«Հունվարի 9-15-ը: Մատթեոս 2, Ղուկաս 2․ Եկանք նորան երկրպագելու», Եկ, հետևիր ինձ․ Երեխաների միության համար. Նոր Կտակարան 2023 (2022)
«Հունվարի 9-15-ը: Մատթեոս 2, Ղուկաս 2», Եկ, հետևիր ինձ․ Երեխաների միության համար. 2023
Հունվարի 9-15-ը։
Մատթեոս 2, Ղուկաս 2
Մենք եկանք Նորան երկրպագելու
Երեխաները, որոնց դուք ուսուցանում եք, Երկնային Հոր թանկագին որդիներն ու դուստրերն են: Խնդրեք Նրան օգնել ձեզ, երբ ձգտում եք սովորեցնել նրանց սուրբ գրություններից: Նա կարող է ուղղորդել ձեզ դեպի սկզբունքներ, որոնք դուք պետք է կարևորեք, և կարող է ոգեշնչել ձեզ վարժությունների գաղափարներով, որոնք կօգնեն Իր զավակներին:
Հրավիրեք կիսվել
Խնդրեք երեխաներին պատմել ձեզ, թե ինչ գիտեն Քրիստոսի ծննդյան մասին: Ո՞ր հատվածներն են նրանց ամենից շատ դուր եկել:
Ուսուցանեք վարդապետությունը. կրտսեր խմբի երեխաներ
Հիսուսը ծնվեց
Հիսուսը թողեց Իր Երկնային Հոր տունը, որպեսզի ծնվեր երկրի վրա և կարողանար լինել մեր Փրկիչը: Ինչպե՞ս կարող եք օգնել երեխաներին հիշել Քրիստոսի ծննդյան պատմությունը:
Հնարավոր վարժություններ
-
Քրիստոսի ծննդյան պատմությունը կարդալիս հրավիրեք երեխաներին բեմականացնել այն կամ օգտվեք այս շաբաթվա գործնական աշխատանքի էջից, որպեսզի կրկնեք պատմությունը: (Տես նաև «Գլուխ 5. Հիսուս Քրիստոսը ծնվեց» Նոր Կտակարանի պատմություններում 13-15, կամ դիտեք համապատասխան տեսանյութը ChurchofJesusChrist.org կայքում):
-
Եթե ունեք Քրիստոսի ծնունդը ներկայացնող փոքրիկ արձանիկներ, կարող եք բերել ու հրավիրել երեխաներին դնել դրանք համապատասխան տեղերում, մինչ կպատմեք նրանց Հիսուս Քրիստոսի ծննդյան պատմությունը: Նաև կարող եք ցույց տալ Սուրբ ծննդյան նկար (տես օրինակ՝ այս շաբաթվա համառոտ շարադրանքում՝ Եկ, հետևիր ինձ․ Անհատների ու ընտանիքների համար բաժնից): Մատնացույց արեք Սուրբ ծննդյանը մասնակից տարբեր մարդկանց ու հրավիրեք երեխաներին կիսվել այն ամենով, ինչ գիտեն յուրաքանչյուր մարդու մասին:
-
Միասին երգեք երեխաների սիրելի երգերը Հիսուսի ծնունդի մասին: Երբ դա անեք, փնտրեք Փրկիչի մասին ձեր վկայությունը բերելու հնարավորություններ: Հրավիրեք երեխաներին կիսվել, թե ինչու են սիրում Հիսուսին:
Ես կարող եմ լավ ընծաներ տալ Հիսուսին
Մոգերը Հիսուսին նվիրեցին ոսկի, կնդրուկ և զմուռս: Ինչպե՞ս կարող եք օգտագործել այս պատմությունը, որպեսզի ուսուցանեք երեխաներին, որ իրենք նույնպես կարող են նվերներ տալ Հիսուսին. օրինակ` սիրո, ծառայության և հնազանդության նվերներ:
Հնարավոր վարժություններ
-
Ցույց տվեք մոգերի նկարը, երբ երեխաների հետ վերանայեք նրանց պատմությունը, որը գտնվում է Մատթեոս 2.1-12-ում: Կարող եք ցույց տալ «Մոգերը նվերներ են տալիս» նկարը (ChurchofJesusChrist.org)։
-
Փաթեթավորեք նկարներ կամ առարկաներ նվերների տեսքով, որոնք կարող ենք տալ Հիսուսին: Հրավիրեք երեխաներին օգնել ձեզ բացել նվերներն ու քննարկել, թե ինչպես ենք այդ նվերները տալիս Փրկիչին:
