aiga o loo savavali atu i le malumalu

2–8 Aokuso

Mataupu Faavae ma Feagaiga 85–87

“Ia Outou Tutu i Nofoaga Paia”

Ona e puupuu lou taimi ma tamaiti, saili le taitaiga faaleagaga e iloa ai po o a mataupu faavae mai tusitusiga paia e tatau ona faamamafa i ai lau aoao. Talitonu i musumusuga e te maua.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Faaali i tamaiti ni ata po o itulau o gaoioiga na e faaaogaina i lesona talu ai nei, ma valaaulia tamaiti e faasoa mai ni mea latou te manatua na latou aoaoina e faatatau i ai, a le i le vasega po o le fale.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 85:6

E talanoa le Agaga i se “leo itiiti ma le filemu.”

Na saunoa mai Elder Richard G. Scott e faapea, “Afai e te le ausiaina se isi lava mea i lou fesootaiga ma ou tagata aoga nai lo o le fesoasoani ia i latou ia iloa ma mulimuli i musumusuga o le Agaga, o le a lemafuatiaina ma faavavau ona e faamanuiaina o latou olaga” (“To Learn and to Teach More Effectively” [Brigham Young University Education Week devotional, Aug. 21, 2007], 5, speeches.byu.edu).

Gaoioiga e Mafai Ona Fai

• Faitau atu i tamaiti le auala na faamatala ai e Iosefa Samita le Agaga: “Ioe, ua faapea ona fetalai mai o le leo itiiti ma le filemu” (Mataupu Faavae ma Feagaiga 85:6). Fai atu i tamaiti e tau mai ni mea e laiti (faaali ata pe a manaomia le fesoasoani). Valaaulia i latou e faapupuu i lalo o le foloa, ina ia laiti ma filemu i le mea latou te mafaia ai. Fesoasoani ia i latou e mafaufau pe mafai faapefea ona itiiti se leo, ma tuu atu ia i latou e faataitai ona faalogologo ma tautala i se leo itiiti. Faamatala atu e uiga i ni taimi na talanoa atu ai le Agaga ia te oe i se leo itiiti, ma le filemu.

• Aoao i tamaiti se pese e uiga i le Agaga, e pei o le “O Le Agaga Paia” (Tusipese a Tamaiti, 56). Valaaulia i latou tou te usuina i se leo musumusu. O le a se mea o aoao mai e lenei pese e uiga i le Agaga Paia? Fesoasoani i tamaiti ia iloa se taimi atonu na latou lagonaina ai Lana uunaiga (e pei o le taimi e tatalo ai, usu ai viiga, pe fesoasoani i isi).

Mataupu Faavae ma Feagaiga 86:11

E mafai ona avea a’u ma malamalama i isi.

O loo faamatalaina i le Vaega 86 le galuega taua ua finagalo le Alii e faia e Ana auauna i aso e gata ai. O se tasi o auala e mafai ona fesoasoani ai tamaiti i lenei galuega o le avea lea ma malamalama i tagata o loo siomia ai i latou.

Gaoioiga e Mafai Ona Fai

• Faitau atu i tamaiti le fuaitau lenei mai le Mataupu Faavae ma Feagaiga 86:11: “Amuia lava outou pe afai tou te tumau pea i loʼu agalelei, o se malamalama i Nuuese [po o tagata e le o mauaina le talalelei].” E faapefea ona faamanuia i tatou e le malamalama? O le a faapeī pe a leai so tatou malamalama? E mafai faapefea ona avea i tatou ma se malamalama i isi tagata o e le iloa e uiga i le talalelei? Fesoasoani i tamaiti e mafaufau i ni auala e mafai ona tatou faasoa atu ai le agalelei o Iesu ma isi.

• Fai atu i tamaiti e vaai faalemafaufau faapea, o loo taumafai se uo e savali i le pogisa (tape moli pe a fesoasoani i ai). Aisea e faigata ai ona savali i le pogisa? O le a se mea e mafai ona tatou faia e fesoasoani ai i le tatou uo? Faamalamalama atu pe a tatou mulimuli i le Faaola, ua pei lea o le faasusulu atu o se moli e faaali ai i isi le auala e ui ai.

• O mekasini o le Liahona ma le Uo e masani ona i ai tala e faatatau i tamaiti o e o avea ma ni faataitaiga lelei. Vaai mo se tala e faasoa atu i tamaiti o le a faapea ona musuia ai i latou ia avea foi ma faataitaiga lelei.

Mataupu Faavae ma Feagaiga 87

E mafai ona avea o tatou aiga ma “nofoaga paia.”

E leai se aiga e atoatoa, ae e i ai mea e mafai e i tatou uma ona faia e fai ai o tatou aiga ma nofoaga paia o le filemu.

Gaoioiga e Mafai Ona Fai

• Faamalamalama atu i tamaiti sa popole Iosefa Samita e uiga i mea sa tutupu i le lalolagi. Aotele le ulutala o le vaega 87, pe faitau le “Mataupu 30: O se Faaaliga e uiga i le Taua” (Tala o le Mataupu Faavae ma Feagaiga, 117–18; tagai foi i le vitio i luga o le ChurchofJesusChrist.org). Fai atu i tamaiti e faalogologo mo mea atonu na mafua ai ona popole Iosefa. Ina ia aoao atu mea na fetalai mai le Alii e tatau ona tatou faia e faatatau i na faafitauli, tagai Mataupu Faavae ma Feagaiga 87:8.

