talavou o loo faamamaina se puipui

13–19 Novema

Iakopo

“A Ia Fai Outou ma E Anaana i le Upu ae Aua Le Na o le Faalogologo i ai”

O le Tusi a Iakopo o loo i ai le tele o upumoni e mafai ona faamanuiaina ai tamaiti o loo e aoaoina. Mulimuli i le Agaga e fuafua ai pe o le fea upumoni o le a e faasoa atu ia i latou. E mafai foi ona fesoasoani ia manatu o lenei otootoga.

aikona o le fefaasoaai

Valaaulia le Fefaasoaai

Valaaulia ia tamaiti e faasoa mai se mataupu faavae o le talalelei latou te manatua na aoaoina ma o latou aiga i le vaiaso ua mavae pe mai le vasega o le Peraimeri i le Aso Sa talu ai. A uma ona faasoa mai tamaiti taitasi, valaaulia se isi tamaitiiti o le vasega e aotele mai mea sa faasoa mai.

aikona o le aoao atu

Aoao atu le Aoaoga Faavae: Tamaiti Laiti

Iakopo 1:5–6

E mafai ona ou ole i le Tama Faalelagi e fesoasoani mai ia te au e aoao le mea e moni.

Fesoasoani ia malamalama tamaiti e te faiaoga ai e mafai foi ona latou liliu atu i le Tama Faalelagi mo le poto. O le faia o lena mea o le a faamanuiaina tele ai i latou pe a latou fetaiai ma fesili faigata.

O Gaoioiga e Mafai Ona Fai

• Fesoasoani i tamaiti e toe fai atu le fasifuaitau “Afai ua leai se poto i so outou, ina ole atu ia i le Atua” (Iakopo 1:5). E faapefea ona tatou fai atu fesili i le Atua? E faapefea ona Ia tali mai ia i tatou?

• Faaali atu se ata o le Uluai Faaaliga (Tusiata o le Talalelei, nu. 90), pe faaali le vitio “Joseph Smith‘s First Vision” (ChurchofJesusChrist.org). Faamatala atu pe na faapefea ona uunaia Iosefa Samita i le faitauina o le Iakopo 1:5 e ole atu i le Tama Faalelagi e fesoasoani ia te ia i se fesili (tagai i le Iosefa Samita—Talafaasolopito 1:1–20). Faasoa atu lau molimau e tali mai le Atua i tatalo, ma molimau atu e mafai e tamaiti ona tatalo atu ia te Ia pe a i ai ni a latou fesili. Tuu i tamaiti e tusi a latou lava ata o Iosefa Samita la e faitau le Iakopo 1:5 ma tatalo i le Tama Faalelagi.

Iakopo 3:1–13

E mafai ona ou tautala ma le agalelei.

Pei ona molimau mai Iakopo, o le aoao e ta’u atu na o ni mea lelei i isi o le a fesoasoani tatou te avea ai e faapei o Iesu Keriso (tagai Iakopo 3:2).

O Gaoioiga e Mafai Ona Fai

• Faaali atu ni ata o se mea suamalie ma se mea oona. Fesoasoani i tamaiti ina ia malamalama faapea na fetalai mai le Tama Faalelagi ia i tatou e faaaoga o tatou laulaufaiva e tautala atu ai i mea suamalie (po o mea lelei) ae le tautala atu i mea oona (po o mea leaga) (tagai i le Iakopo 3:10). Fesoasoani ia latou mafaufau i ni faataitaiga o mea lelei e mafai ona tatou ta’u atu i isi.

• Tuu atu ia tofu tamaiti ma se ata faigofie o se tagata o loo tautala. Valaaulia ia tamaiti e uu i luga pe a e fai atu se mea manaia e mafai ona tatou faia ma a tatou upu (e pei o le ta’u o le mea moni, avatu ni faamalo, ma ofo atu le fesoasoani i se tasi) ma tuu i lalo pe a e fai atu se mea e le tatau ona tatou faia i o tatou laulaufaiva (pei o le talapelo, fai pona o isi, ma le musu e usitai i se matua).

