e sava lalaga o itabagone

13–19 ni Noveba

Jemesa

“Ia Dou Muria na Vosa, ka Kakua ni Rogoca Walega”

Ni o wilika na iVola i Jemesa, raica matua na veitikina e veivakauqeti vei iko. O sa vakauqeti vakacava mo dua e “muria” na veivosa oqo? (Jemesa 1:22).

Vola na Veika o Vakauqeti Kina

Eso na gauna e dua ga na tiki ni ivolanikalou sa rawa ni veisautaka na vuravura. Na Jemesa 1:5 e vaka me ivakasala rawarawa toka ga—kevaka o gadreva na vuku, kerea vua na Kalou. Ia na gauna a wilika kina o Josefa Simici yabaki 14 na tikina oqo, “e laubasikata vakalevu sara na veitiki ni [yalona]” (Josefa Simici—Ai Tukutuku 1:12). Ni sa vakauqeti, a cakacakataka sara o Josefa na veidusimaki i Jemesa ka vakasaqara na vuku mai vua na Kalou ena masumasu. Ka sa sega dina ni veivakadirideini na Kalou, me vakadonuya vei Josefa na veisiko vakalomalagi vakasakiti duadua ena itukutuku ni bula vakatamata—na i Matai ni Raivotu. Na raivotu oqo e veisautaka saraga na ituvatuva ni bula i Josefa ka sa muataki ki na Veivakalesuimai ni Lotu i Jisu Karisito e vuravura. Eda sa vakalougatataki taucoko tu nikua baleta ni a wilika ka cakacakataka o Josefa Simici na Jemesa 1:5.

Na cava o na kunea ni o vulica na iVola i Jemesa? De na rawa beka ni veisautaki iko se na nomu daulomani e dua se rua na tikina. O na kunea beka na veidusimaki ni o sasagataka mo qarava vakaoti na nomu ilesilesi ni bula. O na kunea beka na veivakauqeti mo vosa vinaka se dau vosota vakalevu cake. O na vakauqeti beka mo vakayacora me salavata kei na nomu ivalavala na nomu vakabauta. Se cava ga e vakauqeti iko, laiva na veivosa oqori me “laubasikata … na veitiki ni yalo[mu].” Ni oti oya, ni o “ciqoma ena yalomalua na … vosa,” me vaka e vola o Jemesa, mo dau muria na vosa, ka kakua ni daurogoca walega (raica na Jemesa 1:21–22).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

O cei o Jemesa?

E vakabauti raraba tu ni o koya e vola na iVola i Jemesa e luvei Meri, na tinai Jisu Karisito, ka tacina vakacabecabe na iVakabula. E cavuti tiko o Jemesa ena Maciu 13:55; Marika 6:3; Cakacaka 12:17; 15:13; 21:18; kei na Kalatia 1:19; 2:9. E laurai mai na veivolanikalou oqo ni o Jemesa a dua na iliuliu ni Lotu mai Jerusalemi ka sa kacivi me dua na iApositolo (raica na Kalatia 1:19).

Jemesa 1:2–4; 5:7–11

Na vosota vakadede e kauti keda ki na veika uasivi.

Ni wiliki oti na Jemesa 1:2–4; 5:7–11, na cava o rawa ni tukuna sa itukutuku bibi i Jemesa me baleta na dauvosota? Ena rawa ni veivuke me vakasamataki vakatitobu na veika eratou a vulica na matavuvale nei Elder Jeremy R. Jaggi me baleta na vosota mai na veitikina oqo (raica na “Me Tini Vinaka na Cakacaka ni Dauvosota ka Nanuma me Ka ni Reki Sara!,” Liaona, Nove. 2020, 99–101). Me “tini vinaka” vakacava na dauvosota? (Jemesa 1:4). O na rawa ni vakaraitaka vakacava vua na Turaga ni o sa lomasoli mo vosota vakadede?

Jemesa 1:3–8, 21–25; 2:14–26; 4:17

Na vakabauta sa gadrevi kina na cakacaka.

O kila vakacava kevaka o sa vakabauti Jisu Karisito? E vakaraitaka vakacava na nomu vakabauta na Kalou na nomu cakacaka? Vakasamataka na veitaro oqo ni o vulica na ivakavuvuli i Jemesa me baleta na vakabauta. Ena rairai veivakidroataki me wiliki talega na veika baleti Eparama kei Reapi, e rua na ivakaraitaki e tukuna o Jemesa (raica na Nai Vakatekivu 22:1–12; Josua 2). E rau vakaraitaka vakacava ni rau sa vakabauta na Kalou?

Na wiliki ni Jemesa 1:3–8, 21–25; 2:14–26; 4:17 ena rawa ni vukei iko mo vakasamataka na sala eso mo na daumuria vinaka cake kina na vosa. Vola na veivakauqeti cava ga o ciqoma, ka tuvanaka mo cakacakataki ira.

Raica talega na Alama 34:27–29; 3 Nifai 27:21.

E masu tiko o Eparama ena taudaku ni nona valelaca

“Sa vakabauta na Kalou ko Eparaama, a sa wili vua mei valavala dodonu” (Jemesa 2:23). Eparama ena Buca ko Mamire, mai vei Grant Romney Clawson

Jemesa 1:26; 3:1–18

Na vosa au tukuna e tiko kina na kaukauwa meu vakamavoataka se vakalougatataka na tamata.