• Faaali atu se ata o se malumalu, ma faasoa atu le mafuaaga e avea ai le malumalu o se nofoaga paia. Faaali atu se ata o se fale, ma fesoasoani i tamaiti e mafaufau i ni auala e mafai ai ona latou faia o latou fale ia paia e pei o le malumalu (tagai i le itulau o gaoioiga mo lenei vaiaso). Aisea tatou te mananao ai ia i ai i nofoaga paia?

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 85:6

E talanoa le Agaga i se “leo itiiti ma le filemu.”

O le lalolagi e tele ona mea faalavefau e mafai ai ona faigata ona lagonaina le Agaga. E faapefea ona e fesoasoani i tamaiti ia faalogologo mo le leo o le Agaga?

Gaoioiga e Mafai Ona Fai

• Fai atu i tamaiti pe o le a se latou tala e fai atu, pe a fesili se tasi ia i latou pe faapefea ona latou iloa le taimi e talanoa atu ai le Agaga Paia ia i latou. Valaaulia i latou e faitau e uiga i se auala se tasi na faamatalaina ai e Iosefa Samita le leo o le Agaga i le Mataupu Faavae ma Feagaiga 85:6.

• Tātā filemu se viiga po o se pese a tamaiti, ma fesili atu i se tasi o tamaiti e mate po o le a lea pese ao fai e isi ni leo e faalavelave ai, e pei o le patipati po o le tatū. Ona fai atu lea i isi tamaiti e taofi, ma talanoa pe faapefea ona pei lenei gaoioiga o le lagonaina o le Agaga Paia pe a aveesea mea faalavelave mai o tatou olaga. Fesoasoani i tamaiti e mafaufau i ni mea faalavelave e mafai ona latou aveesea ina ia lagona soo ai le Agaga.

Mataupu Faavae ma Feagaiga 86

E mafai ona ou fesoasoani e faapotopoto le nuu o le Atua.

O le faataoto i le saito ma le titania e faatatau i “aso e gata ai, ma le taimi nei lava” (Mataupu Faavae ma Feagaiga 86:4). Faaaoga lenei faataoto e fesoasoani ai i tamaiti ia lagona le musuia e auai i le “faaputuina o le saito” (fuaiupu 7).

Gaoioiga e Mafai Ona Fai

• Faamatala atu i tamaiti le faataoto i le saito ma le titania, pe valaaulia se tamaitiiti e tago e faamatala (tagai Mataio 13:24–30). Valaaulia tamaiti e tusi se ata o se mea mai le faataoto. Faitau faatasi le Mataupu Faavae ma Feagaiga 86:1–7, ma valaaulia tamaiti e tusi i luga o a latou ata le mea ua faatatau i ai mea na latou tusia.

• Tapena ni nai ata laiti po o ni ata tusi o saito, ona nanā solo lea i le potu. Valaaulia tamaiti taitoatasi e fesoasoani e faaputu mai saito ma tusi ai i luga le igoa o se isi e mafai ona latou “faaputuina” ia Iesu Keriso. O le a le uiga o le faapotopotoina o tagata ia Iesu Keriso? O a nisi o auala e mafai ai ona tatou faia lenei mea? O le a le uiga o le “tumau i le agalelei [o le Faaola],” ma e faapefea ona fesoasoani lena mea ia i tatou i le faapotopotoina o tagata ia te Ia.? (Mataupu Faavae ma Feagaiga 86:11).

Mataupu Faavae ma Feagaiga 87

E mafai ona ou “tu … i nofoaga paia.”

O tamaiti o loo e aoaoina o le a feagai ma faigata faaleagaga ma faaletino i o latou olaga. E mafai ona e fesoasoani e tapenaina i latou e fetaiai ma na faigata e ala i le aoaoina o i latou e saili ma tutū i nofoaga paia.

fafine ma se tamaitiiti i fafo o le malumalu

O le auauna atu i le malumalu o se tasi lea o auala e mafai ona tatou fesoasoani e faapotopoto ai tagata o le Atua.

Gaoioiga e Mafai Ona Fai

• Faitau faatasi le Mataupu Faavae ma Feagaiga 87:6 e aoao ai e uiga i mea na fetalai mai le Alii o le a tutupu i aso e gata ai. Fai atu i tamaiti e talanoa e uiga i luitau e feagai ma tamaiti o le latou tupulaga i nisi o taimi. Valaaulia i latou e saili i totonu o le fuaiupu 8 le mea na fetalai le Alii e tatau ona tatou faia i taimi faigata. Tau atu i tamaiti e uiga i nofoaga paia i lou olaga.

• Fesoasoani i tamaiti e fai se lisi o nofoaga paia, manatu paia, ma gaoioiga paia e mafai ona fesoasoani ia i latou e fetaiai ai ma faigata faaleagaga (mo manatu, tagai i vitio “Standing in Holy Places” ma le “Stand Ye in Holy Places—Bloom Where You’re Planted,” ChurchofJesusChrist.org). Fai atu ia i latou e teu a latou lisi e vaai i ai pe a manaomia.

aikona o le aoaoina

Fautuaina le Aoaoina i le Aiga

Valaaulia tamaiti e piki se mea se tasi o le a latou faia ina ia avea ai o latou fale poo o latou olaga ma se “nofoaga paia.”

Faaleleia o Lo Tatou Aoao Atu

Faaaoga lou fatufatuaʻi. Aua e te faatapulaa oe lava i manatu o gaoioiga ua fautuaina atu i lenei otootoga. Ia faaosofia e nei manatu lou lava fatufatuai. Mafaufau i mea o le a fiafia i ai tamaiti o lau vasega ma mea o le a fesoasoani ia i latou e aoao ai.

itulau o gaoioiga: e mafai ona avea lo’u aiga ma nofoaga paia