“11–17 Tesema. Faaaliga 6–14: ‘Sa Latou Manumalo … ona o le Toto o le Tamai Mamoe,’“ Sau, Mulimuli Mai ia te A‘u—Mo le Peraimeri: Feagaiga Fou 2023 (2021)
“11–17 Tesema. Faaaliga 6–14,” Sau, Mulimuli Mai ia te A’u—Mo Le Peraimeri: 2023
Ata na tuufaatasia e Eric Johnsen: O Le Aufono Tele, saunia e Robert T. Barrett; aniva faaaloaloga a le European Space Agency
11–17 Tesema
Faaaliga 6–14
“Sa Latou Manumalo … ona o le Toto o le Tamai Mamoe”
A o e faitauina le Mosaea 6--14, mafaufau i tamaiti o e aoaoina. E mafai e le Agaga Paia ona fesoasoani ia te oe e iloa upumoni o le a aoga mo i latou.
Valaaulia le Fefaasoaai
Faaali atu ni ata o le a fesoasoani i tamaiti e manatua ai mea na latou aoaoina talu ai nei i le fale po o le Peraimeri. Valaaulia tamaiti e faasoa mai mea latou te iloa e uiga i ata.
Aoao atu le Aoaoga Faavae: Tamaiti Laiti
Ua fesoasoani mai Iesu Keriso ia ou mama.
Na vaai Ioane i le toatele sa oofu i ofu “ua … faasinasina i le toto o le Tamai Mamoe” (fuaiupu 14). Mafaufau pe mafai faapefea ona fesoasoani lenei faaaliga ia malamalama ai tamaiti i le taua o le faamamaina e ala i le Togiola a Iesu Keriso.
Gaoioiga e Mafai Ona Fai
-
Faaali atu i tamaiti ni ofu papae (po o se ata o ni ofu papae) ma se ata o Iesu. Faitau le Faaaliga 7:9, 13–14 i tamaiti, ma fai atu ia i latou e faasino i le ata ma ofu i taimi uma latou te faalogo ai i le upu paepae. Faamalamalama atu o ofu papae e faatusa i le mama ma e faamanatu mai ai ia i tatou o Iesu Keriso e mafai ona faamamaina i tatou mai a tatou mea sese.
-
Faaali i tamaiti se fasi ie paepae po o se fasi pepa, ma tuu atu latou te faapalapalaina e ala i le makaina i se peni pe tuu ai foi i luga ni palapala. Faamalamalama atu afai tatou te le usitai i poloaiga, e mafai ona foliga e pei o i ai ni palapala i o tatou lavalava. Faaali atu se ata o Iesu i Ketesemane (e pei o le Tusi Ata o le Talalelei, nu. 56), tuu ese le ie palapala po o le pepa, ae faaali atu i ai se ie paepae mama. Molimau atu e mafai e Iesu Keriso ona fesoasoani ia i tatou ia mama.
-
Usu se pese e uiga i le papatisoga, e pei o le “Pe A Ou Papatiso” (Tusipese a Tamaiti, 53), ma molimau atu e fesoasoani Iesu ia i tatou ia mama pe a tatou papatiso.
Sa ou faaalia le faatuatua ia Iesu Keriso i le muai olaga.
I le Taua i le Lagi, sa faatoilalo ai e fanau faamaoni a le Atua ia Satani e ala i “le upu o a latou molimau” ma e ala i le faaalia o le faatuatua ia Iesu Keriso (Faaaliga 12:11). O loo faaauau pea ona latou faia i le asō.
Gaoioiga e Mafai Ona Fai
-
Ina ia fesoasoani i tamaiti ia malamalama i le uiga o le mulimuli i se faataitaiga a se tasi, filifili se tamaitiiti e toatasi e fai ma “taitai,” ma fai i isi e mulimuli ia te ia e ala i le faia o soo se mea na te faia. Ona tuu atu lea i isi tamaiti e taitai. Faitau le Faaaliga 12:7–11 i tamaiti ma faamalamalama atu i ai ae tatou te lei fananau mai, sa tatou filifili e mulimuli ia Iesu ae le o Satani.
