O Paulo i le falepuipui

29 Iulai–4 Aokuso

Galuega 22–28

“O Se Auauna ma se Molimau”

A o e faitauina ia tala mai le auaunaga a Paulo le Aposetolo i le Galuega 22–28, vaavaai mo mataupu faavae o le a tele se aoga i tamaiti o loo e faiaoga ai.

Tusifaamaumau Ou Lagona Uunai

aikona fefaasoaai

Valaaulia le Fefaasoaai

Faaali ia ata o se potu o le falepuipui, se vaa, ma se gata. Valaaulia ia tamaiti e faasoa mai ni tala latou te iloaina e uiga ia Paulo e tusa ai ma ata nei.

aikona aoao atu

Aoao atu Aoaoga Faavae

Tamaiti Laiti Ifo

Galuega 23:10–11

E manatu mai le Tama Faalelagi ma Iesu ia te au ma o le a fesoasoani ia te au i taimi faigata.

O le aoao e uiga i le ala na fesoasoani ai le Faaola ia Paulo e mafai ona fesoasoani i isi tamaiti ia iloa e manatu mai le Tama Faalelagi ma Iesu ia i latou.

Gaoioiga e Mafai Ona Fai

• Faasoa atu le tala o i le Galuega 23:10–11 e uiga i le Faaola a o asiasi atu ia Paulo i le falepuipui. Pe faaali foi le vitio “Be of Good Cheer” (LDS.org), lea e faamatala mai ai lenei tala. Faasoa atu se taimi na e feagai ai ma se tofotofoga ma e mauaina se taitaiga ma le faamafanafanaga mai le Atua. Fai i tamaiti e faamatala mai taimi na latou lagona ai le faamafanafanaina e le Atua.

• Fesoasoani i tamaiti e tauloto mea na fai atu ai Iesu ia Paulo: “Ina faalototele ia oe.” Fai i tamaiti e mafaufau i se tasi e mafai ona latou valaaulia ia faalototele ia–atonu o se tasi o faanoanoa pe popole.

Galuega 26:1–29

E mafai ona ou faasoa atu la’u molimau i isi.

O le toe iloiloina o le molimau a Paulo i luma o le Tupu o Akeripa, e mafai ona fesoasoani i tamaiti e aoao ai pe faapefea ona faasoa atu mea ua latou iloa e moni.

Gaoioiga e Mafai Ona Fai

• Aumai se palealii i le vasega ma tuu atu i se tamaitiiti e faamaulu ma faafoliga faapea o ia o le Tupu o Akeripa. Valaaulia se isi tamaitiiti e tu i luma o le tupu e faatusa ia Paulo a o e aoteleina le molimau a Paulo ma le tali atu a le Tupu o Akeripa, o loo maua i le Galuega 26:1–29 (tagai “Mataupu 63: Ua Faamaea e Paulo Lana Misiona,” Tala o le Feagaiga Fou, 162–66, po o le vitio e o faatasi ai LDS.org). Faamalamalama atu e mafai ona tatou faasoa atu a tatou molimau i isi, e pei ona sa faia e Paulo.

• Fai i tamaiti e faalogologo a o e usuina pe faitauina se pese e uiga i le molimau, e pei o le fuaiupu e 2 o “Molimau” (Vi’iga, nu. 74) po o le “Ua Ou Iloa o Soifua Lo‘u Tama” (Tusipese a Tamaiti, 8). Valaaulia tamaiti e sii o latou lima pe a latou faalogo i se mea e mafai ona latou molimau atu ai. Atonu e te manao e usu faafia le pese; valaaulia ia tamaiti e usu faatasi ma oe i le taimi lava ua latou masani ai ma upu. Fai i ai e faasoa atu ni nai mea e uiga i le talalelei ua latou iloa e moni.

• Faaaoga le itulau o gaoioiga o lenei vaiaso e fesoasoani ai i tamaiti e mafaufau e uiga i se mea e mafai ona latou ta’u atu pe a tuu atu a latou molimau. Valaaulia i latou e faasoa atu a latou molimau i se tasi i o latou aiga.