-
Օգնեք յուրաքանչյուր երեխայի նկարել կամ գրել նվերների ցուցակ, որոնք կարող են տալ Հիսուսին, ինչպես օրինակ՝ «լավ ընկեր լինել» կամ «աղոթել»: Հրավիրեք երեխաներին կիսվել իրենց ցուցակներով դասարանի հետ և ընտրել մեկ «նվեր», որը նրանք կտան Հիսուսին այսօր:
Հիսուսը մի ժամանակ ինձ նման մանուկ էր
Փրկիչի մանկության մասին սովորելով՝ երեխաները կարող են կապեր գտնել Նրա հետ: Հարցրեք երեխաներին, թե ինչ կարող են սովորել այս հատվածներից այն մասին, թե ինչպես կարող են հիմա լինել Հիսուսի նման:
Հնարավոր վարժություններ
-
Ծխի երիտասարդներից մեկին հրավիրեք ձեր դասին և կիսվեք Հիսուսի մասին այն պատմությամբ, երբ Նա փոքր տարիքում ուսուցանում էր տաճարում:
-
Նախօրոք խնդրեք երեխաներից մի քանիսին բերել իրենց մանկության նկարները և ցուցադրել դրանք: Հարցրեք նրանց, թե ինչպես են իրենք մեծացել: Կիսվեք, թե ինչպես էր մեծանում Հիսուսը (տես Ղուկաս 2.40, 52): Երեխաների հետ երգեք «Jesus Once Was a Little Child» (Children’s Songbook, 55) կամ Փրկիչի մասին այլ երգ:
-
Կարդացեք Ղուկաս 2.52 հատվածը և բացատրեք, թե ինչ է նշանակում «իմաստությունը» և «հասակը»: Կարող եք խնդրել երեխաներին շարժումներով ցույց տալ, թե ինչ է նշանակում զարգանալ իմաստությունով և շնորհքով Աստծո և մարդկանց հետ: Օրինակ` նրանք կարող են շարժումներով ցույց տալ, որ գիրք են կարդում կամ օգնում են ինչ-որ կարիքավորի:
Ուսուցանեք վարդապետությունը. ավագ խմբի երեխաներ
Հին ժամանակների մարգարեները կանխագուշակել էին Փրկիչի ծնունդը
Մարգարեներն ու հավատացյալները դարեր շարունակ սպասել են Փրկիչի ծնունդին: Հասկանալով այս ճշմարտությունը, երեխաներն ավելի խորը կգնահատեն Փրկիչի կյանքն ու առաքելությունը:
Հնարավոր վարժություններ
-
Խնդրեք երեխաներին խոսել այնպիսի բաների մասին, որոնց նրանք անհամբեր սպասում են, օրինակ` ծննդյան օր կամ որևէ տոն: Հրավիրեք երեխաներին կարդալ Հելաման 14.2–5 հատվածները և գտնել ինչ-որ բան, որին մարգարեներն անհամբեր սպասում էին:
-
Միասին կարդացեք Փրկիչի ծննդյան մասին մի քանի մարգարեություններ (տես Եսայիա 7․14, 9․6, 1 Նեփի 11․18, Հելաման 14․5)։ Օգնեք երեխաներին թվարկել այն մանրամասները, որոնք կան այս մարգարեություններում և գտնել դրանց իրականացումը Ղուկաս 2.1–21 և Մատթեոս 2.1-12 հատվածներում:
-
Հրավիրեք երեխաներին Մատթեոս 2․1–12 կամ Ղուկաս 2․1–21 հատվածներից նկարել որևէ նկար և կիսվել, թե ինչու են շնորհակալ, որ Հիսուսը ծնվել է:
Սիմեոնը երկրպագում է մանուկ Քրիստոսին, Գրեգ Ք. Օլսեն
Հիսուսը զարգացավ «իմաստութիւնով և հասակով, և շնորհքով`Աստուծոյ և մարդկանց մոտ»
Երեխաները նույնպես պետք է Հիսուսի նման նախապատրաստվեն կարևոր առաքելության: Ի՞նչ կարող են նրանք սովորել Հիսուսի օրինակից:
