neke’b’eek laj Adan ut li xEva

Laj Adan ut li xEva, xb’aan laj Douglas M. Fryer

10–16 enero

Genesis 3–4; Moises 4–5

Lix tʼanik laj Adan ut li xEva

K’oxlaheb’ li kok’al naq yooqat chixtzolb’al Genesis 3–4 ut Moises 4–5. K’e reetal li na’leb’ taachalq sa’ laa k’a’uxl; naru taataw xkomon aana’leb’ chi jo’kan.

Tz’iib’a li nakak’oxla

reetalil li wotzok

Xkanab’ankileb’ chi wotzok

K’ut xjalam-uuch laj Adan ut xEva (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al), ut patz’ reheb’ li kok’al naq te’xaqliiq ut te’xwotz k’a’ru neke’ril sa’ li jalam-uuch malaj k’a’ru nanaq sa’ xch’ooleb’ chirix li seraq’.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Genesis 3; Moises 4

Laj Adan ut xEva ke’xtaaqe lix k’uub’anb’il na’leb’ li qaChoxahil Yuwa’.

Tenq’aheb’ li kok’al chixtawb’al ru k’a’ru kik’ulman sa’ li awimq Eden ut chan ru naq a’an xtz’aqob’ lix k’uub’anb’il na’leb’ li Dios re li kolb’a-ib’. K’a’ru li osob’tesiik naqak’ul xb’aan li ke’xb’aanu laj Adan ut xEva?

Kok’ k’anjel naru chi b’aanumank

• Re xk’osb’al ru li seraq’ chirix lix t’anik laj Adan ux xEva, oksi “Adan y Eva” (sa’ Relatos del Antiguo Testamento). Tenq’aheb’ li kok’al chixtawb’al ru naq k’uub’anb’il xb’aan li qaChoxahil Yuwa’ naq laj Adan ut xEva te’xk’ux ru li che’.

• K’e reheb’ chixjunileb’ li kok’al jun jalam-uuch li taareetali li seraq’ chirix laj Adan ut xEva (maare jun li che’, jun k’anti’, jun awimq, malaj li Jesukristo). Patz’ reheb’ naq te’xk’ut lix jalam-uuch naq taaye xk’ab’a’ li wan sa’ li jalam-uuch jo’ naxye sa’ Moises 4. Li perel re kok’ k’anjel re li xamaan a’in naru ajwi’ natenq’an.

  xEva naxchap sa’ ruq’ li ru li che’

  Elk sa’ Eden, xb’aan xAnnie Henrie Nader

Moises 4:1–4

Naru tinsik’ ru li us.

Sa’ Moises 4:3, naqatzol naq laj Satanas “kixsik’ xsachb’al lix taql xch’ool li winq, li kink’e chaq laa’in, li Qaawa’ li Dios, re.” Chan ru taatenq’aheb’ li kok’al chiroxloq’inkil lix seeb’aleb’ chixsik’b’al ru li us ut li ink’a’ us?

Kok’ k’anjel naru chi b’aanumank

• Wotz rik’ineb’ li kok’al k’a’ru xasik’ ru xb’aanunkil chiru li kutan a’in, ut tenq’aheb’ chixk’oxlankil k’a’ru xe’xsik’ ru a’an. Yaab’asi Moises 4:3: : “Lix taql xch’ool li winq, li kink’e chaq laa’in, li Qaawa’ li Dios, re.” Ch’olob’ naq li raqal a’an naxk’ut chiqu naq li Dios xk’e chaq qaseeb’al re taqasik’ ru k’a’ru taqab’aanu. Wotz laa b’antioxihom xb’aan naq wan aaseeb’al re xsik’b’al ru li us, ut ch’olob’ xyaalal reheb’ li kok’al naq a’aneb’ ajwi’ naru neke’xsik’ ru li us.

• Wotzeb’ kok’ seraq’ chirix jun ch’ina al naxsik’ ru li us malaj li ink’a’ us, ut patz’ reheb’ li kok’al naq te’xye ma us malaj ink’a’ us li xsik’ ru li ch’ina al (naru neke’xaqli, te’xtaqsi junaq hu chi kutankil, malaj te’xtaqsi li ruq’). Wotz lix nawom aach’ool naq li qaChoxahil Yuwa’ tooxtenq’a chixsik’b’al ru li us, ut patz’ reheb’ li kok’al naq te’xwotz ajwi’ li neke’reek’a.

