o tamaiti laiti o loo saofafa’i

Taulimaina o Manaoga o Tamaiti Laiti

Ua saunia tamaiti laiti ma ua naunau e aoao le talalelei pe afai e tuuina atu i se ala e mafai ona latou malamalama ai. Ae maise lava pe afai e te aoaoina tamaiti laiti, mafaufau e faʻaaoga ia ituaiga o gaoioiga nei e fesoasoani latou te aʻoaʻo ai.

• Pepese. O viiga ma pese mai le Tusipese a Tamaiti e aoao atu ai ma le mamana ia aoaoga faavae. Faaaoga le faasino autu o i tua o le Tusipese a Tamaiti e sue ai ni pese e fetaui ma mataupu faavae o le talalelei o loo e aoaoina atu. Fesoasoani i tamaiti e faafesootai le savali o pese i o latou olaga. Mo se faataitaiga, e mafai ona e faia fesili e uiga i upu po o fasi fuaiupu o le pese. I le faaopoopo atu i pesepesega, e mafai e tamaiti ona fai ni taga e o faatasi ma pese pe na o le faalogologo i pese e pei o musika o talafaasolosolo aʻo latou galulue i se itulau o gaoioiga.

• Faalogologo i le, pe faatino foi se tala. O tamaiti laiti e fiafia i tala, e faamatala ia i latou ma faalogologo i ai. Fetufaai tala mai tusitusiga paia, mai lou olaga, mai le talafaasolopito o le Ekalesia, pe mai mekasini a le Ekalesia, ma tuu atu i tamaiti e faamatala ni tala mai o latou olaga. Vaavaai mo auala e faaaofia ai i latou i le faamatalaina o tala. E mafai ona latou uuina i luga ata po o meafaitino, tusi ata o mea latou te faalogo i ai, faatino mai le tala, pe fesoasoani i le faamatalaina o le tala. Fesoasoani i tamaiti ia iloa upumoni o le talalelei i tala e te faasoa atu.

• Faitau se mau. Atonu e tau le mafai e tamaiti laiti ona faitau, ae e mafai lava ona e faagalulue i latou e aoao mai tusitusiga paia. E te ono manaomia le taulai atu i se fuaiupu se tasi, fasi fuaitau autu, po o upu. A o e faitauina leotele se mau, e mafai ona e valaaulia tamaiti e tutu i luga pe sii o latou lima pe a latou faalogo i se upu po o se fasi fuaitau patino e te manao e taulai i ai. Atonu foi e mafai ona latou taulotoina ni fasi fuaitau pupuu mai mau pe a latou faia faafia. A o latou faalogo i le upu a le Atua, o le a latou lagonaina le Agaga.

• Ia mataala. Talu ai o tamaiti laiti e tele lava ina tiotio, fuafua ni auala e tuu ai i latou e feofeoai—savali faafitafita i mea e tutu ai, osooso, tafue, faanounou, savalivali, po o isi taga e fesootai i se mataupu faavae po o se tala o loo e aoaoina atu. O nei taga e mafai foi ona aoga pe a outou pepese faatasi.

• Tilotilo i se ata pe matamata foi se vitio. A e faaali atu se ata i tamaiti po o se vitio e fesootai i se mataupu faavae o le talalelei po o se tala faatusi paia, fai i ai ni fesili e fesoasoani latou te aoao ai mai mea o latou vaai i ai. Mo se faataitaiga, e mafai ona e fesili, “O le a le mea lea e tupu i le ata lea po o le vitio?” po o le “O le a sou lagona?” O le polokalama o le Gospel Library, medialibrary.ChurchofJesusChrist.org, ma le children.ChurchofJesusChrist.org o ni nofoaga lelei ia e sue ai ni vitio.

• Faasoa atu ni aafiaga ma molimau. Atonu e le tele ni mea e faasoa mai e tamaiti e laiti e pei o tamaiti matutua, ae a e tuu atu ia i latou se taitaiga patino, e mafai lava ona latou faasoa mai o latou aafiaga ma molimau i mea o latou aoaoina.

