“12–18 Aokuso. Roma 7–16: ‘Faatoilaloina le Leaga i le Lelei’” Sau, Mulimuli Mai ia te A’u—Mo le Peraimeri: Feagaiga Fou 2019 (2019)
“12–18 Aokuso. Roma 7–16,” Sau, Mulimuli Mai ia te A’u—Mo le Peraimeri: 2019
12–18 Aokuso
Roma 7–16
“Faatoilaloina le Leaga i le Lelei”
A o e faitauina le Roma 7–16, tusitusi soo se uunaiga e te mauaina e uiga i le ala e mafai ai ona aoao atu i tamaiti ia upumoni i mataupu nei.
Tusifaamaumau Ou Lagona Uunai
Valaaulia le Fefaasoaai
Fesili i tamaiti pe na latou faasoa atu i o latou aiga se mea sa latou aoaoina i le Peraimeri i le vaiaso ua te’a. (Atonu e te manaomia le toe faia o se iloiloga puupuu o le lesona o le vaiaso na te’a nei.) Afai na fai, o le a se mea na latou faasoaina?
Aoao atu Aoaoga Faavae
Tamaiti Laiti Ifo
E alofa lo’u Tama Faalelagi ia te au.
E mafai faapefea ona e faaaogaina upu a Paulo e aoao atu ai tamaiti faapea o le a alofa pea lava le Tama Faalelagi ia i latou?
E alofa le Tama Faalelagi i Ana fanau taitasi.
Gaoioiga e Mafai Ona Fai
-
Fesoasoani i tamaiti e tauloto le fasifuaitau “[E leai se mea e mafai] ona vavaeeseina i tatou mai le alofa o le Atua” (Roma 8:39). Ina ia faapupulaina lenei upumoni, tuitui faatasi ni laupapa se lua, ona faaigoa lea o le tasi “tatou” ma le isi “o le alofa o le Atua.” Tuu i tamaiti e vaai pe mafai ona latou tuueseeseina ia laupapa.
-
Ave tamaiti i fafo ia lagonaina le susulu o le la, pe faaali atu i ai se ata o le la. E faatusa faapei le la i le alofa o le Tama Faalelagi? Fesoasoani ia latou iloa e ui lava ina mamao le la, ae e mafai ona ia fesoasoani tatou te lagonaina le mafanafana. E mafai ona tatou lagonaina le alofa o le Tama Faalelagi i taimi uma, e tusa lava pe le o i ai o Ia faaletino faatasi mai tatou. E mafai foi ona outou usuina faatasi le “E Alofa Lo‘u Tama Faalelagi Ia Te A‘u” (Tusipese a Tamaiti, 16).
E oo mai le faatuatua e ala i le faalogo i le afioga a le Atua.
A o faalogo tamaiti i le afioga a le Atua ma faalogologo i ai ma le faaeteete, o le a tupu lo latou faatuatua i le Atua. E faapefea ona e fesoasoani ia i latou ia malamalama i le taua o le faalogologo i le afioga a le Atua?
Gaoioiga e Mafai Ona Fai
-
Faitau le Roma 10:17 i tamaiti, ma faaali atu ia i latou ni ata o tulaga e mafai ona latou faalogo ai i le afioga a le Atua (e pei o suesuega faaleaiga o tusitusiga paia, lotu, po o konafesi aoao; tagai i le itulau o gaoioiga o le vaiaso lenei). Fesili i tamaiti pe o anafea na latou faalogo ai i le afioga a le Atua.
-
Faamatala se tala e uiga i se tamaitiiti e faalogologo i le afioga a le Atua i ni auala eseese. A o e faamatalaina le tala, feula lemu se paluni ia faatusa i le tuputupu ae o le faatuatua o se tamaitiiti i taimi taitasi e faalogo ai o ia i le afioga a le Atua.
-
Ina ia fesoasoani ia malamalama tamaiti e mafai ona tupu lo latou faatuatua, fesoasoani ia i latou e usu le “Faatuatua” (Tusipese a Tamaiti, 50). A o pepese, fai i ai e faafoliga faapea o i latou o ni fatu e ala i le faano’uno’u i lalo. O taimi uma latou te usu ai le upu faatuatua, ia latou tutu teisi a’e i luga e pei o se laau o loo tuputupu ae.
-
Nana i le potuaoga se seti o tusitusiga paia, se ata o le Peresitene o le Ekalesia, ma se kopi o le Friend po o le mekasini o le Liahona . Fai i tamaiti e sue mai nei mea ma faasoa atu pe mafai faapefea e nei mea taitasi ona tatou faalogo ai i le afioga a le Atua.
E mafai ona ou fai atu faafetai ia i latou o e o fesoasoani mai ia te au.
Sa faafetai Paulo mo tagata o e sa fesoasoani ia te ia. E mafai ona e fesoasoani i tamaiti e matau ia mea lelei e faia e isi mo i latou ma manatua e faafetai atu ia i latou.
Gaoioiga e Mafai Ona Fai
-
Faamalamalama atu sa faafetai Paulo mo le fesoasoani na ia mauaina mai se fafine e igoa ia Fipe, ma se ulugalii e igoa ia Pisila ma Akula (tagai Roma 16:1--4). Fai i tamaiti e tusi ni ata o Paulo ma nei tagata e toatolu a o e faasoa atu ia upu ma fasifuaitau mai i fuaiupu.
-
Valaaulia tamaiti taitasi e faasoa mai se mea manaia na faia e se tagata mo ia talu ai nei. Fesoasoani i tamaiti e faia ni kata faafetai mo na tagata.
-
Fesoasoani i tamaiti e aoao le faafetai atu i ni gagana eseese. E mafai ona fesoasoani le pese “Tamaiti i le Lalolagi Atoa” (Tusipese a Tamaiti, 4).