• Tenq’aheb’ li kok’al chixk’oxlankileb’ li k’a’ru us naru neke’xsik’ ru xb’aanunkil re xtaaqenkil li Jesukristo. B’ichahomaq sa’ komonil jun li b’ich na’aatinak chirix xsik’b’al ru li us, maare “Tinsik’ ru li us” (B’ichleb’aal choq’ reheb’ li Kok’al, 82–83). Seraq’i reheb’ li kok’al junaq hoonal b’ar wi’ xasik’ ru li us, ut ch’olob’ k’a’ru xaweek’a chirix a’an.

Moises 5:4, 8

Naru tintijoq chiru li qaChoxahil Yuwa’.

K’a’ru tento te’xnaw li kok’al chirix li tijok? K’a’ru nakataw sa’eb’ li raqal a’in li naru tixtenq’aheb’?

Kok’ k’anjel naru chi b’aanumank

• Yaab’asi Moses 5:4 choq’ reheb’ li kok’al. Ch’olob’ chiruheb’ naq laj Adan ut xEva moko ke’ru ta chik chi wank rik’in li qaChoxahil Yuwa’ naq ke’el chaq sa’ li awimq, a’b’an ke’ru chi tijok chiru. Ch’olob’ naq nokotijok chiru li qaChoxahil Yuwa’ sa’ xk’ab’a’ li Ralal, a’ li Jesukristo (chi’ilmanq Moises 5:8). K’a’ru naru naqaye re li qaChoxahil Yuwa’ sa’eb’ li qatij?

• Patz’ reheb’ li kok’al naq te’xk’ut k’a’ru neke’xb’aanu naq neke’tijok. Naru ajwi’ nakak’ut xjalam-uuch jun kristiaan li yoo chi tijok (chi’ilmanq Hu reheb’ li Jalam-uuch re li Evangelio, 111–112) re xk’utb’al chiruheb’ li kok’al naq xxulub’ankil li qajolom, xq’alunkil li qatel, ut xmutz’b’al li qu nokoxtenq’a chixk’utb’al qoxloq’ihom.

• Wotz junaq aanumsihom rik’in li tijok malaj lix nawom aach’ool chirix li tijok. B’icha rik’ineb’ li kok’al jun li b’ich na’aatinak chirix li tijok, maare “Natijok jun ch’ina al” (B’ichleb’aal choq’ reheb’ li Kok’al, 6─7).

reetalil li k’utuk

Xk’utb’al li tzol’leb’: Kok’al ak ninqeb’

Genesis 3; Moises 4; 5:10–11

Lix t’anik laj Adan ut xEva a’an xcha’al lix k’uub’anb’il na’leb’ li Dios.

Wi laj Adan ut xEva ke’kana raj sa’ li awimq Eden, ink’a’ raj ke’wan xkok’al ut ink’a’ raj kik’i xna’leb’eb’ re te’wulaq jo’ li qaChoxahil Yuwa’. Naqab’antioxi naq ke’xsik’ ru xk’uxb’al ru li che’ xb’aan naq a’an kooxk’e chi chalk sa’ li ruchich’och’ ut naxk’e qahoonal re naq taqasik’ li junelik yu’am.

Kok’ k’anjel naru chi b’aanumank

• Patz’ reheb’ li kok’al naq te’k’anjelaq sa’ komonil re te’xwotz li seraq’ chirix lix t’anik laj Adan ut xEva. Wotzeb’ li raqal re Genesis 3 re xtenq’ankileb’.

• Tenq’aheb’ li kok’al chixtawb’al sa’ Moises 4:22–25, 29; 5:10–11 k’a’ru kik’ulman xb’aan naq laj Adan ut xEva ke’xk’ux li ru li che’ (chi’ilmanq ajwi’ 2 Nefi 2:19–25). K’a’ut naq li ke’xsik’ ru xb’aanunkil nokorosob’tesi? Chan ru naq li Kolonel xooxtenq’a chi numtaak sa’ xb’een li maak ut li kamk?

Moises 4:1–4

Wan inwankil re tinsik’ ru k’a’ru tinb’aanu.

