“20–26 Novema. 1 ma le 2 Peteru: ‘Olioli ai ma le Fiafia e Le Matalatalaina, e Silisili Ese Lava” Sau, Mulimuli Mai ia te A’u–Mo Le Peraimeri: Feagaiga Fou 2023 (2021)
“20–26 Novema. 1 ma le 2 Peteru,” Sau, Mulimuli Mai ia te A’u–Mo Le Peraimeri: 2023
O Keriso o loo Talai Atu i le Lalolagi o Agaga, saunia e Robert T. Barrett
20–26 Novema
1 ma le 2 Peteru
“Olioli ma le Fiafia e le Matalatalaina e Silisili Ese Lava”
Amata lau suesuega o le 1ma le 2 Peteru i se tatalo. Manatua o lau tapenapenaga aupito sili lava e aoao atu o le a maua i aafiaga o au suesuega patino ma suesuega faaleaiga.
Valaaulia le Fefaasoaai
Faaali atu le ata o loo maua i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga, ma valaaulia tamaiti e faamatala atu ia te oe se mea ua latou iloa e uiga ia Peteru. Faamanatu atu ia i latou o Peteru o le taitai o le Ekalesia ina ua mavae le toetu mai o Iesu, ma faamalamalama atu o le 1 Peteru ma le 2 Peteru o ni tusi mai ia te ia i tagata o le Ekalesia i lona taimi.
Aoao atu le Aoaoga Faavae: Tamaiti Laiti
E mafai ona ou fiafia e oo lava i taimi faigata.
Mafaufau pe mafai faapefea ona e aoao atu nei fuaiupu i se ala o le a fesoasoani ai i tamaiti e liliu atu i le Faaola pe a latou feagai ma puapuaga.
Gaoioiga e Mafai Ona Fai
-
Fesoasoani i tamaiti e mafaufau i faataitaiga o mea faigata na uia e Iesu, e pei o le tauemuina po o le ulagia. Faamalamalama atu o le a i ai taimi faigata i o tatou olaga. Faitau faatasi le 1 Peteru 1:6–7; 3:14 ma faasoa atu se aafiaga na e feagai ai ma se “tofotofoga o lou faatuatua” ma sa fesoasoani le Faaola ia te oe ia maua le olioli. Pe e mafai foi ona e faasoa atu le tatalo a le Perofeta o Iosefa Samita i le Falepuipui o Liperate ma le faamafanafanaga na tuu atu e le Atua ia te ia (tagai i le Mataupu Faavae ma Feagaiga 121:1–8; 123:17).
O Iosefa Samita i le Falepuipui i Liperate, saunia e Greg K. Olsen
-
Faaali atu se ata o loo faaalia ai Iesu ma isi tagata (o le Tusiata o le Talalelei e tele ai; e faapena foi i le Sau Mulimuli mai ia te A’u—Mo Tagata Taitoatasi ma Aiga). Fai i tamaiti e sue Iesu i le ata. Molimau atu afai tatou te vaai atu i le Faaola, e mafai ona Ia fesoasoani ia i tatou ia maua le olioli i o tatou olaga.
E finagalo le Tama Faalelagi ia avea au o se faataitaiga i isi.
Na aoao mai e Peteru e faapea o i tatou o le “nuu o le Atua” ma o a latou galuega lelei e mafai ona “vivii atu ai i le Atua.”
Gaoioiga e Mafai Ona Fai
-
Faamatala ia mea e tulagaese mai o latou siosiomaga, pe faaali ni ata o na mea. Mo se faataitaiga, e tulaga ese se malumalu mai fale e siomia ai pe e tulai mai foi se mauga i luga ae o se vanu. Faamalamalama atu a tatou tausia ia poloaiga, tatou te tulaga ese lava ma e mafai e isi tagata ona vaavaai mai i a tatou faataitaiga. Talanoa i ni nai “galuega lelei” ua e vaai o fai e tamaiti. Faamalamalama atu o galuega lelei e pei o na e “viia ai le Atua”---e fesoasoani ai e lagona e isi le alofa atili mo le Atua ma le manao e auauna atu ia te Ia.
-
Faamaea ma tamaiti le itulau o gaoioiga. O faapefea e tagata na latou maua i le ata ona vivii atu i le Atua?
O agaga i le lalolagi o agaga e aoao e uiga i le talalelei.
Ina ua mavae Lona maliu, sa afio atu Iesu i le lalolagi o agaga ma auina atu ia agaga amiotonu e aoao isi agaga o e sa lei taliaina le talalelei.
Gaoioiga e Mafai Ona Fai
-
Faamatala i tamaiti e uiga i se tasi e te iloa ua maliu. Faamalamalama atu a oti ia tagata, e tuua e o latou agaga o latou tino ae o i le lalolagi o agaga. Faitau le 1 Peteru 3:19 ma faamalamalama atu ina ua maliu Iesu, sa asiasi o Ia i le lalolagi o agaga. O iina, sa Ia faatonuina ai agaga amiotonu e aoao atu le talalelei i isi agaga o e sa lei taliaina lava le talalelei (tagai i le Mataupu Faavae ma Feagaiga 138:30).
-
Faaali atu se ata o se malumalu. Faamalamalama atu i tamaiti a lava lo latou matutua, e mafai ona latou o i le malumalu ma papatisoina mo o latou tuaa o e sa lei papatisoina a o i ai i le lalolagi. Fesoasoani i tamaiti e faatumu se gafa faigofie faaleaiga (tagai i se faataitaiga o i le “Family History Coloring Pages,” ChurchofJesusChrist.org).
