Vaitafe o Misuri

Afi o le Tolauapiga i Misuri, saunia e Bryan Mark Taylor

31 Me–6 Iuni

Mataupu Faavae ma Feagaiga 60–62

“Ua I Ai Tagata Uma i Loʼu Lima”

Manatua o lau tapenapenaga aupito sili lava e aoao atu le Mataupu Faavae ma Feagaiga 60–62 o le a maua i au suesuega patino ma suesuega faaleaiga o nei vaega.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Tuu atu i tamaiti taitoatasi se avanoa e faasoa mai se mea na ia aoaoina mai tusitusiga paia i le vaiaso ua tuanai pe mai le vasega o le Peraimeri i le aso Sa ua te’a. A uma ona faasoa mai tamaiti taitasi, valaaulia se isi tamaitiiti o le vasega e aotele mai mea sa ia faasoa mai.

aikona o le aoao atu

Aoao atu le Aoaoga Faavae: Tamaiti Laiti

Mataupu Faavae ma Feagaiga 60:4; 61:1–2, 36; 62:1

E aoao a’u e tusitusiga paia e uiga ia Iesu Keriso.

O le Mataupu Faavae ma Feagaiga 60–62 o loo i ai faamatalaga e tele e mafai ona fesoasoani i tamaiti o loo e aoaoina ia malamalama ai po o ai Iesu Keriso ma faatele ai lo latou alolofa mo Ia.

Gaoioiga e Mafai Ona Fai

• Faaali atu se ata o Iesu Keriso, ma fai atu i tamaiti e faasoa mai pe aisea latou te alolofa ai ia Iesu. Filifili ni nai fuaitau mai le Mataupu Faavae ma Feagaiga 60–62 o loo aoao ai oe e uiga i le Faaola, ma faasoa atu i tamaiti (tagai, mo se faataitaiga, Mataupu Faavae ma Feagaiga 60:4; 61:1–2, 36; 62:1). Fesoasoani i tamaiti latou te toe tauina mai faatasi ma oe ia fuaitau? Faasoa atu ou lagona e uiga ia Iesu Keriso.

• Faaali atu ni nai ata o Iesu mai Ana auaunaga i le lalolagi (tagai Tusi Ata o le Talalelei, nu. 34–61). Tuu atu i tamaiti e fesoasoani ia te oe e faamatala mai mea o loo faia e Iesu i ata. O faapefea ona Ia faaalia Lona alofa mo fanau a le Tama Faalelagi? Tau atu i tamaiti e uiga i se tasi o mau e te fiafia i ai o loo aoao mai ia i tatou e uiga ia Iesu.

• Usu faatasi ma tamaiti le pese “O Loo Ou Taumafai e Avea e Pei o Iesu” (Tusipese a Tamaiti, 40–41; tagai foi i le vitio o le musika e mafai ona usu mai ai i luga o le ChurchofJesusChrist.org). Ao e pese e uiga i auala e avea ai e pei o Iesu, fai ma taofi ma fesili i tamaiti e faauma le fuaiupu “E mafai ona ou faapei o Iesu e ala i le …”

  o le Faaola toetu

  O Le Faamoemoega Lenei Ua Ou Sau Ai, saunia e Yongsung Kim

Mataupu Faavae ma Feagaiga 62:3

E finagalo Iesu Keriso ou te faasoa atu Lana talalelei.

E fiafia tamaiti e faasoa atu i isi mea latou te iloa. Fesoasoani ia latou malamalama pe a latou faasoa atu mea latou te iloa e uiga i le talalelei, e fiafia le Tama Faalelagi ia i latou.

Gaoioiga e Mafai Ona Fai

• Faamalamalama atu, na fetalai atu le Alii i le Perofeta o Iosefa Samita ma isi taitai o le Ekalesia e faimalaga mai Katelani, Ohaio, e agai atu i le Itumalo o Siakisone, Misuri. Na Ia fai atu ia i latou e talai atu le talalelei i le ala ma pe a latou toe foi mai i o latou fale. Faitau le Mataupu Faavae ma Feagaiga 62:3, ma fai atu i tamaiti e faalogologo mo le mea na faia e faifeautalai lea na fiafia ai le Alii. Molimau atu e fiafia le Alii ia i tatou pe a tatou faasoa atu le talalelei i isi.

• Fesoasoani i tamaiti e fai ni pine e faaalia ai lo latou mananao e avea ma faifeautalai o le Ekalesia. Tuu atu ia i latou e fai a latou pine ma faataitai le faasoa atu o a latou molimau i le tasi ma le isi.

• Usu faatasi se pese e faatatau i le faasoaina o le talalelei, e pei o le “Ou Te Fia Avea Nei Ma Faifeautalai” (Tusipese a Tamaiti, 90). Fesoasoani i tamaiti e mafaufau i se tala e mafai ona latou tali atu ai pe a fesili mai se tasi po o le a le mea latou te fiafia ai e uiga ia Iesu Keriso ma Lana Ekalesia. Fai atu ia i latou e tusi ni ata o mea latou te fiafia i ai e uiga i le talalelei a Keriso.

aikona o le aoao atu

Aoao atu le Aoaoga Faavae: Tamaiti Matutua

Mataupu Faavae ma Feagaiga 60:7, 13; 62:3, 9

E mafai ona ou tatalaina lo’u gutu e faasoa atu ai le talalelei a Iesu Keriso.

O le molimau a se tamaitiiti e mafai ona mamana e pei o le molimau a se tagata matua, aua o le mana o le molimau e le sau mai le matua o le tagata po o aafiaga ae mai le Agaga Paia. Fesoasoani i tamaiti ia maua le lototele ina ia mafai ona matala o latou gutu ma faasoa atu i isi mea ua latou iloa e moni.

