“Turai 20–26. Aramwa 36–38: ‘Taara te Atua ma ni Maiu,’” Nakomai, Iriirai—Ibukin te Moanrinan: Ana Boki Moomon 2020 (2020)
“Turai 20–26. Aramwa 36–38,” Nakomai, Iriirai—Ibukin te Moanrinan 2020
Kamataataan te tamnei iroun Joshua Dennis
Turai 20–26
Aramwa 36–38
“Taara te Atua ma ni Maiu”
Ngkai ko tataro mwaaka ni kamatebwaia Aramwa 36–38, namakin a na roko nakoim ibukiia ataei ake ko reireiniia. Korei namakin akanne, a kona ni karioi iango ibukin waaki ni kakukurei ake a na reiakinaki.
Korei Am Namakin
Kaoa te Tibwatibwa
Kaoiia ni kabane ataei bwa a na tibwa te bwai are a tia n reireinaki irouia aia karo. Titirakiniia ngkana a ata te reirei are e reireina iai natina Aramwa.
Reirei te Reirei: Ataei aika a Uarereke
Te rairannano e uota te kimwareirei.
Reiakinaia ataei taekan kakukurein te rairannano ngkai a kairake e kona ni kaungaia bwa a na rairi nanoia ngkana a ikawai.
Waaki ni Kakukurei aika a Kona ni Karaoaki
-
Wareka Aramwa 36:20 nakoia ataei, ao titirakiniia bwa tera ana namakin Aramwa. Kaoiia bwa a na taekini bwaai tabeua ake a uota te kakukurei nakoia. Kaota tamnein te Tia Kamaiu, ao kabwarabwara bwa Aramwa e namakina te kukurei ibukina bwa Iesu Kristo e a tia ni kabwarai ana bure.
-
Katoaia ataei n anganiia te mwakoro ni beeba ma te ubu ae kukurei iaon te iterana ao te ubu ae nanokawaki n are te iterana. Tuangiia bwa a na ongora ngkai ko wareka Aramwa 36:6 ao a na rinea te ubu raa ae a riai n taua i eta. Kabwarabwara bwa Aramwa e raira nanona ao e namakina te kimwareirei ibukina bwa Iesu Kristo e kabwara ana bure ibukin ana rinerine aika a kairua. Tuangiia ataei bwa a na ongora ngkai ko wareka Aramwa 36:24 ibukin te rinerine ae raoiroi ake e karaoi rimwi ao n taua i eta te ubu ae eti.
-
Ikotaki anenea kunan Iesu Kristo, n aron ae “E Kanakoa Natina” (Aia Boki n Anene Ataei, 34–35). Kaota am koaua bwa Iesu e roko iaon te aba ni kamaiura man te bure ao ni uota te kakukurei nakoira.
“Bwa a riki bwaai aika korakora man bwaai aika uarereke man aki kaangaanga.”
Ko na kanga n reireiniia ataei bwa a na kina bwa te Uea e kabonganai bwaai aika a uarereke ke a beebete ni katia Ana mwakuri?
Waaki ni Kakukurei aika a Kona ni Karaoaki
-
Wareka Aramwa 37:6–7, ao kaoiia ataei bwa a na bobaraaki ni katoa tai are ko wareka iai te taeka ae “uarereke.” Kaota nakoia tabeua bwaai aika a uarereke aika a kona n riki ke ni kamwaingi bwaai aika a bubura, n aron te baetere ke kiingin te kaa. Tera bwaai aika a bubura aika a riki ke a mwaing ibukin bwaai aika a uarereke aikai? Buokiia ataei bwa a na iangoi bwaai tabeua aika a uarereke ke aika a beebete ake e tangiria te Atua bwa ti na karaoi. Tera bwaai aika a bubura aika a kona n riki ibukin bwaai aika a uarereke aikai ke tuua aika a beebete?
-
Kaota te tamnei ke bwaai aika uoua aika a uarereke ake a kona n riki bwa bwaai aika a bubura, n aron te bwai ni koro uteute ao te marae, ke te tim ni karau ao te nei ae bubura. Kakoaua bwa man bwaai aika a uarereke, mwakuri aika a beebete a kona ni karika te bitaki ae bubura ni maiura ao ni maiuia tabeman. Kaungaia ataei bwa a na maroroakin bwaai tabeua aika a uarereke, bwaai aika a raraoi aika a karaoi ni katoabong, ke tibwa oin am katoto. Kaoiia ataei bwa a na rinea te bwai ae beebete, bwaai aika a raraoi ake a kona ni karaoi n te wiiki aei ao a korea tamneia ngke a karaoi. Kaoiia bwa a na uota aia tamnei nakon mweengaia ao n tibwaia ma aia utu.
Koroboki aika a tabu a kona ni buokiira ni katoa bong.
E ngae ngke aki kona ni wareware angiina ataei, ko kona ni buokiia ni karekea aia koaua ni mwaakan koroboki aika a tabu bwa e na kaira maiuia ni katoabong.
Waaki ni Kakukurei aika a Kona ni Karaoaki
-
Kaota tamnein te Riaona (n aron Bokin Tamnein te Euangkerio, nambwa. 68), ke kaoiia ataei bwa a na korea teuana ngkai a tibwatibwa n te bwai are a uringnga mai iai (taraa 1 Nibwaai 16:10, 28–29). Tabeka i eta koroboki aika a tabu, ao titirakiniia ataei bwa a na tibwaia bwa n te aro raa are a titebo koroboki aika tabu ma te Riaona. Kabongana Aramwa 37:38–47 ao te iteraniba ibukin waaki ni kakukurei n te wiiki aei ni kairia n te marooro aei.
