“Agosto 15–21. Salmo 49–51; 61–66; 69–72; 77–78; 85–86: ‘Igapahayag Ko ang Gibuhat Niya sa Akong Kalag,’” Dali, Sunod Kanako—Alang sa Primary: Daang Tugon 2022 (2021)
“Agosto 15–21. Salmo 49–51; 61–66; 69–72; 77–78; 85–86,” Dali, Sunod Kanako—Alang sa Primary: 2022
Saving That Which Was Lost, [Pagluwas Niana nga Nawala], ni Michael T. Malm
Agosto 15–21
Salmo 49–51; 61–66; 69–72; 77–78; 85–86
“Igapahayag Ko ang Gibuhat Niya sa Akong Kalag”
Ang imong ehemplo isip tigkat-on sa ebanghelyo makahatag og gamhanang impluwensya diha sa mga kabataan. Pakigbahin kanila sa imong espirituhanong mga kasinatian sa pagkat-on sa ebanghelyo.
I-rekord ang Imong mga Panghunahuna
Dapita ang Pagpaambit
Pakigbahin sa mga kabataan og bersikulo gikan sa salmo, himno, o awit sa mga kabataan nga nagtabang kanimo sa pagbati sa gugma sa Manluluwas. Hatagi ang matag bata og higayon sa pagbuhat sa ingon.
Itudlo ang Doktrina: Mas Gagmay nga mga Bata
Kon ako naghimo og sayop nga pagpili, si Jesukristo makatabang kanako sa pag-usab.
Tabangi ang mga kabataan sa pagsabut nga ang mga kasaypanan mga kabahin sa mortal nga kinabuhi ug nga kita makadawat og tabang gikan ni Jesukristo sa pagbuntog niini.
Posible nga mga Kalihokan
-
Pakigbahin og yano nga istorya, gikan sa imong kinabuhi o gikan sa Higala o Liahona, mahitungod sa usa ka bata kinsa mihimo og sayop nga pagpili apan nakadawat og tabang gikan sa Manluluwas nga mahimong mas maayo. Basaha ang Salmo 51:10, ug pakigbahin sa kalipay nga imong gibati sa dihang ang Manluluwas nagtabang kanimo sa pagbaton og “usa ka ulay nga kasingkasing” ug “espiritu nga matul-id.”
-
Ipakita sa mga kabataan ang pahina sa kalihokan niini nga semana. Itudlo ang matag hulagway, ug hangyoa ang mga kabataan sa paghulagway sa unsay ilang nakita. Basaha ang mga ulohan sa pagtabang sa mga kabataan sa pagkat-on mahitungod sa paghinulsol ug pagpasaylo.
Ako makasulti sa uban mahitungod ni Jesukristo.
Ang mga pulong nga puno sa hugot nga pagtuo sa usa ka bata adunay talagsaong gahum sa pagtandog sa mga kasingkasing. Hatagi ang mga kabataan og pagsalig nga ang ilang pagpamatuod ni Jesukristo makatabang sa uban.
Makasulti kita ngadto sa uban mahitungod sa unsay nabuhat ni Jesus alang kanato.
Posible nga mga Kalihokan
-
Basaha ngadto sa mga kabataan ang Salmo 71:8, ug pagdrowing og dako nga ba-ba diha sa pisara. Hangyoa sila sa pagtabang kanimo sa “pagpuno” sa ba-ba og mga butang nga kita makasulti sa uban mahitungod ni Jesukristo.
-
Ipalibut ang usa ka hulagway ni Jesuskristo. Hangyoa ang mga kabataan sa pagpuli-puli og gunit sa hulagway ug sa pagsulti og usa ka butang nga ilang nahibaloan mahitungod Kaniya. Unsa ang Iyang nabuhat alang kanato? (Ang mga hulagway diha sa Libro sa mga Hulagway sa Ebanghelyo makahatag og pipila ka mga ideya.)
Ang Langitnong Amahan maminaw ug motubag sa akong mga pag-ampo.
Daghan sa mga salmo ang sama sa mga pag-ampo ngadto sa Dios alang sa panabang, paggiya, o panalipod. Hunahunaa kon unsaon nimo sa pagtabang ang mga kabataan sa pagtukod sa ilang hugot nga pagtuo nga ang Langitnong Amahan maminaw ug magtubag niini kon sila mag-ampo.
