tamaloa i se laau a o latalata atu Iesu

Sakaio i le Laau o le Sukamoru, saunia e James Tissot

15–21 Me

Mataio 21–23; Mareko 11; Luka 19–20; Ioane 12

“Faauta, e Afio Mai Lou Tupu”

A o e faitauina le Mataio 21–23; Mareko 11; Luka 19–20; ma le Ioane 12, mata’itu ia uunaiga e te maua mai le Agaga Paia. Faasino i le “Taulimaina o Manaoga o Tamaiti Laiti Ifo” i le amataga o lenei punaoa mo mea e mafaufau i ai a o e aoao atu nei mataupu faavae.

aikona o le fefaasoaai

Valaaulia le Fefaasoaai

Faaali atu se ata mai le otootoga o lenei vaiaso i le Sau Mulimuli Mai ia te Au—Mo Tagata Taitoatasi ma Aiga, ma valaaulia tamaiti e faasoa mai mea ua latou iloa i le mea o loo tupu i le ata.

aikona o le aoao atu

Aoao atu le Aoaoga Faavae: Tamaiti Laiti

Luka 19:1–10

E silafia e le Tama Faalelagi ma Iesu a’u i lo’u igoa.

A o e faitau e uiga i le fegalegaleaiga a le Faaola ma Sakaio, o le a se savali ua e maua ai e ono faamanuiaina ai tamaiti o loo e faiaoga ai?

Gaoioiga e Mafai Ona Fai

• Faaali atu se ata o Sakaio i le Laau o le Sukamoru (i lenei otootoga po o i le ChurchofJesusChrist.org). Fesoasoani i tamaiti e sue Sakaio ma ta’u lona igoa. Fatufatu ni taga mo tamaiti e fai a o e faamatalaina le tala ia Sakaio ma Iesu—mo se faataitaiga, tutu tetee e autilo i luga atu o se aofia pe faafoliga o la e fe’a’ei i se laau. Faamalamalama atu na vaaia e le Faaola ia Sakaio ma sa ia valaau atu ia te ia i lona igoa. Molimau atu e silafia foi e le Faaola tamaiti taitasi ma o latou igoa.

• Aumai se faavaa o se ata i le vasega, pe fai foi se faavaa pepa. Valaaulia tamaiti taitasi e feauauai i le uuina o le faavaa i ona foliga a o fai atu le vaega o totoe o le vasega, “E silafia e le Tama Faalelagi ma Iesu [ta’u le igoa o le tamaitiiti].”

• Usu faatasi se pese e faatatau i le alofa o le Tama Faalelagi, e pei o le “O Au o se Atalii o le Atua” (Tusipese a Tamaiti, 2–3). Fesoasoani i tamaiti e faalogo mo mea e fesoasoani latou te iloa ai e alofa le Tama Faalelagi ia i latou.

Mataio 21:12–14

O le malumalu o se nofoaga paia.

O le migao o Iesu mo le malumalu, e pei ona faamatalaina i nei fuaiupu, e mafai ona fesoasoani i tamaiti o loo e aoaoina ia malamalama o le malumalu o se nofoaga paia.

Gaoioiga e Mafai Ona Fai

• Faaali le ata o Iesu o Loo Faamama le Malumalu (Tusi Ata o le Talalelei, nu. 51), ma faamatala le tala e pei ona tusia i le Mataio 21:12–14. Fesoasoani i tamaiti e sue tupe ma manu i le ata. Ona talanoaina lea pe aisea na manao ai le Faaola i le au faatau tupe ma tagata na faatau a latou manu e o ese ma le malumalu.

• Faaali ata o malumalu (mo se faataitaiga, tagai Tusi Ata o le Talalelei, nu. 117–19), ma fai i tamaiti e faasoa mai pe o a o latou lagona pe a latou vaai i se malumalu. E mafai ona e faamalamalama atu o le malumalu o se nofoaga tatou te o i ai e faia ai folafolaga ma le Atua, saili tali i tatalo, ma lagona le latalata atu i le Atua. Fesoasoani i tamaiti ia iloa lagona mai le Agaga Paia i le tau atu ia i latou o le malumalu o se nofoaga faapitoa. Fai i tamaiti e faia ni faatinoga e peiseai o loo latou i ai i totonu o le malumalu. Mo se faataitaiga, e mafai ona latou musumusu ma nonofo ma le migao

• Usu faatasi se pese e faatatau i le malumalu, e pei o le “Ou Te Fia Vaai i le Malumalu” (Tusipese a Tamaiti, 99), ma valaaulia tamaiti e faatu se sini ina ia o atu i le malumalu i se aso.

Malumalu o Fort Collins Colorado

O le malumalu o le maota o le Alii.

Mataio 21:28–32

E mafai ona ou usiusitai.

E finagalo le Tama Faalelagi ina ia tatou usiusitai. O le faataoto i atalii e toalua o se avanoa lea e aoao atu ai e uiga i le taua o le usitai.

Gaoioiga e Mafai Ona Fai

• Tusi se ata o atalii e toalua i le laupapa, ma faaaoga ata tusi a o e toe faamatalaina le faataoto i le Mataio 21:28–32. O le fea atalii na faia le mea sa’o i le faaiuga? Fai i tamaiti e ta’u mai ni mea e mafai ona latou faia e usitai ai i le fale. Tuu atu latou te tusia ni ata o i latou lava o faia se mea se tasi o na mea.