• Toe faamalosi atu le savali o le Iakopo 3:1–13 i le usuina faatasi o se pese e uiga i le agalelei atu, e pei o le “O Le Agalelei e Amata Ia Te A’u” (Tusipese a Tamaiti, 83).

Iakopo 5:7–11

O le mauaina o faamanuiaga a le Atua e manaomia ai le onosai.

E le nofonofo lava le onosai ona sau lea, aemaise i tamaiti. Mafaufau pe mafai faapefea ona e faaaoga le fautuaga a Iakopo e fesoasoani ai i tamaiti o loo e faiaoga ai e aoao le onosai.

O Gaoioiga e Mafai Ona Fai

• Fesoasoani i tamaiti e mafaufau i taimi na tatau ai ona latou faatalitali mo se mea sa latou matua mananao lava i ai. Faasoa atu se aafiaga i se taimi na tatau ai ona e faatali. Faamalamalama atu o le faatalitali mo se mea tatou te mananao ai e aunoa ma le tomumu e ta’ua o le onosai.

• Aotele le Iakopo 5:7 i au lava upu, ma faaali atu se ata o se fatu po o se tama’i laau faatoa oso se tatupu. Aisea tatou te manaomia ai le onosai pe a tatou totoina ia laau? O le a le mea e tupu pe afai tatou te taumafai e toso le tamai laau ia ola vave? E mafai foi ona e talanoa i tamaiti e uiga i le onosai i isi ma i tatou lava. Molimau atu e mafai e le Atua ona fesoasoani ia i tatou e aoao ia onosai.

• Faasoa atu le tala ia Iopu, o loo ta’ua i le Iakopo 5:11 o se faataitaiga o le onosai (tagai i le “Iopu,” i le Tala o le Feagaiga Tuai, po o le vitio e o faatasi ai i luga ChurchofJesusChrist.org). Na faapefea ona faamanuiaina Iopu ona o le onosai?

aikona o le aoao atu

Aoao atu le Aoaoga Faavae: Tamaiti Matutua

Iakopo 1:5–6

O le a fesoasoani le Tama Faalelagi ia te au e aoao upumoni pe afai ou te saili atu i Lana fesoasoani.

O tamaiti o loo e faiaoga ai ua na o ni nai tausaga e laiti teisi ai ia Iosefa Samita ina ua ia faitauina le Iakopo 1:5 ma sa musuia o ia e alu atu i le Tama Faalelagi i le tatalo. Mafaufau pe mafai faapefea ona e fesoasoani i tamaiti o loo e faiaoga ai e atiae lo latou faatuatua faapea o le a fesoasoani le Atua ia te i latou pe a leai so latou poto.

O Gaoioiga e Mafai Ona Fai

• Fai i tamaiti e faamatala atu le tala i le Uluai Faaliga a Iosefa Samita i a latou lava upu (tagai i le Iosefa Samita—Talafaasolopito 1:5–20; tagai foi i le vitio “Joseph Smith’s First Vision” i luga o le ChurchofJesusChrist.org ChurchofJesusChrist.org). Na faapefea ona fesoasoani le faitauina o le Iakopo 1:5 ia Iosefa? Fesoasoani i tamaiti e mafaufau i faataitaiga a tagata o i tusitusiga paia o e na maua se tali ia latou tatalo, e pei o Nifae (tagai i le 1 Nifae 11:1–6) ma le uso o Iareto (tagai i le Eteru 2:18–3:9). O a ni mea e mafai ona tatou ole atu ai i le Tama Faalelagi i le tatalo?

• Faitau faatasi ma tamaiti le Iosefa Samita—Talafaasolopito 1:10–14. Valaaulia ia tamaiti e sue mai mea na faia e Iosefa Samita ia maua ai tali i ana fesili. E mafai faapefea ona tatou mulimuli i le faataitaiga a Iosefa pe a i ai ni a tatou fesili?

Iakopo 1:22–27; 2:14–26

“E mate le faatuatua pe a aunoa ma galuega.”

E faapefea ona e fesoasoani i tamaiti ia iloa le sootaga i le va o mea latou te talitonu i ai ma mea latou te faia?

