o le aiga o loo faitauina tusitusiga paia

28 Tesema–3 Ianuari

Mataupu Faavae ma Feagaiga 1

“Faalogo Maia, Outou E Tagata”

O lau sitepu muamua i le sauniuni e aʻoaʻo atu o le tatau lea ona suʻesuʻe ma le agaga tatalo le Mataupu Faavae ma Feagaiga 1. A o e faia, faalogologo mo uunaiga e faatatau i manaoga a tamaiti, ma vaavaai mo mataupu faavae o le a aoga mo i latou. O nei lagona o le a fesoasoani ia te oe e fuafuaina ni gaoioiga aoga e aoao ai nei mataupu faavae.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Uu i luga le Mataupu Faavae ma Feagaiga, ma fai i tamaiti e faasoa mai mea latou te iloa e uiga i lenei tusi. O ai na tusiaina? O a mea e i ai i totonu? Aisea e taua ai? Mo se fesoasoani, e mafai ona e tagai i le “Mataupu 23: O Le Mataupu Faavae ma Feagaiga” (Tala o le Mataupu Faavae ma Feagaiga, 90–92). Faasoa atu lou fiafia i le Mataupu Faavae ma Feagaiga ma lou naunautaiga e aoao mai ai i lenei tausaga.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 1:4.

E auala mai i Ana perofeta, ua lapataia ai i tatou e le Alii e uiga i tulaga matautia faaleagaga.

Na folafola mai e le Alii o Lana siufofoga o se “leo o le lapataiga.” E mafai faapefea ona e musuia tamaiti ia faalogo ma usitaia lapataiga ua Ia tuuina mai?

Gaoioiga e Mafai Ona Fai

• Tuu atu i tamaiti latou te uuina ata o faailoga o lapataiga—e pei o lamatiaga o feoaiga, leaga o le tau, po o mea oona—ma talanoa pe faapefea ona latou lapataia i tatou i mea matautia. Pe faamatala se tala o se taimi na e usitaia ai se lapataiga. Faatusatusa nei lapataiga i lapataiga e tuuina mai e le Alii e auala mai i Ana perofeta. Molimau atu Na te lapataia i tatou ona e alofa o Ia ia i tatou ma e finagalo ia tatou saogalemu (tagai foi i le itulau o gaoioiga o lenei vaiaso).

• Faitau atu le Mataupu Faavae ma Feagaiga 1:4 i tamaiti: “Ma o le leo o le lapataiga ua mo tagata uma.” Faasoa atu se mea na aoao talu ai nei e le perofeta e mafai ona faasaogalemu ai i tatou. Faaali atu ata talafeagai, pe a mafai. Talanoa e uiga i le auala o loo e mulimuli ai i le fautuaga a le perofeta.

Mataupu Faavae ma Feagaiga 1:17, 29

O Iosefa Samita o se perofeta a le Atua.

A o amata ona tou suesue ma tamaiti i le Mataupu Faavae ma Feagaiga, fesoasoani e atia’e a latou molimau i le valaauga paia a Iosefa Samita.

Gaoioiga e Mafai Ona Fai

• Faaali se ata o le Perofeta o Iosefa Samita (tagai i le Sau, Mulimuli Mai ia te A’u—Mo Tagata Taitoatasi ma Aiga; tagai foi Tusiata o le Talalelei, nu. 87). Fai atu i tamaiti e tutu i autafa o le ata ma faasoa mai mea latou te iloa e uiga ia Iosefa Samita.

• Tuu atu i tamaiti e uu se ata o le Faaola ma se ata o Iosefa Samita. Talanoa atu ia i latou e uiga i le vaega na tuuina mai e le Faaola e auala mai ia Iosefa Samita, e pei o poloaiga (tagai i le fuaiupu 17) ma le Tusi a Mamona (tagai i le fuaiupu 29). Faamatala atu i tamaiti i totonu o le Mataupu Faavae ma Feagaiga o le a latou aoao ai e uiga i poloaiga na tuuina mai e le Alii i le Ekalesia e auala mai ia Iosefa Samita.

• Faasoa atu ou lagona e faatatau ia Iosefa Samita, ma molimau atu o le Atua “na valaau atu i luga o laʼu auauna o Iosefa Samita, Laitiiti, ma tautala atu ia te ia mai le lagi, ma tuu atu ia te ia poloaiga” (fuaiupu 17).

Mataupu Faavae ma Feagaiga 1:38

O upu a le perofeta o afioga a le Atua.

O tamaiti o loo e aoaoina atonu na faalologo o saunoa le Peresitene o le Ekalesia, ae latou te le’i iloaina o ana upu na e mai le Atua. Fesoasoani ia i latou e aoao ia iloa o upu a le perofeta o afioga a le Atua.

Gaoioiga e Mafai Ona Fai

• Fai se taaloga faigofie e tuu atu ni faatonuga i se tamaitiiti ma fai atu ia te ia e toe tau atu faatonuga mo isi tamaiti. Fesoasoani ia i latou ia iloa o le mulimuli i faatonuga a le tamaitiiti e tutusa ma le mulimuli i au faatonuga ma e tutusa le mulimuli i le perofeta ma le mulimuli i le Alii. Faitau atu ia i latou le laina mulimuli o le Mataupu Faavae ma Feagaiga 1:38: “Pe i lo’u lava leo po o i le leo o a’u auauna, ua tutusa lava.”

• Usu faatasi se pese e faatatau i perofeta, e pei o le “Mulimuli i le Perofeta” (Tusipese a Tamaiti, 58). Faasoa atu lau molimau e tautala le perofeta i afioga a le Atua.

