“Nobyembre 29–Disyembre 5. Doktrina ug mga Pakigsaad 137–138: ‘Ang Panan-awon sa Katubsanan sa mga Patay,’” Dali, Sunod Kanako—Alang sa Primary: Doktrina ug mga Pakigsaad 2021 (2020)
“Nobyembre 29–Disyembre 5. Doktrina ug mga Pakigsaad 137–138,” Dali, Sunod Kanako—Alang sa Primary: 2021
Nakita ni Joseph ang iyang amahan, inahan, ug igsoong lalaki didto sa celestial nga gingharian (Panan-awon ni Joseph Smith bahin sa Celestial nga Gingharian, Robert Barrett).
Nobyembre 29–Disyembre 5
Doktrina ug mga Pakigsaad 137–138
“Ang Panan-awon sa Katubsanan sa mga Patay”
Pangita og mga baruganan niining mga pagpadayag nga importante alang sa mga bata nga imong gitudloan. Unsaon man nimo pagtabang kanila nga masabtan kining mga baruganan?
Irekord ang Imong mga Impresyon
Dapita ang Pagpaambit
Ipakita ang usa ka hulagway ni Jesukristo didto sa kalibutan sa mga espiritu, sama sa makita diha sa outline niining semanaha sa Dali, Sunod Kanako—Alang sa mga Indibidwal ug mga Pamilya. Dapita ang mga bata sa pagpaambit og butang nga ilang nahibaloan mahitungod sa kalibutan sa mga espiritu.
Itudlo ang Doktrina: Mas Gagmay nga mga Bata
Doktrina ug mga Pakigsaad 137:1–5
Ang Dios mihatag kanako og paagi nga makauban ang akong pamilya sa kahangturan.
Sa usa ka panan-awon, nakita ni Joseph Smith ang mga sakop sa iyang pamilya nga magkauban didto sa celestial nga gingharian. Unsaon nimo paggamit sa iyang panan-awon aron sa pagtudlo sa mga bata nga ang mga pamilya mahimong magkauban sa kahangturan?
Posible nga mga Kalihokan
-
Ipakita ang litrato sa usa ka tawo sa imong pamilya, ug hisguti kon unsa nimo kagusto nga makauban siya didto sa celestial nga gingharian. Ipasabut nga ang igsoong lalaki ni Joseph Smith nga si Alvin namatay nga batan-on pa ug gimingaw gayud pag-ayo si Joseph kaniya. Basaha ang Doktrina ug mga Pakigsaad 137:1, 5, ug pangutan-a ang mga bata kinsa ang nakita ni Joseph Smith diha sa iyang panan-awon bahin sa celestial nga gingharian (tan-awa usab sa Mga Istorya sa Doktrina ug mga Pakigsaad, 152–53). Dapita ang mga bata sa pagtuyhad sa ilang mga bukton aron ipakita kon unsa gayud nila kamahal ang ilang mga pamilya, ug hangyoa sila sa pagpaambit kon nganong gusto nilang makauban ang ilang mga pamilya didto sa celestial nga gingharian.
-
Gamita ang Doktrina ug mga Pakigsaad 137:1–5 ug ang pahina sa kalihokan niining semanaha sa pagtabang sa mga bata nga makadiskubre og mga detalye mahitungod sa panan-awon ni Joseph Smith bahin sa celestial nga gingharian. Dapita sila sa pagdrowing og hulagway sa ilang kaugalingon ug sa ilang pamilya diha sa pahina sa kalihokan samtang magtukar ka o magkanta og usa ka awit mahitungod sa mga pamilya, sama sa “Mga Pamilya Mahimong Manag-uban sa Kahangturan” (Songbook sa mga Bata, 98).
Doktrina ug mga Pakigsaad 138:6–11
Ang Espiritu Santo makatabang kanako sa pagsabut sa mga kasulatan.
Ang mga kasulatan usahay lisud sabton, ilabi na sa mga bata. Ang Doktrina ug mga Pakigsaad 138:11 nagtudlo nga mabuksan sa Espiritu Santo “ang mga mata sa [atong] salabutan.”
Ang Espiritu Santo makatabang kanato nga masabtan kon unsa ang atong gibasa diha sa mga kasulatan.
