Afio Mai Faalua

O le Afio Mai Faalua, saunia e Harry Anderson

22–28 Me

Iosefa Samita—Mataio 1; Mataio 24–25; Mareko 12–13; Luke 21

“E Sau le Atalii o le Tagata”

Manatunatu loloto pe o a mea e manaomia ona aoao e tamaiti o loo e aoaoina mai le Iosefa Samita—Mataio 1; Mataio 24–25; Mareko 12–13; ma le Luka 21. Fetuunai manatu o tamaiti matutua atu pe a e manao ai, i le otootoga lenei mo tamaiti laiti ifo ma isi foi.

aikona o le fefaasoaai

Valaaulia le Fefaasoaai

Aumai i le vasega se mea faitino po o se ata e fesootai i se tasi o faataoto po o tala i le faitauga o lenei vaiaso (e pei o le suauu e faatusa i taupou e toasefulu po o tupe siliva e faatusa i taleni po o tupe iti a le fafine ua oti lana tane). Tuu atu i tamaiti e faasoa mai mea latou te iloa e uiga i le faataoto po o le tala.

aikona o le aoao atu

Aoao atu le Aoaoga Faavae: Tamaiti Laiti

Iosefa Samita—Mataio 1:31

A o lei toe afio mai Iesu, o le a folafola atu le talalelei i le lalolagi uma.

O se tasi o faailoga o le a vave ona toe foi mai Iesu o le talaiina atu lea o Lana talalelei i le lalolagi atoa. E mafai ona fesoasoani tamaiti e faataunuu lenei valoaga e ala i le faasoa atu o le talalelei.

Gaoioiga e Mafai Ona Fai

• Faaali se faafanua, kelope, po o se ata o le lalolagi (tagai Tusi Ata o le Talalelei, nu. 3) ma fesoasoani i tamaiti e fai mai, “O lenei Talalelei … o le a folafola atu i le lalolagi uma” (Iosefa Samita—Mataio 1:31). Aisea ua finagalo ai le Atua i Ana fanau uma e faalogo i Lana talalelei?

• Valaaulia tamaiti e savavali i le mea o loo tutu ai a o outou usuina faatasi se pese e uiga i le faasoaina atu o le talalelei, e pei o le “Ou Te Fia Avea Nei Ma Faifeautalai” po o le “Tofia e Auauna” (Tusipese a Tamaiti, 90, 94).

• Faaali le vitio “I‘ll Go Where You Want Me to Go” (ChurchofJesusChrist.org). A o matamata tamaiti, fesoasoani ia i latou e faitau auala e mafai ona latou faasoa atu ai le talalelei latou te vaai i ai i le vitio. O a isi auala e faasoa atu ai le talalelei e mafai ona latou mafaufau i ai?

lalolagi mai le vanimonimo

O le a talai atu le talalelei i le lalolagi uma. Atapue mai le faaaloaloga a le NASA Johnson Space Center

Mataio 25:14–30

E mafai ona ou faaaogaina meaalofa na aumai e le Atua ia te au.

Ua iloa e tamaiti a latou meaalofa ma tomai. Fesoasoani ia latou malamalama o nei meaalofa ma tomai e mai le Tama Faalelagi.

Gaoioiga e Mafai Ona Fai

• Aumai ni tupe siliva e faaaoga a o e faamatalaina le faataoto i taleni, o loo maua i le Mataio 25:14–30. E mafai ona e fai i ni tamaiti se toatolu e fai ma auauna e toatolu. Faamalamalama atu, i ona po o Iesu, o taleni sa faatusa i tupe, a o aso nei o taleni e mafai ona faauiga i a tatou meaalofa ma tomai.

• Fai i tamaiti e ta’u mai ni auala sa fesoasoani atu ai o latou matua, tei, faiaoga, po o uo ia te i latou. O a taleni a nei tagata ua fesoasoani ai ia te i latou e auauna atu ai i isi?

• Tusi sina faaupuga i se pepa e ta’u atu ai i tamaiti taitoatasi meaalofa ma tomai ua e matauina ia i latou. A o e faasoa atu i tamaiti taitoatasi ia meaalofa e te vaaia ia i latou, uunaia i latou e faaleleia atili a latou meaalofa ma faaaoga e auauna atu ai i isi.

Mataio 25:31–46

E finagalo Iesu ou te auauna atu i isi.

Tatou te auauna atu i le Tama Faalelagi ma Iesu Keriso e ala i le auauna atu i tagata o loo siomia ai i tatou. Fesoasoani i tamaiti e mafaufau i auala e mafai ona latou auauna atu ai i isi.

Gaoioiga e Mafai Ona Fai

• Aotele le faataoto i le Mataio 25:34–46 Fesoasoani i tamaiti ia malamalama a tatou auauna atu i isi, ua tatou auauna atu ia Iesu.

• Uu i luga se ata o se tamaitiiti faatasi ma se ata o Iesu o loo nana ai i tua. O le a se mea e mafai ona tatou faia e auauna atu ai i lea tamaitiiti? Aveese le ata o le tamaitiiti ma faamalamalama atu a tatou auauna atu i le tasi ma le isi, ua tatou auauna atu ia Iesu.

• Valaaulia tamaiti e tusi o latou lava ata o loo auauna atu i isi i auala o loo faamatala mai e le Faaola i le Mataio 25:35–36. Tuu atu i isi tamaiti e mate mai le ata o loo latou tusia.

