Երեխաների միության ուսուցիչը երեխայի հետ

Օրինաչափություն ուսուցման համար

Այս ուսուցողական նյութի մեջ դուք կգտնեք հետևյալ երեք քայլով կրկնվող օրինաչափությունը յուրաքանչյուր համառոտ շարադրանքում. հրավիրեք կիսվել, ուսուցանեք վարդապետությունը և խրախուսեք տնային ուսումնասիրությունը: Շատ դեպքերում, երբ ուսուցանեք, այս օրինաչափության տարրերը կարող են համընկնել կամ հանդիպել տարբեր կարգով: Օրինակ՝ մտածեք, որ կիսվելը վարդապետություն ուսուցանելու հնարավորություն է, իսկ վարդապետության ուսուցումը պետք է ներառի կիսվելու հրավերներ: Նմանապես, դասարանային քննարկման ժամանակ կարող է տեղի ունենալ տնային ուսուցման խրախուսում: Թույլ տվեք, որ այս օրինաչափության փոփոխությունները բնականորեն տեղի ունենան, հետևելով Հոգու հուշումներին, որ բավարարեք այն մարդկանց կարիքները, ում ուսուցանում եք:

Հրավիրեք կիսվել

Որպես ամեն դասի բաղկացուցիչ մաս, հրավիրեք երեխաներին կիսվել իրենց զգացումներով, կարծիքներով և ձեր ուսուցանած սկզբունքներին առնչվող իրենց փորձառություններով: Նրանց մեկնաբանությունները կարող են ներառել փորձառություններ, որոնք ունեցել են տանը սովորելիս: Կարող եք նաև կրկնել նախորդ շաբաթվա նրանց սովորածը և հարցնել, թե ինչպես է այն ներգործել իրենց կյանքի վրա:

Ուսուցանեք վարդապետությունը

Եկ, հետևիր ինձ. Անհատների և ընտանիքների համար ձեռնարկը կարող է օգնել ձեզ ավելի լավ հասկանալ վարդապետությունը, որն ուսուցանելու եք երեխաներին: Խորհեք, թե սուրբ գրության ինչ հատվածներով, մեջբերումներով, փորձառություններով, հարցերով և այլ ուսուցողական նյութերով կարող եք կիսվել, որպեսզի օգնեք երեխաներին սովորել և գործել՝ համաձայն իրենց սովորած ավետարանի սկզբունքների։ Օգնեք նրանց ճանաչել Սուրբ Հոգու ազդեցությունը, երբ Նա վկայում է ճշմարտության մասին։ Փնտրեք ստեղծագործական և ոգեշնչված ուղիներ, որպեսզի օգնեք նրանց ոգևորվել իրենց սովորածով։

Գաղափարների համար, թե ինչպես օգտագործել երաժշտությունը վարդապետությունն ուսուցանելու համար, տես «Օգտագործել երաժշտությունը վարդապետություն ուսուցանելու համար» և «Օգնել երեխաներին սովորել և հիշել Երեխաների միության երգերը և օրհներգերը» բաժինները՝ այս ձեռնարկի հավելվածում։

Խրախուսեք տնային ուսումնասիրությունը

Քանի որ տունը ավետարանի ուսումնասիրության կենտրոնն է, որպես Երեխաների միության ուսուցիչ, ձեր նպատակներից մեկն է խրախուսել տնային ուսումնասիրությունը: Ինչպե՞ս կարող եք օգնել երեխաներին իրենց ընտանիքի անդամների հետ կիսվել դասարանում սովորածով: Ինչպե՞ս կարող եք խրախուսել երեխաներին և նրանց ծնողներին տանը շարունակել սովորել Նոր Կտակարանը։