-
Ikotaki anenea te kuna ae taekan kamatebwaian koroboki aika tabu. n aron “Search, Ponder, and Pray” ke “As I Search the Holy Scriptures” (Aia Boki n Anene Ataei, 109; Anene n Taromauri, no. 277). Tera kakabwaia man kamatebwaian koroboki aika tabu aika a taekinaki n te kuna?
Tamneite aine ae e wareware ni koroboki aika a tabuKoroboki aika a tabu a reireiniira arora n iriira te Atua.
Reirei te Reirei: Ataei aika a Ikawai
I kona ni “bungiaki iroun te Atua” ngkana I iriira Iesu ao n rairannano man ara bure.
“Te rairaki … bon te bitaki inanora n arona nako. Bon te bitaki ae kakaawaki are e kananona te Uea ao Ana burabeti bwa te manga bungiaki” (“Rairaki,” Gospel Topics, topics.ChurchofJesusChrist.org).
Waaki ni Kakukurei aika a Kona ni Karaoaki
-
Rinanon te karaki ma ataei te rairaki iroun Aramwa te Teei inanon Aramwa 36:6–21. Koreia iaon mwakoro ni beeba taeka ke kibuntaeka man kiibu aikai are e kabwarabwara aron ana namakin Aramwa, ao katekei iaon te burakibooti. Tuangiia ataei bwa ana bairei beeba inanon uoua kurubu: bwaai ake e namakini Aramwa imwain ae e uringa te bwai are e a tia n reireinna tamana ibukin te Tia Kamaiu ao bwaai ake e namakini imwiina ngke e uringii. Ikotaki wareka Aramwa 36:17–20, ao kakoaua nakoia ataei bwa Iesu Kristo e kabwarai ara bure ngkana ti rairi nanora.
-
Korei Bungiaki iroun te Atua ao irii kiibu man koroboki aika a tabu ake a koreaki iaon te burakibooti: 1 Ioane 4:7; Motiaea 5:7; 27:25–26; Aramwa 5:14; 22:15. Buokiia ataei ni wareki kiibu ao n tarai kibuntaeka ake e kabwarabwara n te manga bungiaki iroun te Atua. Tera aron te aomata imwiin manga bungiaakina iroun te Atua? Ti na kanga ni kaotia bwa ti a tia ni manga bungiaki iroun te Atua?
“Bwa a riki bwaai aika korakora man bwaai aika uarereke man aki kaangaanga.”
Buokiia ataei ake ko reireiniia bwa a na nooria bwa warekan koroboki aika tabu n te tai ae kimototo ni katoa bong e kona ni uoti kakabwaia aika korakora nakoia.
Waaki ni Kakukurei aika a Kona ni Karaoaki
-
Korea tamnein ke katea tamnein te bwaketi. Iraua timtimin te ran ae e na kona ni kaona te bwaketi? Buokiia ataei bwa a na ataia bwa e mwaiti te timtim aika a uarereke aika a kainnanoaki ni kaona te bwaketi. E kanga n irekereke aei ma Aramwa 37:6–7? E kanga warekan koroboki aika tabu n titebo ma timtimin te ran nakon te bwaketi?
-
Kaoiia ataei bwa a na tarataraia n Aramwa 37:6–9 ibukin kakabwaia ake a roko man “rekooti,” ke koroboki aika tabu. N te kiraati, karaoi rinanin bwaai ake a kunei. E kanga warekan koroboki aika a tabu ni kakabwaiai maiura? Tibwa am koaua iaon koroboki aika a tabu, ao kaungaia ataei bwa a na karaoia naba.
-
Kaota ke katoka tamnein te Riaona (n aron Bokin Tamnein te Euangkerio, nambwa. 68), ao tuangiia ataei bwa a na rinanon te bwai are a uringnga n taekan te Riaona man 1 Nibwaai 16:10, 28. Buokiia ataei ni wareka Aramwa 37:38–42. E kanga ni mwakuri te Riaona? E kanga n titebo aei ma aron koroboki aika a tabu ni mwakuri? Ikotaki wareka kiibu 43–47 ni buoka kaekaan te titiraki aei. Kaoiia ataei bwa a na kabanea te waaki ni kakukurei n te iteraniba bwa mwakoron te waaki aei.
Kaungaa te Kamatebwai n te Mweenga
Kaungaia ataei bwa a na tibwa teuana bukina ae a kakaitau iai ibukin koroboki aika a tabu ao ni kaoiia kain aia utu bwa a na karaoa naba aio.
Kanakoraoan Ara Anga reirei
Buokiia ataei bwa a na riki bwa taan reiakinaki aika a tamaroa riki. Te kantaninga n am anga reirei nakoia ataei tiaki tii karinakin te koaua irouia. Ko riai naba ni buokiia bwa a na kona n riki bwa taan ukoukoura te koaua i bon irouia. Te katoto, n onean mwiin ae tii tuangakiia ataei bwa a na kunei koaua inanon te karaki n ana marooro Aramwa, ko kona naba ni baireia ni karaoi waaki ni kakukurei ake a na kona iai ni kunei koaua inanon te karaki i bon irouia.