“30 ni Okotova–5 ni Noveba. Iperiu 1–6: ‘Jisu Karisito, ‘na Vu ni Bula Tawamudu’” Lako Mai, Mo Muri Au—Baleta na Tamata Yadua kei na Matavuvale: Veiyalayalati Vou 2023 (2022)
“30 ni Okotova–5 ni Noveba. Iperiu 1–6,” Lako Mai, Mo Muri Au—Baleta na Tamata Yadua kei na Matavuvale: 2023
Na iBotani mai Kiliati,, mai vei Annie Henrie
30 ni Okotova–5 ni Noveba
Iperiu 1–6
Jisu Karisito, “na Vu ni Bula Tawamudu”
Na volai ni veivakauqeti vakayalo eso sa vukei iko mo kila na ka e vinakata na Yalo Tabu me vakavulica vei iko. Na cakacakataki ni nomu veivakauqeti sa vakaraitaka na nomu vakabauta ni ra sa dina na veivakauqeti oqori.
Vola na Veika o Vakauqeti Kina
Eda na biuta tani kece eso na ka me rawa ni da ciqoma na kosipeli i Jisu Karisito—na itovo ca eso, vakabauta e cala eso, na veitokani sega ni savasava, se dua tale na ka. Me baleti ira na kai Matanitu Tani ena Lotu Vakarisito e liu, na saumaki e vakavuqa me kena inaki me biu laivi na veikalou lasu. Ia vei ira na Iperiu (se Jiu), na saumaki e laurai ni, sega walega ni dredre sara, e verevereya vakalevu cake. E dina, ni nodra vakabauta kei na itovo vakamareqeti a yavutaki tu ena qaravi ni Kalou dina kei na nodra ivakavuvuli na Nona parofita, ka lesu tale ki na udolu vakacaca na yabaki. Ia era vakavulica na iApositolo ni lawa i Mosese e sa vakataucokotaki vei Jisu Karisito ka sa ivakatagedegede tu oqo e dua na lawa cecere me baleti ira na vakabauta. Na ciqomi beka ni Lotu va-Karisito sa kena ibalebale li ni sa dodonu vei ira na Iperiu me ra vakanadakuya na nodra vakabauta kei na itovo makawa? Na iVola vei ira na Iperiu e sa nakiti me vukea na wali ni taro eso vakaoya ena kena vakavulici ni lawa i Mosese, ira na parofita, kei na veicakacaka vakalotu sa ra ka bibi taucoko, ia sa cecere cake o Jisu Karisito (raica na Iperiu 1:1–4; 3:1–6; 7:23–28). Na ka dina, na veika kece oqo sa dusia ka vakadinadinataki Karisito ni sa Luve ni Kalou ka sa Mesaia yalataki era a waraka voli na Jiu.
Na saumaki mai, ena veisiga taumada oya kei na gauna nikua, e kena ibalebale me itakele ni noda sokalou kei na noda bula o Jisu Karisito. E kena ibalebale me tauri matua na dina ka laiva na ka e vagolei keda tani mai Vua, ni sai Koya na “vu ni bula tawamudu vei ira sa talairawarawa vua” (Iperiu 5:9).
Vakasama Eso ni Vuli iVolanikalou ni Tamata Yadua
O cei e vola na iVola vei ira na Iperiu?
Eso na kenadau era vakataroga se a vola o Paula na iVola vei ira na Iperiu. Na iwalewale ni tuvai ni volavola ena Iperiu e via duidui toka mai na ivola tale eso i Paula, ka sega ni vakayacani na dauvolaivola ena veiwase ni ivola e liu sara. Ia, baleta ni tautauvata na veivakasama e cauraki ena Iperiu kei na ivakavuvuli tale eso nei Paula, o ira na Yalododonu Edaidai, ena kena cuqeni voli ni itovo ni Lotu va-Karisito, era sa ciqoma vakararaba ni a vakaitavi taumada o Paula ena volai ni ivola oqo.
Raica talega na iDusidusi ki na iVolanikalou, “Na iVola Eso e Vola ko Pauline.”
Sai Jisu Karisito na “yaloyalo ni nonai tovo” na Tamada Vakalomalagi.
E vuqa na Jiu e dredre me ra ciqoma ni sa Luve ni Kalou o Jisu Karisito. Raica na sala e vakadinadinataki Koya kina na iVola vei ira na Iperiu. Me vakataka, ni o wilika na imatai ni lima ni iwase, o na vinakata mo cakava e dua na ituvatuva vakaivola ni vei itutu, itavi, itovodei ni bula, kei na cakacaka i Jisu Karisito ka o raica ni tukuni tiko kina. Na cava e vakavulica vei iko na veika oqo me baleta na iVakabula? Na cava era vakavulica vei iko me baleta na Tamada Vakalomalagi?
Na cava e tukuna tiko vei iko na itukutuku nei Elder Jeffrey R. Holland mo kila me baleta na ivakavuvuli eso ena veiwase oqo? “E lako mai o Jisu … me vakatorocaketaka na rai vakatamata me baleta na Kalou ka vakatakekere vei ira mera lomana na Tamadra Vakalomalagi me vaka e sa daulomani ira ka na lomani ira tikoga ko Koya. … Na nodra vakani na via kana, vakabulai na tauvimate, cudruvi na dauveivakaisini, vakamasuti ni vakabauta—oqo o Karisito ni vakaraitaka tiko vei keda na sala i Tamana” (Na Cecere ni Kalou,” Liahona, Nove. 2003, 72).
