“2–8 Oketopa. Efeso: ‘Ina ia Faaatoatoaina ai le Au Paia’” Sau, Mulimuli Mai ia te A’u—Mo Le Peraimeri: Feagaiga Fou 2023 (2022)
“2–8 Oketopa. Efeso,” Sau, Mulimuli Mai ia te A’u—Mo Le Peraimeri: 2023
2–8 Oketopa
Efeso
“Ina ia Faaatoatoaina ai le Au Paia”
A o e suesueina le Tusi ia Efeso, mafaufau pe o a mataupu faavae e mafai ona e faamamafaina e faamanuiaina ai tamaiti o loo e faiaoga ai. Tusi ni manatu e oo atu i le mafaufau a o e faitauina.
Valaaulia le Fefaasoaai
Valaaulia tamaiti e tutu i se laina. Amata i le pito i luma o le laina, tuu atu i tamaiti taitasi se avanoa e faasoa mai ai se mea na ia aoaoina talu ai nei e uiga i le talalelei i le taimi o suesuega faaleaiga o tusitusiga paia, i le Peraimeri, po o se isi lava nofoaga.
Aoao atu le Aoaoga Faavae: Tamaiti Laiti
E ao i tagata o le Ekalesia ona avea o ni uo ma “e nuu faatasi.”
Pe o ni “tagata ese” pe “nuu faatasi” ia tamaiti o lau vasega o le tasi ma le isi faapea foi ma isi tagata o le uarota? Fesoasoani ia latou malamalama e ui ina i ai o tatou eseesega, e fesoasoani le Faaola ia i tatou ia soofaatasi ma fealofani.
Gaoioiga e Mafai Ona Fai
-
Tuu se ata o le Faaola i le ogatotonu o le potu. Valaaulia ia tamaiti e tutu i vaega eseese o le potu e faatusa i “tagata ese” po o “e aumau.” Fesoasoani ia latou malamalama o nei upu o lona uiga o tagata tatou te lei iloaina lava. A o e faitauina le Efeso 2:19, valaaulia i latou e o atu agai i le ata o Keriso seia iu ina latou tutu faatasi. Ta’u atu ia i latou a o tatou latalata atili atu i le Faaola, e mafai ona tatou tutufaatasi ma isi o ni uo ma “e nuu faatasi”.
-
Sue ni ata o tamaiti mai vaega eseese o le lalolagi, ma nana solo i le potu. Tuu se ata o le Faaola i luma o le potu. Valaaulia lau vasega e fai paga e pei o ni faifeautalai ma feauauai e sue se ata o se “tagata ese” e tuu i autafa o le ata o le Faaola. Fesoasoani ia latou malamalama a oo ina papatiso ia tagata, e avea i latou o se vaega o lo tatou aiga faale-Ekalesia, po o le “aiga o le Atua.” E mafai faapefea ona tatou fesoasoani i se tasi e fou ina ia lagona le taliaina o ia?
E finagalo le Tama Faalelagi ia ou usitai i o’u matua.
A o e faitauina le Efeso 6:1–3, mafaufau i ni auala e mafai ona e fesoasoani ai i tamaiti ia malamalama pe aisea e taua ai le usitai i o latou matua.
Gaoioiga e Mafai Ona Fai
-
Faitau le Efeso 6:1 i le vasega, pe fesoasoani foi i se tasi o tamaiti e faitauina. Fai i tamaiti e mafaufau i ni taimi sa latou usitai ai i o latou matua. Fai atu ia i latou e faasoa mai pe na faapefea ona faamanuiaina i latou i le usiusitai ma o a ni o latou lagona ina ua latou usiusitai. Aisea e taua ai le usitai i o tatou matua?
-
Usu faatasi se pese e uiga i le usitai, e pei o le “Quickly I’ll Obey” (Children’s Songbook, 197). Tuu atu i tamaiti e auauai i le faaigoaina o se mea e fai atu ai o latou matua ia i latou e fai, ma valaaulia i latou e faafoliga o faia lena mea.
-
Faaali atu se ata o Iesu Keriso o loo papatisoina (tagai Tusiata o le Talalelei, nu. 35), ma faasoa mai pe na faapefea ona usitai le Faaola i le Tama Faalelagi e ala i le papatisoina (tagai i le 2 Nifae 31:6–7). Faasoa atu se taimi na e usitai ai i ou matua ma faamanuiaina ai. Aisea e finagalo ai le Tama Faalelagi tatou te usitai i o tatou matua?
E mafai e le ofutau a le Atua ona puipuia au mai mea leaga.
E faapefea ona e fesoasoani i tamaiti ia malamalama o le faia o mea amiotonu e pei o le ofuina lea o le ofutau?
Gaoioiga e Mafai Ona Fai
-
Faaali se ata o se tagata o ofuina le ofutau, e pei o lea e i le itulau o gaoioiga o le vaiaso lenei po o le otootoga o lenei vaiaso i le Sau, Mulimuli Mai ia te A’u–Mo Tagata Taitoatasi ma Aiga. A o e aoteleina le Efeso 6:10–18, faaali i tamaiti pe faapefea e vaega eseese o le ofutau ona puipuia vaega eseese o le tino. (Tagai “The Whole Armor of God,” Friend, June 2016, 24–25.)
