tulo ka mga lalaki nakigsulti sa usa ka lalaki diha sa nataran

The Judgments of Job [Ang mga Paghukom Kabahin ni Job], ni Joseph Brickey

Agosto 1–7

Job 1–3; 12–14; 19; 21–24; 38–40; 42

“Bisan Pa Niini sa Iyang Atubangan Ako Magalaban”

Samtang ikaw nagtuon sa asoy ni Job, unsa nga mga mensahe ang imong nakaplagan alang sa imong kaugalingong kinabuhi? Hain niini nga mga mensahe imong gibati nga gikinahanglan sa mga kabataan nga imong gitudloan nga madunggan?

I-rekord ang Imong mga Panghunahuna

pagpaambit nga icon

Dapita ang Pagpaambit

Ipakita sa mga kabataan ang hulagway ni Job (tan-awa diha sa outline niini nga semana sa Dali, Sunod Kanako—Alang sa mga Indibidwal ug mga Pamilya). Pangutan-a ang mga kabataan unsa sa ilang hunahuna ang gibati kaha sa tawo diha sa hulagway. Dapita sila sa pagpakigbahin og bisan unsa pa nga ilang nahibaloan mahitungod ni Job.

pagtudlo nga icon

Itudlo ang Doktrina: Mas Gagmay nga mga Bata

Job 1–2; 13:15

Ang Langitnong Amahan ug si Jesukristo motabang kanako atol sa malisud nga mga panahon samtang ako adunay hugot nga pagtuo diha Kanila.

Misalig si Job sa Dios ug nakahimo sa pagpabilin nga matinud-anon bisan gisinati niya ang malisud kaayo nga mga pagsulay. Ang istorya ni Job makatabang sa mga kabataan sa paglig-on sa ilang hugot nga pagtuo diha sa Langitnong Amahan ug ni Jesuskristo aron sila maandam sa pag-atubang sa ilang kaugalingong malisud nga mga pagsulay.

Posible nga mga Kalihokan

• Dapita ang mga kabataan sa pagpakigbahin unsay ilang nahibaloan mahitungod ni Job, ug tabangi sila sa pagsabut unsay nahitabo ngadto kaniya (tan-awa sa Job 1–2; “Job” diha sa Mga Istorya sa Daang Tugon). Pangutan-a ang mga kabataan unsa kaha ang ilang bation kon sila pa si Job. Kinsa ang makatabang kanato kon makaguol nga mga butang mahitabo sa atong mga kinabuhi? Pagpakita og usa ka hulagway ni Jesukristo, ug ipasabut nga ang hugot nga pagtuo ni Job diha sa Ginoo mitabang kaniya atol sa iyang mga pagsulay (tan-awa sa Job 1:21).

• Basaha ngadto sa mga kabataan ang mga pulong ni Job diha sa Job 13:15: “Sa iyang atubangan ako magalaban.” Aron sa pagtabang sa mga kabataan nga makasabut unsay kahulugan niining magalaban [pagsalig] diha sa Dios, pakigsulti ngadto kanila mahitungod sa ubang mga tawo nga sila mosalig. Sama pananglit, unsay atong gisalig sa atong mga ginikanan nga buhaton? Unsay gisalig nato sa atong mga magtutudlo nga buhaton? Unsay gisalig nato sa Langitnong Amahan ug ni Jesukristo nga buhaton? Ipahayag ang imong pagsalig diha sa Langitnong Amahan ug ni Jesukristo, ug tabangi ang mga kabataan sa paghunahuna og mga paagi sila makapakita nga sila nahigugma ug misalig Kanila.

Job 19:25

Si Jesukristo mao ang akong Manunubos.

Si Job nakalahutay sa iyang mga pagsulay ug mga pag-antus tungod sa iyang hugot nga pagtuo diha sa Ginoo. Unsaon nimo pagtabang ang mga kabataan nga matukod ang ilang hugot nga pagtuo nga si Jesukristo mao ang ilang Manunubos?

