O Keriso o loo tutu faatasi ma se teineitiiti laitiiti

Pulu Pāsama i Kiliata, saunia e Annie Henrie

30 Oketopa--5 Novema

Eperu 1–6

O Iesu Keriso, “o le Tupuga o le Ola e Faavavau”

O a upumoni ua e mauaina i le Eperu 1–6 ua musuia oe e aoao atu i tamaiti? Gauai atu i uunaiga mai le Agaga ia e oo mai a o e sauniuni, ma ia mautinoa e tusi i lalo.

aikona o le fefaasoaai

Valaaulia le Fefaasoaai

Pe na talia e tamaiti le valaaulia i le faaiuga o le lesona i le vaiaso ua te’a e sue se fuaiupu o se mau e mafai ona latou faasoa maia? Afai na fai, tuu atu se taimi latou te faasoa mai ai. Afai e leai, fesoasoani ia latou mafaufau i se mea sa latou aoaoina mai tusitusiga paia talu ai nei e mafai ona latou faasoa maia.

aikona o le aoao atu

Aoao atu le Aoaoga Faavae: Tamaiti Laiti

Eperu 1:1–10; 2:8–10, 17–18

Ou te talitonu ia Iesu Keriso.

E mafai ona fesoasoani nei fuaiupu i tamaiti e aoao atili ai e uiga ia Iesu Keriso ma faamalosia ai la latou sootaga ma Ia.

Gaoioiga e Mafai Ona Fai

• Saili ni upumoni e uiga ia Iesu Keriso i le Eperu 1:1–10; 2:8–10, 17–18, ma tusi i luga o ni fasipepa. Nana pepa faataamilo i le potu, ma valaaulia tamaiti e sue i latou. Fesoasoani i tamaiti e faitau upumoni o loo tusia i luga o fasipepa, ma talanoa po o a uiga o nei upumoni. Afai e tatau ai, faamalamalama atu ua faaigoa Iesu o le Alo o le Atua aua o le Tama Faalelagi o le tama o Lona agaga ma Lona tino.

• Uu i luga se ata o le Faaola, ma faasoa mai pe aisea e te faafetai ai mo Ia. Tuu atu ia tofu tamaiti ma le avanoa e uu ai le ata ma faasoa mai pe aisea e faafetai ai o ia mo Iesu Keriso.

Eperu 3:8

E finagalo le Tama Faalelagi ia “aua nei faamaaa [o tatou] loto.”

O loo faamatalaina i leEperu 3 le faamaaaina o loto o le fanauga a Isaraelu ma le teenaina o faamanuiaga a le Alii. O se lapataiga foi lenei mo tatou uma ia aua nei faamaaaina o tatou loto.

Gaoioiga e Mafai Ona Fai

• Aumai i le vasega se mea e lei mafaufauina (e pei o se momi po o se ie taele) ma se mea malo (e pei o se maa). Valaaulia ia tamaiti e pa’i i meafaitino ma faamatala mai pe faape’i le pa’i i meafaitino. Faatulutulu ni nai mataua o le vai i mea faitino taitasi, ma faasino atu e sili atu ona mimiti i totonu e le momi le vai nai lo o le maa. Faamatala atu e manaomia ona faavaivai o tatou loto ae le o le maaa ina ia mafai ai ona tatou talia upumoni a le Tama Faalelagi ma Lona alofa.

• Oti se foliga o se fatu i se mea vaivai, e pei o se fasi ie, ma se mea malo, e pei o se pepa malo. Talanoa ma tamaiti i le eseesega i le va o le i ai o se loto agamalu ma se loto maaa. Faasoa atu ni faataitaiga mai tusitusiga paia e uiga i ni tagata o e na i ai ni loto agamalu po o le maaa, e pei o Nifae, Lamana, ma Lemuelu (1 Nifae 2:16--19); Paulo (Galuega 9:1--22); po o Iosefa Samita (Iosefa Samita--Talafaasolopito 1:11--20). A o e faasoaina atu faataitaiga taitasi, valaaulia ia tamaiti e tusi atu i le ata o le loto agamalu po o le loto maaa.

O Mose o loo faauuina Arona

O Arona na “valaauina e le Atua” (Eperu 5:4). Ua Valaau e Mose ia Arona i le Galuega, saunia e Harry Anderson

Eperu 5:4

E valaauina e le Atua i latou e umia le Perisitua.

O leEperu 5:4 o se fuaitau taua aua e faamanino mai ai o i latou e umia le perisitua e tatau ona valaauina e le Atua. E faapena foi i soo se tasi ua valaauina e auauna atu i le Ekalesia a le Alii.

Gaoioiga e Mafai Ona Fai

• Faitau le Eperu 5:4 i tamaiti. Fai atu i se tasi e umia le perisitua e faamalamalama mai po o le a le perisitua. E mafai foi ona ia faasoa atu pe faapefea ona ia auauna atu i isi a o ia faataunuuina ona tiute. Fai atu i se tuafafine i le uarota e faasoa mai lona aafiaga i le vaetofiaina i se valaauga i le Ekalesia. Uunaia o ia e faasoa mai pe na faapefea ona faamanuiaina o ia e le Alii i le mana e faataunuu ai lona valaauga.

• Fesoasoani i tamaiti e tauloto fasifuaitau mai le mataupu faavae lona lima o le faatuatua. Tuu atu lau molimau e faapea o tagata e valaauina e faia le galuega a le Atua e valaauina e le Atua e ala i faaaliga.

aikona o le aoao atu

Aoao atu le Aoaoga Faavae: Tamaiti Matutua

Eperu 1:1–10; 2:8–10, 17–18

Ou te talitonu ia Iesu Keriso.

