o ni tamaitai e toatolu o loo savalivali i fafo o le malumalu

23–29 Oketopa

1 ma le 2 Timoteo; Tito; Filemoni

“Ia Fai Oe ma Faaaoao i e ua Faatuatua”

Na aoao mai Paulo e faapea “o Tusi Paia uma lava e mai … e faapoto ai foi i le amiotonu” (2 Timoteo 3:16). A o e suesue i nei tusi, mafaufau loloto pe mafai faapefea ona latou musuia tamaiti ia ola amiotonu.

aikona o le fefaasoaai

Valaaulia le Fefaasoaai

Fai i tamaiti e talanoa e uiga i se tasi ua avea ma “faaaoao [lelei] o e faatuatua” mo i latou. O a mea o latou faia e avea ai ma faataitaiga lelei i isi?

aikona o le aoao atu

Aoao atu le Aoaoga Faavae: Tamaiti Laiti

1 Timoteo 3:1–2; Tito 1:7–9

E taitai e epikopo ia uarota o ni auauna a le Atua.

Sa aoao atu e Paulo ia Timoteo ma Tito e uiga i le taua o epikopo. E mafai faapefea ona e aoao atu i tamaiti mea e fai e le epikopo? (O se peresitene o le paranesi e faatusatusa i se epikopo.)

Gaoioiga e Mafai Ona Fai

• Tusi se ata faigofie o lou epikopo i luga o le laupapa. Fai i tamaiti e ta’u mai ni nai mea latou te iloa e uiga i le epikopo. E faapeī o ia? O a ana mea e fai? E faapefea ona ia faamanuiaina le uarota? (E mafai ona e mauaina ni nai uiga o se epikopo i le 1 Timoteo 3:1–2 ma le Tito 1:7–9.) A o faasoa mai e tamaiti o latou manatu, tusi i ni fasipepa ona tuu lea i tamaiti e faapipii i le laupapa i autafa o le ata.

• Tusi tiute o se epikopo i luga o fasipepa—e pei o le fesoasoani i tamaiti ma le autalavou i le uarota, taliaina o sefuluai ma taulaga anapogi, tuuina atu o valaauga, faatalanoaina o tagata o le ekalesia, ma fesoasoani ia i latou e le tagolima. Tuu fasipepa nei i se pesini, ma valaaulia tamaiti taitasi e piki se tasi. Ona fesoasoani lea i le tamaitiiti e fai mai taga o nei tiute ia te outou. Faasoa atu lau molimau faapea o lou epikopo ua valaauina e le Atua.

• Valaaulia tamaiti e tusi se ata o le epikopo o loo auauna atu i tagata o le uarota. Fautuaina e ave a latou ata ia te ia e faafetai atu ai ia te ia. O le a se mea e mafai ona tatou faia e fesoasoani ai ia te ia?

faifeautalai e toalua o loo talanoa i se alii

“Aua ne’i ‘ino’ino se tasi i lou taulealea; a ia fai oe ma faaa’oa’o i e ua faatuatua” (1 Timoteo 4:12).

1 Timoteo 4:12

E mafai ona avea au “o se faaa’oa’o i ē ua faatuatua.”

O le a se mea e mafai ona e faia e musuia ai tamaiti ia avea ma “faaaoao i e ua faatuatua”?

Gaoioiga e Mafai Ona Fai

• Usu faatasi ma tamaiti “Do as I’m Doing” (Children’s Songbook, 276). Fai i tamaiti e mulimuli i lau faataitaiga e ala i le faia o taga e te faia. Tuu i tamaiti e feauauai e taitai le vasega e mulimuli i a latou taga. Faitau le 1 Timoteo 4:12, ma fesili i tamaiti po o le a se mea e mafai ona latou faia ia avea ai ma faataitaiga lelei i isi.