Posible nga mga Kalihokan

• Pagpakita og usa ka hulagway ni Jesus diha sa krus o gilubong sa lubnganan (tan-awa sa Libro sa mga Hulagway sa Ebanghelyo, nus. 57, 58). Hangyoa ang mga kabataan sa pagpasabut unsay nahitabo diha sa hulagway. Basaha ngadto sa mga kabataan ang pagpamatuod ni Job diha sa Job 19:25. Pagpakita og usa ka hulagway sa nabanhaw nga Manluluwas (tan-awa sa Libro sa mga Hulagway sa Ebanghelyo, nus. 59, 60; tan-awa usab ang pahina sa kalihokan niini nga semana), ug pagpamatuod nga si Jesukristo nabanhaw ug buhi karon. Nganong mapasalamaton kita nga si Jesus nabanhaw?

• Pagpakita og hulagway ni Job, ug ipasabut nga si Job diha sa hilabihan nga ka sakit tungod kay ang iyang panit puno sa mga nuka. Nawad-an siya sa iyang panimalay, ug ang iyang mga anak nangamatay. Apan si Job nahibalo og usa ka butang nga importante kaayo nga mihatag kaniya og kahupayan. Basaha ang Job 19:25, ug pangutan-a ang mga kabataan unsay nahibaloan ni Job. Pakigbahin sa mga kabataan giunsa nimo pagkahibalo nga si Jesukristo buhi, ug dapita sila sa pagpakigbahin sa ilang mga pagpamatuod kabahin Kaniya.

  lalaki nagtan-aw ngadto sa itaas

  Job, ni Gary L. Kapp

• Hangyoa ang mga bata sa pagkolor sa pahina sa kalihokan niini nga semana. Samtang sila nagbuhat, tugtuga o kantaha ang usa ka awit mahitungod sa Pagkabanhaw ni Jesus, sama sa “Nabuhi ba Gayud Pag-usab si Jesus?” o “Si Jesus Nabanhaw” (Songbook sa mga Bata, 45, 44). Hangyoa sila sa pagpakigbahin kon unsa ang ilang gibati mahitungod ni Jesus, ug tabangi sila sa pagsabut nga kita makabaton og maayong mga pagbati gikan sa Espiritu Santo aron sa pagtabang kanato nga makahibalo nga si Jesukristo tinuod.

pagtudlo nga icon

Itudlo ang Doktrina: Mas Dagko nga mga Bata

Job 1–2; 12, 19

Ang Langitnong Amahan ug si Jesukristo motabang kanako sa pagbuntog sa akong mga hagit samtang ako adunay hugot nga pagtuo diha Kanila.

Ang tanan adunay malisud nga mga adlaw, ug ang pipila sa mga tawo adunay mga pagsulay nga naglungtad og dugay nga panahon. Ang hugot nga pagtuo ni Job diha sa Dios mipalahutay kaniya ngadto sa iyang mga pagsulay. Hunahunaa kon sa unsa nga paagi ang iyang istorya nakatabang sa mga kabataan sa pagtukod sa ilang hugot nga pagtuo diha sa Langitnong Amahan ug ni Jesukristo aron nga sila makahimo sa pag-atubang sa ilang mga pagsulay, karon ug sa umaabut.

Posible nga mga Kalihokan

• Hangyoa ang mga bata sa pagpakigbahin sa unsay ilang nahibaloan mahitungod sa istorya ni Job. Unsa nga matang sa tawo siya? Unsay nahitabo kaniya? Giunsa niya pagtubag ang iyang mga hagit? Itudlo kanila ang mga bersikulo diha sa Job 1–2 sa pagtabang kanila sa pag-asoy sa istorya (tan-awa sa Job 1:1, 13–22; 2:7–10; tan-awa usab ang “Job” diha sa Mga Istorya sa Daang Tugon). Dapita ang mga kabataan sa pagpakigbahin sa unsay ilang gibati nga mao ang pinaka-mensahe sa istorya ni Job.

• Pagpakita og pipila ka mga hulagway ni Jesukristo nga nakig-istoryahanay sa uban, ug pangutan-a ang mga kabataan unsay ilang gibati nga gitudlo niini nga mga hulagway mahitungod kon kinsa si Jesukristo ug sama Siya sa unsa. Unsa pa ang atong nahibaloan mahitungod Kaniya? Dapita ang mga kabataan sa pagbasa og pipila sa mosunod nga mga bersikulo aron mahibaloan ang pipila ka mga butang nga nasayran ni Job mahitungod sa Ginoo Job 12:10, 13, 16; 19:25–27. Nganong bililhon nga mahibalo niining mga butanga mahitungod sa Manluluwas?

