghisgot mahitungod kon sa unsang paagi ang pagtuman sa mga kasugoan sa Dios nakatabang kanimo nga mobati nga malinawon sama sa usa ka suba o lig-on sama sa usa ka balod.
-
Pagdrowing og suba diha sa pisara. Tabangi ang mga bata nga maghunahuna og mga kasugoan nga gihatag sa Dios kanato. Isulat kadto nga mga kasugoan diha sa mga piraso sa papel (o pagdrowing og yano nga hulagway niini), ug papuli-puliha ang mga bata sa pagtaod sa mga kasugoan ngadto sa suba diha sa pisara. Tabangi ang mga bata nga makakat-on kon sa unsang paagi ang pagtuman sa mga kasugoan makahatag og kalinaw.
-
Kantaha og dungan ang usa ka awit mahitungod sa mga kasugoan, sama sa “Sunda ang Kasugoan” (Songbook sa mga Bata, 68–69). Unsay gitudlo niini nga awit mahitungod kon nganong gikinahanglan nato nga motuman sa mga kasugoan?
Itudlo ang Doktrina: Mas Dagko nga mga Bata
Makatabang ako sa pag-andam sa “dalan sa Ginoo.”
Motabang kita sa pagtuman sa panagna sa Isaias 40:3–5 pinaagi sa pagtabang sa uban nga modawat sa Ginoo sa ilang mga kinabuhi.
Posible nga mga Kalihokan
-
Hangyoa ang usa ka bata nga mobasa sa Isaias 40:3 samtang ang uban nga mga bata mobasa og usa sa mosunod nga mga tudling ug mangita og susama nga mga pulong ug mga pulongan: Marcos 1:3–4 (Juan Bautista); Alma 7:9 (Alma); Doktrina ug mga Pakigsaad 33:10–11 (mga misyonaryo sa ulahing mga adlaw). Tabangi sila sa pagtino kon kinsa ang nag-andam sa “dalan sa Ginoo” diha sa matag tudling. Giunsa niini nga mga tawo pag-andam sa dalan sa Ginoo? Unsay atong mabuhat aron makatabang?
-
Pagdrowing og agianan diha sa pisara, ug basaha uban sa mga bata ang Isaias 40:3–5. Hangyoa ang mga bata sa paglista og mga babag nga mahimong makapugong sa mga tawo sa pagsunod sa Manluluwas, ug dapita sila sa pagdrowing og mga babag diha sa agianan. Ipapapas nila ang mga babag samtang maghisgot ka kabahin sa mga paagi nga kita makatabang sa mga tawo sa pagbuntog niini.
Ang Ginoo nag-uban kanako sa akong mga pagsulay.
Kon mohimo kita og mga pakigsaad sa Ginoo, Siya mohimo og mga saad nga mag-uban kanato—bisan atol sa atong mga pagsulay. Tabangi ang mga bata nga makita ang ilang mga kaugalingon nga kabahin sa katawhan sa pakigsaad sa Ginoo ug isip mga magdadawat sa Iyang mga saad.
Posible nga mga Kalihokan
-
Isulat sa pisara ang Ako ang… ug Ako mo… Dapita ang mga bata sa pagbasa sa Isaias 41:10 ug Isaias 43:1–5 aron mahibaloan kon unsay gisulti sa Ginoo kon kinsa Siya ug unsay gisulti Niya nga buhaton Niya. Unsa ang ubang mga pulongan nga gibalik-balik niini nga mga bersikulo? Sa unsang paagi kini nga mga mensahe maghatag kanato og kahupayan ug paglaom atol sa lisod nga mga panahon?
-
Basaha og dungan ang Isaias 48:10, ug hisgoti kon unsa ang usa ka hudno ug ang lain-laing paagi nga kini gigamit. Ipasabot nga ang mga puthaw giputli sa usa ka hudno. Nganong ang usa ka hudno usa ka maayo nga paagi sa paghulagway og pag-antos? Sa unsang paagi nga ang atong mga pag-antos makaputli kanato? (Tan-awa sa Alma 62:41).
Ang Ginoo dili gayod malimot kanako.
Kon mobati kita nga layo gikan sa Ginoo tungod sa sala, mga pagsulay, o sa bisan unsang rason, ang mensahe sa Isaias 49:14–16 makahatag og kahupayan.
Posible nga mga Kalihokan
-
Hangyoa ang mga bata sa pagbasa sa Isaias 49:14. Unsa ang makahimo sa mga tawo nga mobati nga nalimtan o gibiyaan? Sa unsang paagi nga kita makatabang sa uban nga mahibalo nga ang Ginoo wala makalimot kanila? Sa unsang paagi nga makahibalo kita nga Siya wala makalimot kanato?
-
Dapita ang mga bata sa paghisgot mahitungod sa usa ka tawo nga ilang nailhan nga dili nila makalimtan, sama sa usa ka sakop sa pamilya o higala. Hisgoti kon sa unsang paagi mobati ang usa ka mahigugmaon nga inahan mahitungod sa iyang mga anak ug kon sa unsang paagi ang Ginoo mobati mahitungod kanato. Dayon hangyoa ang mga bata sa pagbasa sa Isaias 49:15–16. Sumala niini nga mga bersikulo, nganong dili gayod kita makalimtan sa Ginoo? Dapita ang mga bata sa pagpaambit sa ilang mga pagbati mahitungod ni Jesukristo.
Awhaga ang Pagkat-on diha sa Panimalay
Dapita ang mga bata sa paghunahuna mahitungod sa usa ka butang nga ilang nakat-onan karon nga gusto nilang makat-onan pa og dugang. Tabangi sila sa pagsulat og pangutana kabahin niini nga ilang mapangutana sa usa ka ginikanan o sa lain nga sakop sa pamilya.
Pagpalambo sa Atong Pagtudlo
Ipahiangay sa mga panginahanglan sa mga bata. Kon nagtudlo ka og mas gagmay nga mga bata apan nadasig sa pagtudlo kanila sa usa sa mga baroganan niini nga latid ubos sa “Mas Dagko nga mga Bata” o vice versa, ipahiangay ang usa sa gisugyot nga mga kalihokan alang niana nga baroganan aron matubag ang mga panginahanglan ug mga abilidad sa mga bata nga imong gitudloan.