“Agosto 8–14. Salmo 1–2; 8; 19–33; 40; 46: ‘Ang Ginoo Mao ang Akong Magbalantay,’” Dali, Sunod Kanako—Alang sa Primary: Daang Tugon 2022 (2021)
“Agosto 8–14. Salmo 1–2; 8; 19–33; 40; 46,” Dali, Sunod Kanako—Alang sa Primary: 2022
Ang Ginoo Mao ang Akong Magbalantay, ni Yongsung Kim, havenlight.com
Agosto 8–14
Salmo 1–2; 8; 19–33; 40; 46
“Ang Ginoo Mao ang Akong Magbalantay”
Kini nga outline nagsugyot og pipila ka maanindot nga mga tudling diha sa Salmo nga mopanalangin sa mga kabataan, apan mahimo kang mopili sa ubang bersikulo sa Salmo. Sunda ang paggiya sa Espiritu.
I-rekord ang Imong mga Panghunahuna
Dapita ang Pagpaambit
Sa pipila ka nag-unang mga adlaw, dapita ang pipila ka mga kabataan sa pagdala nganha sa klase og mga drowing nga nagrepresentar og mga butang nga nabasahan nila ug sa ilang mga pamilya mahitungod sa Salmo niini nga semana, sama sa karnero (tan-awa sa Salmo 23:1), usa ka kopa (tan-awa sa Salmo 23:5), o usa ka kasingkasing (tan-awa sa Salmo 24:4). Dapita sila sa pagsulti mahitungod sa ilang mga drowing ug usa ka bersikulo gikan sa Salmo nga naghisgot niini.
Itudlo ang Doktrina: Mas Gagmay nga mga Bata
“Ang mga langit nagapahayag sa himaya sa Dios.”
Ang Salmo 19 ug 33 nagtudlo nga kita makakita og ebidensya sa himaya ug kaayo sa Dios nga naglibut kanato diha sa Iyang maanindot nga mga nilalang. Tabangi ang mga kabataan sa pagkat-on nga makakita sa gahum sa Dios diha sa kalibutan nga naglibut kanila.
Posible nga mga Kalihokan
-
Pakit-a ang mga kabataan og pipila ka mga hulagway sa maanindot nga mga butang nga gilalang sa Dios, o patan-awa og dungan sa gawas sa bintana aron makita kining mga butanga. Pangutan-a ang mga kabataan kon unsa ang ilang nagustuhan mahitungod sa mga nilalang sa Langitnong Amahan. Basaha bisan hain sa Salmo 19:1 o 33:5, ug pangutan-a ang mga kabataan kon unsa ang ilang gibati mahitungod sa Langitnong Amahan sa dihang ilang nakita ang Iyang mga nilalang.
-
Panganta og dungan sa usa ka awit mahitungod sa mga nilalang sa Dios, sama sa “Maanindot Kaayo ang Kalibutan” (Songbook sa mga Bata, 123). Dapita ang mga kabataan sa pagpili og usa ka butang nga gilalang sa Dios (sama sa usa ka butang nga gisulti diha sa awit) ug pagdrowing og usa ka hulagway niini aron ipakigbahin uban sa ilang mga pamilya.
“Ang Ginoo mao ang akong magbalantay.”
Kon ang mga kabataan makakat-on sa gagmay pa og edad nga ang Ginoo mao ang ilang magbalantay, sila mas may kalagmitan nga mosunod Kaniya “sa mga dalan sa pagkamatarung.”
Posible nga mga Kalihokan
-
Hatagi ang matag bata og kopya niining semana nga pahina sa kalihokan, o hatagi ang matag usa kanila og hulagway gikan sa pahina sa kalihokan. Dapita sila sa pagpaminaw samtang imong basahon ang Salmo 23. Hangyoa sila sa pagtudlo o sa pagpataas og usa ka hulagway kon ilang madungog nga gihisgutan kini diha sa salmo. Pagpamatuod nga si Jesus nag-amuma kanato, sama nga ang usa ka magbalantay nag-amuma sa iyang karnero.