• Dapita ang mga kabataan sa pagbasa sa Job 19:14–19, ug pangutan-a sila unsay gisulti niini nga mga bersikulo mahitungod kon giunsa sa mga tawo pagtagad si Job. Unsa kahay atong bation kon kini mahitabo kanato? Dapita ang mga kabataan sa pagbasa sa Job 19:23–27 aron mahibaloan giunsa pagkaplag ni Job og kahupayan dinhi niini nga sitwasyon. Unsa ang gitudlo niini nga mga bersikulo kanato mahitungod sa Manluluwas? Nganong importante nga mahibalo nga Siya buhi ug nahigugma kanato? (tan-awa sa Juan 17:3).

• Panganta og dungan sa usa ka himno mahitungod sa Manluluwas, sama sa “Buhi Ang Manunubos Ko, Niini Nasayud Ako” (Mga Himno, nu. 80). Unsa ang gisugyot niini nga awit mahitungod kon nganong importante ang pagbaton og pagpamatuod nga si Jesukristo buhi? Sultihi ang mga kabataan kon giunsa nimo pagkahibalo nga ang Manluluwas buhi ug nganong ikaw mapasalamaton alang niana nga kahibalo. Awhaga sila sa pagpakigbahin sa ilang mga pagbati ug ingon usab sa mga pagpamatuod.

Job 19:13–19; 22:5

Ang maayong mga higala mobayaw ug moawhag sa usag usa.

Sa dihang si Job nagsugakod, ang iyang mga higala miingon nga ang Dios nagsilot kaniya tungod kay siya nakasala. Kini nga istorya makatabang kanimo sa pagtudlo sa mga kabataan og usa ka mas maayong paagi sa pagtubag kon ang usa ka higala adunay mga hagit (tan-awa sa Job 16:1-5).

Posible nga mga Kalihokan

• Hangyoa ang mga kabataan sa pagribyu sa daghang malisud nga mga butang nga nahitabo ngadto ni Job (tan-awa sa Job 1:13–19; 2:7). Pagbasa og dungan sa Job 19:14, 19, mangita kon giunsa sa mga higala ni Job sa pagtan-aw sa iyang mga pagsulay (tan-awa usab sa Job 22:1–5). Dapita ang mga kabataan sa paghanduraw nga sila mga higala ni Job––unsaon nila sa pagsulay og tabang kaniya? Awhaga sila sa paghunahuna og usa ka higala kinsa tingali nagsinati og malisud nga panahon ug sa pagplano og usa ka butang nga ilang mabuhat sa pagpakita og gugma ug suporta ngadto sa ilang higala.

• Hangyoa ang mga bata sa paglista og pipila ka mga kalidad sa usa ka maayong higala ug sa paghingalan og usa ka higala kinsa aduna niini nga mga kalidad. Pagpakita og hulagway ni Jesukristo. Sa unsa nga mga paagi si Jesus usa ka maayong higala sa matag usa kanato? Unsaon nato pagsunod sa Iyang ehemplo?

pagkat-on nga icon

Awhaga ang Pagkat-on diha sa Panimalay

Dapita ang mga kabataan sa pagpakigbahin ngadto sa usa ka sakop sa pamilya o higala og paagi nga ang Langitnong Amahan ug si Jesukristo makatabang kanila kon sila adunay malisud nga panahon.

Pagpalambo sa Atong Pagtudlo

Ipamatuod ang gisaad nga mga panalangin. Kon ang Ginoo mohatag og usa ka sugo, Siya kanunay mosaad og mga panalangin tungod sa pagsunod niana nga sugo. Kon ikaw modapit og Primary nga mga kabataan sa pagpuyo og piho nga baruganan, pagpakigbahin og mga saad nga gihimo sa Dios pinaagi sa mga propeta ngadto niadtong kinsa nagpuyo niana nga baruganan. Mahimo ka usab nga mopamatuod kabahin sa mga panalangin nga imong nadawat pinaagi sa pagpuyo sa baruganan.

pahina sa kalihokan: Si Jesukristo mao ang akong Manunubos