o se fanua i le oso ae o le la

Itumalo o Tavesi, Misuri

14–20 Iuni

Mataupu Faavae ma Feagaiga 64–66

“E Manaomia e le Alii le Loto ma le Mafaufau Malie”

A o e sauniuni e aoao atu, mafaufau pe faapefea ona e suia le auala e te aoao ai ina ia talafeagai ma manaoga a tamaiti. Manatua, e mafai ona e faaaoga soo se gaoioiga o i lenei otootoga mo tamaiti laiti po o tamaiti matutua.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tuu atu i tamaiti taitasi se avanoa e uu ai se ata o le Faaola ma faasoa mai se mea o loo latou aoaoina e uiga ia te Ia ma Lana talalelei.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 64:9–10

Ua fetalai mai Iesu Keriso ia ou faamagalo atu i isi.

O a ni lesona faitino po o ni gaoioiga e mafai ona e mafaufau i ai o le a fesoasoani i tamaiti ia malamalama i le uiga o le faamagalo atu? A o e talanoaina le faamagaloga, faamanatu atu i tamaiti o le faamagalo atu e le o le faatagaina lea o isi ia faatiga ia i tatou.

Gaoioiga e Mafai Ona Fai

• Faitau le fuaitau “e tatau ona outou faamagalo i le tasi” (Mataupu Faavae ma Feagaiga 64:9), ma fesili atu i tamaiti po o le a le uiga o le faamagalo atu i se tasi. Ina ia fesoasoani ia latou malamalama, faasoa ni nai faataitaiga faigofie. Fesoasoani ia i latou e faatino nei faataitaiga e faataitai ai le faamagalo atu.

• Faitau lemu le Mataupu Faavae ma Feagaiga 64:10 i tamaiti, ma fai atu ia i latou e lululima ma se isi tamaitiiti pe a latou faalogo i le upu “faamagalo.” Faasoa atu lau molimau i le filemu ma le fiafia e oo mai pe a tatou faamagalo atu i isi.

• Usu se pese e faatatau i le faamagaloga, e pei o le “Fesoasoani Mai Ia Te A‘u Tama Pele” (Tusipese a Tamaiti, 52). O le a se mea o aoao mai e lenei pese ia i tatou e uiga i le faamagalo atu o isi?

Mataupu Faavae ma Feagaiga 64:34

E mafai ona ou usitai ia Iesu ma lo’u loto ma lo’u mafaufau.

Na aoao e le Alii le Au Paia ina ia fausia Siona, na manaomia ona latou tuuina atu ia te Ia o latou loto ma mafaufau malilie. Mafaufau pe o le a faapefea ona e fesoasoani i tamaiti ia amata ona mafaufau po o le a le uiga o lenei mea mo i latou.

Gaoioiga e Mafai Ona Fai

• Faitau atu i tamaiti mai le Mataupu Faavae ma Feagaiga 64:34: “Faauta, e manaomia e le Alii le loto ma le mafaufau malie” Toe fai lenei fuaitau mo ni nai taimi, faasino i lou fatu ma lou ulu ao e faitauina na upu, ma valaaulia tamaiti e faia foi. E mafai faapefea ona tatou tuuina atu o tatou loto ma mafaufau i le Faaola? (E mafai ona fesoasoani le faamalamalama atu, o o tatou loto e faatatau lea i o tatou lagona ma le alofa ae o o tatou mafaufau e faatatau i o tatou manatu.)

• Usu se pese e faatatau i le alofa ma le mulimuli i le Faaola, e pei o le “Le Alofa o lou Faaola” (Tusipese a Tamaiti, 42–43; aemaise le fuaiupu lona 3). E faʻapefea ona tatou faʻaali atu i le Faaola tatou te alolofa ia te Ia? Faasoa atu ou lagona mo Iesu Keriso.

Mataupu Faavae ma Feagaiga 66

E silafia a’u e le Alii ma e alofa ia te a’u.

E lima ni fesili patino a Viliamu E. McLellin na i ai mo le Alii. Na maua e Iosefa Samita tali i na fesili i se faaaliga e ui na te lei iloa po o a fesili a Viliamu. O lenei aafiaga e mafai ona fesoasoani ia te oe e aoao ai tamaiti, e silafia e le Atua i latou ma e mafai ona Ia taliina a latou fesili.

Gaoioiga e Mafai Ona Fai

• Tau atu e uiga i le auala na tali ai e le Alii fesili a Viliamu E. McLellin e ala mai i se faaaliga mai le Perofeta o Iosefa Samita (tagai ulutala o le Mataupu Faavae ma Feagaiga 66). Molimau atu e silafia e le Tama Faalelagi i tatou ma finagalo e fesoasoani mai ia i tatou. Fai atu i tamaiti e faasoa mai pe faapefea ona latou iloa e alofa le Atua ia i latou.

• Faitau atu i tamaiti le Mataupu Faavae ma Feagaiga 66:4. Taʻu i tamaiti se taimi na faaali atu ai e le Alii ia te oe le mea na Ia finagalo e te faia. Toe faitau le fuaiupu, ae o le taimi lenei tuu i ai le igoa o se tasi o tamaiti. Toe fai lenei mea mo tamaiti uma.

  O Iesu ma tamaiti

  E alofa Iesu Keriso ia i tatou uma taitoatasi.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 64:7–10

E finagalo le Alii ou te faamagalo i tagata uma.

E pei ona faaali mai i nei fuaiupu, e oo lava i soo o Iesu Keriso e i ai taimi na faigata ai ona faamagalo atu le tasi i le isi. Mafaufau pe o le a faapefea ona e fesoasoani i tamaiti ia malamalama i le poloaiga a le Alii “e faamagalo tagata uma.” (Faamanino atu o le faamagalo atu e le o le faatagaina lea o isi tagata e faatiga ia i tatou; e tatau lava ona latou tau i se tagata matua e faatuatuaina pe a faatiga se isi ia i latou.)

