Jisu Karisito

11–17 ni Sepiteba

2 Korinica 1–7

“Mo Dou Veivinakati kei na Kalou”

Ni o vulica na ivola i Paula vei ira na kai Koronica, vola eso nai vakavuvuli ni kosipeli o kunea ka vakasamataka vakatitobu na sala cava o rawa ni bulataka kina ena nomu bula.

Vola na Veika o Vakauqeti Kina

Ena so na gauna, nida iliuliu ni Lotu, ena gadrevi kina meda kaya eso na ka dredre. E dina na veika oqo ena gauna i Paula me vaka ga ni dina talega nikua. E a dua na ivola e liu nei Paula vei ira na Yalosavasava e Korinica a oka talega kina na veicudruvi kei na vakamosi yalo. Ena ivola ka qai yaco me 2 Korinica, a tovolea me vakamacalataka o koya na cava e vakavuna nona vosa kaukauwa: “Sa rarawa vakalevu ka yaluma na lomaqu ni’u a vola vei kemudou, a sa vakawai vakalevu na mataqu; sa segai mo dou rarawa kina, ia mo dou kila ga ni sa levu sara na noqu loloma vei kemudou” (2 Korinica 2:4). Ni o sa ciqoma tiko na veivakadodonutaki mai vua e dua nai liuliu, ena veivuke mo kila ni sa vakauqeti mai na loloma Va-Karisito. Ena gauna e sega ni yaco tiko kina, kevaka eda sa rawa ni raici ira na tani ena loloma vakai Paula, ena rawarawa na noda sauma yani e dua na veivakayalolailalitaki ena sala e veiganiti. Me vaka a vakasala kina o Elder Jeffrey R. Holland, “Mo ni daulomana na malumalumu vakatamata—na nomu vakai-iko vakakina o ira na tamata era veiqaravi vata kei iko ena Lotu oqo ena nodra veiliutaki na tagane kei na yalewa tawasaumi vakayago. Vakavo ga vei koya na Luvena tawacala e duabauga ka Vakatubura, sai ira ga na tamata ivalavala ca ena cakacaka kina na Kalou mai na ivakatekivu ni gauna” (“Kemuni na Turaga, Au sa Vakabauta,” Liaona, Me 2013, 94).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

2 Korinica 1:3–7; 4:6–10, 17–18; 7:4–7

Na noqu vakatovolei e rawa ni veivakalougatataki.

Na levu ni nona vakatovolei o Paula ena gauna ni nona bula, e sega ni veivakakidacalataki ni a vola vakalevu o koya me baleta na inaki kei na veivakalougatataki ni veivakatovolei. Ni o wilika na 2 Korinica 1:3–7; 4:6–10, 17–18; 7:4–7, vakasamataka na sala eso e rawa ni veivakalougatataki kina na nomu vakatovolei. Me ivakaraitaki, e rawa ni o vakasamataka vakatitobu na sala sa “vakacegui [ iko] kina ena [nomu] rarawa kecega” na Kalou kei na nomu na rawa ni “vakacegui ira rawa era sa rarawa” (2 Korinica 1:4). Se e rawa ni o vakanamata ki na rarama i Jisu Karisito “me cila mai,” e lomamudou ena gauna sara madaga ni “buku na druadrua” kei na “lomaocaoca” (2 Korinica 4:6, 8).

Raica talega na Mosaia 24:13–17; Henry B. Eyring, “Vakatovolei, Vakadinadinataki, ka Vakavinakataki,” Liaona, Nove. 2020, 96–99.

2 Korinica 2:5–11

Na veivosoti e dua na veivakalougatataki au rawa ni solia ka ciqoma.

E sega soti ni levu na ka eda kila me baleta na tamata e tukuna o Paula ena 2 Korinica 2:5–11—eda kila ga ni a valavala ca (raica na tikina e 5–6) ka vinakata o Paula me ra vosoti koya o ira na Yalosavasava (raica na tikina e 7–8). Na cava eda dau sega ni rawa ni “vakadinadinataka kina na [noda] loloma” vua e dua e sa caka ca vei keda? (tikina e 8). E veivakamavoataki vakacava vei ira eso vakakina vei keda ena noda bureitaka na veivosoti? (raica na tikina e 7, 10–11). E soli vakacava vei “Setani … me rawai keda” nida bureitaka na noda veivosoti? (tikina e 11).

Raica talega na Vunau kei na Veiyalayalati 64:9–11.

2 Korinica 5:14-21

Ena Veisorovaki nei Jisu Karisito, ena rawa meu veivinakati kei na Kalou.

