Aia bwaati Iaretaite iaon te ran

N na Manga Uotikorake mai Kabikabi, iroun Jonathan Arthur Clarke

Nobembwa 16–22

Ita 6–11

“Bwa E Aonga n Toki te Buakaka”

Iango aika a koreaki tiaki kaetieti aika ko riai n irii. A kananonaaki bwa a na kauka am kario iango ao ni kaoa te kaunganano.

Korei Am Namakin

te aikaon ibukin te tibwatibwa

Kaoa te Tibwatibwa

Kabonganai tamnei man te wiiki aei ao kamataata n te wiiki ae nako n Nakomai, Iriirai— Ibukiia Aomata n Tatabemaniia ao Utu ni buokiia ataei n rinanon bwaai ake a tia n reiakin iaoia Iaretaite ngke a rinuukan taari. Anganiia bwa a na onomwi n tibwai bwaai ake a atai.

te aikaon ibukin te anga reirei

Reirei te Reirei: Ataei aika a Uarereke

Ita 6:2–12

Tamara arei Karawa e kona ni karaua nanou ngkana I maaku.

E bon bae ni kakamaaku irouia Iaretaite ni “kibakiba rake i aon taian nao i mwain te ang” (Ita 6:5). Ma te Uea e kamanoia ao e buokiia. Ko na kanga ni buokiia ataei n rairaki nakon te Uea ngkana a namakina te maaku?

Waaki ni Kakukurei aika a Kona ni Karaoaki

• Kabonganai taeka ao kibuntaeka man Ita 6:2–12, kabwarabwara nakoia ataei aron mwanangaia Iaretaite n rinuukan te ran. Kaoiia ataei bwa angkoa are a tamwarake iaon te bwaati ao angkoa aia bwaati e tabe ni buti ao e rabunaki n te nao. Tera am namakin ngkana ko a mena iaon te bwaati inanon te ran ae buaka? Tera ae ti kona ni karaoia ngkana ti maaku? Ikotaki wareki kibu 7 ao 9 n nooria bwa tera ae a karaoia Iaretaite ngke a maaku.

• Karakina te tai are ngke koa maaku ao Tamara are i Karawa e karaua nanom. Tibwaia ma ataei te kuna n taromauri ke te anene are e buokiko “ni karabwaa man neboa te Uea” (Ita 6:9) ibukin Ana ibuobuoki. Anganiia ataei bwa a na tibwa kunan te Moanrinan ae a tatangiria, ao n anenei tabeua mai ibuakoia n ikotaki.

• Kabongana te iteraniba ni waaki ni kakukurei n te wiiki aei ni buokiia ataei ni karaoi bwaati man beeba. Kabwarabwara bwa te bwaati e buokiia Iaretaire ni kamanoia ngke a katobibiaki n te ran (taraa Ita 6:7, 10). Tera ae e a tia n anganiira Tamara are i Karawa bwa ti na kawakinaki iaon kawaira n oki NakoIna?

Ita 6:9, 12, 30; 7:27; 10:2

I kona ni karabwarabwa.

Imwiin rokoia ma te kamanoaki n te aba ni berita, Iaretaite a rangi ni kakaitau n te aro are a “bwaro ranin mataia ibukin te kimwareirei ” (Ita 6:12). Ko na kanga ni kaungaa te tamnei ni kakaitau inanoia ataei ake ko reireiniia?

Waaki ni Kakukurei aika a Kona ni Karaoaki

• Wareki nakoia ataei kibuntaeka man Ita 6:9 ao 12 n reireiniia aroia Iaretaite ni kaota aia kakaitau nakon te Uea ibukin buokakiia ni karokoaia n te aba ni berita. Tuangiia ataei bwa a na taekin bwaai tabeua ake a karabwarabwa ibukina. Ikotaki anene, n aron are a karaoia Iaretaite, te kuna are e kaota aia kakaitau, n aron “I Thank Thee, Dear Father” (aia Boki n Anene Ataei, 7).

• Warekia nakoia ataei Ita 10:2 ni kaotia bwa e ngae ngke inanon ririki ake imwiina, Iaretaite a uringa aron te Uea are e a tia ni buokiia iai aia bakatibu n rinuukan te nama. Buokiia ataei bwa a na iangoi kawai are e a tia iai ni kakabwaiaia te Uea. Ngkanne anganiia ataei bwa a na korei tamnei ni kauringiia ni kakabwaia aikai (ke buokiia n rinei man tamnei tabeua ake ko uoti, tao man ana maekatiin te Ekaretia).

Ita 7:24–27

I kakabwaiaaki ngkana I iriira te burabeti.

Ana boki Ita e kamatata bwa ngke a iriira te burabeti Iaretaite, a bon kakabwaiaki, ao ngke a totokoa te burabeti, maiuia e na bon kaangaanga. Iangoi kawai ake ko kona iai ni buokiia ataei n nooria bwa aei naba e koaua nakoira.

Waaki ni Kakukurei aika a Kona ni Karaoaki

• Kaota tamnein te burabeti ae maiu, ao tuangiia ataei bwa tera rongorongona ae a ataia. Tera ae e karaoia te burabeti? Kabwarabwara bwa Iaretaite iai naba aia burabeti, ao n te tai are a iriira iai te burabeti, a bon kakabwaiaki ao a kukurei (taraa Ita 7:24–27). Ti na kanga n iriira te burabeti?