• Faasoa atu se aafiaga ina ua e taumafai e avea ma se faataitaiga lelei i se tasi pe o se tasi foi sa avea ma faataitaiga lelei ia te oe (atonu e aofia ai ni tamaiti i lau vasega). Valaaulia tamaiti e avea ma faataitaiga lelei i tagata o o latou aiga ma uo.

2 Timoteo 3:14–17

O le a fesoasoani tusitusiga paia ou te aoaoina upumoni.

Afai e mafai ona e fesoasoani i tamaiti e aoao ia fiafia i tusitusiga paia, o le a faamanuiaina o latou olaga e aoaoga o i tusitusiga paia i tausaga a sau.

Gaoioiga e Mafai Ona Fai

• Faaali atu se seti o tusitusiga paia, ma fesoasoani i tamaiti e faamasani i ai e ala i le faaali atu ia i latou o itulau faaulutala o le Tusi Paia, le Tusi a Mamona, le Mataupu Faavae ma Feagaiga, ma le Penina Tau Tele. Valaaulia se tamaitiiti e uu nei tusi a o e faitauina le 2 Timoteo 3:15–17. Tau atu i tamaiti pe aisea e te fiafia ai i tusitusiga paia, ma tuu atu i tamaiti e faailoa mai o latou lagona.

• Fai i tamaiti e talanoa mai e uiga ia latou meatotino aupito taua. O le a se mea o latou faia i ai? E faapefea ona latou taulimaina? Tuu atu latou te feauauai i le uuina o tusitusiga paia ma susue ma le faaeteete ia itulau. O a mea tatou te faaaoga i ai ia tusitusiga paia? Aisea e tatau ai ona tatou tausia lelei? Molimau atu o tusitusiga paia o loo i ai upumoni e finagalo le Tama Faalelagi ia tatou iloa.

• Fesoasoani i tamaiti e fatufatu ni taga e o faatasi ma pese e uiga i tusitusiga paia, e pei o le “Saili, Mafaufau Loloto, ma Tatalo” (Tusipese a Tamaiti, 66, 62).

aikona o le aoao atu

Aoao atu le Aoaoga Faavae: Tamaiti Matutua

1 Timoteo 4:12

E mafai ona avea au “o se faaa’oa’o i ē ua faatuatua.”

O Timoteo sa laitiiti tele e avea o se taitai o le Ekalesia, ae sa manao Paulo ia te ia ia ona iloa sa mafai lava ona avea o ia o se faaa’oa’o. E mafai ona e musuia tamaiti e faia ni faataitaiga lelei mo i latou o siomia i latou.

Gaoioiga e Mafai Ona Fai

• Faitau faatasi le 1 Timoteo 4:12, ma fai i tamaiti e sue mai ni auala se ono na ta’ua e Paulo e mafai ona avea ai i tatou “o se faaa’oa’o i e ua faatuatua.” Vaevae le vasega i ni paga, ma valaaulia paga taitasi e mafaufau i se tulaga e mafai ai ona avea i latou o se faaa’oa’o i e ua faatuatua. Fai i ai e faatino la latou tulaga mo le isi vaega uma o le vasega.

• Fesili i ai pe mananao e faasoa mai nisi aafiaga i se taimi na latou taumafai ai e avea o se faataitaiga lelei i isi. Ta’u atu ia i latou le ala ua avea ai i latou o ni faataitaiga ia te oe o e ua faatuatua ma pe o faapefea foi ona e matauina i latou o faia faataitaiga lelei mo isi.

1 Timoteo 6:7–12

O mea e faavavau e sili atu ona taua nai lo tupe.

E tuu e le lalolagi le faamuamua maualuga i tupe ma mea e mafai e tupe ona faatau. E mafai faapefea ona e fesoasoani i tamaiti ia faatumauina lo latou taulaiga ma le alofa e totonugalemu i le Tama Faalelagi ma Iesu Keriso?