A vakararawataki o Jisu Karisito ena ka kecega me rawa Vua me kila vinaka kina ka vukei au niu vakararawataki.
O nanuma li ni sa rawa mo “toro doudou kina ki na itikotiko vakaturaga loloma” ka vakasaqara na loloma veivueti? (Iperiu 4:16). E dua na itukutuku ni iVola vei ira na Iperiu oya ni se cava sara na noda ivalavala ca kei na malumalumu eso, e rawarawa na noda lako yani vua na Kalou ka sa rawa talega ni noda na Nona loloma soliwale. Na cava o kunea ena Iperiu 2:9–18; 4:12–16; 5:7–8 e sa vaqaqacotaka na nomu nuidei ni na vukei iko o Jisu Karisito ena nomu bolebole eso ni bula oqo? Sa rawa mo vola ena nomu ivola ni veisiga na veika o nanuma ka vakila me baleta na ka e sa vakayacora vei iko na iVakabula.
Raica talega na Mosaia 3:7–11; Alama 7:11–13; 34; Matthew S. Holland, “Na iSolisoli Cecere Totoka ni Luvena,” Liaona, Nove. 2020, 45–47.
Na veivakalougatataki ni Kalou sa nodra o ira sa “sega ni vakaukauwataka na [yalodra].”
Ena tukuni tale ni italanoa baleti ira na Isireli ena gauna makawa, a nuitaka o Paula me vakamasuti ira na Jiu me ra levea na cakacala era a vakayacora na nodra qase—na vakanadakui ni veivakalougatataki ni Kalou baleta na tawavakabauta. (E rawa ni o wilika na italanoa a vakaibalebaletaka o Paula ena Tiko Mai na Lekutu 14:1–12, 26–35.)
Sa rawa mo raica na sala e rawa ni baleti iko kina na Iperiu 3:7–4:11. Mo vakayacora oqo, o na rairai vakasamataka vakatitobu na taro eso vakaoqo:
-
Era a vakacudruya vakacava na Turaga o ira na Isireli? (raica na Iperiu 3:8–11). Na cava soti na revurevu ni kena vakaukauwataki tiko na yalo?
-
Ena gauna cava au a vakatara kina me kaukauwa na yaloqu? E tiko beka na veivakalougatataki e via solia vei au na Kalou kau sega ni ciqoma rawa tiko baleta na tawavakabauta?
-
Na cava au rawa ni cakava meu tara cake kina na yalomalua ka malumalumu? (raica na Ica 4:15; Na Vosa Vakaibalebale 3:5–6; Alama 5:14–15).
Raica talega na 1 Nifai 2:16; 15:6–11; Jekope 1:7–8; Alama 12:33–36; Neill F. Marriott, “Solia na Yaloda Vua na Kalou,” Liaona, Nove. 2015, 30–32.
Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale
-
Iperiu 1:8–9.Ena sala cava soti sa vakaraitaka kina o Jisu ni sa taleitaka o Koya na yalododonu ka cata sara na ivalavala ca? Kevaka e tiko vei keda eso na gagano tawasavasava, na cava eda rawa ni cakava meda veisautaka?
-
Iperiu 2:1–4.E rawa li ni o vakasamataka e dua na lesoni ivakaraitaki me vukea nomu vuvale me kila vakavinaka na ibalebale ni kukube matua toka ki na veidina ni kosipeli “eda a rogoca”? O na rairai vakaraitaka oqo vata e dua na iyaya e dau dredre me tauri matua. E tautauvata vakacava na noda sasaga ni taura dei toka noda ivakadinadina ki na kena ciqomi ka tauri toka na iyaya oqo? E rawa vakacava meda vakadeitaka “na ka eda a rogoca” me kakua ni “yali” tani mai vei keda? (tikina e 1).
-
Iperiu 2:9–10.Me digovi vinaka na malanivosa oqo “me sa nodra vu ni bula,” e rawa me tekivu veivosakitaki na cava e dau cakava o vunibula. Na cava na ibalelebale ni bula? E sa vunibula vakacava vei keda o Jisu Karisito kei na noda vakabulai?
-
Iperiu 5:1–5.Na veitikina oqo e rawa ni vukei iko mo veivosakitaka na ibalebale ni kacivi mai vua na Kalou mai vua e dua e tu vua na lewa. Na cava eda rawa ni vulica mai na ivakaraitaki i Jisu Karisito me baleta na ciqomi kei na vakayacori ni veikacivi?
“Sa sega e dua sa taura vakai koya na cakacaka vakarokoroko oqo, o koya ga sa lesi koya na Kalou, me vakataki Eroni” (Iperiu 5:4). Sa Kacivi Eroni ki na Veiqaravi o Mosese, mai vei Harry Anderson
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.
Sere vakaturi: “Au Rai Vei Kemuni,” Sere ni Lotu, naba. 51.
Vakatorocaketaki ni Vuli Yadudua
Tovolea eso tale na iwalewale. Mai na iwalewale vataga e dau vulici tu kina na ivolanikalou, raica eso tale na vakasama ni vuli. Me baleta eso na vakasama, raica na “Vakasama Eso me Vakatorocaketaki kina na Nomu Vuli iVolanikalou” ena itekivu ni vurevure oqo.
Na Rarama kei Vuravura, maivei Walter Rane