“4–10 Tesema. Faaaliga 1–5: ‘Ia i le Tamai Mamoe … Le Viiga, ma le Malosi e Faavavau’” Sau, Mulimuli Mai ia te A’u—Mo Le Peraimeri: Feagaiga Fou 2023 (2021)
“4–10 Tesema. Faaaliga 1–5,” Sau, Mulimuli Mai ia te A’u—Mo Le Peraimeri: 2023
4–10 Tesema
Faaaliga 1–5
“Ia i le Tamai Mamoe … Le Viiga, ma le Malosi e Faavavau”
O le tusi a Faaaliga e mafai ona faigata mo tamaiti ona malamalama ai, ae o loo i ai foi aoaoga faavae taua e matagofie ma faigofie.
Valaaulia le Fefaasoaai
Valaaulia ia tamaiti e faasoa mai pe o a ni o latou lagona pe afai latou te vaai ia Iesu Keriso i se faaaliga. Fai atu ia i latou e faasoa mai soo se mea latou te iloa e uiga i le faaaliga a Ioane ia Iesu i le tusi o Faaaliga.
Aoao atu le Aoaoga Faavae: Tamaiti Laiti
E mafai ona ou faasusulu atu le malamalama o le Faaola.
I le Faaaliga 1:20, na faatusa ai e le Faaola Lana Ekalesia i ni tuugalamepa. Fesoasoani i tamaiti ia malamalama e mafai ona latou faasusulu atu le malamalama o le Faaola e ala i le ola ai i Ana aoaoga.
Gaoioiga e Mafai Ona Fai
-
Faaali atu i tamaiti ata o punavai eseese o le malamalama, e pei o se matauila, se moligao, ma le la. A o e faitauina “O tuugalamepa e fitu na e vaai i ai o ekalesia ia e fitu” (Faaaliga 1:20), valaaulia tamaiti e faasino i le ata o le malamalama o loo ta‘ua i lenei fuaiupu. Fesoasoani i tamaiti e talanoaina pe faapefea e i tatou, o ni tagata o le Ekalesia a Iesu, ona pei o le malamalama o se moligao—mo se faataitaiga, pe a tatou faia ni mea mananaia mo isi.
-
Usu se pese e faatatau i le avea ma malamalama i isi, e pei o le “E Manao Iesu Ia Ou Fai ma Sulu” (Tusipese a Tamaiti, 38). Faasoa atu ni auala na e vaaia ai tamaiti o ola i le talalelei a Iesu Keriso ma avea o se malamalama ia i latou o siomia i latou. Faasoa atu pe na faapefea ona fesoasoani le avea o se malamalama i isi e te lagona ai le latalata atili atu i le Tama Faalelagi ma Iesu Keriso.
E mafai ona ou valaaulia Iesu Keriso i lo’u olaga.
O le ata o Iesu o loo tu i le faitotoa ma tuitui e mafai ona fesoasoani e malamalama ai tamaiti e finagalo o Ia ia latalata atu ia i latou.
Gaoioiga e Mafai Ona Fai
-
A o e faitauina le Faaaliga 3:20, faaali atu le ata o le Faaola i le faitotoa mai le otootoga o lenei vaiaso i le Sau, Mulimuli mai ia te A’u—Mo Tagata Taitoatasi ma Aiga. Valaaulia tamaiti e vaai faalemafaufau ia Iesu o loo tuitui i le faitotoa i o latou fale. Tuu atu ia i latou e talanoa e uiga i mea o le a latou faia.
-
Valaaulia tamaiti e faamatala atu e uiga i ni taimi sa latou faatalitali ai mo se tasi e asiasi atu i lo latou fale lea sa latou naunau e vaai i ai. Na faape’i le faatalitali atu mo lena tagata e tuitui atu le faitotoa? O le a se mea e tupu pe afai tatou te le faatagaina le tagata i totonu? Faitau le Faaaliga 3:20, ma tuu i tamaiti e feauauai e tuu le ata o Iesu ma faafoliga faapea o loo tuitui i se faitotoa. E mafai e isi tagata o le vasega ona faafoliga e tatala le faitotoa. O le a se mea e mafai ona tatou fai e aumaia ai Iesu i o tatou autafa, tusa lava pe le mafai ona tatou vaai ia te Ia?
O Iesu Keriso ua na o le pau lea o le toatasi e agavaa e fai ma o’u Faaola.
Sa aoao e Ioane mai lenei faaaliga vaaia ua na o Iesu Keriso lava (faatusa i se tamai mamoe) e mafai ona avea ma o tatou Faaola ma faataunuu ai le fuafuaga a le Tama (faatusa i le tusi ua faamaufaailogaina).
Gaoioiga e Mafai Ona Fai
-
A o lei amataina le vasega, afifi se kopi o le Tusi Ata o le Talalelei e faaaoga ai se pepa po o se manoa. I le faaaogaina o ni nai fasifuaitau autu mai le Faaaliga 5:1–10, faamatala mai le faaaliga na vaaia e Ioane. Faaali atu i tamaiti le tusi, ma ta’u atu i ai e na o le tasi lava le ala e tatala ai le tusi o le sue lea o le ata o Iesu na e nanaina i le potu. Pe a latou maua le ata, tatala le tusi ma faasoa atu i tamaiti nisi o ata o i le tusi e faatusa i faamanuiaga o loo maua ona o le Togiola a Iesu Keriso (e pei o se malumalu, papatisoga, ma aiga). Molimau atu o le Faaola e na o le pau lea o le tagata e mafai ai ona fai na mea.
