Vakayagataki ni Lako Mai, Mo Muri Au—Baleta na Tamata Yadua kei na Matavuvale

E Baleti Cei Na iVurevure Oqo?

Na ivurevure oqo e baleta na tamata yadua kei na matavuvale kece ena Lotu. E sa caka mai me vukei iko mo vulica na kosipeli—ke o vulica duadua se vata kei iratou na nomu matavuvale. Kevaka o sega ni se vulica wasoma na kosipeli ena gauna sa oti, na ivurevure oqo ena vukei iko mo tekivutaka yani. Kevaka e sa dua tiko na nomu ivakarau vinaka ni vulica na kosipeli, na ivurevure oqo ena rawa ni vukei iko me ivakaibalebale vakalevu cake na veika o sotava.

e rau vuli ivolanikalou tiko na veiwatini

Meu na Vakayagataka Vakacava na iVurevure Oqo?

Vakayagataka na ivurevure oqo ena sala cava ga o nanuma me vukei iko kina. O na kunea ni veivuke vakalevu me idusidusi se ivukevuke ni nomu vulica duadua se vakavuvale. E rawa talega ni o vakayagataka ena lotu vakamatavuvale. Na idusidusi oqo e vakavotuya mai na ivakavuvuli bibi e kune ena Veiyalayalati Vou, vakatura na vakasama eso ni itaviqaravi ni tamata yadua kei na vuvale, ka vakarautaka na vanua me volai kina na nomu vakasama eso.

Na Lako Mai, Mo Muri Au—Baleta na Tamata Yadua kei na Matavuvale e sega ni nakiti me sosomitaka se veisivisivi kei na veika vinaka o sa cakava rawa tiko ni ko vulica na kosipeli. Muria na veidusimaki ni Yalo mo kila kina na iwalewale ni nomu vulica na vosa ni Kalou.

E Veisemati Vakacava na iVurevure Oqo ki na Veika e Yaco e Valenilotu?

Na idusidusi ena ivurevure oqo era sa tauyavutaki ena ituvatuva ni wiliwili ena veimacawa. Na Lako Mai, Mo Muri Au na ivurevure ni Lalai, me baleta na Matawilivola ni Sigatabu, kei na Veikuoramu ni Matabete i Eroni kei na kalasi ni Goneyalewa e vakamuria na ituvatuva vata ga. Me tokona na nomu sasaga ni vulica ka bulataka na kosipeli e vale, ena solia vei iko o nomu qasenivuli e valenilotu na gauna mo wasea na veika o sotava, vakanananu, kei na taro me baleta na ivolanikalou o sa vulica tiko e vale.

Baleta ni vakavulici ga vakarua ena dua na vula na Matawilivola ni Sigatabu, sa rawa ni ra digitaka na qasenivuli ni Matawilivola ni Sigatabu me ra lade lesoni se cokota vata na ituvatuva eso me veisotari tiko kei na ituvatuva vakamacawa. Ena vaka talega oqo (vei rau na Matawilivola ni Siga Tabu kei na Lalai) ena macawa e sega ni yaco kina na soqoni ni Lotu me baleta na koniferedi ni iteki se eso tale beka na vuna. Ena veimacawa oqo o sa sureti mo tomana tikoga na nomu vulica na Veiyalayalati Makawa e vale.

Ena Gadrevi Beka Meu Vakamuria na iTuvatuva?

Ena vukei iko na ituvatuva oqo mo otiva na nomu wilika na Veiyalayalati Vou ni bera ni cava na yabaki. Me kena ikuri, na vakamuri ni nodra ituvatuva vataga eso tale sa rawa ni muataki ki na veika e sotavi e vakaibalebale cake e vale, ena Lotu, kei na veivanua kecega. Ia mo kakua ni vauci ena ituvatuva oqo se namaki mo wilika na veitikina yadua; na ituvatuva sa dua ga na idusidusi me vukei iko mo vagaunataki iko. Na ka e bibi ga ni o sa vulica tiko vakai iko na kosipeli vakakina vata kei na nomu matavuvale.