“Nobembwa 9–15. Ita 1–5: ‘Kam Raeuaka Rabunan te Ataibwai,’” Nakomai, Iriirai—Ibukiia Aomata n Tatabemaniia ao Utu: Book of Mormon 2020 (2020)
“Nobembwa 9–15. Ita 1-5,” Nakomai, Iriirai—Ibukiia Aomata n Tatabemaniia ao Utu: 2020
Taian Iaretaite a Kitana Babera, iroun Albin Veselka
Nobembwa 9–15
Ita 1–5
“Kam Raeuaka Rabunan te Ataibwai”
Ana boki Ita bon aia koroboki Iaretaite, ake a roko n te aba ni berita tienture imwaia Nibwaite. Te Atua e kaunga Moronaai bwa e na karin ana koroboki Ita inanon Ana Boki Moomon ibukin bonganaana n ara bong. Ko kanga n namakinna bwa e bongana ni maium?
Korei Am Namakin
Ngkai e bon koaua bwa a rietaata riki aron te Atua nakon nanora, ao ti riai n tainako ni kanakoi nakon Ana kantaninga, E kaungaira naba bwa ti na iango ao ni mwakuri i bon ibukira. Anne te reirei teuana are a reiakinna Iareta ma tarina. Te katooto, te iango ni mwananga nakon te aba ae boou bon “te aba riki ae rine iaon te aba ni kabuta” e taraa ni moanaki n ana iango Iareta, ao te Uea “ e nanoangaia” ao e berita bwa e na karekea te bubuti, n taekinna, “Ao N na karaoa aio nakoim ibukin maanin te tai are ko tang iai nakoiu” (taraa Ita 1:38–43). Ao ngke tarin Iareta a namakina te rotongitong inanon te kaibuke are e na uotiia nakon te aba ni berita, te Uea e kaoa bwa e na karaoa katokana, n titiraki te titiraki ae ti taneiai n Titirakinna: “Tera ae ko tangiria bwa N na karaoia?” (Ita 2:23). Te rongorongo e taraa n ae ti aki riai ni kantaningaa te Atua bwa E na tuangiira bwaai ni kabane. Ti aki kona n tibwauaia ma Ngaia ara kantaninga ao ara iango, ao E na kakauongo ao n anga Ana kamatoa ke e na reireiniira. N tabetai te bwai ae kamaenakoira man kakabwaia aika ti ukoukori bon oin ara “taratara n te aki koaua,” ao ngkana ti kona n “raeuaka rabunan te ataibwai” (Ita 4:15), ti na rangin n ni miimi n te bwai ae na karaoia te Uea ibukira.
Iango ibukin Oin Am Kamatebwai ni Koroboki Aika Tabu
Ngke I tang nakon te Uea, E na iai Ana nanoanga irou.
Ita 1:33–43 e taekin aia tataro tarin Iareta ake teniua. Tera ae ko reiakinna man ana kaeka te Uea nakon tataro aikai n tatabeua nako? Iangoa te tai ngke ko a tia n rinanon ana nanoanga te Uea ngke ko tang nakoina n te tataro. Ko na bae n tangiria ni koroi mwiin te taneiai aei ao n tibwauaia ma temanna ae kainnanoia ni kan ongora am koaua.
I kona ni karekea te kaotioti ibukin maiu.
E taku Beretitenti Russell M. Nelson: “I bubuti ma ngkami ni kakorakorai ami konabwai n tamnei ni karekea te kaotioti. … Rineia bwa ko na karaoa te mwakuri n tamnei ae kainnanoaki ni kakukureiko n ana bwaintituaraoi te Tamnei ae Raoiroi ao n ongo bwanaan te Tamnei n tainako ao n itiaki” (“Te Kaotioti ibukin te Ekaretia, Te Kaotioti ibukin Maiura,” Ensign ke Riaona, Meei 2018, 96).
Ngkana ko kamatebwaia Ita 2; 3:1–6; ao 4:7–15, tera koaua aika ko kunei aika a buokiko n ataia bwa ko na kanga n ukoukora am kaotioti? Ko kona ni mwakenna n teuana te kara titiraki ke tabeaiangan tarin Iareta ao tera ae karaoia ibukiia, ao n te kara riki teuana mwakenna bwa e kanga te Uea ni buokia ao ni karika Ana kantaninga bwa e na ataaki. Tera ae ana nanom n te kawai are a reitaki iai tarin Iareta ma te Uea, ao tera ae ko reiakinna man te bwai aei bwa ko na kanga ni karikirakea reken te kaotioti ni maium?
Te Uea e na katauraoai n rinanon au “marawa ae korakora.”
