o le tama o loo opoina lona atalii

O le Atalii Faamaumauoa, saunia e Liz Lemon Swindle

1–7 Me

Luka 12–17; Ioane 11

“Ia Tatou Olioli Ia; aua Ua Ou Maua La’u Mamoe Na Leiloa”

Faitau ma le agaga tatalo le Luka 12–17 ma le Ioane 11, ma saili pe mafai faapefea ona e fesoasoani i tamaiti e te faiaoga ai ia malamalama i upumoni i nei mataupu ma lagonaina le alofa o le Tama Faalelagi.

aikona o le fefaasoaai

Valaaulia le Fefaasoaai

Faamanatu i tamaiti ni nai faataoto ma tala o loo maua i le Luka 12–17 ma le Ioane 11, ma valaaaulia i latou e faasoa mai mea latou te iloa e uiga i nei tala.

aikona o le aoao atu

Aoao atu le Aoaoga Faavae: Tamaiti Laiti

Luka 15

E finagalo le Tama Faalelagi ia toe foi atu Ana fanau uma ia te Ia.

Mafaufau i tamaiti o lau vasega, e aofia ai i latou atonu e le o auai soo mai. E mafai faapefea ona e fesoasoani ia latou lagona le alofa o le Tama Faalelagi? E mafai faapefea ona e musuia isi tamaiti e fesoasoani ia te oe e aapa atu ia i latou i le alofa?

Gaoioiga e Mafai Ona Fai

• Tuu atu i se tamaitiiti e toatasi se tupe siliva, i se isi tamaitiiti se ata o se mamoe, ma se isi tamaitiiti se ata o le atalii faamaumau oa (tagai ChurchofJesusChrist.org po o le itulau o gaoioiga o lenei vaiaso). Faamatala faataoto e tolu o loo maua i le Luka 15 ma valaaulia tamaiti e uu i luga a latou tupe siliva po o ata pe a e ta’ua. E mafai ona e valaaulia tamaiti e toe faamatala atu faataoto e le tasi i le isi ia latou lava upu.

• Fai i tamaiti e faasoa mai se taimi na leiloa ai sa latou mea. Na faapefea ona latou mauaina? Faamalamalama atu e mafai ona leiloloa faaleagaga tagata pe a latou le mulimuli i le Tama Faalelagi. Molimau atu e finagalo le Atua i tagata ua leiloloa e o mai ia te Ia, ma e mafai ona tatou fesoasoani ia i latou.

• Valaaulia tamaiti e mafaufau i isi tamaiti e le o o mai i le Peraimeri. Fesoasoani ia i latou e valivali pe tusi ni valaaulia mo nei tamaiti e auai ai i le Peraimeri po o se gaoioiga a le Peraimeri. O le a se isi auala e mafai ai ona tatou fesoasoani i nei tamaiti ia lagonaina le alofa o le Tama Faalelagi mo i latou.

Luka 17:11–19

E mafai ona ou faaali atu lo’u alofa mo le Tama Faalelagi i lo’u faafetai atu mo o’u faamanuiaga.

E mafai faapefea e le tala i lepela e toasefulu ona faamalosiauina tamaiti ia loto faafetai?

Gaoioiga e Mafai Ona Fai

• Faamatala le tala i lepela e toasefulu o e na faamaloloina e Iesu. Faaali atu le ata o loo maua i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga ma valaaulia tamaiti e faitau le sefulu i o latou tamatamailima. Ona fai lea i ai e tuu i lalo tamatamailima e iva e faailoa mai ai le lepela e toatasi na faafetai atu ia Iesu. Fesoasoani i tamaiti e mafaufau i se tasi e mafai ona latou faafetai i ai mo se faatinoga agalelei pe aoga.

• Valaaulia tamaiti taitasi e faatino se mea ua ia faafetai ai, ae mate mai e isi tamaiti uma o le vasega. Fai i tamaiti e faasoa mai ni auala e mafai ona tatou faaali atu ai i le Tama Faalelagi lo tatou agaga faafetai mo o tatou faamanuiaga.

Ioane 11:1–46

Tatou te talitonu o Iesu o le Alo o le Atua.

Na ta’u atu e Mareta, le tuafafine o Lasalo, ia Iesu: “Ua ou talitonu lava o oe le Keriso le Alo o le Atua” (Ioane 11:27). O le tala ia Maria, Mareta, ma Lasalo e mafai ona faamalolosia ai molimau a tamaiti ia Iesu Keriso.

Gaoioiga e Mafai Ona Fai

• Aotele le tala ia Iesu ua faatuina Lasalo mai le oti (tagai foi “Mataupu 43: Ua Toe Faatuina mai Lasalo e Iesu,” i le Tala o le Feagaiga Fou, 107–9, po o le vitio talafeagai i luga o le ChurchofJesusChrist.org). Faaali atu i tamaiti se lālā ua mate ma se laau ola, ma fesili atu ia i latou po o le fea ua mate ae po o le fea o loo ola. Tuu atu lau molimau ona o le mana o Iesu Keriso, o tagata ua oti o le a toetutu ma ola e faavavau.

• Fesoasoani i tamaiti e tauloto le fasifuaitau na fai atu e Iesu ia Mareta: “O a’u nei o le toetu ma le ola” (Ioane 11:25). Faamalamalama atu talu ai le Toetu o le Faaola, o le a tatou toe vaai ai i e pele ia i tatou ua maliliu.

aikona o le aoao atu

Aoao atu le Aoaoga Faavae: Tamaiti Matutua

Luka 15

E mafai ona ou fesoasoani ia Iesu e sue Lana mamoe ua leiloa.