Mai na ivakamacala momona eso a vakayagataka o Jemesa ena nona ivola taucoko, eso na nona ivosavosa kilai vakamatata tu sa kune ena nona ivakasala me baleta na ivosavosa. Sa rawa mo cakava e dua na ituvatuva ni iwalewale kece a vakamacalataka kina o Jemesa na yame se gusu. Na cava e vakatura na veivakatauvatani se ivakatakarakara yadua me baleta na vosa eda cavuta? Vakasamataka e dua na ka o rawa ni cakava mo vakalougatataka kina e dua ena nomu vosa (raica na Vunau kei na Veiyalayalati 108:7).

Jemesa 2:1–9

Me vaka niu dua na tisaipeli i Jisu Karisito, sa dodonu meu lomani ira na tamata kecega, se cava ga na ituvaki ni nodra bula.

A veivakasalataki vakatabakidua o Jemesa vei ira na Yalododonu me baleta na nodra taleitaki na vutuniyau kei na nodra beci na dravudravua, ia sa rawa ni vakayagataki na nona veivakaroti ki na veivakaduiduitaki se veitovaki cavaga eda cakava vei ira eso. Ni o vulica ena masumasu na Jemesa 2:1–9, digova na lomamu ka vakarorogo ki na veivakauqeti ni Yalo Tabu. Ena rawa ni veivuke me sosomitaki na malanivosa eso ena veitikina oqo, me vaka na “tamata dravudravua enai sulu ca” (tikina e 2), kei na vosa se malanivosa tale eso e vakamacalataka e dua o rawa ni temaki mo vakalewai koya vakatawa dodonu. O sa vakila beka eso na veisau o gadreva mo cakava ena ivakarau ni nomu qarava se vakasamataki ira eso?

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Jemesa 1:5.Ni sa wiliki oti na Jemesa 1:5, me ratou qai vakalekataka na nomu vuvale na itukutuku ni iMatai ni Raivotu (raica na Josefa Simici—Ai Tukutuku 1:8–20) “Taroga na Kalou: Joseph Smith’s First Vision” (ChurchofJesusChrist.org). Sureta na lewe ni matavuvale me ra wasea na nodra ivakadinadina baleta na Parofita o Josefa Simici kei na veika era sotava ni sauma mai na nodra masu na Tamada Vakalomalagi.

Jemesa 1:26–27. Nanuma mo sarava na video “True Christianity” (ChurchofJesusChrist.org). Me qai wiliki na ivakamacala nei Jemesa baleta na “lotu savasava” ena Jemesa 1:26–27, ka veivosakitaka na sala me ratou cakava nodratou lotu nomu vuvale me savasava sara.

Jemesa 3.E okati enaJemesa 3 e vuqa na ivakatakarakara e rawa ni vakauqeta na lesoni guilecavi dredre ni ivakaraitaki me vukea na nomu matavuvale me ra dau vosa vinaka. Me ivakaraitaki, e rawa ni dou vakawaqara vata na buka ka veivosakitaka na sala e rawa ni vakavuna kina e dua na leqa levu e dua na vosa ca lailai (raica na tikina e 5–6). Se o rawa ni vakarautaka e dua na ka wiwi se gaga ena dua na ka e dau vakayagataki kina na kakana kamikamica—me vaka na wai ni moli ena tavaya ni oni. Oqo e rawa ni vakavuna na veitalanoataki ni kena qarauni na noda vosa me kamica ka veilaveti (raica na tikina e 9–14).

Jemesa 4:5–8.Na cava na vuna meda “toro voleka yani vua na Kalou” (Jemesa 4:8) ena gauna eda sotava kina na veitemaki?

Jemesa 5:14–16.E vakavuvulitaka o Peresitedi Dallin H. Oaks ni “itubutubu e dodonu me vakayaloqaqataka vakalevu cake na veivakalougatataki ni matabete ena matavuvale” (“Na Kaukauwa ni Matabete,” Liaona, Me 2018, 67). Na wiliki beka ni Jemesa 5:14–16 kei na wasei ni veika e sotavi me baleta na ciqomi ni veivakalougatataki ni matabete ena rawa ni vakayaloqaqataki ira na lewe ni matavuvale me ra kerea e dua na veivakalougatataki ni ra tauvimate se gadreva na kaukauwa vakayalo.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Serenilotu vakaturi: “Na Cakavinaka,” Serenilotu, naba. 131.

Vakatorocaketaki ni Vuli Yadudua

Cakacakataka na ka o sa vulica. Ni o vuli tiko, vakarorogo ki na veivakauqeti ni Yalo me baleta na ivakarau o rawa ni vakayagataka kina na ka o sa vulica voli ki na nomu bula. Yalataka mo muria na veivakauqeti oqo ka bulataka sara vakaoti na kosipeli. (Raica na Veivakavulici ena iVakarau ni iVakabula, 35.)

E wilika tiko na iVolatabu o Josefa Simici

Na ivakasala nei Jemesa me da “kerea vua na Kalou” (Jemesa 1:5) a vakauqeti Josefa Simici me vakasaqara na vuku mai vua na Kalou. iTaba mai vei Christina Smith.