Galuega 27

E lapataia au e perofeta i mea matautia.

Mafaufau pe mafai faapefea e le tala i le afatia o le folauga a Paulo ona aoao ai tamaiti e faapea, e iloa e perofeta le matautia e le mafai ona tatou iloa.

Gaoioiga e Mafai Ona Fai

• Valaaulia tamaiti e faafoliga faapea o la e i luga o se vaa ua afatia i se matagi malosi. Faitau le lapataiga a Paulo i tagata, o loo maua i le Galuega 27:9--10, ma faasoa atu le tala i le afatia o le vaa ona sa latou lei faalogo i lana lapataiga (tagai fuaiupu 11, 39–44). Ia faaali atu se ata o le Peresitene o le Ekalesia. O a ituaiga o lapataiga na te tuu mai ia i tatou?

• Tuu solo ni ata po o ni meafaitino i le potu e faatusa i mea ua aoao mai e perofeta i tatou e fai, e pei o le o i le lotu po o le papatisoina. Savavali faataamilo i le potu, o se vasega, ma tutu i ata po o meafaitino taitasi ma talanoa pe faapefea e le mulimuli i aoaoga a perofeta ona fesoasoani e faasaogalemuina i tatou.

Peresitene Russell M. Nelson

O le mulimuli i aoaoga a perofeta e fesoasoani e faasaogalemuina i tatou.

aikona aoao atu

Aoao atu Aoaoga Faavae

Tamaiti Matutua Atu

Galuega 23:10–11; 27:18–26; 28:1–6

Pe a ou fetaiai ma puapuaga, e le tuulafoaiina au e le Atua.

I tofotofoga uma na feagai ma Paulo, sa faatasi le Alii ma ia. E mafai faapefea ona e fesoasoani i tamaiti e faatatau ia aafiaga o Paulo i o latou lava olaga?

Gaoioiga e Mafai Ona Fai

• I le faaaogaina o le Galuega 23:10, faamalamalama atu faapea na tuuina ia Paulo i le falepuipui ona sa ia aoao atu tagata e uiga ia Iesu. Ona faitau lea o le Galuega 23:11 faatasi ma tamaiti. Pe faaali foi le vitio “Be of Good Cheer” (LDS.org), lea e faamatala mai ai lenei tala. Aisea na mafai ai e Paulo ona “faalototeleina” e ui ina sa i ai o ia i le falepuipui?

• Tusi i le laupapa le Galuega 23:10–11; Galuega 27:18–26; ma le Galuega 28:1–6. Faaali atu ata o se falepuipui, o se vaa, ma se gata, ma valaaulia ia tamaiti e toeiloilo fuaiupu nei ma faafetaui ma ata. I nei tala taitasi, na faapefea ona faaali atu e le Alii ia Paulo sa i ai o Ia faatasi ma ia?

• Valaaulia se tasi mai le uarota e faasoa mai se aafiaga i se taimi na faatasi ai le Alii ma ia i se taimi faigata. Atonu e mafai e oe po o tamaiti ona faasoa mai ni aafiaga.

Galuega 26:1–29

E mafai ona ou faasoa atu ma le lototoa la’u molimau ia Iesu Keriso.

O le lototele o Paulo i le faasoa atu o lana molimau e mafai ona fesoasoani i tamaiti ia lotototoa pe a faasoa atu a latou molimau.

Gaoioiga e Mafai Ona Fai

• Valaaulia ia tamaiti e faitau le Galuega 26:1--29 ma sue ni nai upumoni o le talalelei na aoao atu e Paulo i le Tupu o Akeripa. Aisea na ono taufaafefe ai mo Paulo le faasoa atu o nei mea i luma o le tupu? Valaaulia ia tamaiti e lisi ni nai mataupu faavae latou te iloa e moni. Fai i ai e mafaufau i se tasi latou te iloa e manaomia ona faalogo ia latou molimau i nei upumoni.