-
Aotele le faaaliga o loo faamatala mai i le Faaaliga 5:1–10, ma valaaulia ia tamaiti e faatino mai taga pe o a lagona o Ioane ma isi i vaega eseese o le faaaliga. Mo se faataitaiga, e mafai ona latou faafoliga e fetagisi pe a leai se isi e mafai ona tatala le tusi, pe e mafai ona latou alalaga fiafia ina ua tatala e le Faaola le tusi.
Aoao atu le Aoaoga Faavae: Tamaiti Matutua
Afai ou te tuuto atu i le talalelei a le Faaola, o le a ou maua faamanuiaga silisili i le lagi.
O le a le uiga ia te oe o le “faaleogalua, e te le maalili e te le vevela foi”? Mafaufau i ni auala e fesoasoani ai i tamaiti ia faafeagai ma le faaleogalua—ia naunau i la latou tautinoga i le Faaola ma Lana talalelei.
Gaoioiga e Mafai Ona Fai
-
Faitau faatasi le Faaaliga 3:5, 12, 21, ma faamalamalama atu soo se upu atonu e le iloa e tamaiti. O le a le uiga o le “[ia] manumalo”? Valaaulia tamaiti e tusi se tasi o faamanuiaga na folafola mai i nei fuaiupu ma faasoa atu i le vasega.
-
Faitau faatasi le Faaaliga 3:15–16. Fai i tamaiti e talanoa e uiga i mea e sili ona aoga pe fiafia i ai pe a vevela (e pei o le supo) po o le malulu (e pei o le aisa kulimi). E mafai faapefea e le faaleogalua e uiga i le Faaola ona taofia i tatou mai faamanuiaga ua folafola mai i fuaiupu 5, 12, ma le 21?
-
Tusi i luga o le laupapa le faaleogalua, faatasi ai ma ni upu uiga tutusa, e pei o le leai se naunau, le popole, po o le faasamasamanoa. Faaaoga upu nei e fesoasoani ai i tamaiti ia malamalama pe aisea e le finagalo ai le Alii ia tatou faaleogalua. O a upu e mafai ona tatou mafaufau i ai e faamatala ai le ala e finagalo o Ia tatou te avea ai? Faasoa mai pe aisea e te manao ai ia tuuto atoatoa atu i le Faaola, ma valaaulia tamaiti e faasoa mai foi o latou manatu.
E mafai ona ou filifili e avea Iesu Keriso o se vaega o lo’u olaga.
E mafai faapefea ona e fesoasoani i tamaiti o loo e faiaoga ai e tatala o latou loto ma olaga i le mana ma le tosinaga a Iesu Keriso?
Gaoioiga e Mafai Ona Fai
-
A o e faitauina le Faaaliga 3:20, faaali atu le ata o le Faaola i le faitotoa mai le otootoga o lenei vaiaso i le Sau, Mulimuli mai ia te A’u—Mo Tagata Taitoatasi ma Aiga. Ina ia fesoasoani ia i latou e aumaia le uiga mai le ata, valaaulia i latou e galulue i paga e tali ia fesili pei o nei: O le a sou manatu aisea ua tuitui ai Iesu i le faitotoa? Aisea e le o i ai ai se au o le faitotoa i fafo o le faitotoa? O le a le uiga o le faataga o Iesu i o tatou olaga?
-
Fai i tamaiti e tusi i le laupapa ni auala eseese e “tatala ai le faitotoa” ia Iesu. O nisi faataitaiga e ono aofia ai le auauna atu i isi, faitauina o tusitusiga paia, tausia o feagaiga tatou te osia i le papatisoga, ma le aai ma feinu i le faamanatuga.
O Iesu Keriso ua na o le pau lea o le toatasi e agavaa e fai ma o’u Faaola.
O le faaaliga o loo faamatala mai i le Faaaliga 5 ua aoao mai ai ua na o Iesu Keriso lava e agavaa ma mafai ona faatinoina le Togiola ma laveai i tatou mai le agasala.
Gaoioiga e Mafai Ona Fai
-
Valaaulia ia tamaiti e faamatala mai e uiga i se taimi na latou manaomia ai se tasi e faia se mea sa le mafai ona latou faia mo i latou lava. Fai i ai e faitau le Faaaliga 5:1–10 ma vaavaai mo mea e manaomia ona fai lea e na o le toatasi lava le tagata e mafai ona faia (faamalamalama atu o le Tamai Mamoe o Iesu Keriso ma o le tusi e faatusa i le fuafuaga a le Atua). O le a le mea sa fai e Iesu mo i tatou e leai se isi tagata sa mafai ona faia?
-
Fai i tamaiti e vaavaai mo se viiga po o se pese a tamaiti o loo molimau atu ai ia Iesu Keriso (e pei o le “Beautiful Savior,” Children’s Songbook, 62–63). O a mea o aoao mai e upu o le pese e uiga ia Iesu Keriso? O faapefea ona pei le pese lea o le viiga o faaneetaga na lagiina e uiga ia Iesu Keriso i le Faaaliga 5:9–10?
Uunaia le Aoaoina i le Aiga
Valaaulia ia tamaiti e faasoa atu i o latou aiga auala e mafai ona latou valaaulia ai le tosinaga a le Faaola i o latou fale.
Faaleleia o Lo Tatou Aoao Atu
Fautuaina le migao. O se vaega taua o le migao o le mafaufau lea i le Tama Faalelagi ma Iesu Keriso. E mafai ona e faamanatu i tamaiti o le migao o le usuusu lemu lea pe hamuina se pese pe faaalia se ata o Iesu.