Gaoioiga e Mafai Ona Fai

• Valaaulia ia tamaiti e talanoa e uiga i mea o le a latou faatauina pe afai latou te maua tupe uma o le lalolagi. Faitau faatasi ma tamaiti le 1 Timoteo 6:7–12 ma fai ia i latou e aotele mai mea na aoao atu e Paulo ia Timoteo e uiga i tupe. Ona valaaulia lea o tamaiti e toe faitau ia fuaiupu 11–12 saili mo mea sa ta’ua e Paulo e sili atu ona taua nai lo o tupe.

• Faaali ata o mea faalelalolagi (e pei o tupe, meataalo, po o faafiafiaga) ma mea o le faavavau (e pei o aiga po o malumalu). Valaaulia ia tamaiti e faavasega i ni faaputuga se lua—mea tatou te latalata atili ai ia Keriso ma mea e ono tata’i ese ai mai ia Keriso pe afai e tele atu lo tatou fiafia i ai nai lo le tatou alolofa ia te Ia. Aisea ua avea ai “le manao i le tupe … ma pogai o mea leaga uma”? E faapefea e le taulai atu ia Iesu Keriso ona faafiafiaina ai i tatou?

2 Timoteo 3:14–17

Sa tuuina mai e le Tama Faalelagi ia i tatou tusitusiga paia e fesoasoani ai ia tatou iloa le mea moni mai le sese.

A o e aoao atu ia tamaiti e uiga i tusitusiga paia, vaavaai mo auala e faamalosiauina ai i latou e maua o latou lava aafiaga mamana i le afioga a le Atua.

Gaoioiga e Mafai Ona Fai

• Valaaulia tamaiti e faitau le 2 Timoteo 3:15–17. Faaali atu ni ata o loo faaalia ai se tala mai tusitusiga faavae taitasi e fa, ma valaaulia ni nai tamaiti e piki se ata ma faamatala le tala. (E mafai ona e maua ata i le Tusiata o le Talalelei ma i anomea o le Sau, Mulimuli Mai ia te A’u .) Fai atu i tamaiti e faasoa mai soo se mea latou te iloa e uiga i lena tusi o tusitusiga paia. E faapefea e tusitusiga paia ona “faapoto [i tatou] e iu ai i le olataga”?

• Faasoa atu se mau e fiafia i ai po o se aafiaga na fesoasoani ai tusitusiga paia ia te oe e fausia lou faatuatua i le Tama Faalelagi ma Iesu Keriso. Tuu atu i tamaiti ni avanoa e faasoa mai ai ni a latou lava mau e fiafia i ai po o se aafiaga.

• Fai i se tamaitiiti e faitau le Moronae 10:4–5. O a mea na folafola mai e Moronae i nei fuaiupu? Fesili i tamaiti pe na faapefea ona latou mauaina se molimau faapea e moni ia tusitusiga paia. Valaaulia i latou e faitau pe faalogologo e le aunoa i tusitusiga paia ma ole atu i le Atua pe moni.

aikona o le aoaoina

Uunaia le Aoaoina i le Aiga

Valaaulia ia tamaiti e faasoa atu i o latou aiga mea sa latou aoaoina e uiga i tusitusiga paia ma sue se fuaiupu se tasi o se mau e mafai ona latou faasoa mai i le vasega i le vaiaso a sau (faatasi ai ma le fesoasoani a o latou matua, pe a manaomia).

Faaleleia o Lo Tatou Aoao Atu

Fetuunai ia gaoioiga ina ia fetaui ma manaoga. Nai lo le vaai i nei otootoga faapea o ni faatonuga e tatau ona e mulimuli ai, faaaoga o se faapogai o aitia e faamatua’ia ai au lava musumusuga a o e mafaufau loloto i manaoga o tamaiti o loo e faiaoga ai. E mafai ona e fetuuna’ia ia gaoioiga e aoao ai tamaiti o soo se vaitausaga.

itulau o gaoioiga: e aoao i tatou e tusitusiga paia i upumoni