mga tawo sa kalibutan sa espiritu

Nakakita si Joseph sa iyang amahan, inahan, ug igsoong lalaki didto sa celestial nga gingharian (Joseph Smith’s Vision of the Celestial Kingdom [Panan-awon ni Joseph Smith sa Celestial nga Gingharian], Robert Barrett).

Nobyembre 29–Disyembre 5

Doktrina ug mga Pakigsaad 137–138

“Ang Panan-awon sa Katubsanan sa mga Patay”

Si Presidente M. Russell Ballard mitudlo: “Dapiton ko kamo nga mobasa sa hingpit ug mahunahunaong paagi sa [Doktrina ug mga Pakigsaad 138]. Kon inyo kining buhaton sa mao, hinaut ang Ginoo mopanalangin kaninyo nga mas hingpit nga makasabut ug makadayeg sa gugma sa Dios ug sa Iyang plano sa kaluwasan ug kalipay alang sa Iyang mga anak” (“Ang Panan-awon sa Katubsanan sa mga Patay,” Liahona, Nob. 2018, 73).

I-rekord ang Imong mga Pagbati

Ang mga pinadayag nga girekord diha sa Doktrina ug mga Pakigsaad 137 ug 138 nagbulag og labaw sa 80 ka mga tuig ug 2400 ka kilometro. Seksyon 137 nadawat ni Propeta Joseph Smith sa 1836 diha sa wala mahuman nga Templo sa Kirtland, ug ang seksyon 138 nadawat ni Joseph F. Smith, ang ikaunom nga Presidente sa Simbahan, sa 1918 sa Siyudad sa Salt Lake. Apan sa doktrinal nga paagi, kining duha ka mga panan-awon may kalabutan ug sakop sa usag usa. Kining duha nagtubag sa mga pangutana mahitungod sa padulngan sa mga anak sa Dios sa sunod nga kinabuhi. Ug ang duha adunay lawom nga kahulugan kon atong hunahunaon ang mga kasinatian sa kinabuhi sa mga propeta kinsa midawat niini.

Ang panan-awon ni Joseph Smith mitabang kaniya sa pagsabut sa mahangturong padulngan sa iyang hinigugmang igsoong lalaki nga si Alvin, kinsa namatay unom ka tuig sa wala pa ang awtoridad sa pagbunyag gipahiuli. Ang mga pangutana mahitungod sa mahangturong kaluwasan ni Alvin mipabilin diha ni Joseph sukad sa sinugdanan. Ang panan-awon ni Joseph F. Smith mipadayag og mahimayaong mga kamatuoran mahitungod sa kalibutan sa espiritu––sa tinuod usa ka makahupay nga pagpadayag ngadto sa usa ka tawo kinsa nagbangutan sa mga kamatayon sa daghang suod nga mga sakop sa pamilya. Si Joseph F. Smith nawad-an sa iyang amahan, si Hyrum Smith, sa edad nga 5 ug sa iyang inahan, si Mary fielding Smith, sa edad nga 13. Sa panahon sa iyang panan-awon kaniadtong 1918, nagbangutan siya sa pagkamatay sa 13 ka mga anak.

Daghang mga pangutana ang mga tawo mahitungod sa kinabuhi human sa kamatayon ang natubag niini nga mga pagpadayag. Ang seksyon 137 naghatag og pipila ka mga panabut diha sa ingon nga mga pangutana, ug ang seksyon 138 gani naghatag og mas mahinungdanong mga panabut. Nag-uban, kini nagpamatuod sa “dako nga katingalahan nga gugma nga gihimong gipakita sa Amahan ug sa Anak” (Doktrina ug mga Pakigsaad 138:3).

icon sa personal nga pagtuon

Mga Ideya alang sa Personal nga Pagtuon sa Kasulatan

Doktrina ug mga Pakigsaad 137

Ang matag kalag adunay oportunidad sa pagpili sa celestial nga himaya.

Ang kasagaran nga pagsabut taliwala sa mga Kristiyanos kaniadtong 1836 mao nga kon ang usa ka tawo namatay nga wala mabunyagi––sama sa igsoong lalaki ni Joseph Smith nga si Alvin––kana nga tawo dili makaadto sa langit. Apan si Joseph nakakita ni Alvin sa usa ka panan-awon sa celestial nga gingharian. Samtang ikaw magbasa diha sa seksyon 137, pamalandonga unsay imong nakat-unan mahitungod sa Langitnong Amahan, Iyang plano sa kaluwasan, ug sa celestial nga gingharian.

Tan-awa usab sa Mga Santos, 1:263–66.

Doktrina ug mga Pakigsaad 138:1–11, 25–30

Ang pagbasa ug pagpamalandong sa kasulatan nag-andam kanako sa pagdawat og pagpadayag.

Usahay ang pagpadayag moabut bisan kon kita wala magtinguha niini. Apan sa kadaghanan, kini moabut tungod kay kita makugihong nangita ug nangandam alang niini. Samtang ikaw nagbasa diha sa Doktrina ug mga Pakigsaad 138:1–11, 25-30, timan-i unsay gibuhat ni Presidente Joseph F. Smith sa dihang “ang mga mata sa [iyang] salabutan nabuksan” aron mas makasabut sa matubsanong misyon sa Manluluwas. Dayon hunahunaa unsaon nimo nga makasunod sa ehemplo ni Presidente Smith. Sama pananglit, unsa nga mga kausaban ikaw makahimo ngadto sa imong pagtuon sa kasulatan nga motugot og mas “nagpalandong sa mga kasulatan” ug mas “nagpalandong sa matubsanong sakripisyo sa pag-ula sa [Manluluwas] ”? (mga bersikulo 1–2).