Me vaka na tamata kecega, e kila vinaka tu o Paula na cava ni dua “sa qai buli vou.” (2 Korinica 5:17). A veisau mai na dauvakacacani ira na Lotu Va-Karisito ki na dua na qaqa ka dau tutaka na Karisito. Ni o wilika na 2 ni Korinica 5:14–21, vakasamataka na taro vakaoqo: Na cava na ibalebale me ia na veivinakati? Na cava na kena ibalebale mo veivinakati kei na Kalou? Vakasamataka vakatitobu na cava beka e tawasei iko tiko mai vua na Kalou. Na cava e gadrevi mo cakava me rawa ni taucoko kina nomu veivinakati kei Koya? Ena rawata vakacava oqo na iVakabula?

Sa rawa talega mo vakasamataka vakatitobu na ibalebale me “italatala i Karisito” ka “vunautaka na veivinakati” (tikina e 18, 20). Na rarama cava o sa rawata mai na itukutuku nei Elder Jeffrey R. Holland “Na Veiqaravi ni Veivakaduavatataki”? (Liaona, Nove. 2018, 77–79).

Raica talega na 2 Nifai 10:23–25.

2 Korinica 7:8–11

Na rarawa va-Kalou e veimuataki ki na veivutuni.

Eda sega ni dau vakasamataka na rarawa me ka vinaka, ia e tukuna o Paula me baleta na “rarawa sa vaka na loma ni Kalou” (2 Korinica 7:10) e tiki bibi ni veivutuni. Vakasamataka na veika o sa vulica baleta na rarawa vakalou mai na kena oqo: 2 Korinica 7:8–11; Alama 36:16–21; Momani 2:11–15; kei na itukutuku nei Sister Michelle D. Craig “Tawa Mamau Vakalou” (Liaona, Nove. 2018, 52–55). Ena gauna cava o sa bau vakila kina na rarawa sa vaka na loma ni kalou, kei na cava e sa bau yaco ki na nomu bula?

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

2 Korinica 3:1–3.Esa bau dua ena nomu vuvale e kerea e dua me vola e dua na ivola ni veivakaturi vei ira, me baleta e dua na ivola kerekere ni cakacaka se vuli? Kerei ira me ra veivosakitaka na veika e sotavi oqo. E vakatavulica o Paula ni nodra bula na Yalosavasava e vaka tu na ivola ni veivakaturi ni kosipeli i Karisito mai vei Koya saraga, “sa sega ni volai ena wai ni volavola, sa volai ga ena Yalo ni Kalou bula.” Ni o wilika vata na 2 Korinica 3:1–3 veivosakitaka na sala e tautauvata kina na noda ivakaraitaki me vaka na ivola e rawa ni “kila ka wilika na tamata kecega,” ka vakaraitaka na dina kei na yaga ni kosipeli. Ena rawa ni vola na lewe ni vuvale yadua e dua na “ivola” me vakamacalataka esa ivakaraitaki vinaka vakacava ni tisaipeli i Jisu Karisito e dua tale na lewe ni matavuvale. E rawa ni ra wilika na nodra ivola vei ira na vo ni vuvale ka qai solia ki na lewe ni vuvale e volavola tiko kina. Na cava e bibi kina meda kila vakavinaka ni noda bula e “ivola i Karisito”?

2 Korinica 5:6–7.Na cava na ibalebale ni “lako voli ena vakabauta, ka sega ga ena raica”? Na cava eda sa cakava tiko meda vakaraitaka ni da vakabauta tiko na iVakabula dina ga eda sega ni rawa ni raici Koya?

2 Korinica 5:17.E rawa beka ni vakasamataka se kunea na nomu matavuvale e dua na ivakaraitaki mai na veika buli ni lako curuma e dua na iwalewale ni veisau vakaitamera ka qai yaco me dua na ibulubuli vou? (raica na iyaloyalo e salavata kei na itinitini ni ituvatuva oqo). E rawa vakacava ki na kosipeli i Jisu Karisito me veisautaki keda?

2 Korinica 6:1–10.Me vaka ena 2 Korinica 6:1–10, na cava na kena ibalebale meda “italatala ni Kalou”? (tikina e 4). Na ilavaki cava soti e tu vua e dua na italatala ni Kalou?

2 Korinica 6:14–18.Ena rawa vakacava meda vakamuria nai vakasala nei Paula, “Mo dou qai lako tani mai vei ira na [tawayalododonu], ia dou tawasei tu,” ena gauna vata oya meda lomani ira tikoga na tiko wavoliti keda?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “Ni Vukei Au Mai Noqu Kalou,” iVolanisere ni Gonelalai, 52.

Vakatorocaketaki ni Noda Veivakavulici

Wasea na lesoni ivakaraitaki. Eso nai vakavuvuli vakosipeli, me vaka na Veisorovaki, e rawa ni dredre na kena kilai. Sa rawa mo vakayagataka na iyaloyalo kei na yaya eso me vukea nomu vuvale ena nodra kila vakavinaka na ivakavuvuli o sa kunea ena ivolanikalou.

banuve, dagona, kei na bebe

Ni da sa saumaki mai ki na kosipeli i Karisito, na noda veiveisau esa rui bibi sara ka vakamacalataka o Paula ni da “sa tamata buli vou” (2 Korinica 5:17).