“Nobembwa 23–29. Ita 12-15: ‘N te Onimaki ao A na Kakoroaki Bwaai ni Kabane,’” Nakomai, Iriirai—Ibukin te Moanrinan: Ana Boki Moomon 2020 (2020)
“Nobembwa 23–29. Ita 12–15,” Nakomai, Iriirai—Ibukin te Moanrinan 2020
Ita ngke e Karaba n te Nanganga, iroun Gary Ernest Smith
Nobembwa 23–29
Ita 12–15
“N te Onimaki ao A na Kakoroaki Bwaai ni Kabane”
Ngkai ko wareka Ita 12–15, iangoia ataei ake ko reireiniia. Iango ake a kaotaki ni waaki ni kakukurei aei a kona ni kaungako ma iango tabeua ake a na buokiko ni karekei kainnaoia ataein am kiraati.
Korei Am Namakin
Kaoa te Tibwatibwa
Buokiia ataei bwa a na iangoi karaki man koroboki aika a tabu irouia aomata ake a kaota te onimaki ae korakora. Tabeua katoto a reke n Ita 12:11–22.
Reirei te Reirei: Ataei aika a Uarereke
Te onimaki bon kakoauan bwaai aika ti aki kona n noori.
Moronaai e tibwai tabeua katoto irouia aomata ake a tia ni karaoi bwai aika a korakora ibukin aia onimaki. Iangoia bwa kona kanga ni kona ni kabonganai katoto aikai n reireiniia ataei tera ae nanonaki n te onimaki.
Waaki ni Kakukurei aika a Kona ni Karaoaki
-
Warekia nakoia ataei “Te onimaki bon bwaai aika a kantaaningaki ma aki nooraki” man Ita 12:6, ao tuangiia bwa a na kaokioka te kibuntaeka anne ma ngkoe. Tuangiia ataei taekan bwaai ake ko kakoauai e ngae ngke ko aki kona n noori, ao buokiia bwa a na iangoi raon riki katoto. Te kuna “Faith” (Aia Boki n Anene Ataei, 96–97), ke te kuna teuana n taekan te onimaki, e kona n ibuobuoki.
-
Kaoti tamnei ake a kaota bannan te katoto n te onimaki n Ita 12:13–15, 20–21 (taraa Bokin Tamnein te Euangkerio, nos. 78, 85, ao iteraniba n te waaki ni kakukurei n te wiiki aei). Anganiia ataei bwa a na tuangko bwaai ake a noori n te tamnei ao tera are a ataia man karaki akanne. Taetae ma te ataei n aroia tekoraki aikai ni kaota te onimaki ao te bwai ae e a tia n riki ibukin aia onimaki.
-
Takakaro n te takakaro ni kekeeti ma ataei. Anganiia kairan aia iango iaoia aomata aika kakaonimaki ake a kabwarabwaraaki n Ita 12:13–15, 19–20 ni karokoa a kona ataei ni keeti bwa antai ngaiia. Ngkanne anganiia ataei bwa a na takakaro riki n onomwi ni kairan te iango iaoia aomata naba akekei (ke aomata tabeman aika a kakaonimaki) ngkai nikiraia kain te kiraati a keeti. Tibwa te bwai ae ko mataiakinna n aia onimaki aomata aikai.
Iesu Kristo e kona ni buokai bwa N na korakora.
Ataei n tabetai a kaitarai taai ake a namakina te mamara iai, n ai aron Moronaai. Buokiia n reiakina te bwai are e reiakinna Moronaai—are e kona ni karaoi te Tia Kamaiu “baika mamaara bwa a na riki bwa korakoraia” (Ita 12:27).
Waaki ni Kakukurei aika a Kona ni Karaoaki
-
Kabwarabwara ibukiia ataei te mwakuri are e kainnanoa marurungin te rabwata bwa e na katiaaki iai. Kaoiia bwa a na tibwai katotoon bwaai ake a aki rangi ni korakora ni karaoi ngkai. Ti na kanga ni kona ni korakora ni katiai tibwanga aikai? Kabwarabwara bwa iai naba ara mwakuri n te maiu n tamnei ake tina karaoi, ma n tabetai ti namakina te mamaara n te maiu n tamnei. Moronaai e namakina aei ibukin ana koroboki iaon bwaatua. Wareka Ita 12:27 nakoia ataei. Tera ae e berita iai te Uea nakoia ake a namakina te kainnano?
-
Tibwa te bwai are ko rinanona are e a tia iai ni buokiko te Tia Kamaiu ke temanna ae ko kina ae matoatoa. Kakoaua nakoia ataei bwa ngkana a ukoukora Ana ibuobuoki, Iesu e kona ni buokiia bwa a na korakora, riki ngkana a namakina te mamaara.
Reirei te Reirei: Ataei aika a Ikawai
Te onimaki bon kakoauan bwaai ake ti aki noori.
Ataei ake ko reireiniia a katea aan aia koaua. Ana reirei Moronaai iaon te onimaki, e reke n Ita 12:6, e kona ni buokiia.
Waaki ni Kakukurei aika a Kona ni Karaoaki
-
Kabwarabwara bwa te burabeti Ita e kataia n reireiniia Iaretaite “bwaai aika korakora ma ni moan te kamimi,” ma a aki kakoaua te bwai are e taku. Kaoiia ataei bwa a na wareka Ita 12:5 ni kakaea bwa bukin tera aki kakoaua. Baikara bwaai tabeua ake e tangiriira Tamara are i Karawa bwa ti na kakoaua e ngae ngke ti aki noori? Ikotaki wareka Ita 12:6. Tera ae e reireiniia aomata Moronaai ake a bon aki kakoaua koauan te maiu n tamnei ibukina bwa aki noori?