Diha sa iyang mensahe “Ang Panan-awon sa Katubsanan sa mga Patay” ( Liahona, Nob. 2018, 71–74), misugyot si Presidente M. Russell Ballard og ubang mga paagi diha diin si Presidente Smith naandam sa pagdawat niini nga pagpadayag. Hunahunaa giunsa ikaw sa pag-andam alang sa mga kasinatian nga ikaw aduna o maanaa sa umaabut.

dibuho ni Joseph F. Smith

Joseph F. Smith, ni Albert E. Salzbrenner

Doktrina ug mga Pakigsaad 138:25–60

Ang buhat sa kaluwasan nagpadayon sa duha ka habig sa tabil.

Gitudlo ni Presidente Russell M. Nelson, “Ang among mensahe ngadto sa kalibutan yano ug sinsero: among gidapit ang tanang anak sa Dios sa duha ka habig sa tabil sa pagduol ngadto sa ilang Manluluwas, modawat sa mga panalangin sa balaan nga templo, magbaton og molahutay nga kalipay, ug mahimong angayan sa kinabuhing dayon” (“Magpadayon Tang Tanan,” Liahona, Mayo 2018, 118–19). Pamalandonga kini nga pahayag samtang ikaw magbasa diha sa Doktrina ug mga Pakigsaad 138:25–60. Mahimo usab nga imong hunahunaon kini nga mga pangutana:

• Unsa ang imong nakat-unan gikan niini nga mga bersikulo mahitungod kon giunsa ang buhat sa kaluwasan pagtuman didto sa kalibutan sa espiritu? Nganong importante alang kanimo nga mahibalo nga kini nga buluhaton nagpanghitabo? Giunsa paglig-on niini nga mga bersikulo ang imong pagtuo diha sa Pag-ula sa Manluluwas?

• Unsa ang gitudlo niini nga mga bersikulo mahitungod niadtong kinsa nag-apil diha sa buhat sa kaluwasan didto sa kalibutan sa espiritu? Nganong importante nga masabtan nga ang buhat sa kaluwasan gihimo sa duha ka habig sa tabil?

Tan-awa usab sa Dallin H. Oaks, “Salig sa Ginoo,” Liahona, Nob. 2019, 26–29.

icon sa pamilya nga pagtuon

Mga Ideya alang sa Pamilya nga Pagtuon sa Kasulatan ug Family Home Evening

Doktrina ug mga Pakigsaad 137:1–5.Dapita ang imong pamilya sa pagdrowing unsa kaha sa ilang hunahuna ang hitsura sa celestial nga gingharian base niini nga mga bersikulo. Unsay imong nakaplagan dinhi niini nga mga bersikulo nga makatabang kanimo sa pagpanglantaw nga mopuyo didto? Unsa ang atong gibuhat karon sa pag-andam sa pagpuyo didto sa celestial nga gingharian uban sa Langitnong Amahan ug ni Jesukristo?

Doktrina ug mga Pakigsaad 137:5–10. Tingali mahimo usab ikaw nga mosulti mahitungod sa usa ka tawo nga imong kaila kinsa namatay nga walay higayon nga mabunyagan. Unsa ang gitudlo kanato sa Doktrina ug mga Pakigsaad 137:5–10 mahitungod niana nga tawo?

Doktrina ug mga Pakigsaad 138:12–24.Unsa ang gitudlo kanato sa Doktrina ug mga Pakigsaad 138:12–24 mahitungod sa mga tawo nga giduaw sa Manluluwas didto sa kalibutan sa espiritu? Unsa nga mga panalangin ang ilang nadawat? Unsay atong nakat-unan gikan sa ilang ehemplo?

Doktrina ug mga Pakigsaad 138:38–55.Kini nga mga bersikulo naghulagway niadtong kinsa nakita ni Presidente Joseph F. Smith didto sa kalibutan sa espiritu ug mubo nga mga detalye mahitungod kanila. Tingali ang imong pamilya makahimo og lista sa imong mga katigulangan kinsa tua didto sa kalibutan sa espiritu, uban sa mga detalye mahitungod sa ilang mga kinabuhi.

Alang sa dugang nga mga ideya sa pagtudlo sa mga bata, tan-awa sa latid [outline] karon nga semana sa Dali, Sunod Kanako—Alang sa Primary.

Gisugyot nga awit: “Pagsiksik, Pamalandong, ug Pag-ampo,” Songbook sa mga Bata, 66.

Pagpalambo sa Atong Pagkat-on

Pamalandong sa mga kasulatan. Si Presidente David O. McKay mitawag sa pamalandong nga “usa sa … labing sagradong mga pultahan nga atong agian ngadto sa atubangan sa Ginoo” (Mga Pagtulun-an sa mga Presidente sa Simbahan: David O. McKay [2003], 38).

Si Jesukristo didto sa kalibutan sa espiritu

Ang Gitugyanan [The Commissioned], ni Harold I. Hopkinson. Si Jesukristo nagtugyan sa matarung nga mga espiritu sa pagsangyaw sa ebanghelyo didto sa kalibutan sa espiritu.