Genesis 11–15; 17; Abraham 1–2

Laj Abraham ut li xSara

Jun yeechi’ihom re rosob’tesinkil chixjunileb’ li kristiaan

jun anjel naxkol laj Abraham chiru laj tij

Laj Abraham kiwan rochoch sa’ li tenamit Ur. Ke’wan li maa’us aj tij li ke’raj xmayejankil chiruheb’ lix pak’b’il dios. Kitijok laj Abraham, ut kikole’ rix xb’aan li Qaawa’.

Abraham 1:1–20

laj Abraham ut li xSara neke’b’eek rik’in li kameey

Toja’ naq li Qaawa’ kixtaqla laj Abraham ut xSara, li rixaqil, chi elk chaq Ur ut chi xik sa’ najtil tenamit. Kixyeechi’i reheb’ naq taarosob’tesiheb’ sa’ xb’eenikeb’.

Genesis 12:1–3; Abraham 2:2–4

laj Abraham ut li xSara neke’xch’olani li karneer

Laj Abraham ut li xSara ke’xpaab’ li Qaawa’ ut ke’el chaq Ur. A’ut ke’raho’ xch’ool xb’aan naq ink’a’ ke’ru chi wank xkok’al. Ke’k’ojob’aak xch’ool xb’aan li Qaawa’. Kixyeechi’i reheb’ naq taayo’laaq xk’uula’al.

Genesis 11:30–31; 15:1–6; 17:2–16; Abraham 2:6–9

li Dios naxk’ut rib’ chiru laj Abraham

Laj Abraham kitijok chiru li Qaawa’ re naq tixtzol xkomon chik chirix. Li Qaawa’ kirula’ani laj Abraham ut Jehova kixk’ab’a’i rib’. Li Jehova ki’ok sa’ sumwank rik’in laj Abraham. Kixyeechi’i re laj Abraham naq tixk’e li tijonelil re. Kixyeechi’i ajwi’ naq rik’in xjunkab’al laj Abraham, te’osob’tesiiq chixjunileb’ li junkab’al sa’ ruchich’och’.

Abraham 2:6–11

laj Abraham ut li xSara neke’b’eek rik’ineb’ li kameey

Naq yookeb’ chi b’eek laj Abraham ut li xSara, ke’teneb’aak chixtawb’al xtzakemq. Ke’xyal kanaak sa’ li ch’och’ Kanahan. Maak’a’ li tzakemq aran, jo’kan naq xkoheb’ toj sa’ Egipto. A’b’an xiwxiw li wank aran Egipto.

Genesis 12:10–20; Abraham 2:21–25

laj Abraham ut li xSara neke’rileb’ li xul

Laj Abraham ut li xSara ke’el chaq Egipto ut ke’sutq’i aran Kanahan. Ke’xk’am chaq li tzakemq ut eb’ li xul li ke’xtaw aran Egipto. Kanahan, a’an jun raqal re li ch’och’ kixyeechi’i li Qaawa’ reheb’.

Genesis 13:1–4, 12; Abraham 2:19

laj Melkisedek na’aatinak rik’in laj Abraham ut li xSara

Jo’ kixyeechi’i, li Qaawa’ tixk’e li tijonelil re laj Abraham. Sa’ jun li kutan laj Abraham ut li xSara ke’xnaw ru jun tiikil rey, aj Melkisedek xk’ab’a’. Laj Abraham kixtoj lix lajetqil re.

Genesis 14:18–24; Alma 13:15

laj Melkisedek narosobʼtesi laj Abraham

Laj Abraham kixk’ul li tijonelil rik’in laj Melkisedek. A’an ajwi’ li tijonelil li ke’xk’ul li profeet aj Adan ut aj Noe.

Lix jaltesinkil ru li Santil Hu xb’aan laj Jose Smith, Genesis 14:36–40; Abraham 1:2–4; Tzol’leb’ ut Sumwank 84:14

laj Abraham ut li xSara

Saheb’ xch’ool laj Abraham ut li xSara sa’ Kanahan, a’b’an toj yookeb’ xk’a’uxl xb’aan naq maak’a’eb’ xkok’al. Ki’ajman naq te’xpaab’ lix yeechi’ihom li Qaawa’ naq sa’ junaq kutan taak’iiq xjunkab’aleb’ ut taarosob’tesi chixjunil li ruchich’och’.

Genesis 13:12; 15:3–6