Ma neke’xk’e reetal li kok’al naq li wankilal re sik’ok-u a’an jun xchaq’al ru maatan? Chan ru naq li seraq’ chirix laj Adan ut xEva tixtenq’aheb’ chixraab’al li maatan a’in?

Kok’ k’anjel naru chi b’aanumank

• K’oxla xb’aanunkil jun ch’ina k’anjel jo’ a’in re xk’utb’al naq aajel ru li qawankil re sik’ok-u: Patz’ reheb’ li kok’al naq te’xb’on li perel re kok’ k’anjel re li xamaan a’in, a’b’an k’e jun ajwi’ xb’onol li b’onleb’ reheb’. K’a’ut naq aajel raj ru naq naab’al raj xb’onol li b’onleb’? Ilomaq Moises 4:1–4 sa’ komonil re teeye k’a’ut naq aajel ru li sik’ok-u sa’ lix k’uub’anb’il na’leb’ li Dios.

• Patz’ reheb’ li kok’al naq te’xwotz junaq xnumsihomeb’ b’ar wi’ xe’xsik’ ru li us malaj li ink’a’ us. Kanab’eb’ chi aatinak chirix li k’a’ru naxk’am chaq li k’a’ru xe’xsik’ ru.

Moises 5:4–15

B’antiox re li Jesukristo naru tinjal ink’a’uxl ut naru tinq’ajq chi wank rik’in li Dios.

Li qaChoxahil Yuwa’ kixtaqla chaq li Jesukristo chixkolb’al qix chiru lix t’anik laj Adan ut xEva. Sa’ xk’ab’a’ lix mayej aj tojol-ix li Jesus tooruuq chi wakliik chi yo’yo chirix li kamk ut taakuye’q li qamaak naq naqajal qak’a’uxl.

Kok’ k’anjel naru chi b’aanumank

• Tz’iib’a wiib’ li na’leb’ chiru li pizarron: Xb’aan laj Adan ut xEva ut Xb’aan li Jesukristo. Tenq’aheb’ li kok’al chixk’eeb’al reetal k’a’ru kixk’am chaq lix t’anik laj Adan ut xEva naq te’ril ru Moises 4:25; 6:48; Romanos 5:12; 2 Nefi 2:22–23. Patz’ reheb’ naq te’xtz’iib’a k’a’ru neke’xtzol rub’el li xb’een na’leb’ sa’ li pizarron. Chirix a’an tenq’aheb’ chixk’eeb’al reetal chan ru naq li Jesukristo kinumta sa’ xb’een li maak ut li kamk naq te’ril ru Moises 5:8–11, 14–15; 6:59; Alma 11:42. Patz’ reheb’ naq te’xtz’iib’a k’a’ru neke’xtzol rub’el li xkab’ na’leb’. K’a’ut naq naqab’antioxi li Jesukristo?

• Patz’ reheb’ li kok’al naq te’xwotz k’a’ru neke’reek’a chirix li Jesukristo.

• Chiru li xamaan, patz’ reheb’ junjunq li kok’al naq te’xsik’ ru jun raqal sa’ li loq’laj hu malaj junaq li b’ich chirix lix tojb’al rix li maak xb’aan li Kolonel re te’xwotz sa’ li tzoleb’aal. Waklesi xch’ooleb’ re naq te’xwotz k’a’ut naq nawulak chiruheb’. B’ichahomaqeb’ sa’ komonil jun malaj wiib’ oxib’ reheb’ li b’ich.

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz li perel re kok’ k’anjel re li xamaan a’in rik’ineb’ lix junkab’al, ut te’aatinaq chirixeb’ li osob’tesiik naqak’ul xb’aan lix t’anik laj Adan ut xEva.

Xkawresinkil qib’ jo’ aj k’utunel

Sik’ laa musiq’ankil aajunes. Maawileb’ li tusleb’ aatin a’in jo’ li na’leb’ tento taataaqe naq tatk’utuq. Oksiheb’ b’an jo’ jun xyo’leb’aal li na’leb’ li te’tenq’anq aawe chixk’ulb’al aamusiq’ankil naq yooqat chixk’oxlankil li neke’raj ru li kok’al nakatzoleb’. (Chi’ilmanq Li k’utuk jo’ li Kolonel, 7.)

perel re kok’ k’anjel: lix t’anik laj Adan ut xEva a’an xcha’al lix k’uub’anb’il na’leb’ li Dios