-
Sultihi ang mga kabataan og pipila ka mga paagi nga imong nahibaloan nga ang Manluluwas nahigugma kanimo. Dapita ang mga kabataan sa pagbarug og tagsa-tagsa ug sa pagpakigbahin og pipila ka mga paagi nga ilang nahibaloan nga si Jesus nahigugma kanila. Panganta og dungan sa usa ka awit nga makahatag kanila og mga ideya, sama sa “Gibati Ko ang Gugma sa Akong Manluluwas” (Songbook sa mga Bata, 42–43).
Si Jesukristo makahimo sa pag-usab sa kaguol ngadto sa kalipay.
Pamalandonga kon unsaon nimo pagtabang ang mga kabataan sa pag-angkon sa ilang kaugalingon nga saksi kabahin sa kalipay nga gitanyag ni Jesukristo kanato kon kita magul-anon.
Posible nga mga Kalihokan
-
Dapita ang mga kabataan sa pagpakaaron -ingnon nga naghilak samtang ikaw nagbasa gikan sa Salmo 30:5, “Ang paghilak mopabilin sa kagabhion.” Dayon hangyoa sila sa pagmalipayon samtang ikaw nagbasa, “Apan ang kalipay moabut sa kabuntagon.” Balika kini nga hugpong sa mga pulong og pipila ka mga higayon ug pagpamatuod ngadto sa mga kabataan nga tungod ni Jesukristo, ang kaguol nga atong gibati niini nga kinabuhi mahimong mailisan og kalipay.
-
Pagpakita og usa ka hulagway sa Manluluwas, ug sultihi ang mga kabataan mahitungod sa pipila ka mga butang nga Iyang nahimo alang kanimo nga nagdala kanimo og kalipay. Hatagi ang matag bata og higayon sa paggunit sa hulagway ug sa pagpakigbahin kon unsa ang nahimo ni Jesus nga nagdala kanila og kalipay.
Itudlo ang Doktrina: Mas Dagko nga mga Bata
Ang Ginoo nagtanyag kanako og kalinaw, kalig-on, ug paggiya.
Daghan sa Salmo nagpamatuod kabahin sa mga panalangin sa Ginoo diha sa atong mga kinabuhi. Makagamit ka sa Salmo aron sa pagtabang sa mga kabataan nga makakat-on sa pagsalig Kaniya ug sa pagdangop Kaniya.
Posible nga mga Kalihokan
-
Isulat diha sa pisara Ang Ginoo mao . Papilia ang mga kabataan og usa o daghan pa sa mosunod nga mga kasulatan aron basahon: Salmo 23:1; 27:1; 28:1; 28:7; 32:7; 46:1. Hangyoa sila sa pagkompleto sa kapahayag diha sa pisara nga naggamit sa unsay ilang nakat-unan gikan sa ilang kasulatan. Tabangi ang mga kabataan sa paghisgot kon unsa ang gitudlo niini nga mga simbolo kanato mahitungod sa Ginoo.
-
Pakit-a ang mga kabataan og hulagway sa usa ka nati nga karnero. Hangyoa sila sa paghingalan og pipila ka mga butang nga gikinahanglan sa usa ka nati nga karnero aron luwas ug himsog, ug awhaga sila sa pagpangita diha sa Salmo 23: 1–4 alang sa mga ideya. Dayon pagpakita og hulagway sa usa ka bata. Unsa ang atong gikinahanglan aron luwas og himsog sa espiritwal nga paagi? Pagbasa og dungan sa Salmo 23, ug pangutan-a ang mga kabataan kon sa unsa nga paagi ang mga butang nga gihimo sa usa ka magbalantay sa karnero dinhi niini nga salmo matandi ngadto sa unsay nahimo ni Jesukristo alang kanato.
Kita kinahanglan gayud nga limpyo sa espiritwal nga paagi ug putli sa pagsulod sa presensya sa Ginoo.
Sa pagsulod sa templo, kita kinahanglan “malinis og mga kamot, ug may usa ka putli nga kasingkasing.”
Samtang ang mga kabataan naglantaw sa pagsulod sa templo usa ka adlaw niana, tabangi sila sa pagpasabut nga sila makaandam nga mahimong limpyo sa espiritwal nga paagi pinaagi sa Pag-ula sa Manluluwas.
