“Laj Adan ut li xEva,” Eb’ li Esilal sa’ li Najter Chaq’rab’ (2022)
“Laj Adan ut li xEva,” Eb’ li Esilal sa’ li Najter Chaq’rab’
Genesis 2–3; Moises 3–5; Abraham 5
Laj Adan ut li xEva
Xtawb’al xna’leb’ rik’in xsik’b’al ru xb’e
Laj Adan ut xEva, a’aneb’ li xb’een ralal xk’ajol li qaChoxahil Yuwa’ sa’ ruchich’och’. Ke’wan sa’ li ch’ina-usil awimq Eden rik’in k’iila paay chi q’een ut che’. Dios li qaChoxahil Yuwa’ ut li Qaawa’ Jesukristo ke’rula’aniheb’ ut ke’raatinaheb’.
Genesis 2:8–9; 3:8; Moises 3:8–9; Abraham 5:8, 14–19
Li Dios kixkanab’eb’ chixk’uxb’al ru chixjunileb’ li che’, ka’ajwi’ jun ink’a’. Wi ta te’xk’ux ru li che’ re xnawbʼal ru li us ut li inkʼaʼ us, tento raj te’elq sa’ li awimq ut te’kamq. Laj Satanas kixb’alaq’iheb’ laj Adan ut xEva. Laj Satanas kixye naq wi te’xk’ux ru li che’, te’xnaw ru li us ut li ink’a’ us, a’b’an moko te’kamq ta.
Genesis 2:16–17; 3:1–5; Moises 3:9; 4:6–11; Abraham 5:9, 12–13
Li xEva kixsik’ ru xk’uxb’al ru li che’.
Li xEva kixk’e ru li che’ re laj Adan. A’an ajwi’ kixsik’ ru xk’uxb’al.
Li Dios ut li Qaawa’ ke’rula’aniheb’, a’b’an ke’xuwak ut ke’xmuq rib’ laj Adan ut xEva. Li Dios kixpatz’ reheb’ ma ke’xk’ux li ru li cheʼ re xnawbʼal ru li us ut li inkʼaʼ us.
Genesis 3:8–13; Moises 4:13–14
Laj Adan ut xEva ke’xye naq ke’xk’ux ru li che’. Xb’aan li ke’xb’aanu, ke’teneb’aak laj Adan ut xEva chi elk chaq sa’ li awimq Eden. Isinb’ileb’ chaq chiru li Dios, a’b’an a’an kixk’uub’ jun na’leb’ choq’ reheb’. Anajwan ke’xnaw chik ru li us ut li ink’a’ us, ut truuq te’wanq ralal xk’ajol.
Genesis 3:16–24; Moises 4:15–31
Laj Adan ut xEva ke’xye naq te’xpaab’ chixjunileb’ lix taqlahom li Dios. Kik’utman chiruheb’ naq te’xq’axtesi li xul choq’ mayej. Naq ke’paab’an, ke’xtzol xkomon chik chirix li Jesukristo, li Ralal li Dios. K’a’jo’ xnimal xsahileb’ xch’ool xb’aan naq a’an tixtenq’a lix junkab’aleb’ chi sutq’iik rik’in li Dios.