Gaoioiga e Mafai Ona Fai

• Valaaulia tamaiti e vaai faalemafaufau faapea, na talosagaina i latou e aoao se uso laitiiti e uiga i le faamagalo atu o isi. O le a faapefea ona latou faia? Valaaulia i latou e faitau taitoalua le Mataupu Faavae ma Feagaiga 64:7–10 ma saili ni fuaitau e mafai ona latou faaaoga pe a aoao atu. E mafai foi ona latou faataitai e aoao e le tasi le isi.

• Usu faatasi le “Fesoasoani Mai Ia Te A‘u Tama Pele” (Tusipese a Tamaiti, 52). E faapefea ona fesoasoani le Tama Faalelagi ia i tatou e faamagalo isi?

• Mafaufau i se faatusatusaga atonu e mafai ona fesoasoani i tamaiti ia malamalama pe faapefea ona “faapuapuagatia” i tatou pe a tatou le faamagalo atu (fuaiupu 8). Mo se faataitaiga, faaali atu i tamaiti se pepa palapala; fai atu ia i latou e vaai faalemafaufau faapea, na tauai e seisi i latou i palapala. E faapefea ona pei le le faamagalo atu o le sefeina o le palapala ma feaveai solo ma i tatou? Aisea e sili atu ai ona lelei le tiai ese o le palapala? Fesoasoani i tamaiti e mafaufau i isi faatusatusaga o loo aoao mai ai le mafuaaga e taua ai le faamagalo atu.

Mataupu Faavae ma Feagaiga 64:33–34

E manaomia e le Alii lo’u “loto ma se mafaufau malie.”

O le fausiaina o Siona—po o le fesoasoani i le Ekalesia ia tuputupu ae—o se “galuega maoae,” Ina ia mafai ona ausia, e manaomia e le Alii ona tatou ofo atu ia te Ia o tatou loto ma mafaufau malilie. O i latou e nonofo i Siona e “tasi o latou loto ma tasi le mafaufau” (Mose 7:18).

Gaoioiga e Mafai Ona Fai

• Faaali atu i tamaiti ni mea e fausia mai i ni vaega laiti se tele, e pei o se paso po o se solovae. Fesoasoani ia latou mafaufau i nisi faataitaiga. Valaaulia tamaiti e faitau le Mataupu Faavae ma Feagaiga 64:33. O le a se mea e finagalo le Atua tatou te faia e fesoasoani ai ia te Ia e ausia ai Lana “galuega maoae”? O a “mea iti” e mafai ona tatou faia o le a fesoasoani ai e faataunuu lenei galuega?

• Fai atu i tamaiti e fai se gaoioiga e manaomia ai ni mea faitino se lua, ae tuu atu ia i latou na o se tasi (mo se faataitaiga, tusitusi i luga o le laupapa e aunoa ma le penisina, po o le otiina o se fasipepa e aunoa ma se selaulu). Valaaulia tamaiti e faitau le Mataupu Faavae ma Feagaiga 64:34 e iloa ai po o a mea e lua o loo manao mai ai le Alii ia i tatou. Aisea e manaomia ai ona tuuina atu o tatou loto ma mafaufau i le Alii? E faapefea ona tatou faia lea mea?

Mataupu Faavae ma Feagaiga 65

E mafai ona ou fesoasoani e tapena le lalolagi e talia Iesu Keriso.

O le misiona a le Ekalesia—le malo o le Atua i le lalolagi—o le saunia lea o le lalolagi mo le toe foi mai o le Faaola. O tamaiti o loʻo e aoaoina o se vaega taua o lenei misiona. O le a se mea e mafai ona e faia e fesoasoani ai ia faaauai i latou?

Gaoioiga e Mafai Ona Fai

• Ia faitau o se vasega pe fai paga le Mataupu Faavae ma Feagaiga 65, ma faitau pe o faafia ona tusia le upu “saunia”. O le a se mea ua fetalai mai le Alii ia tatou saunia i ai? O le a se mea e mafai ona tatou faia e saunia ai i tatou lava ma le lalolagi?

• Faaali atu se ata o le Toe Afio Mai Faalua o le Faaola (tagai Tusi Ata o le Talalelei, nu.66), ma fai i tamaiti e faamatala mai mea o loo latou vaai i ai pe iloa e uiga i le mea o loo tupu. Tuu atu i tamaiti upu ma fuaitau autu e sue i totonu o le Mataupu Faavae ma Feagaiga 65 (e pei o le “tumu ai le lalolagi atoa” ma “galuega ofoofogia”). O a mea ua aoao mai ia i tatou e nei upu ma fuaitau e faatatau i le Toe Afio Mai Faalua o le Faaola ma le tatou matafaioi e sauniuni ai mo lea mea?

aikona o le aoaoina

Fautuaina le Aoaoina i le Aiga

Fesoasoani i tamaiti e sue se fuaiupu i totonu o le Mataupu Faavae ma Feagaiga 64–66 latou te fiafia i ai ma o le a mananao e faasoa atu i se tagata o le aiga po o se uo.

Faaleleia o Lo Tatou Aoao Atu

Aoao ia iloa faaaliga. A o e tatalo ma manatunatu loloto e uiga i mau, o le a e iloa ai o manatu ma uunaiga e mafai ona oo mai i soo se taimi ma i soo se mea—”a o e malaga i le galuega, fai au feau i le fale, pe fegalegaleai foi ma aiga ma uo” (Aoao Atu i le Ala a le Faaola, 12).

itulau o gaoioiga: E mafai ona ou mulimuli ia Iesu Keriso ma lo’u mafaufau ma lo’u loto