“27 Novema–3 Tesema. 1--3 Ioane; Iuta: ‘O Le Atua o le Alofa’” Sau, Mulimuli Mai ia te A’u–Mo Le Peraimeri: Feagaiga Fou 2023 (2021)
“27 Novema–3 Tesema. 1--3 Ioane; Iuta,” Sau, Mulimuli Mai ia te A’u–Mo Le Peraimeri: 2023
Alofa Atoatoa, saunia e Del Parson
27 Novema–3 Tesema
1–3 Ioane; Iuta
“O Le Atua o le Alofa”
O Tusi a Ioane ma Iuta o loo aoao mai e uiga i le alofa ma le malamalama o le Tama Faalelagi. A o e suesue i lenei vaiaso, mafaufau pe aisea e manaomia ai e tamaiti o loo e faiaoga ai Lona malamalama ma le alofa i o latou olaga. Manatua e mafaufau i gaoioiga uma o i lenei otootoga, ae le na o le lisi o i lalo o le vaitausaga o loo e faiaoga ai.
Valaaulia le Fefaasoaai
Valaaulia tamaiti e faasoa mai pe na faapefea ona latou lagonaina le alofa o le Tama Faalelagi ma Iesu pe aisea foi latou te manatu ai o le Tama Faalelagi ma Iesu e pei o se malamalama ia i tatou.
Aoao atu le Aoaoga Faavae: Tamaiti Laiti
O le mulimuli ia Iesu e aumaia ai le malamalama i lo’u olaga.
Na tusi Ioane e uiga i le malamalama e aoao atu ai e uiga i le faatosinaga a le Tama Faalelagi ma Iesu i o tatou olaga. Mafaufau pe mafai faapefea ona e fesoasoani i tamaiti e aoao e uiga i le malamalama La te ofoina mai.
Gaoioiga e Mafai Ona Fai
-
Fai i tamaiti e ta’u mai ni mea e maua mai ai le malamalama. Talanoa ma i latou e uiga i aogā o le malamalama, e pei o le fesoasoani i laau ia ola, mafai ai ona tatou vaai, ma aumaia le mafanafana. Ina ia malamalama i le ala e aumai ai e Iesu ia i tatou le malamalama, e mafai ona latou feauauai e ki se moliuila i se ata o Iesu Keriso a o latou fai mai, “O le Atua o le malamalama” (1 Ioane 1:5). Molimau atu o le Tama Faalelagi ma Iesu Keriso e mafai ona aumaia le malamalama i o tatou olaga pe a tatou taumafai e mulimuli i mea ua La fetalai mai ai.
-
Valaaulia tamaiti e feauauai i le uuina o se ata o se matauila po o se moligao. A o uuina e tamaiti taitasi le ata, fesoasoani ia te ia e mafaufau i se auala e mafai ai ona tatou aumaia le malamalama o Iesu Keriso i o tatou olaga.
Ou te faaalia lo’u alofa i le Atua pe a ou faaali atu le alofa i isi.
Fesoasoani i tamaiti ia iloa le sootaga i le va o le alofa latou te lagonaina mo le Tama Faalelagi ma le alofa latou te faaalia i Ana fanau.
Gaoioiga e Mafai Ona Fai
-
Faitau le 1 Ioane 4:11 i tamaiti, ma usu se pese e uiga i le alofa o le Atua, e pei o le “E Alofa Lo’u Tama Faalelagi Ia Te A’u” (Tusipese a Tamaiti, 16). Fai atu i ni nai tamaiti e faasoa mai pe faapefea ona latou iloa e alofa le Tama Faalelagi ia i latou. A uma tali taitasi, valaaulia ia tamaiti e feopoai i latou lava ma fai atu, “O le Atua o le alofa lava ia, ma e alofa le Atua ia te au.”
-
Faitau le 1 Ioane 4:21 i tamaiti. Valaaulia i latou e talanoa pe faatino ni auala eseese e mafai ona latou faaalia ai le alofa i se uo, e pei o le opo atu i ai pe faia foi se kata. O a ni lagona o a tatou uo i nei mea? O a ni lagona o le Tama Faalelagi pe a tatou faia ni mea lelei mo isi?
E faaali atu lo’u alofa i le Atua pe a ou tausi i Ana poloaiga.
Na aoao mai Ioane o “poloaiga a le Atua e le mamafa” (1 Ioane 5:3). Ae, o le mulimuli i poloaiga o se auala lea e faaali atu ai le alofa mo Ia.
Gaoioiga e Mafai Ona Fai
-
Faitau le 1 Ioane 5:3, ma fai i tamaiti e faalogologo mo mea o ta’u mai i lenei fuaiupu e uiga i le ala e mafai ai ona tatou faaali atu tatou te alolofa i le Atua. Valaaulia ia tamaiti e ta’u mai ni poloaiga uma latou te mafaia. O a ni o tatou lagona pe a tatou usitai i poloaiga a le Tama Faalelagi?
-
Valaaulia tamaiti e tusi se ata e faaali atu ai se auala se tasi e mafai ona latou faaali atu ai i le Tama Faalelagi latou te alolofa ia te Ia. Mo se faataitaiga, e mafai ona latou tusia se ata o i latou lava o tausia se tasi o poloaiga.
-
Usu faatasi se pese e uiga i le usitai, e pei o le “Filifili Le Ala Sa’o” (Tusipese a Tamaiti, 82). O a ni o tatou lagona pe a tatou usitai?