Ni karoko n te aba ni berita, a kaitara Iaretaite te kaangaanga ae korakora: n rinanon te “marawa ae korakora” (Ita 2:25). Te kibu n taeka “te marawa ae korakora” e kona n riki bwa kangaa te kawai ae nakoraoi ni kabwarabwaraa aron namakinan kataakira ao ara kakaewenako n tabetai. Ao n tabetai, n aron te kaangaanga ibukiia Iaretaite, n rinanon oin ara “marawa ae korakora” ti te kawai ni kakoroan nanon te Atua ibukira. Ko noori aekakin aikai inanon maium in Ita 2:16–25? E kanga te Uea ni katauraoiko ibukin am kakaewenako? Tera te bwai ae na titirakiniko bwa ko na karaoia ni katauraoiko ibukin te bwai ae E kainnanoiko bwa ko na karaoia n taai aika a na roko?
I karikaki ni katotongan te Atua.
Iaon Maungan Terem, tarin Iareta e reiakina ae bati ibukin te Atua ao bon ibukina. Tera ae ko reiakinna man Ita 3 ibukin aron te Atua n tamnei ao n rabwata? A kanga koaua aikai ni buokiko n atai arom mai ieta ao am konabwai?
Ngaira ni kabane bon natin te Atua.
Tarin Iareta ngaia te moan n aomata ae noora te Uea?
E a tia te Atua ni kaotia nakoia burabeti ake tabeman imwain tarin Iareta (te katooto, taraa Mote 7:4, 59), ngaia ae bukin tera te Uea e taekinna nakoina, “I bon tuai ma ni kaotai nakon te aomata”? (Ita 3:15). Unimwaane Jeffrey R. Holland e anga te kabwarabwara ae kona ni karaoaki aei: “Kristo e taekinna nakon tarin Iareta, ‘I bon tuai ma ni kaotai nakon te aomata n te kawai aei, n akean au kantaninga, ni kabane ibukin aia onimaki ake ko nooriia’” (Kristo ao te Berita ae Boou [1997], 23).
Iango ibukin Kamatebwai ni Koroboki aika Tabu n te Utu ao Bootakin te Utu n te Tairiki
Inanon warekan koroboki aika tabu ma am utu, e kona ni buokiko te Tamnei n ataia bwa tera taian reirei ae a riai ni kamatataaki ao ni maroroakinaki bwa e aonga ni buoka kainnanoia am utu. Aikai tabeua iango.
Ita 1:34–37
Tera ae ti reiakinna man kiibu aikai iaon te tataro ibukiia tabeman? Tera riki koaua ibukin te tataro aika a kabwarabwaraaki inanon kiibu aikai?
Ita 2:16–3:6
Tera ae reireiniira ana katooto tarin Iareta bwa ti na kanga ni karekei kaeka nakon ara kaangaanga ao ara titiraki? Tao a kona kaain te utu n tibwauai aia taneiai ngke a ukoukora ao ni karekei kaeka mairoun te Uea.
Ita 4:11–12
Imwiin warekan riki kiibu, a kona utu ni koroi bwaai ni katoabong aika a na kaungaia am utu (n aron tamnei, anene, takakaro, ke aomata) iaon mwakoron beeba ao ni katikui inanon te boora. Ngkanne a kona n rinea teuana temanna imwiin temanna ao ni maroroakinna bwa “e [kairoroia] bwa a na karaoa ae raoiroi” (Ita 4:12). Tera bitaki aika a kaungaki iai kaain am utu bwa a na karaoia?
Ita 5
Ko kona ni karaba te bwai ke te bwaintangira n te bwaoki ao kaoa temanna kaain te utu bwa e na taraa nanona ao anganiia kaain te utu kanikinaa aika a na kona ni buokiia ni ketinna bwa tera. Ngkana kam wareka Ita 5 ni bootaki, maroroakinna bwa bukin tera e kakawaki bwa e na kabonganaia taan kakoaua te Uea n Ana mwakuri. Ti na kanga n tibwaua ara koaua n Ana Boki Moomon ma tabeman?
Ibukin iango riki tabeua ibukin reiakinaia, ataei n te kamataata n te wiiki aei inanon Nakomai, Iriirai—Ibukin te Moanrinan.
Kanakoraoan Ara Anga reirei
Tatauraoi n tainako. “Taai n reireiaki a waekoa ni bua, ngaia are e kakawaki bwa ti na kabonganai ngkana a reke. … Te katooto, te roro ae 13 ao 19 ma aia babaire ae kaangaanga are a na karaoia e na kona n tauraoi n reirei aron karekean oin am kaotioti” (Reirei n Ana Kawai te Tia Kamaiu, 16).
Ko Noora Riki ae Mwaiti Nakon Aei? iroun Marcus Alan Vincent