Posible nga mga Kalihokan
-
Ipakita ang litrato ni Presidente Joseph F. Smith (tan-awa sa Libro sa mga Hulagway sa Ebanghelyo, nu. 127). Ipasabut nga siya ang ikaunom nga Presidente sa Simbahan, ug usa ka adlaw nagbasa siya sa mga kasulatan ug namalandong niini (naghunahuna kon unsay gipasabut niini). Samtang magbasa ka sa Doktrina ug mga Pakigsaad 138: 6, 11, dapita ang mga bata sa pagpakaaron-ingnon nga sila si Presidente Smith ug mohimo og mga aksyon nga motukma sa mga pulong.
-
Sultihi ang mga bata mahitungod sa usa ka higayon sa dihang namalandong ka og butang diha sa mga kasulatan ug ang Espiritu Santo mitabang kanimo nga masabtan kini. Manganta og dungan sa usa ka awit mahitungod sa pagtuon sa kasulatan, sama sa “Pagsiksik, Pamalandong, ug Pag-ampo” (Songbook sa mga Bata, 66). Unsa ang gisulti niini nga awit nga kinahanglan natong buhaton aron makasabut sa mga kasulatan?
Doktrina ug mga Pakigsaad 138:18–35
Ang tanang anak sa Langitnong Amahan makabaton sa kahigayunan nga makadungog sa ebanghelyo.
Human gilansang si Jesukristo, mibisita Siya sa Iyang matinud-anong mga Santos didto sa kalibutan sa mga espiritu. Gisugo Niya sila nga itudlo ang ebanghelyo ngadto niadtong wala pa makadawat niini.
Posible nga mga Kalihokan
-
Ipakita ang litrato sa usa ka lubnganan (tan-awa sa Libro sa mga Hulagway sa Ebanghelyo, nu. 58, 59 o Bible Photographs, nu. 14), o magdrowing og usa ka lubnganan diha sa pisara. Ipakita ang usa ka hulagway sa Manluluwas didto sa kalibutan sa mga espiritu samtang ang Iyang lawas anaa sa lubnganan (sama sa usa diha sa outline niining semanaha sa Dali, Sunod Kanako—Alang sa mga Indibidwal ug mga Pamilya). Sa pagbuhat nimo niana, pangutana aron matabangan ang mga bata nga makabantay sa mahinungdanong mga detalye diha sa Doktrina ug mga Pakigsaad 138:18–19, 23–24, 27–30, sama sa kinsa ang gibisitahan ni Jesus, unsay ilang gibati, ug unsay Iyang gihangyo nga ilang buhaton.
-
Ipakita ang litrato sa mga misyonaryo (tan-awa sa Libro sa mga Hulagway sa Ebanghelyo, nu. 109, 110), ug hangyoa ang mga bata sa pagpaambit kon unsay gibuhat sa mga misyonaryo. Mahimo usab nimo silang dapiton sa pagdrama-drama sa mga butang nga gibuhat sa mga misyonaryo. Basaha ang Doktrina ug mga Pakigsaad 138:31–34 ngadto sa mga bata. Ipasabut nga kon aduna may mga misyonaryo dinhi sa yuta, didto usab adunay mga misyonaryo sa kalibutan sa mga espiritu nga nagtudlo sa mga tawo didto.
Itudlo ang Doktrina: Mas Dagko nga mga Bata
Doktrina ug mga Pakigsaad 137:1–5
Ang Dios mihatag kanako og paagi nga makauban ang akong pamilya sa kahangturan.
Si Joseph Smith adunay panan-awon bahin sa celestial nga gingharian ug nakita ang iyang mga ginikanan ug ang iyang igsoon nga si Alvin didto. Kini nga panan-awon nagtudlo kanato nga kon matarung kita, ang atong mga relasyon sa pamilya mahimong magpadayon sa sunod nga kinabuhi.
Posible nga mga Kalihokan
-
Dapita ang mga bata sa pagbasa sa Doktrina ug mga Pakigsaad 137:1–5 ug magdrowing og hulagway sa unsay ilang gibasa (tan-awa usab sa pahina sa kalihokan niining semanaha). Unsa kaha ang gibati ni Joseph Smith sa dihang iyang nakita ang mga sakop sa iyang pamilya didto sa celestial nga gingharian?
-
Ipasalida ang video nga “Families Can Be Together Forever” (ChurchofJesusChrist.org), o kantaha ang usa ka awit mahitungod sa mga pamilya, sama sa “Mga Pamilya Mahimong Manag-uban sa Kahangturan” (Songbook sa mga Bata, 98). Unsa ang gitudlo kanato sa video o sa awit mahitungod sa unsay atong mabuhat aron mahimong mahangturon ang atong mga pamilya?