• Valaaulia tamaiti e faasoa mai o latou aafiaga ina ua faaali atu e se tasi se auaunaga faaKeriso ia i latou po o o latou aiga.

aikona o le aoao atu

Aoao atu le Aoaoga Faavae: Tamaiti Matutua

Iosefa Samita—Mataio 1:31

A o lei toe afio mai Iesu, o le a folafola atu le talalelei i le lalolagi uma.

E mafai e tamaiti o loo e faiaoga ai ona folafola atu le talalelei i le lalolagi uma a o lei Afio Mai Faalua le Faaola.

Gaoioiga e Mafai Ona Fai

• Valaaulia tamaiti e faasoa mai faamanuiaga ua latou maua pe o le a maua ona o i latou o tagata o le Ekalesia a Keriso. Faitau faatasi le Iosefa Samita—Mataio 1:31, ma fesili i tamaiti pe faapefea ona faamanuiaina e le talalelei fanau a le Atua i le lalolagi atoa.

• Faaali i tamaiti se faafanua o le lalolagi po o le tou atunuu, ma fesoasoani ia latou faailoa maia ni nofoaga sa talai ai e se tagata o le aiga po o se uo le talalelei i se misiona.

• Valaaulia ni nai tamaiti e o mai sauniuni e faasoa mai pe na faapefea ona faailoa atu i lo latou aiga po o o latou tuaa le talalelei.

• Fai i tamaiti taitasi e tusi le igoa o se tasi e mafai ona ia talanoa i ai e uiga ia Iesu Keriso pe valaaulia foi i le lotu. Fai foi i tamaiti e lisi mai mea e mafai ona latou fai e avea ai o ni faifeautalai i le taimi nei.

Mataio 25:1–13

Ua ia te au le tiutetauave mo lo’u lava liua ia Iesu Keriso.

O le faataoto i taupou e toasefulu ua aoao mai ai e le mafai ona tatou nonoina mai lo tatou liua i le Faaola mai isi. E mafai faapefea ona e fesoasoani i tamaiti e tauave le tiutetauave mo lo latou lava liua?

Gaoioiga e Mafai Ona Fai

• Fai i se tamaitiiti e sau saunia e faasoa mai pe na faapefea ona ia aoao e uiga i le faataoto i taupou e toasefulu i le fale i lenei vaiaso.

• Tusi le ata o se lamepa suauu i le laupapa, ma faaigoa o le molimau. Tuu atu i tamaiti taitasi se fasipepa e foliga i se mataua o le suauu, ma fai i tamaiti taitasi e tusi ai i luga se mea o le a ia faia ia liua atili ai i le Faaola. Faapipii i ai ni mataua i le laupapa faataaliolio i le lamepa.

• Valaaulia tamaiti e fesoasoani atu ia te oe e fai se lisi o mea e fai e sauniuni ai mo se malo faapitoa. E tutusa faapefea nei mea pe ese ai foi mai auala e mafai ona tatou saunia ai faaleagaga mo le Afio Mai Faalua o le Faaola?

• I luga o ni fasipepa se lima, tusi ai mea e le mafai ona nono mai. I luga o isi fasipepa e lima, tusi ai mea e mafai ona nono mai. Faafefiloi fasipepa, ma fai i tamaiti e faavasega i ni vaega se lua. Faitau faatasi le Mataio 25:1–13. Aisea e taua ai le aua nei faalagolago i isi mo lo tatou liua ia Iesu Keriso?

Mataio 25:14–46

I le Faamasinoga Faaiu, o le a tatou tuu atu ai i le Alii se tala o o tatou olaga.

A mavae le Toetutu, o le a faamasinoina i tatou e le Alii e faavae i lo tatou usiusitai i Ana poloaiga ma le taliaina o Lana taulaga togiola. O le faataoto i taleni ma le faataoto i mamoe ma ‘oti ua aoao ai i tatou e uiga i lenei Faamasinoga Mulimuli.

Gaoioiga e Mafai Ona Fai

• Tofi le afa o le vasega e faitau le Mataio 25:14–30 ae o le isi afa e faitau le Mataio 25:31–46. Fai i vaega e faatino mai ia faataoto mo le vasega. O le a le mea ua aoao mai e le Alii ia i tatou i nei faataoto?

• Valaaulia tamaiti e faitau i paga le Mataio 25:35–36 ma fai se lisi o mea e mafai ona latou fai e faaali atu ai lo latou alolofa mo Iesu Keriso.

aikona o le aoaoina

Uunaia le Aoaoina i le Aiga

Fai i tamaiti e faasoa atu i o latou aiga auala e mafai ona avea ai i latou ma ni faifeautalai sili atu ma talanoa i o latou aiga e uiga i tagata e mafai ona latou faasoa atu i ai le talalelei.

Faaleleia o Lo Tatou Aoao Atu

Faalogologo pe faatino se tala. Talu ai e fiafia tamaiti i tala, vaavaai ni auala e faaaofia ai i latou i tala faatusi paia e te faasoa atu. E mafai ona latou uu i luga ni ata po o ni meafaitino, tusi ata o le tala, faatino le tala, pe fesoasoani foi e faamatala le tala. Toe faamatala ia tala e fesoasoani ai ia latou iloa faamatalaga taua ma aoaoga o le talalelei.

itulau o gaoioiga: e finagalo le Faaola ou te faasoa atu le talalelei