“Turai 6–12. Aramwa 30–31: ‘Tamaroan ana Taeka te Atua,’” Nakomai, Iriirai—Ibukin te Moanrinan: Ana Boki Moomon 2020 (2020)
“Turai 6–12. Aramwa 30–31,” Nakomai, Iriirai—Ibukin te Moanrinan: 2020
Bwaai ni kabane a kaotia bwa iai te Atua (Aramwa ao Korioa), iroun Walter Rane
Turai 6–12
Aramwa 30–31
“Tamaroan ana Taeka te Atua”
Kamatebwaia Aramwa 30–31 ma ataei n am iango. N am tai n iangoi korakorai ao kainnanoia, te Tamnei ae Raoiroi e na buokiko n ataia bwa tera ae ko na reirenia.
Korei Am Namakin
Kaoa te Tibwatibwa
Kaoiia ataei bwa a na tibwauai kaeka nakon titiraki n aron aikai: Ti na tataro ningai? Tera ae ti taekinna ngkana ti tataro? Iai ae kona n tibwauaia bwa a kanga Tioromwaite n tataro ke e kanga ana tataro Aramwa?
Reirei te Reirei: Ataei aika a Uarereke
Bwaai ni kabane a kakoaua te Atua .
Aramwa e taekini bwain karawa ma bwain aonteaba ni kakoaua bwa e maiu te Atua ao e bairea te aonaaba. Tera baika ko kona ni buokiia ataei bwa a na nori aika a katobibia aika a kakoaua te Atua?
Waaki ni Kakukurei aika a Kona ni Karaoaki
-
Wareka Aramwa 30:44 nakoia ataei, ao tuangiia bwa a na kakauongo nakon baike e taekin Aramwa bwa a buokira n ataia bwa iai te Atua. Kaota tamnein tabeua bwaai akanne, ao tuangiia ataei bwa a na kotei tamnei ngkana ko wareki rongorongoia n te kibu. Kaoiia ataei bwa a na korei tamnein bwaai aika a buokiia ni kakoaua te Atua.
-
Ngkana e kona, nakonako i tinaniku ma ataei ao titirakinia bwa a na tei irarikin te wintoo n am tai ni wareka Aramwa 30:44. Tuangiia bwa a na taekini bwaai aika a noori aika a buokiia n ataia bwa iai te Atua. Te iteraniba ibukin te waaki ni kakukurei n te wiki aei e kona naba n ibuobuoki.
-
Tuangiia ataei bwa a na tekateka n te mronron ao ni bootaki n anenea te kuna ae kaota ana karikibwai te Atua, n aron “My Heavenly Father Loves Me” (Aia Boki n Anene Ataei, 228–29). N aia tai n anene ataei, kaoiia bwa a na kabuta imarenaia te bwai n aron te booro. N te tai are e toki te katangitang, tuanga te ataei are e taua te booro bwa e na tibwaua teuana te bwai ae karikia Tamara are i Karawa ae e karabwarabwa iai teuanne ke neienne ibukina.
Ana taeka te Atua e korakora.
Ngkana ataei a iangoa te korakora, tao a iangoi bwaai n aroia aika korakora n ninikoria, ueannaine, ke uea. Ko kona ni buokia ni mataata bwa ana taeka te Atua e korakora riki nakon “bwaai nako” (Aramwa 31:5).
Waaki ni Kakukurei aika a Kona ni Karaoaki
-
Korea tamnein te kabaang iaon te burakibooti. Wareka Aramwa 31:5 nakoia ataei, ao kaoiia bwa a na kakauongo bwa tera ae taekinna Aramwa ae korakora riki nakon te kabaang. Tibwa te bwai ae ko a tia n rinanona ngke ana taeka te Atua e korakora mwaakana iaom.
-
Bootaki n anenea te kuna ibukin koroboki aika tabu, n aron “Scripture Power” (music.ChurchofJesusChrist.org), ao titirakinia ataei bwa a na kakauongo bwa a kanga koroboki aika tabu ni buokira. Kaokioka te mwakoro taeka ae “Ana taeka te Atua e korakora riki nakon …” tabeua te tai, ao tuangiia ataei bwa a na kabwanina te mwakoro n taeka anne.
Tamara are i Karawa e ongo au tataro.
Aramwa e nanokawaki ngke e nora aroia Tioromwaite n tataro (taraa Aramwa 31:24)—A aki kakoaua Iesu Kristo ao a okioki aia tataro n te tabo are a kona iai n nooraki irouia aomata ni kabane (Aramwa 31:13–14). Ma ana tataro Aramwa e mangori ao e kaota te onimaki iroun Kristo.
Waaki ni Kakukurei aika a Kona ni Karaoaki
-
Kakimototoa karakinan Aramwa ao Tioromwaite ibukia ataei man kiibu n Aramwa 31:8–35. Ko kona ni kabongana “Mwakoro 28: Tioromwaite ao te Ramtam” (Karaki man Ana Boki Moomon, 78–80, ke te witeo ae irekereke ma ae iaon ChurchofJesusChrist.org). Kaota te kaokoro imarenan aia tataro Tioromwaite ma ana tataro Aramwa. Kaoiia ataei bwa a na katamneia bwa a kaitibo ma natiia Tioromwaite. Tera ae a na taekinna bwa a na reireia aron te tataro?
-
Buokiia ataei bwa a kinai bwaai ake a taekin Tioromwaite n aia tataro (tataro Aramwa 31:15–18) n aia tai ni katea te taua ae te Ramtam man taian kai ke atibu. Kamatata bwa tiaki aio aron te tataro. Titirakiniia ataei bwa ti na kanga n tataro, ao anganiia bwa a na kanakoa te kai ke te atibu ni katoaa te bwai ae mwaneweaki.
