Sa masu vakalougatataki Eparama o Melikiseteki

Sa Vakalougatataki Eparama o Melikiseteki, mai vei Walter Rane. iSolisoli nei daudroini

6–12 ni Noveba

Iperiu 7–13

“Sai Koya na Bete Levu ena Veika Vinaka ena Yaco Mai”

Ni o wilika na Iperiu 7–13, ena rawa ni o ciqoma na veivakauqeti mai na Yalo Tabu. Vakasamataka eso na sala mo na volai ira kina; me vakataka, nomu rawa ni o vola na veika oqo ena idusidusi oqo, ena maliwa lala ni nomu ivolanikalou, se ena dua na ivolalailai se ivolaniveisiga.

Vola na Veika o Vakauqeti Kina

O ira madaga na Yalododonu yalodina era dau sotava ena so na gauna na “veivakalialiai kei na veivakararawataki” ka dau rawa ni yavalata na nodra nuidei (raica na Iperiu 10:32–38). E kila tu o Paula ni o ira na Jiu era saumaki ki na Lotu Va-Karisito era sotava tiko na veivakacacani levu baleta na nodra vakabauta vou. Me vakauqeti ira me ra dina tiko ki na nodra ivakadinadina, e a vakananuma tale kivei ira o koya o ira na dauvakabauta yalodina mai na gauna balavu e liu: mai vei Epeli, Inoki, Noa, Eparama, Serai, Josefa, Mosese—“e vaka na o era sa vakaraici keda” ni dina sara na yalayala ni Kalou ka sa yaga sara meda waraka (raica na Iperiu 11; 12:1). Sa nomu talega na ivakarau oqo. Na iyau ni vakabauta oqo e wasei mai vei ira kece era rai vei “Jisu [ni] o koya sa vakatekivuna ena sauma talega na noda vakabauta” (Iperiu 12:2). Ena vukuna ga, ena veigauna ena vinakata na meca meda “suka tani tale,” ena rawa “meda toro voleka yani ena yalodina kei na vakabauta dina sara” (Iperiu 10:22, 38). Vei keda, kei ira tale ga na Yalosavasava ni gauna makawa, o Jisu Karisito sa noda “bete levu ena ka vinaka ena muri mai” (Iperiu 9:11).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Iperiu 7

Na Matabete i Melikiseteki e dusimaki au vei Jisu Karisito.

Ena veisenitiuri, era vakayagataka tu na Jiu na Matabete Vaka-Livai, ka kilai talega me Matabete i Eroni. Ia ena taucoko ni kosipeli i Jisu Karisito sa vakalesuimai kina na Matabete cecere i Melekiseteki, ka solia na veivakalougatataki e cecere cake. Na cava o vulica me baleta na Matabete i Melekiseteki mai na Iperiu 7? Nanuma tiko ni inaki ni ivola oqo—me vaka na ivolanikalou kece—o ya me tarai cake na vakabauti Jisu Karisito, o na raica beka na veitikina ka vakadinadinataki Koya.

Oqo eso na ivakaraitaki ni dina o na rawa ni kunea:

• iVakadewa i Josefa Simici, Iperiu 7:3, 21: O ira sa tabaki ki na Matabete i Melikiseteki “sa caka me vaka na Luve ni Kalou” ka ra sa “[bete] ka sega ni mudu.”

• Iperiu 7:11: Na Matabete Vaka-Livai e sega ni “vinaka sara” na ka e solia ka sa yaco kina me sosomitaki mai na Melikiseteki (raica na Vunau kei na Veiyalayalati 84:18–22).

• Iperiu 7:20–21: Na Matabete i Melikiseteki e ciqomi ena dua na “bubului kei na veiyalayalati” (raica na Vunau kei na Veiyalayalati 84:33–44).

Na veivakalougatataki cava o sa ciqoma mai na Matabete i Melekiseteki kei na “kena cakacaka vakalotu”? (Vunau kei na Veiyalayalati 84:20). E sa vukei iko vakacava na Matabete i Melikiseteki mo lako mai vei Karisito?

Raica talega na Alama 13:1–13; Vunau kei na Veiyalayalati 121:36–46; iDusidusi ki na iVolanikalou, ““Melikiseteki,” scriptures.ChurchofJesusChrist.org; Russell M. Nelson, “iYau Vakayalo,” Liaona, Nove. 2019, 76–79; Dallin H. Oaks, “Na Matabete i Melikiseteki kei na kena iDola,” Liaona, Me 2020, 69–72.

Iperiu 9; 10:1–22

Na veicakacaka vakalotu ni veigauna makawa kei na gauna oqo era dusi vei Jisu Karisito.

O ira na kai Iperiu dina era wilika nai vola oqo era na rawa ni kila vinaka na vale tabu ni gauna makawa kei na cakacaka vakalotu e vakamacalataka o Paula. Ia, eso era sega ni kila vakataucoko ni inaki ni veicakacaka vakalotu oqo oya me ra dusia tiko na veisorovaki solibula nei Jisu Karisito.

Ena gauna ni vola tabu, ena dua na siga ni yabaki e vakananumi kina na Siga ni Veisorovaki, e dua na bete levu e curu yani kina vanua tabu duadua (se Vakatabui Vua na Kalou) ena valetabu e Jerusalemi ka cabora e dua na me se lami me sorovaki kina na ivalavala ca i Isireli.