Posible nga mga Kalihokan
-
Pangutan-a ang mga kabataan kon unsaon nila pagsulti ang mga tawo kinsa nagpuyo sa layo. Pakit-a sila og mga butang nga atong magamit sa pagpakigsulti, sama sa telepono o sulat. Basaha ngadto kanila ang Salmo 86:7. Sa unsa nga paagi kita “magasangpit” sa Langitnong Amahan? Sa unsa nga paagi Siya magtubag kanato?
-
Dapita ang mga kabataan sa pag-aksyon sa mga butang nga ilang gibuhat sa matag adlaw, sama sa pagmata, pagkaon sa pamahaw, pagbiya padulong sa eskwelahan, o sa pagkatulog. Tabangi sila sa pagpangita og mga panahon atol sa adlaw nga sila makaampo ngadto sa Langitnong Amahan. Ipamatuod nga kita makaampo ngadto Kaniya sa bisan unsa nga oras, ug Siya kanunay maminaw kanato.
-
Panganta og dungan sa usa ka awit mahitungod sa pag-ampo, sama sa “Ampo sa Usa ka Bata” (Songbook sa mga Bata, 6–7). Pagsulti mahitungod sa usa ka panahon sa dihang ang Dios mitubag sa imong mga pag-ampo.
“Akong pagasaysayon ang mga buhat sa Ginoo.”
Ang mga kasulatan makatukod sa atong hugot nga pagtuo diha ni Jesukristo pinaagi sa pagtabang kanato sa paghinumdom sa Iyang “mga kahibulongan sa kakaraan.”
Posible nga mga Kalihokan
-
Basaha ngadto sa mga kabataan ang Salmo 77:11, ug sultihi sila sa unsa nga paagi ikaw naninguha nga “pagasaysayon ang mga buhat sa Ginoo,” lakip ang Iyang buhat diha sa imong kinabuhi. Dapita ang mga kabataan sa pagdrowing og mga hulagway sa pagtabang kanila sa paghinumdom sa mahinungdanong mga butang nga Iyang nabuhat.
-
Pagpakita og mga hulagway gikan niini nga basahon o gikan sa Dali, Sunod Kanako––Alang sa mga Indibidwal ug mga Pamilya sa pagpahinumdom sa mga kabataan sa mga istorya nga ilang nakat-unan diha sa Daang Tugon mahitungod sa mahinungdanong mga butang nga nabuhat sa Ginoo alang sa Iyang mga katawhan. Pangutan-a sila hain niini nga mga istorya ang ilang labing nagustuhan ug ngano.
Itudlo ang Doktrina: Mas Dagko nga mga Bata
Ang paghinulsol mao ang kausaban sa kasingkasing.
Ang Salmo 51 naglangkob og daghang mga kamatuoran mahitungod sa paghinulsol. Unsaon nimo sa pagtabang ang mga kabataan sa pagdiskubre niini nga mga kamatuoran?
Posible nga mga Kalihokan
-
I-assign ang matag bata sa pagbasa og usa sa mga pakisayran sa kasulatan sa pahina sa kalihokan niini nga semana. Hangyoa sila sa pagpangita og mga pulong nga nagtudlo kanila og usa ka butang mahitungod sa paghinulsol. Ipasulat kanila ang mga pulong diha sa pisara. Human ang tanan makapakigbahin, pangutan-a ang mga kabataan unsaon nila sa pagtubag ang usa ka higala kinsa mangutana, “Unsa ang kahulugan nga maghinulsol?”
-
Pagdrowing og kasingkasing diha sa pisara. Hangyoa ang mga kabataan sa paghingalan og pipila ka mga sala nga si Satanas nagtintal kanato sa pagbuhat. Isulat kadto nga mga sala sulod sa kasingkasing. Hangyoa ang mga kabataan sa pagpangita sa pulong nga kasingkasing diha sa Salmo 51:10, 17. Unsa ang gitudlo kanato niini nga mga bersikulo mahitungod sa paghinulsol? (tan-awa usab sa bersikulo 6). Tabangi ang mga kabataan sa pagsabut nga bisan og kita mohunong sa pagbuhat og sala, ang atong mga kasingkasing nagkinahanglan nga mausab aron kita makahinulsol. Hangyoa ang mga kabataan sa pagpapas sa mga sala sa sulod sa kasingkasing diha sa pisara ug sa pagsulat og bag-o nga mga pulong nga naghulagway sa kausaban sa atong mga kasingkasing kon kita maghinulsol. Ipakigbahin ang imong pagpamatuod nga ang Dios “makabuhat diha [kanato] og usa ka ulay nga kasingkasing” kon kita maghinulsol (bersikulo 10).
