tamaiti i se vasega

O Se Mamanu mo le Aoao Atu

I lenei punaoa, o le a e maua ai laasaga e tolu o le mamanu lea ua faifaafia i otootoga taitasi: valaaulia e faasoa, aoao atu aoaoga faavae, ma faamalosia le aoaoina i le aiga. I le tele o tulaga, a o e aoao atu, o elemene o lenei mamanu e ono fesopoa’i pe tulai mai foi i se faasologa e ese. Mo se faataitaiga, mafaufau o le fefaasoaai o se avanoa lea e aoao atu ai le aoaoga faavae, ma o le aoaoina atu o le aoaoga faavae e tatau ona aofia ai le valaaulia e faasoa. E faapena foi, o le fautuaina o le aoaoina i le fale e mafai ona fai i le gasologa atoa o se talanoaga a le vasega. Faataga suiga i le mamanu lenei ia tupu lava ia, mulimuli i uunaiga a le Agaga e taulima ai manaoga o tamaiti e te faiaoga ai.

aikona o le faasoa

Valaaulia le Fefaasoaai

I le avea o se vaega o vasega taitasi, valaaulia tamaiti e faasoa mai o latou lagona, malamalamaaga, aafiaga ma molimau e uiga i mataupu faavae o loo e aoaoina. O a latou faamatalaga e ono aofia ai aafiaga sa latou maua a o aoao i le fale. E te ono toe iloiloina foi mea sa latou aoaoina i le vaiaso ua te’a ma fesili pe na faapefea ona aafia ai o latou olaga.

aikona o le aoao atu

Aoao Atu le Aoaoga Faavae

E mafai ona fesoasoani le Sau, Mulimuli Mai ia te A’u—Mo Tagata Taitoatasi ma Aiga ia te oe e malamalama atili ai i le mataupu faavae o le a e aoao atu i tamaiti. Fuafua pe o a fuaiupu o mau, upusii, aafiaga, fesili, ma isi punaoa e te manao e faasoa atu e fesoasoani ai i tamaiti ia aoao ma faatino mataupu faavae o le talalelei. Vaavaai mo ni auala mata’alia e fesoasoani ai ia i latou e sagisagi fiafia ai i mea latou te aoaoina.

aikona o le aoaoina

Uunaia le Aoaoina i le Aiga

Talu ai o le aiga o le totonugalemu lea o le aoaoina o le talalelei, o se tasi o ou faamoemoega i le avea ai o se faiaoga o le Peraimeri o le faamalosiau atu lea o le aoao i le aiga. E mafai faapefea ona e fesoasoani i tamaiti e faasoa atu i o latou aiga mea sa latou aoaoina i le vasega? E mafai faapefea ona e fautuaina tamaiti ma o latou matua e faaauau le aoao mai le Mataupu Faavae ma Feagaiga i le fale?