Reirei te Reirei: Ataei aika a Ikawai
Ana Boki Moomon e kauringira ni kaitarai reirei aika kairua.
Ana reirei Korioa aika kairua a kabwarabwaraki n ana Boki Moomon ni buokira ni kinaa ao n totokoi reirei aekakin aikai ni boong aikai.
Waaki ni Kakukurei aika a Kona ni Karaoaki
-
Kaoti tabeua bwaai (n aron te mwane ke te amwarake) ao katotongan bwaai aikai ake bwaai n takakaro . Tera ae a na rineia ataei? Buokiia ataei n ukora Aramwa 30:12–18 ibukin taian kewe ke reirei aika kairua ake e reirei Korioa ibukin te Atua.
-
Buokiia ataei bwa a kinai taian kewe ake e reirei Korioa ao korei iaon mwakoro ni beeba ni katekei iaon te burakibooti (taraa Aramwa 30:12–18, 24). Tuangiia ataei bwa a na ukora Aramwa 30:32–35, ni kakaei kawai ake e kaekai iai Aramwa nakon ana kewe Korioa. Tuangiia ataei bwa a na kanga n ataia bwa a koaua bwaai ake e reirei Aramwa.
TamneiE taetae Korioa ma AramwaKorioa e kaitaraa Aramwa, iroun Robert T. Barrett
Ana taeka te Atua e korakora riki nakon bwaai nako.
Ningai ae ko a tia iai n namakina mwaakan ana taeka te Atua? Iangoia bwa a na kanga baike ko a tia n rinanoni ni kaungaia ataei ake ko reireia.
Waaki ni Kakukurei aika a Kona ni Karaoaki
-
Kaoiia ataei bwa a na iangoa te bwai teuana ke te aomata ae korakora, ke kaoti tamnein tabeua bwaai aika korakora. Tera ae kakorakoraia bwaai aikai? Bootaki ni wareka Aramwa 31:5 , ao titirakinia ataei bwa tera ae irouia nanon te kibu aei. E kanga ni korakora riki ana taeka te Atua nakon te kabaang? Tera ae kona ni karaoia?
-
Reitaki ma tabeman ataei imwain te tai, ao tuangiia bwa a na iangoa te bwai ae a tia n rinanona bwa a na tibwaia n te kiraati ngke koroboki aika tabu ke te taetae mairoun te tia kairiiri n te Ekaretia e buokiia ni karaoa te bwai ae raoiroi. Bukin tera ana taeka te Atua e karikia bwa a na tangira karaoan baika a raoiroi?
-
Anenea te kuna ma ataei iaon taekan ana taeka te Atua, n aron “Search, Ponder, and Pray” ke “Follow the Prophet” (Aia Boki n Anene Ataei, 109, 110–11). A kona naba n anenea “Scripture Power” (music.ChurchofJesusChrist.org).
I kona n nanorinano.
Mai buakon kairua ake a karaoi Tioromwaite, bon aia kainikatonga ae taraa ni karika te nanokawaki iroun Aramwa. Aio e kona n riki bwa te tai n reireinia ataei kakawakin te nanorinano.
Waaki ni Kakukurei aika a Kona ni Karaoaki
-
Buokiia ataei bwa a na mataata n te kaokoro imarenan te kainikatonga ao nanorinano (taraa “Kainikatonga” ao “Karinanoa, Nanorinano” ni Bwai ni Kairi nakon Koroboki aika Tabu). Tuangiia ataei bwa a na ikaruoruo ni wareka Aramwa 31:24–28. Ke Bootaki ni wareka “Mwakoro 28: Tioromwaite ao te Ramtam” (Karaki man Ana Boki Moomon, 78–90). N aia tai ni wareware, tuangiia bwa a na taraa a kanga Tioromwaite ni kaotia bwa a kainikatonga. E kanga ni kaotia Aramwa bwa e nanorinano? (taraa Aramwa 31:30–33).
-
Tibwaia ataei nakon kurubu, ao tuangiia kurubu nako bwa a na kaekai titiraki n aron: Tera are a kabanea nanoia iai Tioromwaite? (taraa Aramwa 31:24, 28). Tera bwain te aonaaba aika a kabanei iai nanoia aomata ni boong aikai? Tao bukin tera aomata a iangoia bwa a rietata riki nakoia tabeman? N te tai are a tibwaa aia reke kurubu nako, angania bwa a korea mwakoron te taua ae te Ramtam iaon te burakibooti. Imwina tuangiia bwa a na kamaunai mwakoron te taua ni katoaa te tai are a iangoa iai te kawai are a kona ni kaota te nanorinano.
Kaungaa te Kamatebwai n te Mweenga
Kaoiia ataei bwa a na reireia aia utu te bwai ae a reiakinna ibukin mwaakan ana taeka te Atua n taai aikai.
Kanakoraoan Ara Anga reirei
Buokiia ataei n reirei man koroboki aika tabu. Ataei aika a uarereke e na aki bati ae a na kona ni warekia, ma ko kona ni kairiia n te kamatebwai man koroboki aika tabu. Te katoto, ko kona ni wareki taeka ao kaoiia bwa a na teirake ke ni katea baia n te tai are a ongo iai te taeka ke te mwakoro n taeka ae onoti. Imwiina buokiia bwa a na mataata n te taeka ke te mwakoro n taeka anne. (Taraa Reirei n Ana Kawai te Tia Kamaiu, 20–21.)