• Valaaulia tamaiti e faasoa mai ni aafiaga na latou oo i ai i le usiusitai i o latou matua. Na faapefea ona faamanuiaina i latou ona o le usiusitai?

aikona o le aoao atu

Aoao atu le Aoaoga Faavae: Tamaiti Matutua

Luka 19:1–10

A o ou sailia le Faaola, o le a ou maua o Ia.

E mafai ona e faaaogaina le tala ia Sakaio e fesoasoani ai i tamaiti e mafaufau i mea e mafai ona latou faia e latalata atili ai i le Faaola.

Gaoioiga e Mafai Ona Fai

• Faitau le Luka 19:1–10, taofi pe a uma ni nai fuaiupu ma talanoaina mea ua tatou aoaoina e uiga ia Sakaio. O le a le mea sa faia e Sakaio ina ia mafai ai ona ia iloa atu Iesu? Na faapefea ona ia tali atu ina ua fai atu Iesu ia te ia e sau i lalo mai le laau? Fai i tamaiti taitasi e faasoa mai se mafuaaga se tasi o le a latou mananao ai e vaai ia Iesu. Afai e afio mai le Faaola i lo tatou aai, o le a sau mea e fai e te saunia ai?

• Valaaulia tamaiti e mafaufau i tagata latou te iloa, e pei o Sakaio, atonu o loo sailia le Faaola. Fesili i tamaiti pe o le a se mea latou te fai e fesoasoani ai i se isi tagata e aoao e uiga i le Faaola.

• Valaaulia tamaiti e faasoa atu o latou aafiaga ina ua latou lagonaina e silafia e le Tama Faalelagi ma Iesu Keriso i latou ma e alolofa ia i latou.

Mataio 21:12–14

O le malumalu o se nofoaga paia e tatau ona ou faaaloalo i ai.

E mafai faapefea e le tala i le faamamaina e le Faaola o le malumalu ona fesoasoani ia te oe e aoao atu ai tamaiti e uiga i le paia o le malumalu?

Gaoioiga e Mafai Ona Fai

• Valaaulia tamaiti e faitau le Mataio 21:12–14. Faaali le ata O Iesu o Loo Faamamaina le Malumalu (Tusi Ata o le Talalelei, nu. 51), ma fesili ia i latou pe o le fea fuaiupu o loo faailoa mai i le ata.

• Valaaulia tamaiti e faasoa mai pe o a o latou lagona ina ua latou o i totonu o se malumalu, asiasi i lotoa o le malumalu, pe matamata foi i ata o malumalu. O le a se mea na fesoasoani ia i latou e iloa ai e paia le malumalu? E mafai ona e faasoa atu i tamaiti pe aisea e te fiafia ai i le malumalu. Aisea e paia ai ia te oe?

• Valaaulia se tasi pe sili atu ni talavou e o mai i le vasega ma talanoa mai pe na faapefea ona latou sauniuni e ulu atu i le malumalu. Afai na latou o i le malumalu, fai ia i latou e talanoa mai pe o a o latou lagona ao latou i ai iina.

• Otioti se ata o le malumalu i ni fasi paso, ma tufa ia tofu le tamaitiiti ma le fasi paso. Fai i tamaiti e tusi i tua o a latou fasi paso se mea se tasi e mafai ona latou fai e saunia ai e ulu atu i le malumalu. A o faasoa mai manatu o tamaiti taitasi, faaopoopo lana fasi paso i le paso.

• I luga o le laupapa, tusi ai mea nei: e mafai ona fesoasoani ia te au e saunia ai e auauna atu i le malumalu. Valaaulia tamaiti e fautua mai ni auala e faauma ai lenei fuaiupu. O nisi manatu e ono aofia ai le “Tausia o a‘u feagaiga o le papatisoga” po o le “O Le Agaga Paia.”

Mataio 23:25–28

E finagalo Iesu ia ou amiotonu i a’u taga e fai ma o’u manaoga.

Na aoao atu e Iesu le au tusiupu ma le au Faresaio e uiga i le taua o le ola moni i le talalelei—ae le na o le faafoliga e amiotonu. O le a se mea e ono fesoasoani i tamaiti ia malamalama ai i lenei upumoni?

Gaoioiga e Mafai Ona Fai

• A o e faitauina faatasi ma tamaiti le Mataio 23:25–28 mafaufau e faasoa atu lenei fauigaga o le hypocrite mai le Bible Dictionary: “O se tagata e faafoliga e lotu ae leai.” Aisea e leaga ai le avea o se tagata pepelo?

• Faaali i tamaiti se ipu e mama fafo ae palapala totonu e fesoasoani ai e faapupula mai le talafaatusa o i le Mataio 23:25. E mafai faapefea ona faamautinoa ua tatou mama a’ia’i i totonu?

aikona o le aoaoina

Uunaia le Aoaoina i le Aiga

Fesoasoani i tamaiti e mafaufau i se mea na latou aoaoina i le vasega e mafai ona latou faasoa atu i o latou aiga i le fale.

Faaleleia o Lo Tatou Aoao Atu

Lagolago atu i matua o tamaiti. “O matua o faiaoga o le talalelei aupito taua ia mo a latou fanau—e i ai ia i latou le tiutetauave autu ma le mana silisili e tosina ai a latou fanau (tagai Teuteronome 6:6–7). A o e aoao atu tamaiti i le lotu, saili ma le agaga tatalo auala e lagolago atu ai i o latou matua i la latou matafaioi taua” (Aoao Atu i le Ala a le Faaola,25).

itulau o gaoioiga: o le malumalu o se nofoaga paia