Gaoioiga e Mafai Ona Fai

• O a faamanuiaga na folafola mai e le Alii i le Mataupu Faavae ma Feagaiga 60:7; 62:3, 9 ia i latou o e faasoa atu Lana talalelei? E faapefea e le faasoaina atu o le talalelei ona faamanuiaina ai isi? Mafaufau e faasoa atu se aafiaga mai lou olaga i se taimi na e faasoa atu ai le talalelei—o a ni faamanuiaga na maua mai i au taumafaiga? Valaaulia tamaiti e faasoa mai soo se aafiaga sa latou oo i ai. E mafai foi ona outou usuina se pese e uiga i le galuega faafaifeautalai, e pei o le “Tala‘i Atu o Iesu” (Viiga, nu.168), ma talanoa e uiga i faamanuiaga o loo ta’ua i le pese.

• Fesoasoani i tamaiti e faatino ni tulaga latou te ono faasoa atu ai le talalelei ia latou uo. Mo se faataitaiga, o le a se latou tala pe a fesili atu se tasi pe aisea latou te o ai i le lotu? Pe faapefea pe a vaaia e se uo i latou o mamaina se mama FMT pe o faitauina le Tusi a Mamona ma fesili ai? O le a sa latou tala e fai atu i ai?

Mataupu Faavae ma Feagaiga 60:7; 61:1–2, 36; 62:1

O loo naunau le Alii e faamagalo a’u pe a ou salamo.

Sa lei atoatoa Iosefa Samita ma isi taitai o le Ekalesia. O isi taimi sa latou tauaimisa ma lē lava le onosai (tagai “Ezra Booth and Isaac Morley,” Revelations in Context, 133). Ae na alofa pea le Alii ia i latou ma ofo atu i taimi uma le faamagaloga o a latou agasala pe afai latou te salamo.

Gaoioiga e Mafai Ona Fai

• Faitau ma tamaiti le Mataupu Faavae ma Feagaiga 60:7; 61:2, ma fai atu ia i latou e sue ni upu e tutusa i nei fuaiupu. Faamanatu atu i tamaiti o nei faaaliga na tuuina atu ia Iosefa Samita ma isi taitai o le Ekalesia. O le a le mea na finagalo le Alii latou te iloa? O le a se mea ua tatou aoaoina mai nei fuaiupu e uiga i lagona o le Faaola ia i tatou pe a tatou faia ni mea sese?

• Tusi E faapeī Iesu Keriso? luga o le laupapa. Faitau faatasi le Mataupu Faavae ma Feagaiga 61:1–2, 36; 62:1, ma fai se lisi o tali i lenei fesili e maua e tamaiti i totonu o nei fuaiupu. E faapefea ona fesoasoani uiga o loo i le laupapa ia i tatou ia malamalama pe aisea e naunau ai le Faaola e faamagalo i tatou? O a ni auala e mafai ona tatou mulimuli ai i Lana faataitaiga?

Mataupu Faavae ma Feagaiga 60:5; 61:22; 62:5–8

E finagalo le Alii ou te faaaogaina lo’u faitalia ma Lona Agaga e fai ai filifiliga lelei.

E faapefea ona e faaaogaina nei fuaiupu e aoao ai tamaiti i le auala e fesoasoani mai ai le Alii ia i latou e fai ni filifiliga lelei?

Gaoioiga e Mafai Ona Fai

• Fai i tamaiti e talanoa e uiga i se taimi sa tatau ai ona latou faia se filifiliga. Na faapefea ona latou filifili po o le a le mea e fai? Faitau faatasi le Mataupu Faavae ma Feagaiga 62:5, 7–8 e aoao ai pe o le a le saunoaga a le Alii i toeaiina ia na sauni e malaga mai Misuri i Katelani, Ohaio. O a ni filifiliga sa tatau ona latou faia e uiga i le latou faigamalaga? O a mea ua tuuina mai e le Atua ia i tatou e fesoasoani tatou te faia ai filifiliga? Tau atu i tamaiti pe na faapefea ona e faaaogaina le taitaiga o le Agaga ma lou lava faamasinoga sili ona lelei e fai ai filifiliga.

• Vaevae le vasega i ni vaega se tolu, ma fai atu i vaega taitasi e faitau fuaiupu nei, lea na faatonuina ai e le Alii nisi o faifeautalai e faatatau i le ala e faataunuu ai a latou misiona: Mataupu Faavae ma Feagaiga 60:5; 61:22; 62:5. O le a se mea tatou te iloa mai faatonuga a le Faaola i nei fuaiupu? Aisea e lelei ai mo i tatou i nisi taimi le faaaoga o le tatou lava faamasinoga nai lo o le faatalitali mo faatonuga faapitoa mai le Atua i mea uma lava?

aikona o le aoaoina

Fautuaina le Aoaoina i le Aiga

Valaaulia tamaiti e faataitai le faasoaina atu o le talalelei ma se tagata o lona aiga. Mo se faataitaiga, e mafai ona latou faasoa atu se mea na latou aoaoina i le Peraimeri.

Faaleleia o Lo Tatou Aoao Atu

Tuu atu lau molimau i lau vasega. O le faasoaina o lou molimau o le a fesoasoani i tamaiti o loo e aoaoina e maua ai a latou lava molimau. E mafai ona faigofie se molimau e pei o le “Ou te iloa e alofa le Tama Faalelagi ia te outou taitoatasi” po o le “Ou te lagona lava le fiafia o lo’u loto pe a ou aoao e uiga ia Iesu Keriso.”

itulau o gaoioiga: E mafai ona ou faasoa atu le talalelei