Aoao atu le Aoaoga Faavae: Tamaiti Matutua
Ou te faaalia lo’u alofa i le Atua pe a ou faaali atu le alofa i isi.
E mafai faapefea ona e fesoasoani i tamaiti ia malamalama o le alofa i le Atua e aofia ai le alofa ia i latou o siomia i tatou---e oo lava i tagata atonu e ese mai ia i tatou pe faigata ona alofa i ai?
Gaoioiga e Mafai Ona Fai
-
Fai i tamaiti e vaai faalemafaufau ua i ai se tagata fou ua amata ona auai atu i le latou aoga po o le uarota ae na te lei iloaina lava se tasi iina. Mata o a lagona o lenei tagata? Valaaulia se tamaitiiti e faitau le 1 Ioane 4:7–8. O le a se mea o fautua mai e lenei fuaiupu e uiga i le ala e tatau ona tatou taulima ai lenei tagata? Faasoa atu ni tulaga faapena, pe fai foi i tamaiti e mafaufau i se taimi atonu latou te maua ai avanoa e faaali atu ai le alofa.
-
Fai i tamaiti e faitau le 1 Ioane 4:7–8, 20–21, ma valaaulia i latou e taitasi ma tusi se fuaiupu se tasi e aotele ai mea ua latou manatu o le lesona aupito sili ona taua i nei fuaiupu. A uma ona faasoa mai a latou fuaiupu, faasoa atu se tala mai lou olaga pe mai se mekasini o le Uo po o le Liahona e te lagona ua faapupula mai ai mea o loo aoao mai e nei fuaiupu (tagai, mo se faataitaiga, “Faatalofa Atu ia Halim,” Uo, Iuni 2019, 8–9; po o le Liahona, Iuni 2019, U18–U19). Valaaulia tamaiti e faasoa mai a latou lava faataitaiga. E mafai faapefea ona tatou faaalia le alofa ia i latou o siomia i tatou?
E faaali atu lo’u alofa i le Atua pe a ou tausi i Ana poloaiga.
O le usitai i poloaiga e mafai ona faigofie atili pe a tatou malamalama i upumoni o loo aoao mai i le 1 Ioane 5:3. E mafai faapefea ona e fesoasoani i tamaiti ia vaai atu i poloaiga e le o se avega mamafa ae o ni avanoa e faaali atu ai lo latou alolofa mo le Atua?
Gaoioiga e Mafai Ona Fai
-
Valaaulia ia tamaiti e lisi i le laupapa ni auala e mafai ona latou faaali atu ai i le Atua latou te alolofa ia te Ia. Ona faitau faatasi lea o le 1 Ioane 2:5–6; 5:2–5 mo ni manatu faaopoopo. E faapefea e le usitai i poloaiga ona faailoa atu tatou te alolofa i le Tama Faalelagi?
O le tausia o poloaiga a le Atua e fesoasoani tatou te faatoilaloina ai le lalolagi.
-
Faitau le 1 Ioane 4:17, ma faamalamalama atu i tamaiti o le “maua o le lototoa i le aso o le faamasinoga” o lona uiga o le i ai o le talitonuga mautinoa ma le filemu pe a latou tutu atu i luma o le Atua ina ia faamasinoina. O le a se mea o aoao mai e lenei fuaiupu e manaomia ona tatou faia ina ia maua ai lea talitonuga mautinoa? O a nisi o mea e mafai ona tatou faia i le taimi nei ia talitonu mautinoa ai i luma o le Atua?
E mafai ona ou faamaoni tusa lava pe ulagia a’u e isi.
Ona o i tatou o soo o Iesu Keriso, o nisi taimi e ulagia ai i tatou e isi mo o tatou talitonuga po o le ala tatou te ola ai. O nei fuaiupu o loo i ai le fautuaga a Iuta i le ala e tumau faamaoni ai i ia ituaiga tulaga.
Gaoioiga e Mafai Ona Fai
-
Fai atu i tamaiti e faasoa mai ni taimi na ulagia ai i latou e isi po o se tasi latou te iloa ona sa latou faia le mea sa’o. Valaaulia ia tamaiti e faitau le Iuta 1:18–22 ma vaavaai mo auala e mafai ai ona tatou tumau faamaoni pe a amusia pe ulagia i tatou. Tusi mea latou te maua i le laupapa, ma talanoaina ni auala e mafai ona latou mulimuli ai i lenei fautuaga.
-
Aotele le miti a Liae (tagai i le 1 Nifae 8:1–35), ma fai i ni nai tamaiti e faitau ia fuaiupu mai le 1 Nifae 8:26–28, 33. Talanoaina pe faapefea e tagata i le faletele ateatea ona pei o tagata aamu o loo talanoa i ai Iuta. O le a se mea e mafai ona tatou faia ia le tosina ai e i latou o e ulagia i tatou pe le ioeina foi mea ua tatou talitonu ai? (tagai 1 Nifae 8:30, 33).
Uunaia le Aoaoina i le Aiga
Fautuaina tamaiti e fai se fuafuaga e fai se mea e faasoa atu ai lo latou malamalama i o latou aiga.
Faaleleia o Lo Tatou Aoao Atu
E tiotio tamaiti. E i ai taimi atonu e te manatu o le tiotio o tamaiti o se o se faalavelave mai le aoaoina. Ae e mafai ona e atiae i luga o o latou natura faaalia e ala i le valaaulia o i latou e faatino mai i taga, tusi se ata, pe usu foi se pese e uiga i se mataupu faavae o le talalelei. (Tagai i le Aoao Atu i le Ala o le Faaola,25–26.)