e vuli ivolanikalou tiko e dua na marama

Vakasama Eso me Vakatorocaketaka na Nomu Vuli iVolanikalou Vakai-Iko

Oqo eso na sala rawarawa me vakarabailevutaka na nomu vulica na vosa ni Kalou ena ivolanikalou.

Vakasaqara na Dina baleti Jisu Karisito

E vakavulica vei keda na ivolanikalou ni ka kecega sa vakadinadinataki Karisito (raica na 2 Nifai 11:4; Mosese 6:63), qai raica mo vola se makataka na veitikina e vakavulica na veika e baleta na iVakabula kei na sala mo muri Koya kina.

Vakaraica na Veivosa kei na Malanivosa e Veivakauqeti

O na raica kina ni so na vosa kei na malanivosa ena ivolanikalou ena uqeti iko, e vaka ni ra a volai me baleti iko sara ga. Era na rairai ganiti iko sara ga mera uqeti ka cokonaki iko. Raica mo toqai ira ena nomu ivolanikalou se volai ira ena nomu ivola ni veisiga.

Vakasaqara na Dina ni Kosipeli

Eso na gauna na dina vakosipeli (dau vakatokai me vunau se vakavuvuli) sa volai vakadodonu, ka so na gauna era vakaibalebaletaki ena dua na ivakaraitaki se italanoa. Tarogi iko mada, “Na dina tawamudu cava so esa vakatavulici ena veitikina oqo?”

Vakarorogo ki na Yalotabu

Yadrava matua na nomu vakasama kei na veika o vakila, ke sega mada ga ni veisotari ki na veika o wilika tiko. Na veivakanananu oqori sa rawa ni ka saraga e vinakata vei iko na Tamada Vakalomalagi mo vulica.

Vakatauvatataka na iVolanikalou ki na Nomu Bula

Raica na sala e vakaibalebale kina ki na nomu bula na italanoa kei na ivakavuvuli o wilika tiko. Me vakataka, nomu rawa ni tarogi iko, “Na cava so au sotava esa tautauvata kei na ka au wilika tiko?” se “E rawa vakacava meu muria na ivakaraitaki ni tamata oqo ena ivolanikalou?”

Taroga na Taro Eso ni O Vuli Tiko

Ni o vulica tiko na ivolanikalou, ena votu mai nomu vakasama na taro eso. Na veitaro oqo e rawa ni semati ki na ka o wilika tiko se ki na nomu bula raraba. Vakasamataka vakatitobu na veitaro oqo ka vakaraica na isaunitaro ni o tomana tiko na vuli ivolanikalou.

e vuli ivolanikalou tiko o cauravou

Vakayagataka na Veivuke ni Vuli iVolanikalou

Me vakaikuritaki na raiyawa eso ena veitikina o sa wilika, vakayagataka na ivakamacala e ra, na iDusidusi Vakaiulutaga, the iVolavosa ni iVolatabu, na iDusidusi ki na iVolanikalou (scriptures.ChurchofJesusChrist.org), kei na veivuke tale eso ni vuli.

Mo Raica na Lewe ni iVolanikalou

Sa rawa mo raica eso na vakasama titobu me baleta na ivolanikalou kevaka o vakasamataka na kena ituvatuva—na ituvaki se ituvatuva ni veika ena ivolanikalou. Me vakataka, na kilai ni tuvaki kei na nodra vakabauta na tamata e vosa kina e dua na parofita ena rawa ni vukei iko mo kila vakavinaka na inaki ni nona vosa.

Vola na Nomu Vakasama kei na Veika o Vakila

E vuqa na sala o rawa ni vola kina na veika e votu mai vei iko ena nomu vuli tiko. Me vakataka, nomu rawa ni makataka e dua na vosa se malanivosa e vakaibalebale ka vola na nomu nanuma ena nomu ivolanikalou. Sa rawa talega ni o maroroya e dua na ivolaniveisiga ni raititobu, veika o vakila, kei na vakanananu eso o ciqoma.

Vulica na Nodra Vosa na Parofita kei na iApositolo ni Gauna Oqo

Wilika na veika era sa vakatavulica na parofita kei na apositolo ni gauna oqo me baleta na ivakavuvuli o kunea ena ivolanikalou (me vakataka, mo raica na conference.ChurchofJesusChrist.org kei na Mekasini ni Lotu).

Wasea na Raititobu Eso

Na veitalanoataki ni raititobu mai na nomu vuli yadua e sega walega ni sala vinaka mo vakatavulici ira kina na tamata, ia e vukea talega me vaqaqacotaka na nomu kila vakamatata na veika o sa wilika.

Bulataka na Veika O Vulica

Na vulici ni ivolanikalou me kua walega ni vakauqeti keda ia e dodonu talega me muataki keda meda veisautaka na ivakarau ni noda bula. Vakarogoca na veika e vakauqeti iko kina na Yalo mo cakava ni o wiliwili tiko, ka qai vakadeitaka mo cakacaka ena veivakauqeti oqori.

E kaya o Elder David A. Bednar: “Meda kakua ni namaka na Lotu me vaka e dua na isoqosoqo mena vakavulica se tukuna vei keda na ka kecega e dodonu meda kila ka cakava meda yaco meda tisaipeli yalodina ka vosota ena yaloqaqa me yacova na ivakataotioti. [raica na Vunau kei na Veiyalayalati 121:29]. Ia, sa noda dui lesilesi ga meda vulica na ka e dodonu meda vulica, ka bula ni da kila meda na bula kina, ka yaco meda vakataka na tamata sa gadreva na iVakavuvuli meda na vakataka. Ia na noda itikotiko sa usutu ni vanua ni vuli, bula, kei na ituvaki meda na vakataka” (“Vakarautaki me Rawati na Veika Kece e Ganiti,” Liaona, Me 2019, 102).