te ati inanon bain te ataei

Turai 13–19

Aramwa 32–35

“Unika Te Taeka Aio Inanomi”

Iangoia ataei ake ko reireinia n am tai ni kamatebwaia Aramwa 32–35ma te tataro. Ni karaoa aei, iango ma namakin a na roko ibukin reireinakiia. Korei ao mwakurii namakin aikai.

Korei Am Namakin

te aikaon ibukin te tibwatibwa

Kaungaa te Tibwatibwa

Karini araia ataei nako inanon te turumwa. Tuanga temanna bwa e na anaa teuana te ara, ao kaoa te ataei anne bwa e na tibwaua te bwai ae e a tia n reiakinna man ana Boki Moomon tabeua te tai n nako. Reitinako ni karokoa ae e reke aia tai ngaiia ni kabane, ma tai kairoroa temanna bwa e na tibwatibwa.

te aikaon ibukin te anga reirei

Reirei te Reirei: Ataei aika a Uarereke

Aramwa 32:28–43

I kona ni buoka au onimaki iroun Iesu Kristo n rikirake.

Taian koraa, aroka, ao uaanikai bon baika a kai kinaaki aika a kona ni buokiia ataei n oota n reirei n aron te onimaki ao te koaua. Iangoia bwa ko na kanga n kabongana ana kabotau Aramwa n reireniia ataei.

Waaki ni Kakukurei aika a Kona ni Karaoaki

• Kakimototoa Aramwa 32:28–43; ko kona ni kabongana “Mwakoro 29: Aramwa E Reirei taekan te Onimaki ao ana Taeka te Atua” (Karaki man Ana Boki Moomon, 81, ke te witeo are e irekereke ma ngaia iaon ChurchofJesusChrist.org). Kaoti tamnein te aroka n rikirakena aika kakaokoro, ao tuangiia ataei bwa a na buokiko n kaeti nnen tain tamnei (taraa te tamnei are inanon te iteraniba ibukin te waaki ni kakukurei n te wiiki aei). Kabwarabwara bwa ngkai ti maiuakina te euangkerio, e rikirake ara koaua—e waaki man ae uarereke n aron te ati ma e kona ni bubura n aron te kai.

• Kaota te ati nakoia ataei, ao wareka nakoia tabeua rainin Aramwa 32:28. Tuangia ataei bwa ana taeka te Atua kanga te ati. Titiraki bwa ti kanga ni buoka te ati n bwebwerake. Kamenaia ataei bwa a aongkoa a unika te ati, a tebokia, man buokiia ni bwebwerake. Kaotia bwa ti aki kona n noora te ati imwin unikana, ma ti ataia bwa e bon mena ikekei ao e bwebwerake; ti aki naba kona n noora Tamara are i Karawa ao Iesu Kristo, ma ti ataia bwa Bon iai Ngaia ao A tangiriira. Buokiia ataei n iangoi baika a kona ni karaoi ni buoka aia onimaki iroun Iesu Kristo bwa e rikirake.

• Korea te aroka iaon te burakibooti, ao angania ataei bwa a na Korei baana ao uaana ni katoa te tai are a iangoa iai te bwai ae a kona ni karaoia ni buoka aia onimaki irou Iesu Kristo n rikirake. Kaoiia bwa a na karaoi mwakuri aika bebete aika a katamneia baike a iangoi.

Aramwa 33:2–11; 34:17–27

Tamara are i Karawa e ongo ngkana I tataro.

Tenaan Tioromaite a tataro ti teuana n te wiki, ao a kabonganai taeka aika a okioki ni katoa tai (taraa Aramwa 31:22–23). Aramwa ao Amureki a reirei bwa ti kona n tataro n taai nako ibukin kainnanora nako n te tamnei ao n te rabwata.

Waaki ni Kakukurei aika a Kona ni Karaoaki

• Wareki mwakoro n taeka aika ko a tia n rinei man Aramwa 33:4–11 aika a kabwarabwarai tabo aika ti kona n tataro iai ao buokiia ataei n iangoi tabo aika a kona n tataro iai. Imwiina ao kaoiia bwa a na korei tamneia aika a tataro n taabo akanne. Kaota am koaua bwa a kona n tataro n taabo nako, e ngae ngke a inanoi n tataro.

• Rinei mwakoro n taeka man Aramwa 34:17–27 aika a kabwarabwarai bwaai aika ti kona n tataro ibukia, ao warekia nakoia ataei. Buokiia bwa a na iangoi bwai aika a kona n taekinna nakon Tamara are i Karawa ngkana ti tataro, ao kaoiia bwa a korei tamnein bwai aikai. Kaota am koaua bwa a kona n taetae ma Tamara are i Karawa ibukin baike a iangoi ke n namakin. Tibwaua te bwai ae ko rinanona ike Tamara are i Karawa e ongo am tataro.

• Anenea te kuna ae e reireinia ataei taekan te tataro, n aron “A Child’s Prayer” ke “We Bow Our Heads” (Aia Boki n Anene Ataei, 12–13, 25). Buokiia bwa a nooria bwa tera ae e reirei te kuna anne ibukin te tataro.

te aikaon ibukin te anga reirei

Reirei te Reirei: Ataei aika a Ikawai

Aramwa 32:1–16, 27–28

Ngkana I nanorinano, te Uea E kona n reireinai.

