vuli ivolanikalou tiko o tina kei gone

Vakasama Eso me Vakatorocaketaka na Nomudou Vuli iVolanikalou Vakamatavuvale

Na vuli ivolanikalou vakavuvale e veigauna sa dua na sala kaukauwa me vukea nomu vuvale me vakila na veivakauqeti ni Yalo Tabu ka vulica na kosipeli. Na levu se balavu ni ka dou wilika vakamatavuvale e sega soti ni bibi mai na nomu sasaga me vakayacori tikoga. Ni o cakava na vuli ivolanikalou me tiki bibi ni bula ni nomu matavuvale, o na vukea mera toro voleka yani na lewe ni nomu vuvale vei Tamada Vakalomalagi kei Jisu Karisito ka taracake na nodra ivakadinadina e yavutaki ena vosa ni Kalou. Sa rawa mo ni veivosakitaka vata na veitaro oqo:

• E rawa vakacava ni ra veivakayaloqaqataki vakai ira na lewe ni nomu matavuvale me ra vulica yadudua na ivolanikalou?

• Na cava e rawa ni ratou cakava na nomu lewe ni matavuvale me ra wasea na veika era sa vulica tiko?

• E rawa vakacava ni o vakabibitaka na ivakavuvuli o vulica tiko ena Veiyalayalati Vou ena gauna ni veivakavulici ena veisiga?

Nanuma tiko ni vale sa vanua vinaka duadua me caka kina na vulici ni kosipeli. E rawa ni o vulica ka vakatavulica na kosipeli e vale ena sala e sega ni na rawa ena kalasi ni Lotu. Mo dau buli ka vou ni o vakasamataka eso na sala mo vukea na nomu vuvale me ra vuli mai na ivolanikalou. Raica eso na vakasama oqo mo vakavinakataka na vuli ivolanikalou ni nomu vuvale.

era lagasere vata na matavuvale kei na iliuliu ni Lotu ena dua na itikotiko

Vakayagataka na iVakatagi

Lagata na sere e dau vaqaqacotaka na ivakavuvuli e vakatavulici ena ivolanikalou. E dau vakaturi ena ituvatuva e veimacawa yadua e dua na serenilotu se nodra sere na lalai. Sa rawa mo taroga na lewe ni vuvale na taro me baleta na vosa se malanivosa eso ena qaqa ni sere. Me ikuri ni lagasere, e rawa ni ra matanataka na nomu vuvale na qaqanisere se vakarogoca na sere me vakatagi malua tu ni ra cakava tale tiko eso na itaviqaravi. Me baleta na vakasama tale eso, raica na “Okati na Sere Tabu ena Nomu Vulica na Kosipeli” ena ivurevure oqo.

Wasea na iVolanikalou e Vakaibalebale

Solia na gauna vei ira na lewe ni vuvale me ra wasea eso na tikini volanikalou era kunea ni vakaibalebale ena gauna ni nodra vuli yadua.

Vakayagataka ga na Nomu Vosa

Sureti ira na lewe ni vuvale me ra vakalekalekataka ena nodra vosa na veika era vulica mai na ivolanikalou.

Bulataka na iVolanikalou ena Nomu Bula

Ni o wilika oti na tikini ivolanikalou, kerei ira na lewe ni vuvale me ra wasea na sala ena tikina oya e veiganiti ki na nodra bula.

Taroga e dua na Taro

Sureti ira na lewe ni vuvale me ra taroga na taro vakosipeli, ka qai taura na gauna me ra vakasaqara na veitikina ena rawa ni sauma na taro.

Vakaraitaka e dua na iVolanikalou

Digia e dua na tikina e vakaibalebale, ka qai vakaraitaka tu ena vanua era na raica vakawasoma na lewe ni vuvale. Sureti ira eso na lewe ni vuvale me ra vakaitavi kece ena kena digitaki e dua na ivolanikalou me vakaraitaki.

era vuli ivolanikalou tiko na veitinani

Vola na Veitiki ni iVolanikalou

Vakamatavuvale, digia e vica na tikina o na vinakata me veitalanoataki ena macawa ka tarava.

Cavuqaqataka na iVolanikalou

Digia e dua na tiki ni ivolanikalou e vakaibalebale ki na nomu vuvale, ka sureti ira na lewe ni vuvale me ra cavuqaqataka ni ra cavuta vakavica vata ena veisiga se qitora e dua na qito ni cavuqaqa.

Wasea na Lesoni iVakaraitaki

Vakasaqara e so na iyaya e sema ki na ivakavuvuli ni kosipeli ena tiki ni ivolanikalou dou sa wilika tiko vakamatavuvale. Sureta na lewe ni vuvale me ra veitalanoataka na sala e sema kina na iyaya yadua ki na ivakavuvuli ena ivolanikalou.

Digia e dua nai Ulutaga

Me ra veitarataravi na leweni vuvale ena digitaki ni ulutaga ena vulica vata na matavuvale. Vakayagataka na iDusidusi ki na iVolanikalou (scriptures.ChurchofJesusChrist.org) mo raica na tiki ni volanikalou eso me baleta na ulutaga.

Droinitaka e dua na iYaloyalo

Wilika vata vakamatavuvale eso na tikina, ka solia na gauna vei ira na lewe ni vuvale me ra droinitaka e dua na ka e sema ki na veika sa wiliki. Taura na gauna mo dou veitalanotaka na nomudou dui droini.

Vakatasuasuataka e Dua na iTalanoa

Ni wiliki oti e dua na italanoa, sureti ira na lewe ni vuvale me ra matanataka. Ni oti oya, veitalanoataka na sala sa sema kina na italanoa kina veika dou sa sotava yadua tiko se vakamatavuvale.

E kaya o Peresitedi Russell M. Nelson: “Au yalataka ni ko cakacaka vagumatua mo moica vou na nomuni itikotiko me vale ni vuli kosipeli, ena yaco nomuni Siga ni Vakacecegu me ka rekitaki vakaidina. Era na maqusa na luvemuni mera vulica ka bulataka na ivakavuvuli ni iVakabula, ka yaco na veiuqeti nei vunimeca ena nomuni bula kei na nomuni itikotiko me malumalumu yani. Na veisau ena nomu matavuvale ena vakalevutaki ka veitokoni” (“Mo iVakaraitaki Uasivi ni Yalododonu Edaidai,” Liaona, Nove. 2018, 113).