Tatou te iloa uma lava se tasi o loo i ai i nisi o auala e pei o le mamoe na leiloa, o le tupe na leiloa, po o le atalii faamaumau oa i faataoto a le Faaola. Mafaufau pe mafai faapefea ona e musuia tamaiti e aapa atu i nei tagata ma le alofa.

Gaoioiga e Mafai Ona Fai

• Fesoasoani i tamaiti e faitau le leoa le faataoto i le mamoe na leiloa po o le faataoto i le tupe na leiloa, o loo maua i le Luka 15:1–10, ma faasoa mai mea sa latou aoaoina.

• Tusi igoa nei i le laupapa: tama, atalii matua, ma le uii. Faaali le vitio “The Prodigal Son” (ChurchofJesusChrist.org) ma taofi i nisi taimi ina ia mafai ai e tamaiti ona tusitusi i luga o le laupapa nisi o lagona o tagata o loo lisiina. O a ni lagona o le Tama Faalelagi ma Iesu Keriso e uiga ia i latou ua agasala?

• Fai i se tamaitiiti e alu i fafo ae nana e isi tamaiti se tupe siliva po o se mamoe pepa. Tuu atu e toe foi ane le tamaitiiti ma sue le tupe po o le mamoe. O a nisi o auala e mafai ai e tagata ona lagona le “leiloa” e pei o le tupe siliva po o le mamoe? Valaaulia i latou e fautua mai ni auala e mafai ona latou aapa atu ai ia i latou. Usu faatasi ma tamaiti se pese e talafeagai, e pei o le “Pele i le Leoleo Mamoe” (Viiga, nu.135), ma molimau atu i le olioli e maua pe a toe foi mai tagata i le Atua.

• Faamalamalama atu sa faaaoga e Iesu le mamoe na leiloa, le tupe na leiloa, ma le atalii faamaumau oa e faatusa i tagata ua “leiloloa” aua ua latou le maua faamanuiaga o le talalelei. Valaaulia tamaiti e mafaufau i tagata latou te iloa e le o maua nei faamanuiaga i o latou olaga. O le a se mea e mafai ona latou faia e fesoasoani ai i nei tagata e lagonaina le alofa o le Tama Faalelagi mo i latou?

Iesu ma mamoe

Leoleo Mamoe Agavaivai, saunia e Yongsung Kim

Luka 17:11–19

E mafai ona ou faaali atu lo’u alofa mo le Tama Faalelagi i lo’u faafetai atu mo o’u faamanuiaga.

O le tala i lepela e toasefulu o se auala lelei e musuia ai tamaiti ina ia faaali atu le loto faafetai i le Tama Faalelagi mo o latou faamanuiaga.

Gaoioiga e Mafai Ona Fai

• Faitau faatasi le tala i lepela e toasefulu. Na faamanuiaina faapefea le lepela na faafetai atu ona o lona loto faafetai? Aisea e taua ai le faafetai atu i le Atua mo o tatou faamanuiaga?

• Valaaulia tamaiti e lisi mai mea latou te faafetai ai e amata i mataitusi taitasi o o latou igoa.

• Fai i tamaiti e tusi ni faamatalga faafetai i le Tama Faalelagi mo faamanuiaga ua Ia tuuina mai ia i latou. E mafai ona latou faatautauina na faamatalaga i autafa o o latou moega e faamanatu atu ai ia te i latou e faaali atu lo latou loto faafetai pe a latou tatalo.

Ioane 11:1–46

Tatou te talitonu o Iesu o le Alo o le Atua.

E mafai faapefea ona tatou faaaogaina le tala ia Maria, Mareta, ma Lasalo e fesoasoani ai i tamaiti ia iloa, e pei ona sa faia e Mareta, o Iesu “o le Keriso, le Alo o le Atua”? (Ioane 11:27)

Gaoioiga e Mafai Ona Fai

• Tusi i le laupapa ni nai faamatalaga na fai e tagata i le Ioane 11. Fai atu i tamaiti e taʻu mai po o ai na fai mai faamatalaga taitasi, ma valaaulia i latou e saili le Ioane 11 e siaki ai a latou tali. O a ni o latou lagona pe ana o i latou o Iesu, Mareta, Maria, po o Lasalo? E mafai faapefea e le talitonu ia Iesu ona fesoasoani ia i tatou pe a tatou faanoanoa pe fefefe?

• Faitau le molimau a Mareta, o loo maua i le Ioane 11:20–27. Fai i tamaiti e vaavaai mo upu ma fasifuaitau o loo faaalia ai sa faatuatua Mareta ia Iesu Keriso. O le a se mea e mafai ona tatou faia ia maua ai le faatuatua ia te Ia?

• Fesoasoani i tamaiti e tauloto le Ioane 11:25. Faamalamalama atu o le a toetutu tagata uma, ae na o e amiotonu o le a maua le ola e faavavau ma toe nonofo faatasi ma le Tama Faalelagi ma Iesu Keriso.

aikona aoaoina

Uunaia le Aoaoina i le Aiga

Avatu i tamaiti ni pepa e mafai ona latou faaaoga e tusitusi ai pe tusi ai ni ata o mea latou te faafetai ai i le gasologa o le vaiaso.

Faaleleia o Lo Tatou Aoao Atu

O le fai faafia o se ki i le aoaoina. E manuia tamaiti mai le faalogo i se mataupu faavae o le talalelei po o le faia o se gaoioiga e sili atu i le na o le faatasi. Taumafai e faifai soo gaoioiga i ni auala eseese.

itulau o gaoioiga: E mafai ona ou fesoasoani ia Iesu e saili ma toe aumai Lana mamoe na leiloa