-
Usu faatasi se pese e faatatau i le mua’i olaga, e pei o le “I Lived in Heaven” po o le “O Le a Ou Mulimuli I Le Fuafuaga a le Atua” (Tusipese a Tamaiti, 4, 86--87). Fai fesili e pei o le, “O le a le mea na tupu i le lagi ae tatou te lei fananau mai?” ma le “O le a le mea na tatou filifili e fai?” (Tagai foi i le “Folasaga: O Le Fuafuaga a lo Tatou Tama Faalelagi” i Tala o le Feagaiga Fou, 1--5, po o le vitio talafeagai i luga o le ChurchofJesusChrist.org.)
Na toefuatai mai le talalelei i o tatou aso.
Na tusia e Ioane e uiga i se agelu o le a aumaia “le talalelei e faavavau” (Faaaliga 14:6). O le talanoa i le Faaaliga 14:6–7 e maua ai se avanoa mo oe e molimau atu ai i le Toefuataiga o le talalelei a Iesu Keriso i o tatou aso.
Gaoioiga e Mafai Ona Fai
-
Faaali atu i tamaiti se ata o Moronae o loo talanoa ia Iosefa Samita a o e faitauina le Faaaliga 14:6 (tagai i le Tusi Ata o le Talalelei, nu. 91). Fai atu i tamaiti e tusi i le agelu o loo i le ata. Faasoa atu ia i latou le tala i le asiasiga a Moronae (tagai i le “Mataupu 3: O Le Agelu o Moronae ma Papatusi Auro,” i Tala o le Mataupu Faavae ma Feagaiga, 13–17, po o le vitio talafeagai i le ChurchofJesusChrist.org).
-
Valaaulia tamaiti e faatino le tala ia Moronae o loo asiasi ia Iosefa Samita (tagai i le Iosefa Samita—Talafaasolopito 1:29–35). Fesoasoani ia i latou e ta‘u mai nisi o faamanuiaga tatou te olioli ai ona ua toefuatai mai le talalelei a Iesu Keriso. Faasoa atu lau molimau e uiga i le Toefuataiga.
Aoao atu le Aoaoga Faavae: Tamaiti Matutua
E mafai ona fesoasoani le talalelei ia te au e faatoilalo ai tofotofoga.
O le asu na faapouliuligia ai le ea i le Faaaliga 9:2 e mafai ona faatusa i faaosoosoga (tagai 1 Nifae 12:17).
Gaoioiga e Mafai Ona Fai
-
Tusi ni ata o le la ma se ao pogisa, ma ‘oti’oti ese. Valaaulia ia tamaiti e faitau le Faaaliga 9:2 ma le 1 Nifae 12:17 ma tusi i luga o le ao pogisa mea ua faatusa i ai le asu po o puao pogisa i nei fuaiupu. Tuu le ao pogisa i luga o le laupapa, ma valaaulia ia tamaiti e fai se lisi o faaosoosoga e fetaiai ma tamaiti o le latou vaitausaga. Ona tuu lea o le la i luga o le laupapa ma fai i tamaiti e fai se lisi o meafaigaluega ua tuuina mai e le Tama Faalelagi ia i tatou e faatoilalo ai le pogisa i le lalolagi.
-
E mafai faapefea ona tatou fesoasoani atu i isi o e ua i ai i le pogisa faaleagaga? Ina ia fesoasoani i tamaiti e mafaufau e uiga i lenei fesili, faaali se vaega o le vitio “Choose the Light” (ChurchofJesusChrist.org), aemaise le afa mulimuli o le vitio. E mafai faapefea ona tatou pei o le tagata sa fesoasoani i le tagata tietie uila i le ana?