• Faasoa atu se ata, po o se vitio o le perofeta soifua. Faasoa atu lau molimau e tau mai e le perofeta ia i tatou mea e finagalo le Atua tatou te iloa. Valaaulia tamaiti e faasoa atu o latou lagona e uiga i le perofeta.

  sauniga o le konafesi aoao

  Ua aoaoina i tatou e le perofeta i mea e finagalo le Atua ia tatou iloa.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 1:15–17, 29–30

Na silafia e le Alii ia luitau o le a tatou fetaiai, o lea na Ia toefuatai mai ai le talalelei e ala mai ia Iosefa Samita.

E mafai ona e fesoasoani i tamaiti e saunia mo luitau i le lumanai e ala lea i le aoaoina oi latou pe faapefea ona avea le Toefuataiga o le talalelei ma puipuiga faaleagaga.

Gaoioiga e Mafai Ona Fai

• Fesoasoani i tamaiti e mafaufau i nisi o faafitauli i le lalolagi i aso nei. Iloilo le Mataupu Faavae ma Feagaiga 1:15–16 faatasi ma i latou, ma fesoasoani ia i latou e faailoa mai nisi o faafitauli na valoia e le Alii o le a tupu. Valaaulia i latou e saili i fuaiupu 17 ma le 29–30 mea na faia e le Alii e fesoasoani ai ia i tatou e feagai ma luitau o o tatou taimi.

• Fai atu i tamaiti e vaai faalemafaufau faapea o loo latou tapenapena mo se faigamalaga. O a mea e tatau ona latou tapenaina? E faapefea ona fesoasoani ia i latou ia iloa o le a timu i le taimi o la latou malaga pe o le a pa le pa’u a le latou taavale? Faitau faatasi le fuaiupu 17, ma talanoaina le mea na silafia e le Alii o le a tupu ia i tatou ma le ala na Ia saunia ai mo lena mea. (Afai e talafeagai, ia faamatala atu o se “mala” o se faalavelave po o se mea matautia.) E faapefea ona fesoasoani poloaiga a le Atua ia i tatou e taulimaina luitau o o tatou taimi?

Mataupu Faavae ma Feagaiga 1:30.

O Le Ekalesia a Iesu Keriso o le Au Paia o Aso e Gata Ai o le “ekalesia moni ma o loo i ai nei” a le Alii.

E faʻapefea ona e fesoasoani i tamaiti ia talisapaia faamanuiaga silisili o le auai i le “ekalesia moni ma o loo i ai nei” a le Alii.

Gaoioiga e Mafai Ona Fai

• Valaaulia tamaiti e lisi nisi o mea e i ai le ola ma nisi o mea e leai se ola (pe a mafai, aumai ata po o ni faataitaiga). O le a le eseesega i le va o se mea e i ai le ola ma se mea e leai se ola? Faitau faatasi le fuaiupu 30. O le a le uiga o le Ekalesia e “moni”? o loo “ola pea”?

• Faaali atu se ata, e pei o se atavali o le Faaola, ma fai atu i tamaiti e faamatala mai ao tapeina moli i totonu o le potu. Faaaoga lenei gaoioiga e fesoasoani ai i tamaiti ia iloa mo le toatele o tagata, o le Ekalesia moni a le Faaola o loo i le “pouliuli” ma le “pogisa.” E mafai faapefea ona ou fesoasoani i isi ia aoao e uiga i le Ekalesia?

Mataupu Faavae ma Feagaiga 1:37–38

O le afioga a le Alii e faavavau.

E mafai ona e fesoasoani i tamaiti e fausia lo latou faatuatua ia Iesu Keriso e ala i le aoao atu ia i latou o Lana afioga e mautinoa ma faʻatuatuaina.

Gaoioiga e Mafai Ona Fai

• Fesoasoani i tamaiti e faatusatusa mea e le tumau, e pei o se moli po o se kiona, ma mea e foliga mai e tumau, pei o se mauga po o le la. Fai atu ia i latou e sue i fuaiupu 37–38 se mea na fetalai le Alii e tumau. Aisea e avea ai ma se faamanuiaga le iloa o afioga a le Atua “e le mavae atu”?

• Fesoasoani i tamaiti ia malamalama o le “leo o aʻu auauna” e aofia ai leo o o tatou aposetolo ma perofeta. Fesoasoani i tamaiti e sue “valoaga ma folafolaga” i se lauga talu ai nei a le konafesi aoao a se tasi o auauna a le Alii. Tuu atu lau molimau o nei upu e musuia e le Alii ma “o le a faataunuuina uma.”

aikona o le aoaoina

Fautuaina le Aoaoina i le Aiga

Iloilo faatasi ma tamaiti mea na latou aoaoina i le aso, ma valaaulia i latou e filifili se mea se tasi latou te lagona e tatau ona iloa e tagata uma. Uunaia i latou e faasoa atu i se uo po o se tagata o le aiga.

Faaleleia o Lo Tatou Aoao Atu

E tele auala e aoao ai tamaiti. “E le tutusa uma tamaiti, ma o tamaiti taitoatasi e vave le tuputupu ae. O au taumafaiga e aoao tamaiti o le a sili ona aoga a o e faaaogaina ni metotia eseese o le aoao atu,” e aofia ai tala, fesoasoani vaaia, ma musika (Aoao Atu i le ala a le Faaola, 25).

itulau o gaoioiga: ua lapataia i tatou e le perofeta e uiga i tulaga matautia faaleagaga