O Iesu o loo nofonofo ma tamaiti

O Oe o se Faiaoga o Tamaiti

Ua valaauina oe e le Atua ia alofa ma aoao Lana fanau i le ala a le Faaola. Sa vaetofiaina oe i lenei valaauga i le pule o Lana perisitua paia. Tusa lava pe le o oe o se faiaoga ua i ai le tomai masani, a o e ola agavaa, tatalo i aso taitasi, ma suesue i tusitusiga paia, o le a tuuina e le Tama Faalelagi ia te oe le tosinaga ma le mana o le Agaga Paia e fesoasoani ia te oe ina ia manuia (tagai 2 Nifae 33:1).

O i latou ua tuuina atu i lau vaaiga o fanau a le Tama Faalelagi, ma ua Ia silafia mea latou te manaomia ma le ala sili e aapa atu ai ia te i latou. E ala atu i le Agaga Paia, o le a taiala oe e le Atua i le taimi o au tapenapenaga ma a o e aoao atu. O le a Ia faaali atu ia te oe mea e tatau ona e fai atu ai ma mea e tatau ona e faia (tagai 2 Nifae 32:5).

I vaega uma o o latou olaga, o nei fanau faapelepele latou te teuina lava faamatalaga e le aunoa, fatuina ma faaleleia o latou manatu, ma faia ma faasoa atu mea latou te maua. E faapitoa le moni o lenei mea i le talalelei, aua e masani ona saunia tamaiti ma naunau e aoaoina upumoni faigofie. O o latou faatuatua i mea faaleagaga e malolosi ma mama a’ia’i, ma e latou te vaai atu i taimi uma o se avanoa e aoao mai ai. Latou te galulue ma le naunautai i mea ua latou aoaoina, tusa lava pe le o atoatoa lo latou malamalama. O le ala lea e tatau ai ia i tatou uma ona talia le talalelei. Pei ona sa aoao mai le Faaola, “Ai se le tali i le malo o le Atua e pei o se tama itiiti, e le sao lava ia i ai” (Luka 18:17).

O le valaauga e faiaoga o se faatuatuaga paia, ma o se mea masani le lagona lofituina i nisi o taimi. Ae ia manatua o lou Tama Faalelagi na valaauina oe, ma o le a Ia le tuulafoaiina lava oe. O le galuega lenei a le Alii, ma a o e auauna atu “ma lou loto atoa, manatu atoa, mafaufau atoa, ma le malosi atoa” (Mataupu Faavae ma Feagaiga 4:2), o le a Ia faalauteleina ou gafatia, meaalofa, ma taleni, ma o lau tautua o le a faamanuiaina ai olaga o tamaiti o loo e aoaoina.