“Akong pagasaysayon ang mga buhat sa Ginoo.”
Gitudloan sa mga Israelite ang ilang mga anak mahitungod sa mga milagro nga nabuhat sa Dios alang kanila aron nga ang mga anak “mobutang sa ilang paglaum sa Dios” (Salmo 78:7).
Posible nga mga Kalihokan
-
Hangyoa ang mga kabataan sa pagpakigbahin kanimo sa pipila sa ilang mga kinaham nga mga istorya gikan sa mga kasulatan (ang mga hulagway gikan sa Libro sa mga Hulagway sa Ebanghelyo mahimong makatabang kanila sa paghunahuna sa mga istorya). Nganong nagustuhan nila kini nga mga istorya? Unsa ang gitudlo kanato niini nga mga istorya mahitungod sa Ginoo? Pagbasa og dungan sa Salmo 77:11; 78:7. Nganong importante nga “pagasaysayon ang mga buhat sa Ginoo”?
-
Hangyoa ang mga kabataan sa pagbasa sa Salmo 66:16 ug paghunahuna o pagsulat sa mga tubag sa pangutana “Unsa ang nabuhat sa Ginoo alang sa akong kalag?” Dayon himoa nga ipakigbahin nila ang ilang mga tubag, kon sila gusto. Unsa ang atong mabuhat aron “kanunay mahinumdom” (Moroni 4:3; 5:2) unsa ang nabuhat sa Ginoo alang kanato?
Ang Ginoo gusto nga mopasaylo.
Kon kita makasala, gusto ni Satanas kanato nga mohunahuna nga ang Ginoo dili gayud mopasaylo kanato. Tabangi ang mga kabataan sa pagtukod sa ilang hugot nga pagtuo nga ang Ginoo “andam sa pagpasaylo; ug madagayaon sa mahigugmaong kalolot” (Salmo 86:5).
Posible nga mga Kalihokan
-
Pagpakita og usa ka hulagway sa Manluluwas (sama sa usa diha sa Dali, Sunod Kanako––Alang sa mga Indibidwal ug mga Pamilya), ug pangutan-a ang mga kabataan unsa nga pulong ang ilang gamiton sa paghulagway Kaniya. Dapita sila sa pagpangita og mga pulong nga naghulagway Kaniya diha sa Salmo 86:5, 13, 15. Kon gikinahanglan, tabangi sila sa pagpatin-aw niini nga mga pulong. Unsa ang atong isulti ngadto sa usa ka higala kinsa mobati nga ang Dios masuko kanila kon sila makasala?
-
Kanta uban sa mga kabataan og usa ka awit nga imong gibati nga motabang kanila sa pagsabut sa mapasayloong kinaiya sa Manluluwas, sama sa “Ako Nagpabilin nga Natingala” (Mga Himno, nu. 114). Ipakigbahin ang imong pagpamatuod nga si Jesukristo gusto nga mopasaylo kanato.
Awhaga ang Pagkat-on diha sa Panimalay
Dapita ang matag bata sa paghingalan og usa ka rason nga ilang gihigugma ang Langitnong Amahan ug si Jesukristo. Awhaga sila sa pagpakigbahin niana nga rason ngadto sa usa ka tawo sa panimalay. Pagpamatuod nga ang ilang mga pulong mopanalangin niana nga tawo.
Pagpalambo sa Atong Pagtudlo
Pahayag og pagsalig. “Kon mobati ang mga [kabataan] mobati nga misalig ka kanila, ang ilang pagsalig diha sa ilang balaang potensyal motubo. … Mahigugmaong ipahibalo nga nasayud ka nga sila mahimong responsable sa ilang kaugalingong pagkat-on” (Pagtudlo sumala sa Pamaagi sa Manluluwas, 28).