O Gaoioiga e Mafai Ona Fai

• Faaali atu i tamaiti se moliuila e leai ni maa, se penitala e leai se mata, po o se isi mea e le aoga pe ua “mate.” Valaaulia tamaiti e faitau le Iakopo 2:14–17. E faapupula mai faapefea e nei meafaitino le upumoni o i nei fuaiupu?

• Valaaulia nisi o tamaiti e faitau lemu le Iakopo 1:22–27 ma isi e faitau le 2:14–18. Ona valaaulia lea o i latou e faasoa mai mea e mafai ona latou faia e faaalia ai o i latou o ni e faatinoa le upu. Mo se faataitaiga, o faapefea ona latou tausia a latou feagaiga o le papatisoga? Pe latou te iloa se tasi o ma‘i pe tuuatoatasi e mafai ona latou asiasi i ai? E mafai faapefea ona latou auauna atili atu i o latou aiga? E mafai foi ona e faamanatu atu ia te i latou ia upu latou te faalogo i ai i le sauniga faamanatuga i le aso. E mafai faapefea ona avea i tatou ma e faatinoa nei upu?

O Aperaamo o loo tatalo i fafo o lona faleie

“Sa talitonu Aperaamo i le Atua” (Iakopo 2:23). Aperaamo i Fanua Laugatasi o Mamere, saunia e Grant Romney Clawson

Iakopo 3:1–13

E mafai ona ou filifili e tautala ma le agalelei.

O upu tatou te fai atu i le tasi ma le isi atonu e le taua, ae e pei ona molimau mai Iakopo, e mafai ona i ai se tosinaga mamana, mo le lelei po o le leaga.

O Gaoioiga e Mafai Ona Fai

• Pe o i ai se tasi i le uarota, atonu o se tasi o tamaiti o loo e faiaoga ai, sa faia ni galuega mo solofanua pe na te iloa se mea e uiga i vaa? E mafai ona e valaaulia o ia e tuuina mai ni malamalamaaga e uiga i aoaoga a Iakopo i le Iakopo 3:3–4 e uiga i le faaaogaina o upu agalelei. Pe tuuina mai ni ou lava malamalamaaga. O le a se mea ua tatou aoao ai e uiga i le pulea o o tatou laulaufaiva mai nei faataitaiga?

• Valaaulia ia tamaiti e faitau le Iakopo 3:1–13 ma tusi se ata o se mea latou te maua o loo aoao mai ai e uiga i le pulea o o tatou laulaufaiva. Tuu atu se taimi e faasoa mai ai a latou ata ma mea sa latou aoaoina. Usu faatasi se pese e faatatau i le faaaogaina o upu alofa, e pei o le “Fai Upu Alofa i le Tasi” (Viiga, nu. 147).

• A uma ona toe faamanatu faatasi le Iakopo 3:1–13 , ona toe faamanatu lea o tulaga faatonuina mo gagana o i le Mo le Malosi o le Autalavou ([tamaitusi, 2022]. 12). Fesoasoani i tamaiti e faatu se sini e faaleleia le ala latou te talanoa atu ai i isi, ma uunaia i latou e ole atu i le Tama Faalelagi e fesoasoani ia i latou i lenei sini.

aikona o le aoaoina

Uunaia le Aoaoina i le Aiga

Valaaulia tamaiti e fai se mea i lenei vaiaso e faaaoga ai mea sa latou aoaoina i le vasega, e pei o le tatalo i le Tama Faalelagi i se fesili po o le taumafai ia onosai atili. Fai atu ia i latou e faasoa mai o latou aafiaga i le isi vasega e sosoo ai.

Faaleleia o Lo Tatou Aoao Atu

Fesoasoani i tamaiti ia sagisagi mai. “Ao e aoaoina tamaiti, faataga i latou e fau, tusi ata, valivali, tusitusi, ma fatufatu. O nei mea e sili atu nai lo na o ni gaoioiga malie—e taua i le aoaoina” (Aoao Atu i le Ala a le Faaola,25).

itulau o gaoioiga: E mafai ona ou agalelei atu i isi