• Valaaulia ia tamaiti e faaaoga le itulau o gaoioiga o lenei vaiaso e tusia ai se mea latou te ono fai atu ai ia latou molimau.

Galuega 27

E lapataia au e perofeta i mea matautia.

E mafai e tamaiti ona faalogologo i savali a perofeta o ona po nei ma faailoa mai a latou lapataiga. E mafai faapefea ona e fesoasoani i tamaiti e aoao pe faapefea ona uai atu i na lapataiga?

Gaoioiga e Mafai Ona Fai

• Ooti se fasipepa e faafoliga i se vaa i ni fasi paso. Valaaulia ia tamaiti e tusi ia lapataiga a Paulo o i le Galuega 27:9--11 i fasipepa ma tuufaatasia le paso. Aisea na le faalogo ai tagata ia Paulo? (tagai i le fuaiupu 11). Valaaulia tamaiti e faitau ia fuaiupu 18--20 ma le 40--44 e iloa ai le mea na tupu o se taunuuga. (Faamalamalama atu ona sa mulimuli ia tagata i le fautuaga mulimuli ane a Paulo e nonofo i luga ole vaa, o lea na leai ai se tasi e oti i le afatia ai o le folauga; tagai fuaiupu 30--32.) O le a se mea ua tatou aoao mai i lenei aafiaga e uiga i le mulimuli i le perofeta?

• Aumai se savali o se konafesi talu ai nei a le Perofeta ole Ekalesia ma faasoa atu i tamaiti soo se lapataiga po o se fautuaga na ia tuuina mai. Valaaulia tamaiti e mafaufau ini auala e mafai ona latou mulimuli ai i le perofeta.

• Faaali le vitio “E Manuia ma Fiafia I Latou O E Tausi i Poloaiga a le Atua” (LDS.org). E faapefea ona faatusa ia perofeta i le tamaloa o loo i ai meavaai?

• Tusi i lalo ni nai gaoioiga e mafai ona fai e tamaiti e fesoasoani ai ia i latou e aoao e uiga i le matafaioi a se perofeta---mo se faataitaiga, “Faitau le Mataupu Faavae ma Feagaiga 21:4–7” po o le “Usu le ‘Mulimuli i le Perofeta’” (Tusipese a Tamaiti, 58, pe faaaoga se isi pese e uiga i perofeta). Faatautau le lisi o gaoioiga i fafo o le potuaoga, ma valaaulia se tamaitiiti e toatasi e tu i le faitotoa ma faitau taitasi ia gaoioiga i le isi vaega o tamaiti, ma tuu atu i latou e faamaea le gaoioiga a o lei faitauina atu le isi. Faamalamalama atu e pei lava ona tuuina mai e le tamaitiiti e toatasi o faatonuga i isi, e aoao mai foi i tatou e se perofeta i mea e finagalo le Atua tatou te faia. Tuu atu i tamaiti e faasoa mai mea latou te iloa e uiga i perofeta mai gaoioiga.

aikona aoaoina

Fautuaina le Aoaoina i le Aiga

Fai i tamaiti e faaaoga mea sa latou aoaoina e uiga ia Paulo e faamalosiauina ai o latou aiga e suesue i le savali aupito lata mai a le perofeta ma talanoaina pe mafai faapefea ona latou mulimuli ai i lana fautuaga.

Faaleleia o Lo Tatou Aoao Atu

Faaaofia ai sane. “O le toatele o tamaiti (ma tagata matutua) e sili atu ona aoaoina pe a faaaofia ai sane eseese. Sue ni auala e fesoasoani ai i tamaiti e faaaoga ai o latou sane o le vaai, faalogo, ma tago a o latou aoao. I nisi o tulaga, e te ono mafai foi ona sue ni auala e faaaofia ai o latou sane o le sogisogi ma le tofo!” (Aoao Atu i le Ala a le Faaola, 25).

itulau o gaoioiga: E mafai ona ou faasoa atu la’u molimau