• Ikotaki anenea kunan te burabeti, n aron “Follow the Prophet” (Aia boki n anene Ataei, 110–11; taraa naba Bokin Tamnein te Euangkerio, nambwa. 4–27, 67–87). Marooro ma ataei n taekan bwaai ake e a tia n reireiniira te burabeti bwa ti na karaoi (te katoto, warekan ara boki aika a tabu ni katoabong, kawakinan te bong ae te Tabati ni katabua, ke ni buokiia tabeman), ao kaoiia bwa a na karaoa te kaotitoi n ongotaeka n te reirei anne ngkana ko kangai “Irira te burabeti!”

te aikaon ibukin te anga reirei

Reirei te Reirei: Ataei aika a Ikawai

Ita 6:2–12

I kona n onimakina Tamara are i Karawa bwa e na kairai nakon te maiu are akea tokina.

Rongorongon mwanangaia Iaretaite rinuukan te nama e kona ni kabotauaki nakon mwanangara n rinanon te maiu n rabwata. Mwananga n kauoua n tabetai a bon kakamaku ao ni kainnanoa te onimaki are te Uea e na kairiira ao ni kawakiniira.

Waaki ni Kakukurei aika a Kona ni Karaoaki

• Ikotaki wareka Ita 6:2–12, n toki tabeua te tai bwa aonga ataei ni korea tamnein te bwai are a warekia. E kanga mwanangaia Iaretaite n titebo ma maiura? Buokiia ataei ni kamatatai ao ni kanikinaai bwaai aika a kakaokoro man aia tamnei ake a kona n tei ibukin maiura. Te katoto, Iaretaite a kona n tei ibukira. Te bwaati a kona n tei ibukin mweengara, te Ekaretia, ke te euangkerio. Tera ae e kona n tei ibukin te ang, te ran, atibu ake a ota, ao te aba ni berita?

• Buokiia ataei ni kakai taeka ao kibuntaeka inanon Ita 6:2–12 anne e kaota aroia Iaretaite n onimakina te Atua. Tibwai katoto n aron ae e a tia ni buokiko iai te Atua ni katan irouna inanon am tai ni kaitarai kaangaanga inanon maium. Kaungaia ataei bwa a na tibwaua te bwai ae a rinanona ae aekakin naba aei.

  Iaretaite ngke a mwananga ma maan

  Mwanangaia Iaretaite n rinuukan Atia, iroun Minerva Teichert

Ita 6:30; 7:27; 10:2

Uringa te bwai are e a tia ni karaoia ibukiu te Uea are e uota te rau.

Teuana te bwai are kaokoroia aia uea Iaretaite mairouia aika a buakaka bon te uea ae e “uringii bwaai aika a korakora ake e a tia te Uea” ni karaoi ibukiia (Ita 7:27). Ko na kanga ni kaungaia ataei bwa a na uringa te bwai are e a tia ni karaoia te Uea ibukiia?

Waaki ni Kakukurei aika a Kona ni Karaoaki

• Tuangiia ataei bwa a na wareka Ita 6:30; 7:27; ao 10:2 n tatabemaniia ke n te kurubu ae uarereke ao ni kakaea te bwai are e okioki ni kibu aikai. Tibwaua am namakin iaon te bwai are e a tia ni karaoia te Uea ibukim, ao kaoiia ataei bwa a na karaoia naba.

• Tibwaia ma ataei arom are ko a tia ni kataia n uringii kawai ake e a tia ni kakabwaiako iai te Uea ma am utu. Buokiia ataei bwa a na iangoi kawai ake a kona ni kauringaki iai ni bwaai ake e a tia ni karaoi te Uea ibukiia. Anganiia ni katoaia n te mwakoro ni beeba, ao kaoiia bwa a na iangoi ao ni korea te bwai teuana are E a tia ni karaoia ibukiia ae e a tibwa riki. Tuangiia bwa a na karaoia bwa anuaia ni korei kakabwaia ake a ataia bwa mairoun te Uea (taraa “O Remember, Remember” [video, ChurchofJesusChrist.org]).

Ita 9:28–35; 11:5–8

E nanoanga te Uea ngkana I rairananou.

E ngae ngke Iaretaite n tabetai a tinanikuia burabeti ao a moanna ni buakaka, te Uea e kabwarai aia bure ngkana a nanorinano ao a rairinanoia.

Waaki ni Kakukurei aika a Kona ni Karaoaki

• Ikotaki wareka Ita 9:28–35, ao buokiia ataei bwa a na iangoi teniua ke aua tiententi are e kakimototoa te bwai are e riki ni kibu aikai. Ngkanne wareka Ita 11:5–8, ao buokiia ataei n atai bwaai aika titebo imarenan rongorongo aika uoua. Tera ae ti reiakinna man karaki aikai?

• Tuangiia atei bwa a na iangoia aomata tabeman n ana Boki Moomon ake a nanorinano ao a kabwaraaki aia bure. Kabonganai tamnei man Bokin Tamnein te Euangkerio ke Nakomai, Iriirai—Ibukiia Aomata n Tatabemaniia ao Utu ni buokiia bwa a na uringnga. Kaota am koaua bwa te Uea e kabwarai ara bure ngkana ti rairinanora ma nanora ni koaua.

te aikaon ibukin te kamatebwai

Kaungaa te Kamatebwai n te Mweenga

Kaoiia ataei bwa a na tibwaia ma aia utu te bwai are e a tia ni karaoia ibukiia Tamara are i Karawa are a kakaitau iai.

Kanakoraoan Ara Anga reirei

Buokiia ataei bwa a na kakau iango iaona. “Ngkai ko reireiniia ataei, anganiia bwa a na katei, korei, karani, ao ni karaoi bwaai. Bwaai aikai a nano riki nakon waaki ni kakukurei—bwaai aika a kakaawaki n reiakinaki” (Reirei n ana Kawai te Tia Kamaiu, 25).

te iteraniba ibukin waaki ni kakukurei: Tamara are i Karawa e buokiia Iaretaite ni katei taian bwaati