-
Aumai ni mea eseese i le vasega e mafai ona faatusa i vaega o le ofutau o loo ta’ua i le Efeso 6:14–17 (mo se faataitaiga, o se pulou po o se taliufiufi), po o ni vaega faigofie o le ofutau mai le pepa. Tuu i tamaiti e feauauai e faamaulu le “ofutau.” Fesoasoani ia latou malamalama pe faapefea ona tatou ofuina le ofutau o le Atua (mo se faataitaiga, e ala i le suesue i tusitusiga paia, auauna atu i isi, tatalo, usiusitai, ma isi mea faapena). Talanoaina pe faapefea e le faia o nei mea ona puipuia i tatou mai le leaga.
Aoao atu le Aoaoga Faavae: Tamaiti Matutua
Ua “nuu faatasi” i tatou i le aiga o le Atua.
E faamalolosia tamaiti pe a i ai ni a latou uo lelei i le talalelei. E mafai faapefea ona e fesoasoani ia i latou e atinae ni faauooga e sili atu o le tasi ma le isi?
Ua “nuu faatasi” i tatou ma le Au Paia a le Atua.
Gaoioiga e Mafai Ona Fai
-
Faitau faatasi le Efeso 2:19 ma talanoaina le uiga o le avea o se tagata ese po o se tagata e aumau. Faasoa atu se aafiaga sa e lagona ai e pei o se tagata ese po o se e aumau ma sa fesoasoani se tasi ia e lagonaina le talileleia o oe. Valaaulia tamaiti e faasoa mai ni aafiaga faapena. O le a se mea e mafai ona tatou faia e avea ai ma “e nuu faatasi” nai lo ni tagata ese? Pe i ai ni tamaiti o lau vasega e le o mai soo, atonu ona latou te lagona e pei i latou o ni tagata ese? Fesoasoani i tamaiti e faia se fuafuaga e fesoasoani ai i na tagata ia lagonaina le talileleia ma le alofagia.
-
Ina ia fesoasoani i tamaiti e faamalosia o latou sootaga ma le tasi ma le isi, tusi ni nai fesili i le laupapa e uunaia ai i latou e faasoa atu se mea e uiga ia i latou lava, e pei o le O anafea na tali mai ai sau tatalo? po o le O le a se mea e sili ona e fiafia i ai e fai faatasi ma lou aiga? Vaevae ia tamaiti i ni paga, ma valaaulia i latou e fai atu le tasi i le isi ia fesili. O le a se mea na tatou aoaoina e uiga i le tasi ma le isi?
E finagalo le Tama Faalelagi ia ou usitai ma ava i o’u matua.
Mafaufau i ni auala e mafai ona e fesoasoani ai i tamaiti ia malamalama pe aisea e taua ai le usitai i o latou matua.
Gaoioiga e Mafai Ona Fai
-
Valaaulia ia tamaiti e faitau le Efeso 6:1–3 taitoatasi ma faailoa mai fasifuaitau e taua ia i latou. Valaaulia i latou e faasoa mai nei fasifuaitau ma pe aisea ua latou lagona ai e taua nei fasifuaitau.
-
Valaaulia ia tamaiti e su’e ma talanoa e uiga i ni faataitaiga o tagata o i tusitusiga paia sa usitai ma ava i o latou matua, e pei o le Faaola (tagai Luka 2:42–52), Ruta (tagai Ruta 1), po o Nifae (tagai 1 Nifae 3:1–8). Aisea e taua ai le usitai ma ava i o tatou matua?
-
Tuu atu i tamaiti taitasi se fasipepa ma le upu ava i le pito i luga. Talanoaina le uiga o le upu. Valaaulia ia tamaiti e fai se tusiga pe tusi se ata i a latou pepa, o se mea e mafai ona latou faia e faaali atu ai latou te ava i o latou matua.
E mafai e le ofutau a le Atua ona puipuia au mai mea leaga.
A o e faitauina le Efeso 6:10–18, mafaufau i ni nai mea matautia faaleagaga e feagai ma tamaiti ma pe mafai faapefea ona e fesoasoani e faamalolosia ia tamaiti e faasagatau i ai.
Gaoioiga e Mafai Ona Fai
-
A o faitauina e se tamaitiiti e toatasi le Efeso 6:10–18, fai i se isi tamaitiiti e lisi mai pe tusi i luga o le laupapa ni vaega o le ofutau o loo ta’ua. Aisea e taua ai se ofutau i se taua? E mafai faapefea ona tatou ofuina le ofutau faaleagaga i aso uma?
-
Tofi tamaiti taitasi e tusi ma faaigoa se vaega o le ofutau o loo faamatala mai i le Efeso 6:14–17. E mafai faapefea e nei vaega o le ofutau ona puipuia i tatou mai le leaga? O a mea ua folafola mai e le Alii ia i latou o e ofuina le ofutau o le Atua? (tagai i le Efeso 6:13). O le a le uiga o le “tetee atu pe a oo i le aso vale”?
Uunaia le Aoaoina i le Aiga
Valaaulia ia tamaiti e matau i lenei vaiaso se tasi e ono lagona e faapei o se tagata ese. Lu’i i latou e faia se mea e aapa atu ai i lena tagata.
Faaleleia o Lo Tatou Aoao Atu
Fesoasoani i tamaiti laiti e aoao mai tusitusiga paia. E mafai e tamaiti laiti ona aoao mai tusitusiga paia, ae atonu e manaomia ona latou taulai atu i se fuaiupu se tasi pe na o se fasifuaitau autu foi. E mafai ona e valaaulia i latou e tutu i luga pe a latou faalogo i se upu po o se fasifuaitau patino. (Tagai i le Aoao Atu i le Ala o le Faaola,25–26.)