“Nobembwa 30–Ritembwa 6. Moronaai 1–6: ‘Bwa a na Waaki n te Kawai ae Eti,’” Nakomai, Iriirai—Ibukin te Moanrinan: 2020 (2020)
“Nobembwa 30–Ritembwa 6. Moronaai 1–6,” Nakomai, Iriirai—Ibukin te Moanrinan: 2020
Minerva Teichert (1888–1976), Aramwa e Karaoa te Bwabetito inanon Ranin Moomon, 1949–1951, te oera iaon te mitionaite, 35⅞ x 48 intiti. Brigham Young University Museum of Art, 1969
Nobembwa 30–Ritembwa 6
Moronaai 1–6
“Bwa a na Waaki n te Kawai ae Eti”
Imwain ae ko waaki ni bairei waaki ni kakukurei n anga reirei ibukiia ataei, tataro mwaaka ni kamatebwaia Moronaai 1–6, n taratarai reirei ao kiibu ake ko namakinna bwa ko riai n ota iai.
Korei Am Namakin
Kaoa te Tibwatibwa
Kaoiia ataei bwa a na tibwa te bwai are a reiakinna iroun Moronaai. Ko kona ni kabongan “Mwakoro 53: Moronaai ao Ana Reirei” (Karaki man Ana Boki Moomon, 154–55, ke te witeo are e irekereke ma ngaia iaon ChurchofJesusChrist.org) ni buokiia bwa a na uringnga.
Reirei te Reirei: Ataei aika a Uarereke
I kana te toa ni kaotia bwa I uringa Iesu Kristo n tainako.
Te toa e kona n riki bwa te bwai ae rinanon te maiu n tamnei—riki ibukiia ataei aika a uarereke. Ko na kanga ni buokiia ataei ake ko reireiniia ni kabongana tain te toa n iangoa iai Iesu?
Waaki ni Kakukurei aika a Kona ni Karaoaki
-
Kaota tamneia aomata aika a kana te toa (taraa Bokin Tamnein te Euangkerio, nambwa. 108). Tuangiia ataei bwa a na tuangko te bwai ae riki n tain te toa. Tera ae ti riai ni karaoia n tain te toa?
-
Kaoiia uoman kain te uoote bwa a na roko ni wareka Moronaai 4:3 ao 5:2 nakoia ataei ao n tibwaia bwa bukin tere a anaa te toa ni katoa wiiki. Tuangiia bwa a na taekin bwaai ake a kona ni karaoi ataei ni buokiia n iangoa Iesu n tain te toa ao n uringnga n tainako.
-
Anenea te kuna are e buokiia ataei n iangoa Iesu, n aron “Reverently, Quietly” (Aia Boki n Anene Ataei, 26). Tuangiia ataei bwa a na kataneiai n tekateka ni karinerine n aron are a na karaoia n tain te toa.
I kona ni katauraoi nakon te bwabetito.
Ana kabwarabwara Moronaai iaoia aomata ake a bwabetitoaki n ana bong a kona ni buokiia ataei ni katauraoi ni butimwaea te otenanti ae kakaawaki aei n te bong aei.
Waaki ni Kakukurei aika a Kona ni Karaoaki
-
Wareki kiibu man Moronaai 6:1–3 are e taekinna bwa antai aika a kona ni bwabetitoaki. Kabwarabwarai taeka ake a kona n aki oota iai ataei. Te katoto, teuana nanon “te nano ae uruaki ao te tamnei ae raraoma” bon namakinan te raraoma ibukin ara bure (Moronaai 6:2). Karakina arom ni katauraoi ngke ko bwabetitoaki, ke tuanga temanna ae e a tibwa bwabetitoaki bwa e na kabwarabwara bwa e kanga teuanne ke neienne ni katauraoi. Buokiia ataei n iangoi kawai ake a kona iai ni katauraoi bwa a na bwabetitoaki n te bong teuana.
-
Katekei tamneia aomata ngke a bwabetitoaki (taraa Bokin Tamnein te Euangkerio, nambwa. 103, 104), ao anganiia ataei bwa a na taetae iaon te bwai are a nooria n te tamnei. Buokiia bwa a na atai kabwarabwaraia, n aron te ran ao te kunnikai mainaina. Titirakiniia ataei bwa bukin tera ngkai a bwabetitoaki, ao kabwarabwara bukin tera ko rineia bwa ko na bwabetitoaki.
I kakabwaiaki ngkana I nako n taromauri.
A oota ataei ake ko reireiniia bwa bukin tera ti nako n taromauri ni katoa wiiki? Moronaai 6 e anga tabeua bukina aika a kakaawaki.
Waaki ni Kakukurei aika a Kona ni Karaoaki
-
Titirakiniia bwa bukin tera ngkai a nako n taromauri, ao buokiia n taekini bwaai ake ti karaoi n te taromauri. Warekia nakoia tabeua bwaai man Moronaai 6:4–6, 9, ao kaoiia bwa a na karaoia n te kaotioti ke ni korei tamneia ngke a karaoi bwaai tabeua man bwaai aikai (n aron te tataro, kabwarabwara, anene, ao kanakin te toa).
-
Buokiia ataei n anenei kuuna iaon irakin te taromauri, n aron “When I Go to Church” (Aia Boki n Anene Ataei, 157). Tuangiia ataei bukina ngkai ko tatangiria n nako n taromauri ao e kanga ni kakabwaiako.
Reirei te Reirei: Ataei aika a Ikawai
Te Tamnei ae Raoiroi bon te bwaintangira ae tabu.