-
Kaota te tamnei nakon te teei temanna n aki anganiia ataei ake tabeman bwa a na nooria, ao tuanga te teei bwa e na kabwarabwara te tamnei nakoia kain te kiraati. Ngkana e abwabwaki te tai, anganiia ataei tabeman bwa e na karaoa are e karaoaki mai imwaina ma te tamnei ae kaokoro. Ngkanne kaoiia bwa a na wareka Ita 12:6 ao kakaea te kibu aei: “te onimaki bon bwaai aika a kantaaningaki ma aki nooraki.” Ti na kanga ni kaota onimakinan Iesu Kristo ngkana ti aki nooria?
-
Tuangiia ataei bwa a na wareka te kibu aei n Ita 12:6: “Kam bon aki kona ni karekea te bwai ni kakoaua ni karokoa ae e kataki moa ami onimaki.” Buokiia ataei bwa a na ota bwa ngkana ti ongotaeka nakon te tua, ti kona n ataia bwa e bon koaua. Tuangiia bwa a na iangoa reirein te euangkerio are e tangiriira te Atua bwa tina kareka ara koaua iai, n aron kabwakaan te kabwianibwai, katabuan te bong ae te Tabati, ke maiuakinan Taeka ni Wanawana. Ngkanne koreia iaon te burakibooti Ni karekea moa te kakoaua n te bwai teuana , I riai . Tibwaia bwa ko kanga ni kamwakura am onimaki bwa ko aonga ni karekea am kakoaua ni bwaai ao ni koauan tabeua te euangkerio.
Te onimaki kaanga ai aron ana angka tamneiu.
Buokiia ataei ake ko reireiniia bwa a na ota bwa ti kona n “kantaninga te aonaaba ae tamaroa riki” ibukin ara onimaki iroun Kristo (Ita 12:4).
Waaki ni Kakukurei aika a Kona ni Karaoaki
-
Tibwaia ma ataei kabwarabwaraan te kantaninga are e kuneaki n “Hope” (Guide to the Scriptures, scriptures.ChurchofJesusChrist.org). Ni kaineti ma te kabwarabwara aei ao Ita 12:4, 32, tera ae ti riai ni kantaningaia? (taraa naba Moronaai 7:40–42). Buokiia ataei n iangoi taeka tabeua bwa kantaninga, n reitaki ma taeka ake a nanona kaitaraan kantaninga. Tibwaia ma ngaiia tabeua koaua n te euangkerio are e anganiko te kantaninga, ao ni kaoiia bwa a na karaoa naba anne.
-
Kaota (ke koreia iaon te burakibooti) tamnein te booti ao te angka. Bukin tera a kainnanoi angka taian booti? Tera ae e na riki nakon te booti are akea ana angka? Ikotaki wareka Ita 12:4, ao titirakiniia ataei bwa e kanga te kantaninga n riki bwa te angka. Kaoiia ataei bwa a na korei aia tamnei n tamnein te booti ao te angka bwa a aonga n reireiniia aia utu taekan te kantaninga.
Iesu Kristo e kona ni buokiira bwa tina korakora.
Ngkai a ikawai riki ataei, a kona riki n atai mamaaraia. Kabonganai kiibu aikai n reireiniia bwa e kanga te Tia Kamaiu ni kona ni karaoi “karaoi baika mamaara bwa a na riki bwa korakoraia” (Ita 12:27).
Waaki ni Kakukurei aika a Kona ni Karaoaki
-
Tuangiia ataei bwa a na wareka Ita 12:23–25 bwa a na kakaea bwa bukin tera e tabeaianga Moronaai. Titirakiniia ngkana a tia naba ni karekea te namakin ae aron aei. Ngkanne kaoiia bwa a na wareki kibu 26–27 ni kakaea bwa e kanga te Uea ni kaungaa Moronaai. Tera ae ti kainnanoia bwa tina kona ni karaoi bwa e aonga te Uea ni kona ni buokiira bwa tina korakora ngkana ti namakina te mamaara? Tibwa te bwai ae koa tia n rinanona ngke te Tia Kamaiu e buokiko bwa ko na korakora ni kona ni karaoi bwaai aika a matoatoa.
-
Kaoiia ataei bwa a na korea tamnein te bwai ae mamaara ao te bwai ae korakora. Ngkanne kaoiia bwa a na ikota aia tamnei ma taeka tabeua ao kibuntaeka man Ita 12:23–29 are e reireiniia aron te Tia Kamaiu ni kona ni buokiira ni bita te mamaara nakon te korakora. Kaungaia ataei bwa ana iangoa te mamaara are irouia ao ngkanne a na ukoukora ana ibuobuoki te Tia Kamaiu bwa a na korakora.
Kaungaa te Kamatebwai n te Mweenga
Kaoiia ataei bwa a na korea te koaua are a tangiria ni karekea aia koaua iai. Buokiia ni katea aia kouru bwa a na kamwakura te onimaki bwa a aonga ni karekea te kakoaua n te koaua anne.
Kanakoraoan Ara Anga reirei
Ukoukoria bwa kona matata irouia ataei ake ko reireiniia. “Taratarai kawai ake kona ata iai aia baekuraun, mamaten nanoia, aia tarena, ao kainnanoia [ataei] ake ko reireiniia. Anga titiraki, kakauongo raoi, ao kamwataua te bwai are a taekinna taan reireinaki ao bwaai aika a karaoi n aro aika a kakaokoro. … Titirakiniia aia karo ibukin aia iango. I aoia ni kabane, tataro ibukin te atatai are tii te Tamnei ae e kona n anga” (Reirei n Ana Kawai te Tia Kamaiu, 7).