Ni o wilika na ivakamacala nei Paula me baleta na veicakacaka vakalotu oqo, vakaraica na ivakatakarakara kei na ivakavuvuli ena vukei iko mo kila vakavinaka cake na ilesilesi ni veisorovaki ni iVakabula.

Na cakacaka vakalotu eda vakaitavi kina nikua e duidui mai vei ira ena gauna nei Paula, ia na kedra inaki e tautauvata. E vakadinadinataki Jisu Karisito vakacava vei iko na cakacaka vakalotu ni gauna oqo?

Mo vulica eso tale na ka me baleta na soqoni makawa ni Jiu kei na kedra ivakatakarakara, raica na vidio “Na Valecavu” and “iSoro kei na Sakaramede (ChurchofJesusChrist.org).

Iperiu 11

Na vakabauta e gadrevi kina meda nuitaka tiko na yalayala ni Kalou.

Kevaka e dua e tarogi iko mo vakamacalataka na vakabauta, na cava o na kaya? A vakamacala o Sisita Anne C. Pingree mai na vosa ena Iperiu 11 me solia na ivakamacala ni vakabauta: “Na kaukauwa vakayalo me vakayarayarataki ki na yalayala e laurai ‘vakayawa sara’ ia ena rairai sega beka ni rawati ena bula oqo” (“Raica na Yalayala e Yawa Sara,” Liaona, Nove. 2003, 14).

Sa rawa mo tauyavutaka na nomu ivakamacala ni vakabauta ni o vakasamataka vakatitobu na veivakasama eso ena Iperiu 11. Na cava e vakatavulica vei iko na nodra ivakaraitaki o ira era tukuni tiko ena iwase oqo me baleta na vakabauta? (Raica talega na Ica 12:6–22.)

Na yalayala cava soti o raica “vakayawa sara”? O na vakaraitaka vakacava vua na Turaga ni ko sa “ciqoma, [ka] mokoti ira”? (Iperiu 11:13).

Raica talega na Alama 32:21, 26–43; Jeffrey R. Holland, “Sai koya na Bete Levu ena Veika Vinaka ena Yaco mai,” Ensign, Nove. 1999, 36–38; Ulutaga Vakosipeli, “Vakabauti Jisu Karisito,” topics.ChurchofJesusChrist.org.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Iperiu 10:32–36.E rawa ni ko sureti ira na lewe ni vuvale me ra wasea na ka era sotava ni ra “vakararamataki” ena dina. Ena rawa vakacava ni vukei keda na veika sotavi oqo meda “kakua ni biuta laivi na [noda] dinata” ena gauna ni noda vakatovolei se vakatitiqa?

Iperiu 11.Ena rawa vakacava ni o vukei ira nomu lewe ni vuvale me ra vuli mai na nodra ivakaraitaki na yalodina e tukuni tiko ena Iperiu 11? Ena rawa ni kani marau me vakatasuasuataki eso vei ira na italanoa ni veivakaraitaki eso oqo. Sa rawa mo railesuva eso na italanoa oqo ena iTalanoa ni Veiyalayalati Makawa. Se ena rawa ni veitalanoataka na nomu vuvale eso na ivakaraitaki ni tamata yalodina tale eso dou kila tu—oka kina na nomudou qase e liu, liuliu ni Lotu, kei ira na lewe ni nomu itikotiko. E rawa talega ni o lagata e dua na sere me baleta na vakabauta, me vaka na “Vakabauta” (iVolanisere ni Gonelalai, 50).

Iperiu 12:2.Mai na itikina oqo, na cava e lomasoli kina o Jisu me vosota na rarawa kei na mosi ni kauveilatai? Na cava e vakavulica vei keda na ka oqo me baleta na noda rawa ni vosota na noda vakatovolei? E a solia eso na veivakararamataki veivukei o Peresitedi Russell M. Nelson ena tikina oqo ena nona itukutuku na “Reki kei na Bulabula Vakayalo” (Liaona, Nove. 2016, 81–84).

Iperiu 12:5–11.Na cava e cudruvi ka vakadodonutaki keda kina na Turaga? Na cava eda raica ena veitikina oqo me baleta na sala e raica kina na Turaga na veicudruvi? E veisautaka vakacava na veitikina oqo na nomu solia se ciqoma na veicudruvi?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Vakabauta,” Nodra iVolanisere na Lalai, 50.

Vakatorocaketaki Noda Veivakavulici

Vakayagataka na sere ivakatagi mo sureta na Yalo ka vulica na ivunau. Na Mataveiliutaki Taumada e kaya, “Na sere ivakatagi e sega ni yalani na kena kaukauwa me toroi [keda] yani ki na bula vakayalo e cecere cake.” (“iVakamacala Taumada ni Mataveiliutaki Taumada,” Serenilotu, x). E dua beka na sere me baleta na vakabauta, me vaka na “Dina ena Vakabauta”” (Serenilotu, naba. 154), ena rawa ni oka ena veitalanoa vakavuvale mai na Iperiu 11.

ivakaraitaki kei Jerusalemi makawa

Na ivakatakarakara kei na cakacaka vakalotu ni valetabu ni gauna e liu e vakavulica na veika me baleta na itavi i Jisu Karisito.