• Fatufatu. E mafai e tamaiti ona fau, tusi ata, pe valivali se mea e fesootai ma le tala po o le mataupu faavae o loo latou aoaoina. Fautuaina i latou e ave mea sa latou fatufatuina i le fale ma faasoa atu i tagata o o latou aiga e fesoasoani ai i tamaiti e manatua mea sa latou aoaoina.

• Auai i lesona faatino. E mafai ona fesoasoani sina lesona faatino faigofie i tamaiti e malamalama ai i se mataupu faavae o le talalelei e faigata ona malamalama i ai. A faaaoga ni lesona faatino, sue ni auala e auai ai tamaiti i le faatinoina. O le a tele atu mea latou te aoaoina ai mai se aafiaga fefaasoaai nai lo le na ona matamata i se faataitaiga.

• Faatino i Taga. A faatino e tamaiti i taga se tulaga latou te ono fetaiai i le olaga moni, o le a sili ona mafai ona latou malamalama i le ala e faatatau ai se mataupu faavae i o latou olaga.

• Fai ma toe fai ia gaoioiga. Atonu e moomia e tamaiti laiti ifo ona faalogo faafia i manatu faavae ina ia malamalama ai. Aua le fefe e fai soo ia tala po o gaoioiga, tusa lava pe o le lesona lava e tasi. Mo se faataitaiga, e mafai ona e faasoa soo atu se tala faatusi paia i ni auala eseese i le taimi o le lesona—faitau mai tusitusiga paia, aotele i au lava upu, faaali se vitio, tuu i tamaiti e fesoasoani atu ia te oe e faamatala le tala, valaaulia i latou e faatino mai le tala, ma isi mea. Afai e toe fai foi i le fale se gaoioiga sa faaaoga i le vasega, o le toe faia o le a fesoasoani i tamaiti e aoao ma manatua ai.

• Talanoa ma isi. O loo atia’e e tamaiti ni tomai faa-agafesootai ma e tele lava ina latou fiafia e aoao ma taaalo ma a latou tupulaga. Ia faia ni avanoa mo i latou e fefaasoaai ai, feauauai, ma galulue faatasi a o latou aoao.

• Auai i le faatinoina o ni gaoioiga eseese. E masani lava o tamaiti laiti ifo e fiafia puupuu, ma e ese foi a latou aga e aoao ai. Faaaoga ni gaoioiga eseese, ma mata’itu faailoga e iloa ai ua manaomia e tamaiti se suiga o le saoasaoa. Mo se faataitaiga, atonu e moomia ona e fesuia’i soo i le va o gaoioiga lemu ma gaoioiga tiotio.

O se vaega o lau matafaioi o se faiaoga o tamaiti laiti—e faaopoopo i le aoao atu o mataupu faavae o le talalelei—o le fesoasoani lea i tamaiti e aoao pe faapefea ona auai lelei i se vasega i le Lotu. Mo se faataitaiga, atonu e manaomia lo latou aoao e uiga i le feauaua’i, fefaasoaai, faaaloalo i isi, ma isi mea faapena. O nisi faiaoga latou te faia siata ma ni tofiga mo tamaiti taitasi e auai e faatino i le vasega i se ala patino (e pei o le faia o se tatalo, uuina se ata, pe tufatufa foi ni pepa). E mafai ona fesuisuiai tofiga i vaiaso taitasi. E fesoasoani lenei mea e feauauai ai tamaiti ma taulai atu i amioga talafeagai i le potuaoga.

O tamaiti—aemaise lava o tamaiti laiti ifo—e tele ina aoga i ai ni gaoioiga masani faifai pea. Talu ai o tamaiti laiti e fiafia puupuu ma o nisi taimi e faigata ai ona taulai i se vasega atoa, e sili lava pe afai o lenei masani e aofia ai suiga faifai pea mai le tasi gaoioiga i le isi. Mo se faataitaiga, o le faiga masani o lau vasega e aofia ai malologa i nisi taimi e fai se taaloga, valivali se ata, usu se pese, ma isi mea.

tamaiti ma faiaoga i le vasega