O le Tusi ia Eperu sa tusia e faamalolosia ai le faatuatua o le Au Paia i Eperu ia Iesu Keriso. E mafai foi ona faia lea lava mea e tasi mo tamaiti o loo e faiaoga ai.

Gaoioiga e Mafai Ona Fai

• Tofi ia tofu tamaiti taitasi ma ni nai fuaiupu mai le Eperu 1:1-10; 2:8-10, 17-18, ma valaaulia tamaiti e sue i na fuaiupu ni upumoni e uiga ia Iesu Keriso. Fai atu ia i latou e faasoa mai pe tusi i le laupapa mea na latou mauaina. O a isi mea ua tatou iloa e uiga ia Iesu Keriso? E mafai ona maua e tamaiti ni manatu i pese e pei o le “Ua Ou Iloa Lo‘u Fa‘aola” (Viiga, nu.73) po o le “Na Ia Auina Mai Lona Alo” (Tusipese a Tamaiti, 20).

• Fai atu i tamaiti e tusi ni ata o i latou lava ma o latou matua. Fai i ai e faasoa mai mea e tutusa ai i latou ma o latou matua. Faamalamalama atu ina ua fai mai le Eperu 1:3 o Iesu Keriso “ua matua tusa lava ma le [Atua],” o lona uiga ua i ai ia Iesu ma le Tama Faalelagi uiga auaumama ma uiga faaleatua e tutusa lelei. Talanoa ma tamaiti pe faapefea e le mulimuli ia Iesu Keriso ona aumaia i tatou ia latalata atili atu i le Tama Faalelagi.

Eperu 3:7–19

Ina ia maua le taitaiga ma faamanuiaga a le Tama Faalelagi, e “le tatau ona faamaaa [o tatou] loto.”

I le Eperu 3, o loo faaaoga ai le tala ia Isaraelu i le vao e aoao mai ai le taua o le le faamaaaina o o tatou loto. E mafai faapefea ona e faaaogaina lenei tala e aoao atu ai i tamaiti lenei mataupu faavae?

Gaoioiga e Mafai Ona Fai

• Fai i tamaiti e mafaufau i mea e malo ma vaivai. (Afai e mafai, aumai ni faataitaiga e faaali atu i ai.) Faitau faatasi le Eperu 3:8. O le a le uiga o le i ai o se loto maaa? Aisea e finagalo ai le Atua ia malu o tatou loto?

• I au lava upu, faasoa atu le tala ia Isaraelu na faamaaaina o latou loto i le Alii i le vao (tagai Numera 14:1–12; Eperu 3:7–19). Tuu i tamaiti e faatino mai le tala. O le a le mea e tupu pe a faamaaa o tatou loto i le Alii ma Lana talalelei?

• Valaaulia ia tamaiti e faitau le Mataio 13:15; Eperu 3:15; Mosaea 11:29; ma le Mose 6:27. Fai i ai e tusi i luga o le laupapa vaega o le tino o loo ta’ua i nei fuaiupu. O le a le uiga o le i ai o taliga ua mafiafia faaleagaga, o mata ua tauaso, ma loto ua maaa? E faapefea ona tatou mautinoa o o tatou taliga, mata ma loto ua saunia ia iloa le leo o le Agaga?

Eperu 5:1–4

E valaauina e le Atua i latou e umia le Perisitua.

O leEperu 5 ua tuuina mai ai se avanoa e talanoa ai po o le a le perisitua---o le mana ma le pule e galue ai i le suafa o le Atua---ma pe faapefea ona maua.

Gaoioiga e Mafai Ona Fai

• Faaali le ata o le Tuuina Atu e Mose o le Perisitua ia Arona (Tusiata o le Talalelei, nu. 15) a o faitau e se tamaitiiti le Eperu 5:4. Faamalamalama atu o le Perisitua Arona na faaigoa ia Arona. Fesoasoani i tamaiti e mafaufau i tiute a i latou e umia le Perisitua Arona (e pei o le papatisoina, faamanuiaina ma le tufatufaina atu o le faamanatuga, ma le valaaulia o isi e o mai ia Keriso; tagai i le Mataupu Faavae ma Feagaiga 20:46–48, 59).

• Fesoasoani i tamaiti e mafaufau e uiga i auala eseese e maua ai e tagata le pule. Mo se faataitaiga, e faapefea e se faiaoga, fomai, po o se taitai faaupufai ona maua le pule? E faapefea ona tuuina mai e le Atua Lana pule? Valaaulia ia tamaiti e mafaufau e uiga i le fesili lenei a o latou faitauina le Eperu 5:4 ma le mataupu faavae e lima o le faatuatua. Fesoasoani i tamaiti e mafaufau i tagata i le uarota o e ua i ai le pule mai le Atua—e aofia ai e umia le perisitua, faapea foi alii ma tamaitai o e ua vaetofiaina e auauna atu i ni valaauga faapitoa.

aikona o le aoaoina

Uunaia le Aoaoina i le Aiga

Valaaulia tamaiti e faasoa atu se mau, pese, po o se gaoioiga na latou aoaoina i le vasega i le asō i o latou aiga i se afiafi faaleaiga.

Faaleleia o Lo Tatou Aoao Atu

E mafai ona iloa e tamaiti le uunaiga a le Agaga. Aoao atu i tamaiti o lagona o le filemu, alofa, ma le mafanafana latou te maua, pe a latou talanoa pe usu le pese e uiga ia Iesu Keriso ma Lana talalelei e sau mai le Agaga Paia.

itulau o gaoioiga: E i ai la’u molimau ia Iesu