Aoao atu Aoaoga Faavae
Tamaiti Matutua Atu
E finagalo le Tama Faalelagi ia te au e sauniuni ia maua mea uma ua ia te Ia.
O le fuafuaga a le Tama Faalelagi ua mafai ai e i tatou ona avea e faapei o Ia ma maua mea uma ua ia te Ia. O lenei upumoni e mafai ona musuia ai tamaiti o loo e faiaoga ai e ola faamaoni atili i le talalelei.
Gaoioiga e Mafai Ona Fai
-
Faitau faatasi le Roma 8:16–18 O a ni mea ua tatou aoao mai i nei fuaiupu pe o ai i tatou ma pe o ai foi e mafai ona avea ai i tatou? Faamalamalama atu o se “suli” o se tasi ua i ai, pe mauaina foi, mea o i ai i ona matua. Tusi i le laupapa O a mea e manaomia ona tatou faia ia maua ai mea uma o i ai i lo tatou Tama o i le Lagi? Usu faatasi se pese e uiga i le usitai, e pei o le “O Le a Ou Mulimuli I Le Fuafuaga a le Atua” (Tusipese a Tamaiti, 86), ma vaavaai mo tali. O a isi tali e mafai ona mafaufau i ai tamaiti?
-
Fai i tamaiti e mafaufau e uiga i se tupu e manao i ona atalii ma afafine e pulea lona malo i se aso. Faamalamalama atu o le Tama Faalelagi e pei o se tupu, ma o i tatou o ona atalii ma afafine tautupu. E mafai ona faasoa atu le tala i le atalii o le Tupu o Louis XVI o Farani, o loo maua i le lauga a Sister Elaine S. Dalton “Manatua Pe O Ai Oe!” Ensign po o le Liahona, Me 2010, 121). E mafai faapefea e le manatua o i tatou o fanau a le Tama Faalelagi ma sa fanau mai ia iai se aso ia avea ai faapei o Ia, ona fesoasoani ia tatou ola amiotonu ai iinei i le lalolagi? (Mo nisi faamatalaga, tagai Faamaoni i le Faatuatua, 74–76.)
E oo mai le faatuatua e ala i le faalogo i le afioga a le Atua.
E tele avanoa e maua e tamaiti e faalogologo ai i le afioga a le Atua. Fesoasoani ia latou iloa o le faalogo i le afioga a le Atua e mafai ona faamalolosia ai lo latou faatuatua.
Gaoioiga e Mafai Ona Fai
-
Tusi le fuaiupu lea i le laupapa: e tupu le , ma le i le a le . Fai i tamaiti e faatutumu ia avanoa pe a uma ona faitau le Roma 10:17. Faamatala atu se taimi na aoao atu ai e se tasi se upumoni o le talalelei na fesoasoani e faamalosia ai lou faatuatua—atonu e mafai ona e faasoa atu se mau e te fiafia i ai po o se upusii mai le konafesi aoao. Valaaulia tamaiti e faasoa mai o latou lava aafiaga.
-
Faaigoa ni ipu vai i mea tatou te maua ai le afioga a le Atua (e pei o tusitusiga paia, sauniga/fonotaga faale-Ekalesia, ma konafesi aoao). Talanoaina pe faapefea e le afioga a le Atua ona faateleina lo tatou faatuatua a o e liligiina ipu taitasi i se pesini ua faaigoaina i le “Faatuatua.”
-
Tuu atu i se tamaitiiti e toatasi se ata o le Faaola o loo faamaloloina se tagata e aunoa ma le vaai o isi tamaiti i le ata. Fai i le tamaitiiti e tuu atu ni faamatalaga taufaailoilo e fesoasoani ai i isi tamaiti e mate mai po o le a se mea o faaalia i le ata. E mafai faapefea ona tatou faasoa atu i isi mea ua tatou iloa e uiga i le Faaola ina ia latou maua ai le faatuatua ia te Ia?
“Aua nei tatou … toe fefaasalaa’i.”
A fegalegalea’i tamaiti ma isi e eseese filifiliga latou te fai nai lo i latou, e ono faaosoosoina ai i latou e faamasinosino. Mafaufau pe na mafai faapefea ona fesoasoani le fautuaga a Paulo i tagata Roma latou te alo ese ai mai le faamasinosino.
Gaoioiga e Mafai Ona Fai
-
Valaaulia se tamaitiiti e faitau le Roma 14:10, 13. Fai i tamaiti e faitau pe faafia ona faaaoga e Paulo le upu faasala. O le a le uiga o le faamasino o se tagata? E tatau i se a ona tatou aloese mai le faamasinoina o isi?
-
Faaali atu se ata o se tagata, ma fesili i tamaiti pe o le a se mea latou te iloa e uiga i lenei tagata i le na o le tilotilo i le ata. O a ni mea tatou te le iloa e uiga ia te ia? E sili i se a ona faamasino e le Alii lenei tagata? (tagai 1 Samuelu 16:7).
Fautuaina le Aoaoina i le Aiga
Fai i tamaiti e piki se gaoioiga se tasi sa outou faia o se vasega e o e fai ma o latou aiga. Ta’u i ai o le vaiaso a sau e mafai ona latou faasoa mai ai mea sa latou faia.
Faaleleia o Lo Tatou Aoao Atu
Faagauai tamaiti i talanoaga faaletalalelei. Atonu e manaomia ona e mafaufau e fatufatu ni auala e faagauai ai tamaiti i talanoaga faaletalalelei. O nisi taimi e mafai ona e faia se mea faigofie e pei o le valaaulia o tamaiti e nonofo faalapotopoto i luga o le fola nai lo le tietie i nofoa.