“Ritembwa 21–27. Kiritimati: “E Na Roko nakon te Aonaaba n Kamaiuia Ana Aomata’” Come, Follow Nakomai, Iriirai—Ibukin te Moanrinan: Ana Boki Moomon 2020 (2020)
“Ritembwa 21–27. Kiritimati,” Nakomai, Iriirai—Ibukin te Moanrinan: 2020
Nora ana tibu te Atua, iroun Walter Rane
Ritembwa 21–27
Kiritimati
“E Na Roko nakon te Aonaaba n Kamaiuia Ana Aomata”
Ataei n angin te tai a tangiria ni maroroakina aroia n runga te Kiritimati. Iangoia bwa tera ae ko kona ni karaoia ni buokiia bwa a na katurua aia iango iroun Iesu Kristo ao aia karabwarabwa ibukin bungiakina.
Korei Am Namakin
Kaoa te Tibwatibwa
Kaoiia ataei bwa a na karakina ke a na korea tamnein te bwai are e kakaraoia aia utu n te kakiritimati ni buokia bwa a na ururinga Iesu Kristo.
Reirei te Reirei: Ataei aika a Uarereke
1 Nibwaai 11:13–22; Motiaea 3:5–8; Aramwa 7:9–13; Ereman 14:1–6; 3 Nibwaai 1:15, 19–21
E bungiaki Iesu Kristo bwa e na riki bwa au Tia Kamaiu.
A ataia ataei ake ko reireinia bwa bukin tera ti runga te Kiritimati? Ko na kanga ni buokiia bwa a na matata bwa bukin tera bungiakin Iesu Kristo bon te bwai ae riai n rungaaki?
Waaki ni Kakukurei aika a Kona ni Karaoaki
-
Karakina bungiakin Iesu, ao kaoti tamnei n am tai ni karaki (n aron Boki ibukin Tamnein te Euangkerio, nambwa. 28, 29, 30, 31). Anga te tai nakoia ataei bwa a na tibwa aia atatai. Kabongana te iteraniba ibukin te waaki ni kakukurei n te wiiki aei n reireinia ataei bwa aomata ake a maeka n tain ana Boki Moomon a ataa taekan bungiakin Iesu.
-
Wareki mwakoro n taeka aika a kakawaki man Aramwa 7:11–12 n reireinia ataei bwa tera ae e a tia ni karaoia Iesu Kristo ibukira. Tibwauaia bwa bukin tera ko karabwarabwa ngkai e a tia ni bungiaki Iesu Kristo, ao kaota am namakin iaon Ana mwakuri ni kamaiu.
-
Kaoti tamnei aika a kabwarabwara ana mwakuri ni kamaiu te Tia Kamaiu—n aron marakina i Ketetemwane, matena iaon te kaibangaki, ao Maungautina (taraa Bokin Tamnein te Euangkerio, nambwa. 56, 57, 58, 59). Tuangia ataei bwa a na tuangko bwa tera are a nooria n taian tamnei. Buokiia bwa a na matata bwa Tamara are i Karawa e kanakomaia Iesu Kristo nako aonteaba bwa e na maraki ibukin ara bure nako, bwa e na mate ibukira, ao ni mangauti bwa ti aonga ni kona n oki rikaaki ni maeka ma Ngaia.
-
Anenea tekorana te kuna ma ataei ae kaineti ma bungiakin Iesu , n aron “He Sent His Son” ke “Away in a Manger” (Aia Boki n Anene Ataei, 34–35, 42–43). Kaoti nakoia ataei mwakoro n taeka ake n te kuna aika a kabwarabwarai kakabwaia ake iai iroura ibukina bwa e a tia ni bungiaki Iesu.
Ana Boki Moomon e kakoaua taekan Iesu Kristo.
Ni kainan ami kamatebwai n ana Boki Moomon n te ririki aei, kauringia ataei bwa te boki aei bon “Kakoauan Taekan Iesu Kristo,” ae koreaki bwa e na buokira bwa ti na nako nakoina.
Mwakuri ni Kauring aika a Kona ni karaoaki
-
Katea ana Boki Moomon bwa aonga n nooria ataei. Wareka Atuna ao kotei taeka aika “Kakoauan Taekan Iesu Kristo.” Angania ataei aia tai bwa a na taua te boki, ao buokiia bwa a na kakaea aran te Tia Kamaiu iaon moan te boki. Kaota am namakin nakoia ataei ibukin ana Boki Moomon ao bwa e kanga n tia ni buokiko n reiakina taekan Iesu Kristo.
-
Angania ataei ni kabane tamnein Iesu, ke tuangia bwa a na korea tamneina. Kaoiia bwa a na katei aia tamnei ni katoa te tai are a ongo iai aran Kristo n am tai ni wareka 2 Nibwaai 25:23, 26. Kaota am koaua bwa e koreaki ana Boki Moomon ni buokira bwa ti na “kakoaua Kristo” (2 Nibwaai 25:23).