Sa ou faaalia le faatuatua ia Iesu Keriso i le muai olaga.
O tamaiti o loo e faiaoga ai o loo i le lalolagi ona sa latou faatuatua ia Iesu Keriso i le muai olaga ma sa filifili e mulimuli ia te Ia.
Gaoioiga e Mafai Ona Fai
-
Faitau faatasi le Faaaliga 12:7–11, ma tusi i luga o le laupapa ia upu tarako, Taua i le Lagi, tuliesea, molimau, ma le Tamai Mamoe. Fai i tamaiti e aotele ia fuaiupu nei e faaaoga ai upu o i le laupapa. O a mea ua tatou aoaoina e uiga ia Iesu Keriso (le Tamai Mamoe) mai nei fuaiupu? O a mea ua tatou aoaoina e uiga i filifiliga sa tatou faia i le muai olaga?
-
I luga o le laupapa, fai ni koluma se tolu ma faailoga A o lei oo i lenei olaga, I lenei olaga, ma le Vaega Uma e Lua. Ia saunia ni fasipepa o loo tusia ai upumoni e faatatau i le mua’i olaga ma le olaga faitino, e pei o le E i ai o tatou tino, E leai ni o tatou tino, Ua tatou ola i le afioaga o le Atua, O loo tatou tau ma Satani, Tatou te faaaogaina le faatuatua ia Iesu Keriso, ma le Tatou te mulimuli i le fuafuaga a le Atua. Tuu i tamaiti e feauauai e piki se fasipepa ma filifili pe o le fea koluma e e i ai. Faamatala atu lou talitonuga mautinoa e mafai e tamaiti ona faaalia pea lava pea le faatuatua ia Keriso.
I le avea ai ma se vaega o le Toefuataiga, o le a talai atu le talalelei i le lalolagi uma.
O tamaiti o loo e aoaoina e mafai ona fesoasoani e talai atu le talalelei “i atunuu uma, ma ituaiga, ma gagana, ma nuu” (Faaaliga 14:6).
Gaoioiga e Mafai Ona Fai
-
Fai i tamaiti e faitau le Faaaliga 14:6–7 ma tusi i luga o le laupapa upu po o fasifuaitau mai nei fuaiupu e taua ia i latou. Fai atu ia i latou e faasoa mai pe aisea na latou filifilia ai na upu po o fuaitau. Faamalamalama atu o nei fuaiupu o loo faamatala mai ai le Toefuataiga o le talalelei i o tatou aso. Fesili atu ia i latou pe mafai faapefea ona latou auai i le galuega o le talaiga o le talalelei i le lalolagi.
-
Valaaulia tamaiti e faitau le Faaaliga 14:7 ma toe faaupu i a latou lava upu le savali a le agelu mo le lalolagi. Pe valaaulia i latou e tusi se ata e faatusa i le savali a le agelu. O le a se mea e mafai ona tatou faasoa atu i isi e uiga i le talalelei a Iesu Keriso?
Uunaia le Aoaoina i le Aiga
Fesoasoani i tamaiti e tusi i lalo se upu po o se fasifuaitau o le a fesoasoani ia i latou e manatua ai se mea na latou aoaoina i le vasega i le asō. Valaaulia i latou e faaali atu mea na latou tusia i se tasi i le fale ma faasoa mai mea sa latou aoaoina.
Faaleleia o Lo Tatou Aoao Atu
Aoao atu aoaoga faavae e ala i musika. O le usuina faatasi ma tamaiti o pese e mafai ona faamalosia ai le aoaoga faavae o loo e aoaoina atu mai tusitusiga paia. Mo ni manatu, tagai i le “Faaaogaina o Musika e Aoao Atu ai Aoaoga Faavae” i le vaega ua faaautuina “Faatonuga mo le Taimi o Pesepesega ma le Polokalama a Tamaiti i le Sauniga Faamanatuga” i le faaiuga o le tusi lesona lenei.