Te Tamnei ae Raoiroi e taekinaki tabeua te tai n Moronaai 2–6. Ko na kanga ni kabonganai mwakoro aikai ni buokiia ataei n oota n aron te Tamnei ae Raoiroi ni kona ni buokiia?
Waaki ni Kakukurei aika a Kona ni Karaoaki
-
Tuangiia ataei bwa a na kakaai kibu n Moronaai 2–6 are e taekinaki iai te Tamnei ae Raoiroi ke te Tamnei. Wareki kiibu nako aikai ni bootaki, ao tuangiia ataei bwa a na korei rinanin bwaai ake a reiakin iaon te Tamnei ae Raoiroi. E na kanga te Tamnei ae Raoiroi ni buokiira?
-
Tuangiia ataei taekan te tai are ko namakina iai ana wirikiriki te Tamnei ae Raoiroi, tao n te taromauri ke n te tabo teuana. Kabwarabwara bwa ko kanga n ataia bwa te Tamnei ae Raoiroi ao e kanga ni buokiko. Kaoiia ataei bwa a na tibwai bwaai ake a tia n rinanona ma te Tamnei ae Raoiroi, ao kaungaia bwa a na ukoukora Ana wirikiriki.
Tamneite ataeinnaine ae karekea te kakabwaiaTe bwaintangira n te Tamnei ae Raoiroi e karekeaki rinanon te katokabai.
I anaa te toa ni kaotia bwa I ururinga Iesu Kristo n tainako.
Ngkana a oota ni kakawakin te toa ataei, a na bon karaoia ma te karinerine ao n namakinna bwa a kaan riki nakon te Atua inanon karaoakin te otenanti aei.
Waaki ni Kakukurei aika a Kona ni Karaoaki
-
Korei kibuntaeka man Moronaai 4:3 ao 5:2 iaon beeba aika kaokoro, ao tuangiia ataei bwa a na katukui kibuntaeka ni nneia ae eti. Ni kaineti ma kiibu aikai, bukin tera e kakaawaki te toa?
-
Kaoiia ataei bwa a na iangoia bwa raraoia e roko n tain te bootaki n toa n te moan tai. A na kanga ni kabwarabwara nakon raraoia bwa teraa te toa ao bukin tera ngkai ti kanna? Kaungaia bwa a na kabongana Moronaai 4:3 ao 5:2 n aia kabwarabwara.
-
Kaoiia ataei bwa a na tibwai bwaai ake a karaoi aia utu n taini te toa bwa a na karinerine ao n iangoa Iesu Kristo. Tera riki iango aika iai irouia? Kaoiia bwa a na anaa teuana man iango aikai ao ni katea aia kouru bwa a na kabanea riki aia tai n iangoa te Tia Kamaiu n tain te toa.
Ti nako n taromauri n anaa te toa ao ni boutokaira imarenara.
Ana taeka Moronaai a kona ni buokiia ataei ake ko reireiniia ni karekea te kantaninga ae korakora riki n rorokoia n taromauri ni katoa wiiki.
Waaki ni Kakukurei aika a Kona ni Karaoaki
-
Koreia Bukin tera ngkai ti roko n taromauri? iaon te burakibooti, ao tuangiia ataei bwa a na korei kaekaaia ake a kona. Kaoiia bwa a na karekei raon riki kaekaaia n Moronaai 6:4–6, 9 ao karinii nakon aia rinan iaon te burakibooti. Kaoiia ataei bwa a na tibwaia bwa a kanga n tia ni kakabwaiaki ibukin irakin te taromauri. Anganiia bwa a na karaoa te kaotioti nakoia raraoia ake man te aro teuana bukina ngkai a kakaitau ngkai a kaaina te Ekaretia.
-
Kaoti tamnein ke katoto n amwarake aika boongana. Bukin tera e kakawaki bwa ti na kamwarakei rabwatara? Ikotaki ni wareka Moronaai 6:4, ao tuangiia ataei bwa tera n aia iango ae nanonaki n te kibuntaeka “kamwarakeaki n ana taeka aika raraoi te Atua”. E kanga ni kanuaira ana taeka te Atua?
-
Kaoa temanna te ataei bwa e na wareka ana taeka Unimwaane Jeffrey R. Holland, ao maroroakinna bwa tera ae reirei iaona ao e kanga ni kamwarakeira n tatabemaniira: “Angiina aomata a aki nako n taromauri n ti taratarai koaua tabeua n te euangkerio ae boou ke n nooria raraoia ake ngkoa, e ngae ngke ni kabane a bon bane ni kakaawaki. A roko ni karekei atatai n te maiu n tamnei. A tangira te rau. A tangira aia onimaki bwa e na raka riki ao aia onimaki bwa e na kaboouaki. A tangiria, ni kauarerekeana, ni kamwarakeaki n ana taeka aika raraoi te Atua, ni kakorakoraaki man mwaakan karawa” (“A Teacher Come from God,” Ensign, Meei 1998, 26). Ti na kanga ni buoka maiuraoin tamneira imarenara n te taromauri?
Kaungaa te Kamatebwai n te Mweenga
Kaungaia ataei bwa a na taetae nakoia aia utu ibukina ngkai a tangiria n ira te taromauri ni katoa wiiki.
Kanakoraoan Ara Anga reirei
Boutokaia kaaro. Tataro mwaaka ni kakaai kawai ni boutokaia aia karo ataei ake ko reireiniia. Ko na kanga ni boutoka aia mwakuri n reirei te euangkerio nakoia natiia? Te katoto, ko kona n taetae nakoia kaaro ibukin kainnanoia ao mamaten nanoia natiia ke n tibwaia ma ngaiia te bwai are a reiakinna ataei n te kiraati (taraa Reirei n ana Kawai te Tia Kamaiu, 25).