Doktrina ug mga Pakigsaad 138:1–11
Kon mamalandong ko sa mga kasulatan, ang Espiritu Santo makatabang kanako nga masabtan kini.
Unsay makat-unan sa mga bata gikan sa ehemplo ni Presidente Joseph F. Smith nga tingali makapalambo sa paagi sa ilang pagtuon sa mga kasulatan?
Posible nga mga Kalihokan
-
Dapita ang mga bata sa pagbasa sa Doktrina ug mga Pakigsaad 138:1–11, ug tabangi sila sa pagsulat og usa ka sentence nga summary bahin sa kasinatian ni Presidente Joseph F. Smith. Unsa ang iyang gibuhat nga miresulta ngadto niining talagsaon nga panan-awon? Unsay gipasabut sa pagpamalandong o paghunahuna bahin sa mga kasulatan?
-
Pangutan-a ang mga bata kon unsay ilang buhaton kon sila adunay mga pangutana mahitungod sa ebanghelyo. Ipaambit ang pipila ka ehemplo gikan sa mga kasulatan o sa kaugalingon nimong kinabuhi sa dihang ang pagpamalandong sa mga kasulatan nakahatag og panabut gikan sa Espiritu (tan-awa, sama pananglit ang, 1 Nephi 11:1–6; Doktrina ug mga Pakigsaad 76:19–24; Joseph Smith—Kasaysayan 1:11–12).
Doktrina ug mga Pakigsaad 138:12–35
Ang tanang anak sa Langitnong Amahan makabaton sa kahigayunan nga makadungog sa ebanghelyo.
Si Presidente Joseph F. Smith nakakat-on nga ang buhat sa pagsangyaw sa ebanghelyo nagpadayon didto sa kalibutan sa mga espiritu. Kini nga buhat mosiguro nga ang tanan makabaton og kahigayunan sa pagdawat sa ebanghelyo.
Posible nga mga Kalihokan
-
Diha sa pisara, ilista ang pipila ka bersikulo gikan sa seksyon 138. Dayon ilista, sa lahi nga pagkahan-ay, ang mga pamahayag nga nag-summarize sa matag hugpong sa mga bersikulo. Dapita ang mga bata sa pagpares-pares sa mga pamahayag uban sa husto nga mga bersikulo. Ang mga bersikulo mahimong maglakip sa 12–16 (ang matarung nga mga espiritu nagpundok aron maghulat nga mopakita si Jesus), 18–19 (ang Manluluwas mipakita ngadto sa matarung nga mga espiritu), 29–30 (si Jesus mitudlo og mga mensahero sa pagsangyaw sa ebanghelyo), 31–35 (ang matarung nga mga espiritu nagsangyaw sa ebanghelyo), ug uban pa. Human makahimo ang mga bata og panagpares, hangyoa sila sa pagpaambit kon unsay ilang nakat-unan gikan sa mga bersikulo.
-
Hangyoa ang pipila ka bata sa pagbasa sa Doktrina ug mga Pakigsaad 138:33 sa pagpangita kon unsa nga mga baruganan sa ebanghelyo ang gitudlo ngadto sa mga espiritu sa mga patay. Hangyoa ang mga bata sa pagbasa sa mga baruganan nga gitudlo diha sa Mga Artikulo sa Hugot nga Pagtuo 1:4. Unsay magkapareho niining mga bersikulo, ug unsay magkalahi? Unsa ang gitudlo niini kanato mahitungod sa Langitnong Amahan ug sa Iyang plano?
Awhaga ang Pagkat-on diha sa Panimalay
Dapita ang mga bata sa pagplano og panahon karong semanaha kon kanus-a mamalandong sila sa mga kasulatan nga ilang basahon.
Pagpalambo sa Atong Pagtudlo
I-awhag ang balaang pagtahud. Tabangi ang mga bata nga makasabut nga ang usa ka importante nga bahin sa balaan nga pagtahud mao ang paghunahuna mahitungod sa Langitnong Amahan ug ni Jesukristo. Mahimo nimong pahinumduman ang mga bata nga magbaton og balaang pagtahud pinaagi sa hinay nga pagkanta o paglaylay og usa ka awit sa Primary o sa pagpakita og hulagway ni Jesus.