-
Tibwaua teuana te rongorongo ke te karaki ae mamate nanom iai nakoia ataei are man ana Boki Moomon ae buokiko n reiakina taekan Iesu Kristo. Titirakinia ataei bwa tera taian karaki man ana Boki Moomon aika a tatangiria, ao buokiia bwa a na kona n nooria bwa a kanga karaki aikai ni buokira n reiakina taekan te Tia Kamaiu ao bwa ti na kanga n nako nakoina. Taraakin tabeua tamnei man Karaki man Ana Boki Moomon e kona ni buokiia bwa a na atai taian karaki.
Reirei te Reirei: Ataei aika a Ikawai
1 Nibwaai 11:13–22; Motiaea 3:5–8; Aramwa 7:10–13; Ereman 14:1–6; 3 Nibwaai 1:15, 19–21
E bungiaki Iesu Kristo bwa e na riki bwa au Tia Kamaiu.
Iangoia bwa ko na kanga n rangi ni buokiia ataei bwa a na ataa kakawakin bungiakin Kristo ao bwa tera nanon aei irouia.
Mwakuri ni Kauring aika a Kona ni Karaoaki
-
Angania ataei n tatabemania kakateuana aia kibu man te iteraniba ibukin te waaki ni kakukurei n te wiiki aei. Kaoiia bwa a na wareka aia kibu, ao ni kinaa bwa antai te burabeti ae taetae, ao tibwaa teuana te bwai ae e ataia te burabeti aei ibukin Iesu Kristo. Buokiia ke kariaia bwa a na bootaki ni mwakuri ngkana ko nora riaina.
-
Karinani baika a riki iaon te burakibooti, n aron are e kabwarabwaraki n Ruka 2:4–14; Mataio 2:1–2; ao 3 Nibwaai 1:15, 19–21. Buokiia ataei n ukeri kibu aikai ni kakaea bwa a riki iaa bwaai aikai, i Betereem, ke i Amerika ke bon tabo aikai ni kauoua. Bukin tera ti karabwarabwa ngkai iai iroura ana Boki Moomon bwa te kauoua ni kakoaua ibukin bungiakin Iesu Kristo ao ana mwakuri bwa te Tia Kamaiu?
-
Wareka Aramwa 7:10–13 ma ataei. Tera baika ti reiakin man kibu aikai aika a kaineti ma bungiakin Iesu? rongorongon Mimitongina? rongorongon Ana mwakuri iaon te aonaaba? Kaoiia ataei bwa a na tibwaia bwa bukin tera ngkai a karabwarabwa ibukin Iesu Kristo, ao kaota am koaua ibukina.
Ana Boki Moomon e kakoaua taekan Iesu Kristo.
Ngke e taetae Iotebwa Timiti ibukin ana Boki Moomon, ao e taku “e na kaania riki te Atua te aomata man irirakin reirei ake i nanona, nakon taian boki riki tabeua” (kabwarabwara nakon Ana Boki Moomon). Ko na kanga ni buokiia ataei bwa a na matata n te berita aei?
Mwakuri ni Kauring aika a Kona ni Karaoaki
-
Anga teuana mai buakon kibu aikai nakoia ataei n tatabemania: 2 Nibwaai 25:23, 26; 33:4, 10. Kaoiia ataei bwa a na wareka aia kibu ao ni katebenakoa bwa tera ae e tangiria te burabeti man ana Boki Moomon ae Nibwaai bwa ti na ataia. Tuangia bwa a na korei aia reke iaon burakibooti. Kabwarabwara bwa bwaai aikai a kabwarabwara oin ana Boki Moomon ae kakawaki. Anga te tai nakoia ataei bwa a na kataneiai imarenaia aroia ni kabwarabwara nakon raoraoia oin ana Boki Moomon ae kakawaki.
-
Tibwaua teuana te rongorongo ke te karaki ae mamate nanom iai nakoia ataei are man ana Boki Moomon ae buokiko n reiakina taekan Iesu Kristo. Titirakinia ataei bwa tera taian karaki man ana Boki Moomon aika a tatangiria, ao buokiia bwa a na kona n nooria bwa a kanga karaki aikai ni buokira n reiakina taekan te Tia Kamaiu ao bwa ti na kanga n nako nakoina. Tibwauaia nakoia ataei bwa e kanga ana Boki Moomon ni buokiko n ataia bwa Iesu bon te Kristo. Kaungaia ataei bwa a na kakaea te kibu ke te karaki man ana Boki Moomon are e kakorakora aia koaua iroun Iesu Kristo. Tuangia bwa a na tibwauaia ma raoraoia ke kaain aia utu ae e aki ataa rongorongon ana Boki Moomon.
Kaungaa te Kamatebwai n te Mweenga
Kaoiia ataei bwa a na kabwarabwara nakoia aia utu bwa e kanga ana Boki Moomon ni buokiia n reiakina riki taeka Kristo. Kaungaia bwa a na tibwaua te kibu ke te karaki man ana Boki Moomon bwa raon aia koaua.
Kanakoraoan Ara Anga reirei
Ataei a tatangiri taian karaki. Te karaki bon teuana te kawai ae rianako tamaroana ibukin buokaia ataei bwa a na reiakin man ururingi taian koaua. N am tai n tibwaua karakinan bungiakin Iesu, iangoia naba bwa ko na tibwauai karakinan oin maium ake a tia ni buokiko ni kamatoatoa am onimaki iroun te Tia Kamaiu.