Aramwa ao Amureki a tokanikai n reireinai tenaan Tioromwaite ake a nanorinano man tauraoi n ongo ana taeka te Atua. Iangoia bwa ko na kanga ni kaungaia ataei bwa a rineia bwa a na nanorinano.

Waaki ni Kakukurei aika a Kona ni Karaoaki

• Tuangia ataei bwa tera ae a uringnga man are a reiakinna n te wiki ae nako ibukia tenaan Tioromwaite (taraa Aramwa 31:8–24). Kauringia bwa teuana bukina ae E raraoma iai Aramwa irouia bon aia kainikatonga (taraa Aramwa 31:24–28). Bootaki ni wareka Aramwa 32:1–5, ao tuangia ataei bwa a na kakimototoa te bwai ae e a tia n riki nakoia tenaan Tioromwaite ake a kainnano. Imwina ao kaoiia ataei bwa a na wareki kiibu 12–13 ni kakaea bwa bukin tera Aramwa e namakinna bwa te katinanikuaki man aia tinakaoke (ke tabo n taromauri) bon te bwai ae raoiroi ibukia Tioromwaite aikai. Tera tabeua kakabwaia aika a roko man te nanorinano?

• Buokiia ataei bwa a kakaea nanon karinanoa ke nanorinano kairi nakon Bwai ni Kairi nakon Koroboki aika Tabu ke te rikitinare. Tera riki tenaan kairi iango ibukin nanon taeka aikai ae a kona ni kunei inanon Aramwa 32:13–16? Kaoiia bwa a na iangoi kawai aika kakaokoro ni kabwanina te kibuntaeka n aron “I nanorinano ngkana I .”

Aramwa 32:26–43

Au koaua iroun Iesu Kristo e rikirake ngkana I ribanaia.

Buokiia ataei aika ko reireinia ni kunea bwa tera ae a kona ni karaoia n “unika” ana taeka te Atua i nanoia.

Waaki ni Kakukurei aika a Kona ni Karaoaki

• Kaota te bwai ae matoatoa, ae kona n tauaki (n aron te atibu) bwa e tei ibukin te nano ae matoatoa man kainikatonga ao te bwai ae maraurau (n aron te tano) bwa e tei ibukin te nano ae maraurau man nanorinano. Angania ataei bwa a na ringi bwai akanne. Imwina ao kaota te ati nakoia ataei bwa e tei ibukin ana taeka te Atua. Kaoiia bwa a na kataia ni karina te ati nako nanon te bwai are matoatoa ao te bwai are maraurau. Bootaki ni wareka Aramwa 32:27–28, ao maroroakinna bwa tera ae nanonaki n “reke nnen teutana” (kibu 27) ana taeka te Atua i nanora.

• Ngkai kam bootaki ni wareka Aramwa 32:26–43 , tei tabeua te tai ao kaoiia ataei bwa a na korea tamnein te koraa ke te aroka ae unikaki—te katoto, te koraa ao te koraa ae moanna ni bwebwe (kibu 28), te aroka ae rikirake (kibu 30), ao te aroka ae e ikawai ao iai uaana (kibu 37). Kaungaia bwa a na korei aran aia tamnei n reitaki ma te kairi man Aramwa 32. E kanga kamwarakean te koraa n titebo ma kamwarakean ara koaua iroun Iesu Kristo? Ti kanga ni kamwarakea ara koaua? Kaoiia ataei bwa a na iango inanoia bwa e kanga aia koaua n rikirake ao tera ae a na karaoia ni kamwarekea aia koaua.

Aramwa 33:2–11; 34:17–27

Tamara are i Karawa e ongo ngkana I tataro.

Tenaan Tioromwaite iai aia koaua aika kairua ibukin te tataro, tabeua ake ti kona naba n noori ni boong aikai. Aramwa ao Amureki a reirei koaua aika korakora ni kaeti koaua aika kairua aikai.

Waaki ni Kakukurei aika a Kona ni Karaoaki

• Buoki ataei n ukera Aramwa 33:2–11 ibukin taeka ao mwakoro n taeka aika kakawaki aika a kaineti ma te tataro ake a kaokiokaki. Tera ae a reireinira taeka ao mwakoro n taeka aikai ibukin te tataro?

• Buokiia ataei bwa a na korei taai ike a kona iai n tataro, n ikotaki ma ake a mwaneweaki inanon Aramwa 33:4–10 ao 34:17–27 n ikotaki naba ma baike a riki ni maiuia. Kaoiia ataei bwa a na iangoi ke n tibwauai taneiai ngke a tataro ao n namakinna bwa te Atua e kaekai aia tataro.

te aikaon ibukin te kamatebwai

Kaungaa te Kamatebwai n te Mweenga

Ngkana e kona, angania ataei ni kabane te koraa bwa a na uoti nakon mwengaia ao n uniki bwa e na kauringia bwa a na buoka aia koaua iroun Iesu Kristo n rikirake. Kaungaia bwa a na tuangia aia utu baike a reiakin ibukin kamwakuran aia onimaki iroun Iesu Kristo.

Kanakoraoan Ara Anga reirei

Kaota am koaua bwa iai kakabwaia aika beritanaki. N te tai are ko kaoiia iai ataei bwa a na maiuakina reiren te euangkerio, tuangia ana berita te Atua nakoia naake a maiuakina te reirei anne (taraa Reirei n ana Kawai te Tia Kamaiu, 35).

te iteraniba ibukin te waaki ni kakukurei: I kona n onimakina Iesu Kristo