Aoao atu le Aoaoga Faavae: Tamaiti Matutua
E mafai ona ou maua le olioli ma le filemu e oo lava i taimi faigata.
O tamaiti o loo e faiaoga ai atonu na feagai ma ni ituaiga o taufaifai po o le aamu ona o mea ua latou talitonu ai. E mafai ona fesoasoani nei fuaiupu ia i latou i na taimi.
Gaoioiga e Mafai Ona Fai
-
Aotele ni nai tala e uiga ia Iesu o loo sauaina, pe fai atu i tamaiti e faitau mai i latou--tagai, mo se faataitaiga, Mataio 12:9–14 po o le Luka 22:47–54. Fesili i tamaiti pe i ai se taimi na taufaifai ai pe amusia i latou ona o loo latou ola i aoaoga a Iesu Keriso. O a ni o latou lagona e uiga i ai? Ona faitau faatasi lea o le 1 Peteru 3:12–14; 4:13–14, 16, ma fesili i tamaiti e vaavaai mo mea na ta’ua e Peteru e uiga i le tigaina “ona o le amiotonu.” Aisea e mafai ai ona tatou fiafia pea pe a aamu mai isi tagata i lo tatou faia o mea tonu?
-
Faasoa atu se aafiaga ina ua e maua le olioli po o le filemu i se taimi o se tofofofoga, pe faasoa atu pe na faapefea e le Perofeta o Iosefa Samita ona maua le filemu ina o i ai o ia i le Falepuipui o Liperate (tagai i le Mataupu Faavae ma Feagaiga 121:1–8; 123:17). E mafai faapefea ona tatou maua le olioli ma le filemu ia Keriso i le taimi o o tatou tofotofoga?
E mafai lava ona ou saunia i taimi uma e faasoa atu le talalelei.
O tamaiti o loo e faiaoga ai o le a maua avanoa e tele i o latou olaga e tali ai fesili mai isi tagata e uiga i lo latou faatuatuaga. Mafaufau po o le a se mea e mafai ona e faia e fesoasoani ai ia latou “saunia pea lava e tali atu.”
Gaoioiga e Mafai Ona Fai
-
Faamatala se taimi na fesili atu ai e se tasi se fesili ia te oe e uiga i le Ekalesia, ma faamatala atu pe na e lagona ua e saunia e tali atu. Fai i tamaiti e talanoa e uiga i soo se taimi na fesili atu ai tagata ia te i latou ni fesili e uiga i le Ekalesia. Faitau faatasi le 1 Peteru 3:15. E mafai faapefea ona tatou mulimuli i le fautuaga a Peteru i le fuaiupu lea?
-
Fesoasoani i tamaiti e mafaufau i ni nai fesili e ono fesili ai tagata e uiga ia Iesu Keriso po o Lana Ekalesia. Tuu atu e feauauai ia tamaiti e faamalamalama mai pe faapefea ona latou tali atu i nei fesili ina ia mafai ai ona latou “saunia pea lava.” Ua tuuina mai e Mataupu Faavae o le Faatuatua ni upumoni faigofie e mafai ona faaaoga e tamaiti e tali ai fesili e uiga i le Ekalesia.
E aoao agaga i le lalolagi o agaga e uiga i le talalelei.
Pe a feoti e amiotonu, latou te o i le lalolagi o agaga e aoao atu le talalelei ia i latou e lei mauaina a o i ai i le lalolagi.
Gaoioiga e Mafai Ona Fai
-
Tusi i luga o le laupapa se li’o ma se laina e vase i le ogatotonu. Tusi le Parataiso o Agaga i le isi afa o le li’o ma le Falepuipui o Agaga i le isi afa. Valaaulia se tasi o tamaiti e faitau mai le 1 Peteru 3:18–20; 4:6 (tagai 1 Peteru 4:6, vaefaamatalagaa, mo toefaamanatu mai le Faaliliuga a Iosefa Samita). Faamalamalama atu ina ua maliu Iesu, sa afio o Ia i le parataiso o agaga. Sa Ia faatonuina agaga amiotonu iina e aoao atu le talalelei i agaga o i le falepuipui o agaga.
-
Valaaulia se matua po o se tei matua o se tasi o tamaiti e faamatala mai e uiga i le alu i le malumalu ma maua sauniga mo se tasi o o latou augatama.
-
Valaaulia ia tamaiti e faatumu se gafa faigofie faaleaiga (tagai i se faataitaiga o i le “Family History Coloring Pages,” ChurchofJesusChrist.org).
Uunaia le Aoaoina i le Aiga
Valaaulia ia tamaiti e faasoa atu a latou laau o gafa faaleaiga i tagata o o latou aiga ma fesili atu ia i latou mo se fesoasoani e faaopoopo i ai ni igoa.
Faaleleia o Lo Tatou Aoao Atu
Saili ia malamalama i tamaiti o loo e aoaoina. Ua e iloa tamaiti o loo e faiaoga ai, o lea ia fesuiai manatu po o aitia i lenei otootoga pe a tatau ai e taulima ai o latou manaoga. E mafai ona e faaaoga soo se gaoioiga o fautuaina atu i lenei otootoga, ae le na o manatu ua tusia mo le vaitausaga o loo e faiaoga ai. (Tagai i le Aoao Atu i le Ala a le Faaola,7.)