Posible nga mga Kalihokan
-
Ipakita sa mga kabataan ang usa ka hulagway sa templo. Dapita sila sa pagbasa sa Salmo 24:3 ug pangita og mga pulong nga nagpahinumdom kanila kabahin sa templo. Dayon pagbasa og dungan sa bersikulo 4 aron makat-unan kon kinsa ang makasulod sa templo (ipatin-aw ang bisan unsa nga mga pulong nga dili sinati). Unsaon pagkahugaw sa atong mga kamot sa pisikal nga paagi? Unsaon pagkahugaw sa atong mga kamot ug mga kasingkasing sa espiritwal nga paagi? Unsaon nato paglimpyo ang atong mga kamot sa pisikal nga paagi? Sa unsang paagi ang Manluluwas makatabang kanato sa paglimpyo sa atong mga kamot ug mga kasingkasing sa espiritwal nga paagi? (Kon kini makatabang, ipasabut nga ang “mga kamot” niini nga bersikulo nagrepresentar sa atong mga lihok ug ang “kasingkasing” nagpresentar sa atong mga tinguha.)
-
Ribyuha uban sa mga kabataan ang mga panginahanglanon aron makadawat og usa ka rekomen sa templo (tan-awa sa Russell M. Nelson, “Panapos nga Pakigpulong,” Liahona, Nob. 2019, 120–22; o pagdapit og usa ka miyembro sa bishopric sa paghisgot niini nga mga panginahanglanon ngadto sa klase). Dapita ang mga kabataan sa pagpili og usa ka butang nga ilang gibati nga nadasig sa pagbuhat aron sa pagpangandam nga mahimong takus sa pagsulod sa templo.
“Humilom kamo ug ilhon ninyo nga Ako mao ang Dios.”
Ang paghatag og panahon nga mahimong may balaang pagtahud ug maghilom, bisan sa kapuliki nga naglibut kanato, makatabang kanato sa pagtukod og mga pagpamatuod nga ang Dios buhi.
Posible nga mga Kalihokan
-
Tabangi ang mga kabataan sa pagmemorya sa unang linya gikan sa Salmo 46:10: “Humilom kamo ug ilhon ninyo nga Ako mao ang Dios.” Pakigsulti uban kanila mahitungod sa unsa kahay kahulugan sa “humilom,” sa pisikal ug mental nga paagi. Pakigbahin uban sa mga kabataan og usa ka kasinatian diin ang “kahilom” milig-on sa imong pagpamatuod sa Langitnong Amahan. Hangyoa ang mga kabataan sa pagpakigbahin og bisan unsa nga mga kasinatian nga sila aduna. Ngano nga ang paghilom importante nga paagi nga mahibalo nga ang Dios buhi?
-
Dapita ang mga kabataan sa pagribyu uban kanimo kon unsa ang ilang buhaton sa panahon sa usa ka ordinaryo nga adlaw. Tabangi sila sa paghunahuna og mga higayon atol sa ilang adlaw nga sila nakasulay sa “paghilom” ug gibati ang kaduol ngadto sa Langitnong Amahan. Awhaga sila sa paghimo og usa ka tumong nga gamiton sa mga higayon atol sa umaabut nga semana sa paglig-on sa ilang pagpamatuod sa Langitnong Amahan.
-
Dapita ang mga kabataan sa paglista og pipila ka mga butang nga atong mabuhat aron makahibalo alang sa atong mga kaugalingon nga ang Langitnong Amahan tinuod ug nga Siya nahigugma kanato. Dapita sila sa pagpili og usa ka butang gikan sa lista nga ilang gusto nga buhaton.
Awhaga ang Pagkat-on diha sa Panimalay
Dapita ang mga kabataan sa pagpili og bersikulo nga ilang nagustohan gikan sa mga salmo nga ilang nahisgutan karong adlawa. Awhaga sila sa pagpakigbahin niana nga bersikulo ngadto sa usa ka sakop sa pamilya o sa usa ka higala.
Pagpalambo sa Atong Pagtudlo
Tutuki ang mga panginahanglan sa mga kabataan. Isip magtutudlo, anaa ikaw sa talagsaon nga kahimtang sa pagsabut sa mga panginahanglan niadtong kinsa imong gitudloan. Ang imong kasinatian, ang imong pagkaila sa mga kabataan, ug ang paggiya sa Espiritu motabang kanimo kon hain nga mga kalihokan sa pagkat-on ang adunay kalagmitan nga motukod sa ilang hugot nga pagtuo diha sa Langitnong Amahan ug ni Jesukristo.