Հնարավոր վարժություններ
-
Մինչ կկարդաք Ղուկաս 2.40, 52-ը, հրավիրեք երեխաներին ուշադրություն դարձնել, թե ինչ էր անում Հիսուսը: Հրավիրեք երեխաներին կիսվել, թե ինչպես են փոխվել այն ժամանակից ի վեր, երբ փոքր էին: Կիսվեք ավետարանից քիչ-քիչ սովորելու ձեր փորձառությամբ։ Բերեք ձեր վկայությունը Փրկիչի մասին:
-
Ավարտեք գործնական աշխատանքները, որոնք լուսաբանում են Ղուկաս 2.40, 52 հատվածների արտահայտությունները: Օրինակ՝ կարող եք չափել յուրաքանչյուր երեխայի հասակը («Հիսուսը զարգանում էր … հասակով») կամ հրավիրեք երեխաներին կիսվել սուրբ գրության իրենց սիրելի հատվածով («աճում էր և զորանում հոգիով»): Օգնեք երեխաներին ուշադրություն դարձնել, թե ինչպես են իրենք մեծանում, և դրանով կիսվել իրենց ընտանիքի անդամների հետ:
-
Ղուկաս 2.40, 52 հատվածները վերանայելուց հետո հրավիրեք երեխաներին կիսվել, թե իրենց կարծիքով, Հիսուսն ինչպիսին էր իրենց տարիքում: Ինչպե՞ս կվարվեր Նա իր մայրիկի հետ: Ինչպե՞ս կվարվեր Իր եղբայրների և քույրերի հե՞տ:
Ես կարող եմ հետևել Հիսուսի օրինակին
Նույնիսկ փոքր տարիքում Հիսուսը տաճարում ուսուցանում էր ավետարանը: Նույն կերպ ձեր դասարանի երեխաները շատ բան կարող են ուսուցանել իրենց շրջապատում գտնվողներին:
Հնարավոր վարժություններ
-
Հրավիրեք երեխաներից մեկին Ղուկաս 2.41–52 հատվածների պատմությունն ամփոփելու համար նախապատրաստված գալ: Որպեսզի օգնեք երեխաներին հասկանալ պատմությունը, ուսուցանեք, թե ինչ է նշանակում «Հօր տանը լինել» (հատված 49) արտահայտությունը: Օրինակ՝ կարող եք ասել երեխաներին, թե ինչպիսի աշխատանք ունեք դուք կամ ձեր ծնողները: Ինչպիսի՞ աշխատանք կամ «գործ» էր անում Հովսեփը` Հիսուսի երկրային հայրը (տես Մատթեոս 13․55)։ Ո՞րն է Իր Երկնային Հոր աշխատանքը (տես Ղուկաս 2․46–49, տես նաև Մովսես 1․39)։
-
Երեխաների հետ կարդացեք Ղուկաս 2.46-49-ը և հարցրեք. «Ինչպե՞ս էր Հիսուսը Իր «Հօր տանը լինում»: Օգնեք երեխաներին գրատախտակի վրա թվարկել կամ նկարել եղանակներ, որոնցով նրանք նույնպես կարող են օգնել Երկնային Հոր գործի կատարմանը:
-
Որպեսզի օգնեք երեխաներին վստահ լինել, որ իրենք ևս պատանի Հիսուսի նման կարող են ուսուցանել ավետարանը այդ հասակում, օգնեք նրանց, որ միմյանց ուսուցանեն մի սկզբունք Երիտասարդներին զորացնելու համար գրքույկից:
Խրախուսեք տնային ուսումնասիրությունը
Հրավիրեք երեխաներին իրենց ընտանիքի անդամներին ուսուցանել ինչ-որ բան, որը սովորեցին Հիսուս Քրիստոսի ծնունդի մասին:
Բարելավենք մեր ուսուցումը
Երեխաները հետաքրքրասեր են և սովորում են շատ եղանակներով: Երեխաներին դուր է գալիս սովորել նոր ու զանազան փորձառությունների միջոցով: Կիրառեք այնպիսի գործնական աշխատանքներ, որոնք կօգնեն նրանց շարժվել, օգտագործել իրենց բոլոր զգայարանները, հետազոտել և փորձել նոր բաներ: (Տես Ուսուցանել Փրկիչի ձևով, 25-26:)